Read kirikeni 1 Timoti 6 Bible Online

1 Timoti 6 - kirikeni bible

1 Timoti 6

¹Ye omoniapụ ma ini nyanapụ ma osi yemamgba ḅụ, mịẹse gbọrịḅọ sọnị Tamụnọ Ḅe ẹrẹ mị ḅụ wa ḍiearịye mị ḅụ na siye ḍuko ẹka ḅara.

²Ye ḅereniapụma inia omoniapụ ma ḍikisimama anịatịḅị ini inia mịnapụ-ẹ. Anịnakaraka ini iḅiọkụ se ini na anga gbẹịnmẹ, anịatịḅị inia fịrị ḅụ sọye fịarị apụma, anị ḅereniapụ na ḅẹlẹmasa apụ na-ẹ. Mayema ḍie se pịkị àrị se tetema pịrị.

³Jịn kịrịaye ḍieḅọ goyegoye se wa Nyanaḅọ Jizọs Kraịst Ḅe kọkọma ọkwẹịnma na kuraka pịkị mịna Tamụnọ ḅẹrẹ nemi yeḍie ḅara na kuraka ḅọ ḅe

⁴iniḅọ opuamịẹye na wọlọma waraḅẹ, iniḅọ pịkị nemiye ofori-ẹ, ò kuraka ḅara se ye ịgbanị pịkị kamụsọ se ọkwẹịn ḍọkịmẹ, mịn mị dekiḅoḅoye anị ḅụnwọnwọ, kamụsọ, wọlọ, kuraka ḅara se tọrụse-yekịẹnma,

⁵pịkị sịkịmamgba ḅerijine-a si kuḅie nyana, pịkị kọkọmaye mị ḅarị inia ḅie ofori-ẹ. Ini nwọ chịnmẹ na ini tẹkẹarịye ḅụ anị ini ḅọrọ se alakọnḅịaye-ẹ.

⁶Iḅimẹ, Tamụnọ nemi mị anị tomoniḅọ mịẹmịẹmẹ iniḅọ iḅi ḅara se pẹrẹ, nemikase iniḅọ nyanaye iniḅọ ḅụ na deinkoromẹ nwọ ḅẹḅẹ.

⁷Cheye wa ḅọrọ nwọ seni tomonikiri mị ḅo? Gbọrịye sọnị ofori-ẹ! Cheye wa ineda nwọ ọkị tomonikiri mị ḅie pakaso ḅe? Gbọrịye sọnị ofori-ẹ!

⁸Anịẹrẹchị, wa nemikase fịye na chụaḅịaye na nwọ nyanamẹ ḅẹḅẹ, anị ómine na deinkoro gbẹịnmẹ.

⁹Ọkụma alakọn ḍọkịarịapụ ma ini mun telima ḅie sọ se ḍẹịn ḅie koro, tọn-a oḅoriaye na ye se nweni lamalamaye na ḅie ḅụ sọsọmẹ, anị tomoni fọnọ mun fa na fị na ḅie chuchumẹ.

¹⁰Anịatịḅị igbiki ḅẹlẹma mị anị tọrụkịrịkịrị si-a mịẹmịẹyema ḅe chuku mị-ẹ. Dapụ anị nyanaḅịa ẹrẹchị kuḅie chịẹ-chịẹ-chịẹ so ọkụma, ini ḅereni mị ateli nwọ nwẹngị gbarị se tọn-a kururu ḅụ inia kuḅie kansam.

¹¹Ọkụma ị́rị́, Tamụnọ tomoniḅọ, mayema ḍikiḅụtọn. Kụrọma karakaraye mịẹ na, Tamụnọ nemi na, ḅereni na ḅẹlẹma na, inema nyana na, pịkị dein tẹmẹ nyana na nwọ ḍọkị.

¹²Ị́ya ịnyọ laḅara nwọse ị́ya ḅereni mị ḅe mangị kọn, se simegbaso ḍumo nwọ nyana ị́ ḅụ pịrị; anịatịḅị mị ḍumo mị gose anị Tamụnọ Ḅe ị́ chịnye-ẹ, tọn-a onyechịẹapụ tọrọkọ ị́ya ḅereni mị ị́ nwọ ḍukopakụma sịkị ḅụ.

¹³Tamụnọ Ḅe tọrọkọ ḅụ, ḍumo se yemamgba pịrị ḅọ ḅe pịkị Kraịst Jizọs Ḅe anị Pọntịọs Paịlet ḅe tọrọkọ kụrọma oria ḅereni mị ḍukopakụma ḅọ ḅe tọrọkọ na ḅụ, à mịn mị nwọ tọn ị́ pịrịmẹ

¹⁴ini tọn ị́ pịrịye ma mịẹ, se kuḅie se ḅụgbana gbẹịnḅọ ḅara se àrị koko ọkịmun wa Nyanaḅọ Jizọs Kraịst Ḅe ḅoḅịa Ene mị la.

¹⁵Oria ḅo sịkị mị Tamụnọ Ḅe mị anị tọnḅịaye-ẹ, ḅẹlẹmasa pịkị ngẹrị Ḅẹrẹtọn ḅọ ḅe, amanyanapụ mamgba ḅụ Amanyanaḅọ ḅe, pịkị nweni nyanapụ mamgba Nyanaḅọ ḅe.

¹⁶Ori kẹngẹ mị fịfịkaḅọ ḅe-ẹ gbọrịḅọ sọnị ineda kpekima ẹka enekuḅu ḅie anga ḅọ ḅe. Ori ọrịsa ḅọ ma ofori-ẹ, pịkịna ineda ori ọrịḅịa ḅọ ofori-ẹ. Ye osi na simegbaso ḅẹrẹtọn na sime ọ̀ pịrị! Amẹn.

¹⁷Ḍuko mị ḍumo mị ḅe alakọn apụma pịrị na ini opuayemịẹ ma, pịkị tọrụ se tịḅịofori ngọkọn ḍikima, ọkụma tọrụ se Tamụnọ Ḅe ḍiki, yegoyegoye nwọse wa pịrị se wa se ḅụtimarịḅọ Ḅe.

¹⁸Ḍuko ini pịrị ini iḅi mị-ẹ, iḅi-a fịrịnwẹngị ala nwọ kọn, ini ịmụkụ ḍumo kọn ma, ọkụma ḅụkarakarama iniaye nwọse jịn apụ na ḍiafị.

¹⁹Mịn ḅara mị ḅụ ini tọrọkọju iḅi ngọ koḅirima inia ḅụ ma pịrịḅịa, mị anị tọrọkọju kụrọ chukusẹkẹ ḍụparị sọ ini pịrịḅịaye-ẹ. Anịsịkị ini ineda kọkọma ḍumo mị nwọ nyana inia ḅụ pịrịḅịa.

²⁰Timoti, ini se ị́ ḅarachụa ḍikiḍiki nwọ ḅẹye mị iḅiọkụ anị kpa, Tamụnọ mịẹmịẹye ḅụ ofori ọkwẹịn na nemi ofori ḅẹrẹjinea na nwọ ḍikiḅụtọn, anị dapụ irima ḅara ḅụ “Nemi” se chịnye mị.

²¹Anịatịḅị dapụ ọkịmẹ na ini yenemimẹ anị ḅụ ḅọrọ ḅereni mị ḅụ achọ irisam. Tamụnọ Ḅe ḍikiḅụgerere mị ómine mgba na sime.