Read kirikeni 2 Timoti 1 Bible Online

2 Timoti 1 - kirikeni bible

2 Timoti 1

¹Mịn fịrịfịrịmaḍiri mị Pọl, anị Tamụnọ Ḅe ḅi ḅara ḅụ, Kraịst Jizọs okunwẹngịḅọ ḅe ḅara anị ḅomẹ, mun Nyanaḅọ Ḅe ḅereni oria tomonima pịrị ḍumo mị ḅe ḅẹrẹ ḍukopakụma ini nwọse fịrịma ḅọ ḅe, anị Kraịst Jizọs Ḅe na gbọrịye mịẹ ḅụ wa nyanaye mị—

²À se Timoti, ị̀ ḅụ yela tọkụ ḅe fịrịmamẹ: Ye Tamụnọ Ḍaḅọ Ḅe na Kraịst Jizọs wa Nyanaḅọ Ḅe na ḍikiḅụgerere na, ḍikitịḅịfoin na pịkị deinma na se ị́ pịrị.

³Fịafịasa si na iḅi na nemi kuḅie à nwọse mịẹḅaka se Tamụnọ Ḅe ḅẹmẹ, à fịrịnwẹngị pịrịarị ḅọ ḅe anị ị̀ya ḅieju-aḍapụma mịẹ ḅara mị. À mịẹḅaka se Tamụnọ Ḅe ḅẹmẹ àrị ị̀ya tẹkẹ ḅie ị́ ḅiekoromarị sịkị ḍin na enekaka na ḅụ.

⁴Ị́ sara owu mengima à nwọse ḅiekoromamẹ, à pịkị opuma ị́ ọrịḅịa ẹrẹchị ḅimẹ, mịẹse àrị opu ḅieḅẹlẹ nyanaḅịa ḅara.

⁵Àrị ị́ nyana epele ofori ḅereni mị nwọse ḅiekoromamẹ, ị́ya opu nyengiḅọ, Lọịs ma na ị́ nyengi Yunaịs ma na nyana ḅereni ḅara mị, à ḅerenimẹ na ị́rị́ sọnị anị nyanamẹ.

⁶Anịẹrẹchị, à se ị́ ḅiekoromaḅẹ na à ḅara se ị́ tịḅị ọgọnọ gbana sịkị Tamụnọ Ḅe se ị́ pịrị ḍiepịrịye mị ḅereni ma se anị fị.

⁷Anịatịḅị Tamụnọ Ḅe se wa pịrị Tẹmẹ Ḅe kụrọ na, ḅẹlẹma na, ḅụọlọ na nwọse mịna ḅie chu ḅeinmamẹ.

⁸Anịọkụma, onyechịẹ wa Nyanaḅọ Ḅe pịrị mị anị ḅụgerere se ị́ pịrị ma; pịkị ị̀rị̀ Kraịst Ḅe tịḅị gose ikoli sọ ḅọ ḅe gose ḅụgerere ma. Anịnakaraka, ị́rị́ sọnị Iḅi Ḅẹrẹ mị gose tọrụsiọrị, Tamụnọ Ḅe ị́ se anị mịẹḅịa ḅe ịnyọ nwọse ị́ pịrị warasịkị.

⁹Ómine ḍụaḅọrọma pịkị wa chịn ọkị se oria tomoni nwọ mịẹsam, wa nwẹngị sa fịrị gosekẹ, ọkụma ọ̀ tọnkoroma sa ḅara na oria ḍikiḅụgerere na gose-ẹ. Sịkị mị ma laka simeogbo ọ̀ Kraịst Jizọs Ḅe ḅụ ḅọrọ mị ḍikiḅụgerere mị nyana wa pịrịmẹ,

¹⁰ọkụma mịọkụ, mịna Ḍụaḅọrọmaḅọ Kraịst Jizọs Ḅe ḅo mị ḅụ, ini anị mịẹḅelema wa pịrịsam. Ọ̀ mịẹse fị kụrọ mị kulumasam, se Iḅi Ḅẹrẹ mị ḅụ ḅọrọ fịẹka ḍumo mị nwọ mịẹ ḅelemasam.

¹¹Tamụnọ Ḅe ị̀ tọnpakụmaḅosam okunwẹngịḅọ na yeḍieḅọ na ḅara ḅụ Iḅi Ḅẹrẹ mị ḍukopakụmaḅịa ẹrẹchị.

¹²Se mịn mị gose à ma tọrụsiọrị ma nwọ ọrịaḅẹ. Ọkụma ị̀ kuḅie pa kụrọ waraḅẹ, anịatịḅị à kuḅie se ḅụgbana ḅọ ḅe àrị ò nemimẹ, à pịkị ḅerenimẹ na ori ineda ò se ị̀ ḅarachụaye mị se deinma wẹrị mun anị Ene nwọ laḅịa.

¹³À se ị́ ḍie kọkọma ọkwẹịnma kapụma àrị ọlọ chịẹma ị́ ḍiki nwẹngịḅịaye ḅara ḅụ, se mine ḅe Kraịst Jizọs Ḅe na gbọrịye mịẹ ḅụ wa nyana ḅereni mị na ḅẹlẹma mị na ḅụ sime.

¹⁴Mịna ḅie anga Fịafịa Tẹmẹ Ḅe kụrọ ḅụ, ini se ị́ ḅarachụa iḅiaye ma kapụma nwọ ọlọ chịẹma.

¹⁵Ị́ nemimẹ na Esia pẹkẹrẹ ḅụ sime apụ mamgba ini ị̀ ḅụ pu sikimasam, pịkị Faịjilọs ḅe na Hamọjinis ḅe na sọnị.

¹⁶Ye Nyanaḅọ Ḅe Onisiforọs furo mị ḍikiḅụgerere, anịatịḅị tọn-a sịkị ọ̀ nwọse ị̀ kuḅie kụrọmamẹ, àrị ikoli ḅie omi-ẹ nwọ ḅẹye mị anị ọ̀ ḅụgereremakẹ.

¹⁷Ọkụma ò ḅo Rom la kirikiri ọ̀ sakị ị̀ ḍọkị nweni-i ò ḅo ị̀ ọrị sịkị lamẹ.

¹⁸Ye Nyanaḅọ Ḅe ḍikitịḅịfoin nyana ọ̀ pịrị anị Ene mị ḅụ! Ẹfịsọsị ḅie ò se ị̀ mịẹ iḅi la-ọkụ ị́ iḅiọkụma nemimẹ.