Read kirikeni 2 Timoti 2 Bible Online

2 Timoti 2 - kirikeni bible

2 Timoti 2

¹Ị́rị́ ị̀ya tọkụ ḅe ọkụma, Kraịst Jizọs Ḅe na gbọrịye mịẹ ḅụ wa nyana ḍikiḅụgerere mị ḅụ ḅọrọ kụrọḅọ sọ-ọ.

²Tọn-a onyechịẹapụ tọrọkọ ḅụ, yeḍie ḅara ḅụ à ḍukopakụma ị́ naasaye ma ọkị; àrị se kuḅie se ḅụgbana gbẹịn apụ ḅarachụa, anị ineda àrị se ye se jịn apụ ḍieḅịa apụma.

³Kraịst Jizọs Ḅe ò kuḅie se ḅụgbana gbẹịn owuniḅọ ḅara ḅụ, ị́rị́ sọnị ị́ lalama tọrụsiọrị mị ḍiaọkị.

⁴Owusọarị owuniḅọ ḅiḅịa ori ọ̀ tịḅịda owuniḅọ ḅe ḅụḅẹlẹḅịaye nwọ mịẹ, anịẹrẹchị ò ḅi ẹkẹ ori ọ̀ ḅụ se owu ḅie ofori apụ ḍumo na wọlọma.

⁵Arụḍụa mangị kọn-arị ḅọ ineda anịa ḍiepịrịye nyanaḅo ẹkẹ, ori anịa olokoma kokoka simeogbo.

⁶Kụrọma fịrịnwẹngị sa ozu ḍipiḅọ ḅe tatarị sokuḅịa fịye ḅụ yeḍia ọkị gbẹịnmẹ.

⁷À ḍukoarịye ma nwọse koroma ḅụ chu, anịatịḅị Nyanaḅọ Ḅe ị́ mịẹse ị́ ineda maye mamgba nwọ kaịnḅoḅịa.

⁸Jizọs Kraịst Ḅe nwọse ḅiekoroma, ini fịḅụsịsẹma ḅọ ḅe, Devid furo ḅọ ḅe à ḍukoarị Iḅi Ḅẹrẹ mị ḅie ini anị ḍie ọkụ mị.

⁹Anịatịḅị àrị Iḅi Ḅẹrẹ mị ḍukoye gose ị̀ tọrụsiọrịmẹ, ini pịkịna ikoli se ị̀ ịkasịmẹ, anị oloko kanḅọ mịẹ ọkụ mị. Ọkụma Tamụnọ ọkwẹịn mị anị ikoli sọkẹ.

¹⁰Mịn mị gose à yegoyegoye nwọ inemamẹ Tamụnọ Ḅe sẹlẹọkịsa tomonima tịḅị gose, mịẹse ini sọnị Kraịst Jizọs Ḅe ḅụ ḅọrọ ḅo ḍụaḅọrọma mị nwọ nyanaḅoḅịa ḅara anị simegbaso boma ọkịḅoḅoye mị.

¹¹Mịn mị kọkọmaye-ẹ: “Wa nemikase ori na fịmẹ ḅẹḅẹ, wa pịkịna ori na ḍumoḅịa.

¹²Wa pa inema ḅụ simemamun-aḅẹ ḅẹḅẹ, wa pịkị ọ̀ ḅụ sọ ḅẹrẹtọnḅịa. Se wa nemikase ò pikimẹ ḅẹḅẹ, ori sọnị ọ̀ wa pikiḅịa.

¹³Mine nemikase kuḅie se ḅụgbana gbẹịnka apụ-ẹ ḅẹḅẹ, ori kuḅie se ḅụgbana gbẹịn ḅọ-ẹ, anịatịḅị ori ineda ọ̀ ḅụ piki ẹkẹ.”

¹⁴Mịn mị se ị́ya tomonima ḅiekoroma, se Tamụnọ Ḅe tọrụkuḅu ḅụ kụrọma inia ḅerijine na ini ọkwẹịn mị gose owusọ ma. Anị iḅiye mịẹ ẹkẹ, ọkụma siye kẹngẹ mị anị se pokiarị apụma mịẹmịẹye-ẹ.

¹⁵Ị́ya ịnyọ laḅara nwọ mịẹ se Tamụnọ Ḅe ḅeinma ị́ ọkị, oria fịrị gose ḅụgerere nyanaka fịrịnwẹngịḅọ ḅara ḅụ, pịkị karakara ḅara nwọse Tamụnọ kọkọma ọkwẹịn mị ḍiearịḅọ ḅara ḅụ.

¹⁶Ị́ ḅụ sikima, Tamụnọ nemi nyanaka pịkị yenemika ḍukoaye ma ḅụ, àrị mịẹarịye anị Tamụnọ ḅụ tomoni de ḅọlọ nyọ ḅụ koroma kẹngẹ-ẹ.

¹⁷Ọkọ sime ḍieye mị ojumịnị mị okopẹịarị ịnọ simeọkụ simemẹ, ọkọ sime ḅara se yeḍie mama apụ anị Haịminịọs ḅe na Filitọs ḅe na-ẹ.

¹⁸Ini kọkọmaye mị ḅụ ḅarasinsam, se da ḅereni apụ nwọ pikirimaḅẹ inia ḅereni ḅụ, nwọ ḅẹ na mịna fịḅụsịsẹ mị kiri ọkị ḅọrọsam nwọ ḅẹye ḅụ.

¹⁹Ọkụma Tamụnọ Ḅe ḍipi sa kụrọ chukusẹkẹ ḍụparị mị ngịsị jike ẹkẹ; se ma ọkwẹịnma anị ọgọnọ gịẹịn waraḅẹ: “Nyanaḅọ Ḅe oria tomonima ori ini nemimẹ” se, “À sime Nyanaḅọ Ḅe pịrịmẹ nwọ ḅẹ ḅo goyegoye kuraka mịẹmịẹye ḅụ ḅụsin.”

²⁰Opu warị ḅie kịrịkịrị ẹfẹrẹ na bọlị na omi-ẹ; goli na seleḅa na ini nwọse daye mịẹmẹ, ísíaye ma chịn na aḅaịn na mị ini se àrị mịẹye-ẹ; daye sime osi nyana fịrịma pịrịmẹ anịsịkị ísíaye ma pịkị sime eneḅeneḅene-a papa fịrịma pịrịmẹ.

²¹Tomoniḅọ nemikase ma siaye ma ḅụ mịnaḅụ mịẹfịafịamamẹ ḅẹḅẹ, ini iniḅọ se sosikima fịrịnwẹngịḅịa, anịatịḅị iniḅọ mịnaḅụ se osiḅụ wẹrị se fịrịnwẹngị gbẹịn ḅọ mịẹ iniḅọ nyanaḅọ ḅe pịrịsam pịkị ḅụ karakarama iḅi fịrị goyegoye nwọ pịrịsam.

²²Asẹmẹnịḅọ pụkọtarị-tarịaye ma ḅụ ḅụtọn, se gagama karakaraye mịẹḅịa ọkụ nwọ ḍọkị; ḅereni na, ḅẹlẹma na, deinma na, se fịafịa kuḅie se wa Nyanaḅọ Ḅe chịn ọ̀ ḅara ḅarachụa ḅiarị apụma ḅụ sọ.

²³Ọkụma oḅorisọ na mịẹyenemika ḅẹrẹjinea ma ḅụ ị́ ḅụ sin, ị́ nemimẹ na kamụ ḅụ mị àrị mun kuluma kulumaye-ẹ.

²⁴Wa Nyanaḅọ Ḅe fịrịnwẹngịḅọ kamụ sọ ẹkẹ. Ori iḅiyemịẹḅara nyana tomoni mamgba nwọ pịrịḅịa, iḅi pịkị ye-inema yeḍieḅọ nwọ sọḅịa.

²⁵Ori ọ̀ ḅụ nemiḅịa ori na tụḅụrụarịapụma ọ̀ nwọ dagbụkụkụmarị sịkị. Sosi Tamụnọ Ḅe achọ se ini pịrị se ini vinpịkịḅo kọkọmaye mị nwọ nemiḅịa.

²⁶Anịsịkị ini vinpịkịḅo inia nemi ḅie sọ se Oru ḅe tu ini pịrị ḍẹịn ḅie pọkọḅịa, anị ini kun se ini mịẹse ini ò ḅiarịye nwọ mịẹarịḅọ ḅe.