Read kirikeni 2 Timoti 3 Bible Online

2 Timoti 3 - kirikeni bible

2 Timoti 3

¹Mịn mị nwọse ḅiekoroma na kuluma enema ḅie ḅụfụka sịkị simeḅịa.

²Tomoni ịmụkụ, ngẹrịfị ḍọkị, ḅụboma, pịkị ḅụse ḅụchịnḅịa, ini nweni wọlọḅịa, ini ini yiapụ ḅịpịpoki ẹkẹ, mịẹḅaka ḅẹ ọkụ nemi ẹkẹ, ini pịkị Tamụnọ Ḅe sọnị nemi ẹkẹ;

³ini tọrụkpọḅịa, ini jịn apụ ḍikitịḅịfoin ẹkẹ, jịn apụ ḍuko simaḅịa, kụrọkụrọ ḍumo kọnḅịa, ḅalafamaḅịa, ini taraka se iḅi apụ wẹrịmaḅịa;

⁴ini nweni dẹrị apụ sọḅịa, ye-abalaka ḍumo kọnḅịa, se yeḅụsọka opuayemịẹḅịa, ini ḅụtima ḅẹlẹmatẹịn Tamụnọ Ḅe nẹngịḅịa;

⁵ini mịna Tamụnọ nemi ḅara ḅụ ọgọnọ pakaye ma kẹngẹ nwọ ọlọḅịa, ọkụma anịa kụrọ mị nwọ sịkịḅịa. Mịna tomonima ḅụ ị́ ḅụ sin.

⁶Inia ḅie dapụ anị ikiri mun si pụnụmasa kunḅara ḅie sime yenemika eremeni ma warịma ḅie sọma ḅọrọ apụ ma-ẹ, anị ojumịnị mị pụkọtarịaye ma fọnọ so sa apụma.

⁷Sịkịmamgba yeḍawọ nwọ ḍọkịarị eremeni ma, ọkụma ineda kọkọmaye mị nwọ ḍawọ nemi ẹkẹ.

⁸Anị paka Janis ḅe na Jambris ḅe na pịrị ọkụ mị, ini Moziz ḅe na tụḅụrụ sịkị, anị mịna apụma sọnị kọkọmaye mị na tụḅụrụ ọkụ-ẹ—inia koromama ḅụrụsam, ḅereni mị ḅụ sọnị ini pịkị ḅịkịmẹ.

⁹Ọkụma ini ḅọlọ nyọ sọ la ẹkẹ anịatịḅị ḅẹḅọ ḅẹḅọ inia yenemika mị nwọ ọrịḅịa, anị paka Janis ḅe na Jambris ḅe na pịrị ọkụ mị.

¹⁰Ọkụma ị̀ya ḍieaye ma na, ị̀ya yemịẹḅara na, ị̀ya ḍumo kọn ḅara na; ị́ nwọ ḍukonwẹngịsam, ị̀ya ḅereni ḅụ ị́ elekima chụasam pịkị ị̀ya ye-inema na, ị̀ya ḅẹlẹma na pịkị ị̀ya ye-inema nyana mị na,

¹¹ị̀ya tọrụsiọrị mị na ị̀ya ḅụfụka da mị na, Antiọk ḅie na, Aịkonịọm ḅie na Listra ḅie na ị̀ ḅụ pakaye mamgba ị́ nemimẹ. Àye ikirima nyana ḅalafama tọrụsiọrịma pịrị ọkụ mị! Ọkụma Nyanaḅọ Ḅe arịa ḅie mgba ị̀ ḍụamẹ.

¹²Tamụnọ kịkẹ ḍumokọn ḅiḅọ ḅiḅọ, iniḅọ tọrụsiọrịḅịa, anị Kraịst Ḅe ḅereniḅọ ḅara ḅụ.

¹³Ọkụma si apụma na ḅụ se laka kiri otoma apụma na ini siye ḅụ ḅọrọ mun sitẹịnye ḅie sọḅịa, oḅori se jịn apụ chịn pịkị oḅori se inia ḅụ chịn aḅẹ.

¹⁴Ị́rị́ ọkụma, ini se ị́ ḍie sa kọkọmaye ma na ị́ kụrọma ḅereniaye ma na kapụma nwọ ọlọchịẹma. Ye se ị́ ḍie apụma ị́ ini nemi waraḅẹ.

¹⁵Ị́ pịkị se ḅiekoroma waraḅẹ na ị́ya boka sịkị ngịsị ị́ Fịafịaḍiri ma nemimẹ, anị Kraịst Jizọs Ḅe ḅụ ị́ nyana ḅereni mị ḅụ ḅọrọ ị́ se mun ḍụaḅọrọma mị ḅie sọḅịa nemi mị se ị́ pịrịye ma.

¹⁶Fịafịa ḍiri mị mgba Tamụnọ Ḅe tọn ḅara ḅụ mị àrị wẹrị gịẹịnye-ẹ, se kọkọmaye mị ḍie, se kurakaye mị ḍikiganị, se ị́rị́ yema datekerema, se pịkị karakara ḍumo kọnḅịa ọkụ seni nweni ḍieḅịa ẹrẹchị.

¹⁷Mịẹse Tamụnọ tomoniḅọ ḅe yemamgba ḅụ kara se pịkị ḅụgbẹịnḅịa ḅara, pịkị ḅụkarakarama iḅi fịrịnwẹngịḅịa yegoyegoye nwọ nyanaḅịa ọkụ.