Read kirikeni Taịtọs 1 Bible Online

Taịtọs 1 - kirikeni bible

Taịtọs 1

¹Mịn fịrịfịrịmaḍiri mị, Pọl Tamụnọ fịrịnwẹngịḅọ pịkị Jizọs Kraịst okunwẹngịḅọ ḅe ḅara anị ḅomẹ. Ini ị̀ sẹlẹọkị se ị̀ fịrịmamẹ mun ḅarachụa Tamụnọ Ḅe sẹlẹọkịsa apụma ḅereni mị pịrịḅịa ọkụ pịkị mịna Tamụnọ tẹkẹ ḅara mị ḅie sime kọkọmaye mị se ini ḍieḅịa ọkụ,

²tọrụseḍiki simegbamaso ḍumo ḅụ sẹrẹrẹye mị. Tamụnọ, anị iruokọnkọnka ḅọ ḅe, mị ḍumo mị nwọ ḅereni wa pịrịmẹ tomonikiri mị ma pakaka sịkị ngịsị,

³se anịa karakara sịkị ḅụ ori oria oku ḅụ wẹrị anị ḍieḅelemamẹ. Mịn mị ini nwọse ị̀ ḅarachụamẹ, se àrị anị ḍukoḅelemamẹ, Tamụnọ mịna Ḍụaḅọrọmaḅọ Ḅe tọn ḅara ḅụ.

⁴À ḍiri gịẹịn Taịtọs ḅe sẹịnmamẹ, ḅereni mị ḅụ ị̀ya kọkọma tọkụ ḅe. Ye Tamụnọ Ḍaḅọ Ḅe na Kraịst Jizọs mịna Ḍụaḅọrọmaḅọ Ḅe na ḍikiḅụgerere na deinma na se ị́ pịrị.

⁵À Krit ḅie ị́ wẹrịsomẹ, mịẹse ị́ anịnyọ mịẹ ḅụpalịmaye ma nwọse ọrụtọnḅịa ḅara, pịkị ama goyegoye ḅie chọchị sẹnịapụ nwọ tọn koromaḅịa ḅara. À tọn ị́ pịrị ọkụ nwọse ḅiekoroma:

⁶ori sẹnịḅọ ḅe ò ḍukosimaḅịaye nwọ nyana ma; ọ̀ gbọrị eremeniḅọ kẹngẹ nwọ simeḅịa, oria awọma ini ḅereniapụ sọḅịa, pịkị bịanbịan awọ anịkanịka ḅịpịpokika awọ ini nwọ sọ ẹkẹ.

⁷Anịatịḅị ori nwọ Tamụnọ fịrị mị nwọ ḍikiḍikiarị sịkị, chọchị tịḅịnịḅọ ḅara ḅụ ò ḍukosimaḅịaye nwọ nyana gbẹịnkẹ, ọ̀ ḅụ deki gololoma ẹkẹ, pịkị owoi kuḅie nyana ẹkẹ, ori iruḅu tọrụḅaama ẹkẹ, pịkị owuaye mịẹ ẹkẹ, pịkị igbikifị pụkọ nyana ẹkẹ.

⁸Ori igoni kọn ḅẹlẹmaḅịa, se iḅiye ḅẹlẹmaḅịa. Ori ọ̀ ḅụ se ọrụtọnḅịa, karakara ḍumokọnḅịa, fịafịa, pịkị ḅụ se osi pịrịḅịa.

⁹Kuḅie se ḅụgbana gbẹịn pịkị ḍieye mị na kura ọkụ mị ọ̀ kapụma nwọ ọlọḅịa. Mịn ḅara ḅụ, ori ineda kọkọma ḍieye mị se jịn apụ kuḅie kụrọmaḅịa, pịkị anị na tụḅụrụ apụma ḅe mịẹirima mị se ini ḍieḅịa.

¹⁰Anịatịḅị kọngọ kụrọma se inia yeḅụsọka ḅẹrẹma se oḅori se jịn apụ chịn-arị apụ ḅakamẹ anịtẹịn anga, Juapụ olomu ḅereniye mị ḅụ vinpịkịḅo se ḅụpẹlẹ mị se tịḅịsẹkẹ apụma.

¹¹Mịẹkamịẹka ḅara ḅụ anị omi-ẹ, ini kọn-arị ọkwẹịnma kiki mị, anịatịḅị ini ḍie gbẹịnkaye nwọ ḍie ḅụ, ḅọrọ bebe mịna furo mamgba kuḅie lọkọmaḅẹ; anị ḅụgereremamẹ, anịatịḅị igbiki ḍẹịn mị ini tuarịye-ẹ.

¹²Ḅarana Kritḅọ-ẹ, inia ịkịankoroapụma ḅie gbọrịḅọ mị ḅẹye-ẹ na, “Kritapụ ma ini sịkịmamgba iruokọnkọnmẹ, ini anị sitịḅịnyana nama-ẹ, opufịye ḍọkị ikula apụ-ẹ.” Se, mị ò ḍukoye mị pịkị kọkọmaye-ẹ, anịẹrẹchị, ị́ kụrọma ini ḍiki ịganịḅịa, mịẹse ini ịnyọ ḅụ sime ḅereni nwọ nyanaḅịa ḅara,

¹⁴se ḅarị Juapụ egberi-a ḅẹrẹ ma na tomoni olokoma na koko ma, anị kọkọmaye mị sịkị apụma ḅara ḅo yema.

¹⁵Yemamgba fịafịamẹ ini fịafịa apụma ḅụ, ọkụma ini pụlasa apụma na pịkị ọkwẹịn mị ḅerenika apụma na ḅụ fịafịaye ofori-ẹ; anịatịḅị inia koromama na pịkị inia si na iḅi na nemi kuḅie ma na pụlasam.

¹⁶Ini Tamụnọ nemi ḅara se inia ḅụ ọkịmẹ, ọkụma mịẹmịẹye ḅụ ini ò pikimẹ. Ini taraka nyana nweni pịrịmẹ, ini pịkị ḅịpịpokikẹ, se ineda gbọrị iḅiye sọnị mịẹ ẹkẹ.