Read kirikeni Taịtọs 3 Bible Online

Taịtọs 3 - kirikeni bible

Taịtọs 3

¹Se ị́ya tomonima ḅiekoroma ini inia ḅụ iderima ḅẹrẹtọn apụma na kụrọ nyana apụma na pịrị, ini inia ḅịpịpoki se ḅụkarakarama iḅiye mịẹ ḅọkọ ḅọkọ ḅụ.

²Ḍuko ini pịrị ini gbọrịḅọ ḅụ sọnị siye ḍuko ma, ọkụma deinma na ikia ḅara ḅụ na wẹrị sime, se sịkịmamgba ḅụnemi ḅara se nweni mgba na anga.

³Anịatịḅị mine na mịnaḅụ na gbọrị sịkị wa oḅorisọ na, ḅịpịpokika na pịkị mịẹirima na ḅụ simemẹ. Wa omonisọ oju mị ḅụḅẹlẹaye ma na tọrụkịrịkịrị ḅụḅẹlẹaye na nwọ pịrịmẹ. Wa mịna ḍumo ma se ḍikiḅụnwọnwọ na ḍikitọrụfụka na pịrịmẹ; jịn apụ taraka se wa wẹrịmamẹ, mine pịkị taraka se ini wẹrịmamẹ.

⁴Ọkụma Tamụnọ mịna Ḍụaḅọrọmaḅọ Ḅe iḅimịẹmịẹye mị na ḅẹlẹma mị na ḍieḅelema sịkị,

⁵ò mine ḍụaḅọrọmamẹ. Wa nwẹngị iḅi fịrịma gosekẹ, ọkụma oria ḍikitịḅịfoin mị gose ọ̀ Fịafịa Tẹmẹ Ḅe ḅụ ḅọrọ wa ḍụaḅọrọmamẹ, anị wa sịkịrị ḅụ ḅọrọ ịwọma yi na ịwọ ḍumo na se wa pịrị ḅọ ḅe.

⁶Tamụnọ Ḅe mịna Ḍụaḅọrọmaḅọ Jizọs Kraịst Ḅe ḅụ ḅọrọ ḅakama Fịafịa Tẹmẹ Ḅe se mịna ọgọnọ saramẹ,

⁷mịẹse wa oria ḍikiḅụgerere ḅụ ḅọrọ ḅo Tamụnọ Ḅe na karakara, se ḅo wa tọrụseḍikiarị simegbamaso ḍumo mị nwọ nyanaḅịa ḅara.

⁸Mịn mị kọkọma ḅẹrẹ-ẹ. Àrị ị́ ḅara ḅiaḅẹ, ye ị́ iḅiọkụma ma ḅẹrẹma ḍuko kụrọma, mịẹse nwọ Tamụnọ Ḅe ḅerenisa apụma sịkịmamgba iḅi mịẹ ḅụ simeḅịa ọkụ, anị nweni mamgba ḅụ iḅi se, pịkị sọye mịẹ ḅọḅọ pịrịḅịaye ma.

⁹Ọkụma nemi ḅie ofori ḅẹrẹjinea ḅụ ị́ ḅụ sin, anị ḅieju-aḍapụma ḅụ ḍawọaye ma na, kamụ sọ na pịkị Oloko mị gose owusọ mị na, àrị ye ḅụ sọkẹ pịkị ye lakẹ.

¹⁰Nwọ pua deki ḅoḅo ḅọ ḅe, iderimatẹịntẹịn mama sịkị se ò ḅerijine, se ḅarị ori na jịn mịẹgboloma nyana ma.

¹¹Ị́ nemimẹ na ọkọ sime tomoniḅọ iniḅọ si ḅụ fịnamasam, iniḅọ sima pịkị ḅẹrẹkọn iniḅọ ḅara simasam.

¹²Atẹmas anịkanịka Tikikọs ḅe à nwọse ị́ fịrịmasa ḅẹḅẹ, ḅụkụrọma ḅọkọḍọkị ḅo Nikopolis ḅie ị̀rị̀ na ịrịa, anịatịḅị à tọnpẹlẹsam na à fọngụ sịkị mị ḅie anịnyọ simeḅịa.

¹³Pa ḅụkụrọma ị́ya ịnyọ la-ọkụ se ḅarachụa Zinas, olokonemiḅọ ḅe na Apọlọs ḅe na pịrị se ini sakị ini munḅịa nyọ mun, pịkị ọrị na ini inia ḅụpalịmaye goyegoye nwọse chụa mun mẹ.

¹⁴Mine na nwẹngịapụma sịkịmamgba iḅi mịẹḅịa ọkụ mị ḍawọ nemi; mịẹse ye kọkọma ḅụpalịmaḅịa sịkị ini ineda ḅarachụaḅịa ọkụ; ini ngịsị ye ḅụ sọka ḍumokọn ma.

¹⁵Ị̀rị̀ na sime apụ mamgba kereniḅịpị seni ọ́ sẹịnmamẹ. Mịna kereniḅịpịma seni ḅereni mị ḅụ mịna ikiapụ ma pịrị. Tamụnọ ḍikiḅụgerere ómine mgba na sime.