Read kirikeni Hibru 10 Bible Online

Hibru 10 - kirikeni bible

Hibru 10

¹Juapụ Olokoma, kara pịkị kuḅie se ḅụgbana gbẹịn kọkọmayema ḅe-a yekẹ; anị seni papa tọrọkọ ḅoḅịa iḅiayema ḅụaye ḍiepakụmarịye-ẹ. Mà gbọrị agbama kụra kụra ḅụ ini àrị mịẹ gbamasomẹ. Nde anịọkụma, Oloko mị ineda ḅo mà agbama mịẹ seni Tamụnọ Ḅe damaḅo apụma mịẹse ini mịẹye ḅụ karaḅịa ọkụ?

²Nemikase Tamụnọ Ḅe tẹkẹarị apụma inia sima ḅụ ini ini mịẹfịafịamasam nwọ ḅẹ ọkụma, mgbọkụ inia kuḅie ḅụ ini si mịẹmẹ nwọ ḅẹ ḅẹrẹḅarasi ini ḅarị nwọ nyana ẹkẹ, agbamịẹ pịkị ḅarị sime ẹkẹ.

³Anị sime ḅara ḅụ, ye simeọkụ simeọkụ sọnị, agbama nwẹngịarị fịrị anị kụra kụra ḅụ tomonima ḅe sima nwọse inia ḅiekoroma mị-ẹ.

⁴Anịatịḅị owoi nambulo na oḅori na pulo ineda sima dekisin ẹkẹ.

⁵Anị mị gose mị Kraịst Ḅe tomonikiri mị ḅo-ẹtọn àrị sịkị, Ọ̀ nwọse Tamụnọ Ḅe ḅẹmẹ: “Ị́ agba na pịrịaye na nwọ ḅikẹ, ọkụma oju Ị́ nwọ karakarama Ị̀ pịrịsam.

⁶Tọn-a nama se ẹbẹ ọgọnọ mịẹ dọkịma agba anịkanịka si mịẹmịẹye dekisinḅịa agba Ị́ nwọ ḍọkịkẹ.

⁷Anịsịkị à nwọ ḅẹmẹ, ‘Mị Ị̀rị̀-ẹ, Ị́ ḅiye mị mịẹḅịa ẹrẹchị, Yei Tamụnọ, Oloko ḍiri mị ḅie ini Ị̀ gbolomaye mị gịẹịnsa ḅara ḅụ.’”

⁸Ọ̀ tatarị nwọ ḅẹmẹ, “Agba na ḍiepịrịaye na Ị́ nwọ ḅikẹ, àrị pịkị Ị́ ḅụḅẹlẹkẹ, anịkanịka se agbamịẹ ẹbẹ ọgọnọ dọkịma nama na, se pịkị sima nwọ dekisinḅịa agba na.” Mịn mị Ọ̀ nwọ ḍukomẹ, Oloko mị ḍuko ḅara ḅụ ini agba mamgba nwọ mịẹḅịa nwọ ḅẹ sọnị.

⁹Anịsịkị ọ̀ nwọ ḅẹmẹ, “Mịn Ị̀rị̀-ẹ, Yei Tamụnọ, Ị́ ḅiye mị mịẹḅịa ẹrẹchị.” Anị Tamụnọ Ḅe olomu agbama ḅụḅarasinye-ẹ se Kraịst Ḅe agba mị nwọse arịa tọrụ ḍinmamẹ.

¹⁰Anịatịḅị Jizọs Kraịst Ḅe Tamụnọ Ḅe ḅi na Ọ̀ mịẹ nwọ ḅẹye Ọ̀ nwọ mịẹmẹ, mine mgba ini siḅụ wa mịẹfịafịamasam, Ori Ọ̀ ḅụ se gbọrị sịkị mịẹ agba mị ḅụ, anị gbọrị sịkị ḅụ Ọ̀ mịẹ agba mị kẹngẹ-ẹ.

¹¹Juapụ agbamịẹḅọ goyegoye eneḅeneḅene oria fịrịnwẹngị-nwẹngịmẹ, se tọn-a sịkị ḅụ àrị gbọrị agbama nwọ mịẹmẹ. Ọkụma ma agbama àrị da sima dekisinkẹ.

¹²Anị simeọkụ simeọkụ sọnị, Kraịst Ḅe sima gose, gbọrị sịkị kẹngẹ gbọrị agba nwọ mịẹmẹ, yeḅụsọ gbasoḅịa agba, anịsịkị Tamụnọ Ḅe amaḅara anga Ò sime waraḅẹ.

¹³Mịọkụ Ori anịnyọ sime koruaḅẹ ọkịmun Tamụnọ Ḅe Ori na taraka apụma nwọse ḅụọ sẹkẹ ịkasịe mịẹ Ọ̀ pịrịḅịa sịkị la.

¹⁴Gbọrị agba mị Ọ̀ nwọse siapụma mịẹ, se ini kara se pịkị fịafịa gbasosam.

¹⁵Fịafịa Tẹmẹ Ḅe sọnị onyechịẹ wa pịrịsam. Tatarịye Ọ̀ nwọ ḅẹmẹ,

¹⁶“Mịn àrị ini na fịḅịa ọḅọkụ mị-ẹ ḅoḅịa enema ḅie, Nyanaḅọ Ḅe ọkọ ḅẹmẹ: Àrị Ị̀ya olokoma se inia koromama ḅie chụaḅịa pịkị àrị seni inia kuḅie ma ḅụ gịẹịnḅịa.”

¹⁷Anịsịkị Ọ̀ pịkịna nwọ ḅẹmẹ, “À ḅarị inia sima na simịẹmịẹaye ma na nwọse ḅiekoroma ẹkẹ.”

¹⁸Anịẹrẹchị ini nwọ si ḅụ ḅarasin-pịrịsa apụma, se si dekisinḅịa agba ḅarị inia ḅụpalịmakẹ.

¹⁹Anịọkụma, ị̀ya mịnapụ, Jizọs Ḅe kọnfị mị ḅụ, se mun Fịafịa Tẹịn Nyọ mị ḅie sọḅịa ẹmbẹ finji wa pịrịsam.

²⁰Ori ịwọ ateli nwọ finji wa pịrịsam, ḍumo ateli, nyọ kikima ḅịtẹ mị ḅụ ḅọrọ—anị fiearịye, Oria oju ḅụ ḅọrọ mị-ẹ.

²¹Tamụnọ warị mị ḍikiḍikiarị gbọrị opu agbamịẹḅọ wa nwọ nyanamẹ.

²²Anịẹrẹchị ó ye wa karakara kuḅie na kọkọma ḅereni na se kpekima Tamụnọ Ḅe damaḅo, ini mịẹfịafịama sa siḅụ oforika kuḅie na, pịkị fịafịa mengi se sịkịrịsa ojuma ḅụ na.

²³Ó ye wa kapụma wa ḍukopakụmasa tọrụseḍikiarịye mị nwọ ọlọ, anịatịḅị wa ineda kuḅie se Tamụnọ Ḅe ḅụgbanaḅịa na Ori ineda Ò ḅereniye mị nwọ mịẹḅịa.

²⁴Ó ye wa jịnḅọ jịnḅọ abala, ḅarachụa jịnḅọ jịnḅọ pịrị, se ḅẹlẹma na iḅiyemịẹ na nwọ ḍiepakụma.

²⁵Wa ịrịa gboloma mịẹmịẹye mị ḅụ ọ́ ḅarasin ma, anị dapụ mịẹarị ọkụ mị. Anịnakaraka, ó ye wa jịnḅọ jịnḅọ kuḅie kụrọmatẹịn, ómine ọrịmẹ na Nyanaḅọ Ḅe Ene mị anị ḅo kpekiaḅẹ.

²⁶Anịatịḅị se sima dekisinḅịa jịn agba ḅarị ofori-ẹ, wa nemikase kọkọmaye mị nemiso se, pa si mịẹmamun-aḅẹ ḅẹḅẹ.

²⁷Anịnakaraka mịọkụ kọnye, anị ḅalafa ḅụ sime ḅoarị ḅẹrẹkọn mị nwọ koru mị-ẹ, pịkị ḅalafama fịnị mị na anị Tamụnọ Ḅe na tụḅụrụ apụma dọkịmaḅịaye mị!

²⁸Moziz Oloko mị ḍukoye mịẹka ḅọ goyegoye ini ḅaamẹ ḍikitịḅịfoin oforika ḅara ḅụ, mama apụ anịkanịka tẹrẹ apụ onyechịẹmẹ ḅẹḅẹ.

²⁹Nde anịọkụma, anị paka Tamụnọ Tọkụ Ḅe ḍikisimaḅọ pịrịḅịa ọkụ? Yesọka ḅara nwọse Tamụnọ ọḅọkụ pulo mị nwọ ọkịḅọ ḅe, siḅụ iniḅọ mịẹfịafịamaye mị? Ḍikiḅụgerere Tẹmẹ Ḅe nwọ wọlọ ḅọ ḅe? Iniḅọ laḅịa opu ḅụfụka si laḅịa ọkụ ọ́ nwọse ḅiekoroma!

³⁰Anịatịḅị mịn mị ḍukoḅọ ḅe wa ò nemimẹ na, “À sowu ḅiḅịa, à pịkịna gbẹịnḅịa,” pịkị nwọ ḅẹ ḅọ ḅe na, “Nyanaḅọ Ḅe Ọ̀ ḅẹrẹkọn Oria tomonima pịrịḅịa.”

³¹Anị opuma ḅalafamaye-ẹ, ḅịkị mun ḍumo Tamụnọ Ḅe ḅara ḅie sọ mị.

³²Ḅọrọsa sịkị mị ḅụ anị ómine na simeọkụ mị ọ́ nwọse ḅiekoroma. Àrị enema ḅie Tamụnọ Ḅe enekuḅu mị ḅia ḅo ọ́ sarama so sịkị, ọ́ tọn-a tọrụsiọrị ọrịmẹ, anị-ẹ ḅẹ sọ, anị ḅụḅalaḅala mị ḅie ọ́ nẹngịmaye ofori-ẹ.

³³Da sịkị ini amaogbo ọ́ wọlọ se pịkị ḅụgbẹịnka ḅara se ọ́ mịẹmịẹmẹ, da sịkị ḅụ ọ́ pịkị ḅụkarakarama inia ḅụ sọ tọrụsiọrị mị ọrị ḅiḅimẹ, ini mị ḅara mị nwọse mịẹarị apụma.

³⁴Ikoli ḅie sime apụma tọrụsiọrị ma ọ́ nwọ ḍiki tịḅịfoinmẹ, ọ́ nyanaye ini nwọ ọfọịn ọkị sịkị ọ́ pịkị arịa fa nwọ inema inemamẹ ḅieḅẹlẹ ḅụ, anịatịḅị ó nemimẹ na ómine iḅitẹịnye pa nwọ nyana waraḅẹ, anị simegbasoḅịaye mị.

³⁵Anịẹrẹchị ọ́ kụrọ kuḅie nyana, anịatịḅị opu gbẹịnye anị nwọse ḅoḅịa.

³⁶Ómine inema nyanaḅịa, mịẹse ọ́ Tamụnọ Ḅe ḅiye nwọ mịẹḅịa ḅara, pịkị ḅereniye ma nwọ nyanaḅoḅịa ọkụ.

³⁷Anịatịḅị, Fịafịaḍiri mị ḍuko ḅara ḅụ, “Pa sịkị kalaye ḅọrọḅịa, ḅoḅịa ḅọ Ḅe Ò ḅoḅịa; Ọ̀ sịkị fama ẹkẹ.

³⁸Ị̀ya karakara tomonima, anị simeọkụ simeọkụ ini ḅereni nyanaḅịa se ḍumoḅịa; ọkụma nemikase inia ḅie vinpịkị ọḅụdaḅọ omi-ẹ ḅẹḅẹ, àrị iniḅọ ḍiki ḅieḅẹlẹ ẹkẹ.”

³⁹Mine vinpịkị ọḅụda se faḅịa apụkẹ. Anịnakaraka, wa ḅereni nyanamẹ se ḍụaḅọrọma nwọ nyanasam.