Read kirikeni Hibru 11 Bible Online

Hibru 11 - kirikeni bible

Hibru 11

¹Ḅereni nyana mị, anị wa tọrụseḍikiayema wa nwọ nyanaḅịa nwọ ḅẹye mị nemi kpaịnma mị-ẹ, pịkị wa ineda ọrịẹkayema sọnị wa nyanaḅịa nwọ ḅẹye mị ḅụokoro na-ẹ.

²Ḅereni ḅụ anị olomu sịkị apụma ḅọrọ Tamụnọ Ḅe ḅụḅẹlẹye nwọ mịẹye-ẹ.

³Ḅereni ḅụ mị wa ḅọrọ kaịnḅoye-ẹ na tomonikiri mị Tamụnọ ọkwẹịn ḅụ mị anị ḅọrọ tẹmẹye-ẹ, anịẹrẹchị tọrụseọrịaye ma, tọrụseọrịkaye ḅụ mị àrị ḅọrọ tẹmẹye-ẹ.

⁴Ḅereni ḅụ mị Ebẹl ḅe iḅitẹịn agba nwọ mịẹ Tamụnọ Ḅe pịrịtẹịn Ken ḅe nẹngịye-ẹ. Oria ḅereni ḅụ Tamụnọ Ḅe ḅọrọ ọ̀ ḅụ iḅiye ḍukomẹ se karakara tomoniḅọ nwọse ọ̀ chịnmẹ, anịatịḅị Tamụnọ Ḅe ḅara na oria ḍiepịrịayema nwọ da ọkịmẹ. Oria ḅereni mị ḅụ Ebẹl ḅe ọ̀ pa ọkwẹịn-aḅẹ ọ̀ fịsam nwọ ḅẹ sọnị.

⁵Ḅereni mị, mị mịẹse Enọk ḅe fịkaye-ẹ. Anịnakaraka ini ori ọkị iwo Tamụnọ Ḅe damamunmẹ, se gbọrịḅọ sọ ḅarị ori ọrịkẹ, anịatịḅị Tamụnọ Ḅe ori ọkịsam. Fịafịaḍiri mị nwọ ḅẹmẹ na ma ini Enọk ḅe ọkị iwoka sịkị ọ̀ Tamụnọ Ḅe ḅụḅẹlẹye nwọ mịẹmẹ.

⁶Ineda Tamụnọ Ḅe ḅụḅẹlẹye nwọ mịẹḅịa ḅọ ofori-ẹ ḅereni oforika ọkụma, anịatịḅị Tamụnọ Ḅe damaḅo àrị ḅọ goyegoye iniḅọ tatarị ḅereniḅịa na Ori omi-ẹ, Ọ̀ pịkị gbẹịnye se Ọ̀ ḍọkịarị apụma pịrịpịrịmẹ.

⁷Ḅereni mị, mị mịẹse Noa ḅe Tamụnọ Ḅe ḅerijine mị nwọ naaye-ẹ, tọrọkọju ḅoḅịaye ḅụ anị ori ineda ọrịkaye mị. Ọ̀ Tamụnọ Ḅe ḅịpịpoki se arụ ịkasị se ọ̀ ḅụ na ò furo mị na nwọ ḍụaḅọrọmamẹ. Anị mị ḅụ ḅẹrẹsi sime tomonikiri mị pịrịmẹ, se Noa ḅe Tamụnọ Ḅe ḅara ḅereni ḅụ ḅọrọ ḅo karakaramịẹmịẹye mị nwọ nyanamẹ.

⁸Ḅereni mị, mị mịẹse Tamụnọ Ḅe Ebraham ḅe chịn sịkị, ori Ọ̀ ḅịpịpoki se paka so Ò ḅereni na Ò se ọ̀ pịrịḅịa nwọ ḅẹ ama mị munye-ẹ. Ori oria ama mị koroma somẹ ò mun-arị nyọ mị nwọ nemika ḅara ḅụ.

⁹Ḅereni mị ọ̀ mịẹse ọ̀ bịanḅo ḅọ ḅara nwọse Tamụnọ Ḅe ḅereni ọ̀ pịrịsa ama mị ḅie angaye-ẹ. Iko-a-warịma ḅie ori angamẹ, anị Aịzịk ḅe na Jekọb ḅe na sọnị mịẹ ọkụ mị-ẹ, anị gbọrị ḅereniye mị Tamụnọ Ḅe ḅara nwọ nyana apụma.

¹⁰Anịatịḅị Tamụnọ Ḅe ḅara na tọn se nama opu ama mị Ebraham ḅe koru simeye-ẹ, simegbaso chuku chụa ḍụparị nyana ama mị.

¹¹Ḅereni mị, mị mịẹse Ebraham ḅe ineda ḅo ḍaḅọ nwọsọye-ẹ ori opuma olomusam nwọ ḅẹ sọnị, Sera ma sọnị ḅarị ineda pịkị awọ yi ẹkẹ nwọ ḅẹ sọnị. Ò kuḅie se Tamụnọ Ḅe ḅụgbanamẹ na ò ḅereni ḅara mị ọ̀ nwọ mịẹḅịa.

¹²Ye mịẹmịẹ ḅara ḅụ Ebraham ḅe ọ̀ fịsam nwọ ḅẹ sọnị, ḅe gbọrịḅọ ḅe ḅụ mị tọn-apụ ḅakama sara pakaḅo lolia sotọrụ sara ọkụ nwọse saraye-ẹ.

¹³Ḅereni mị ḅụ, mị mịna tomoni mamgba sime fịye-ẹ, Tamụnọ Ḅe ḅereni ini pịrị ayema ma inia ḅara lakẹ, ọkụma ini sasaju ḅụ simearị ọrị pịkị àrị da ọkịmẹ, ini pịkị ḅelema ḍukopakụmamẹ na ini ma bịanḅo apụ-ẹ pịkị igoni apụ-ẹ tomonikiri mị ḅie.

¹⁴Mayema ọkwẹịn apụma ḅelema ḍukomẹ na ini tọrụ se inia ḅarakuḅu sẹ nwọ ḍikiaḅẹ.

¹⁵Ini sime ini koroma sosa sẹ mị ḅe koroma nwọ kọnkẹ, ini nemikase ọkọ sime koroma nyana ọkụma, mgbọkụ ini achọ ḍọkị se vinpịkị sosam.

¹⁶Anịnakaraka, iḅitẹịn sẹ mị ini ḍọkịye-ẹ, anị soḅie ama mị-ẹ. Anịẹrẹchị Tamụnọ Ḅe anị Ọ̀ ḅụgereremakẹ inia Tamụnọ nwọse Ọ̀ chịn mị, anịatịḅị Ọ̀ sẹ karakarama ini pịrịsam.

¹⁷Ḅereni mị, mị mịẹse Ebraham ḅe oria tọkụ Aịzịk ḅe se agba mịẹ Tamụnọ Ḅe pịrịye-ẹ, Tamụnọ Ḅe Ebraham ḅe ḍaḍiki sịkị. Ebraham ḅe anị Tamụnọ Ḅe yeḅereni pịrịye-ẹ, anị sọnị ọ̀ ḅụkarakaramamẹ oria ngẹrị tọkụ ḅe nwọse agba mịẹ.

¹⁸Tamụnọ Ḅe nwọse ọ̀ ḅẹmẹ, “Aịzịk ḅe ḅụ mị ị́ ḅụ pakaḅoḅịa apụ ị́ nwọ nyanaḅịaye-ẹ.”

¹⁹Ebraham ḅe ò koromamẹ na Tamụnọ Ḅe Ori ineda fịḅụ Aịzịk ḅe sịsẹmaḅịa—se ye ḍukoḅaraḅụ, Ebraham ḅe ọ̀ kọkọma fịḅụ pịkị Aịzịk ḅe nyanaḅomẹ.

²⁰Ḅereni mị ḅụ, mị Aịzịk ḅe ḅọrọ ḅẹlẹma ḅereni Jekọb ḅe na Isọ ḅe na pịrịye-ẹ.

²¹Ḅereni mị ḅụ, mị Jekọb ḅe ọ̀ fị-ẹtọn-arị sịkị Josẹf owuapụ awọma ḅụ ḅọḅọ nwọ ḅẹlẹmaye-ẹ, ori oria amgbara nwọse ọ̀ ḅụ dachịẹma se kpẹrẹkị Tamụnọ Ḅe tẹkẹmẹ.

²²Ḅereni mị, mị mịẹse, Josẹf ḅe fị-ẹtọn-arị sịkị, Izrẹlapụma Ijipt ḅie pakasoḅịa nwọ ḅẹ ḅẹrẹ ḍukoye-ẹ, pịkị se oria oju mị mịẹḅịa ḅara nwọ ḍukoye-ẹ.

²³Ḅereni mị ḅụ, mị Moziz ḅe yiapụma ò se ḅọịye-ẹ, ini oyi tẹrẹ akalụ karama sịkị ḅụ. Ini ọrịmẹ na ò ḍikitọrụgbẹịnmẹ, anịẹrẹchị amanyanaḅọ ḅe tọnye mị mịẹka mị, anị inia ḅalafamakẹ.

²⁴Ḅereni mị, mị mịẹse Moziz ḅe ḅo ogu lasịkị, ò ḅerenikẹ ini Fẹro ḅa ma tọkụ nwọse ọ̀ chịn.

²⁵Tamụnọ-a tomonima na gboloma tọrụsiọrị mị ọ̀ ḅụḅẹlẹtẹịn mun boka sịkị se si ḅie ḅụtima mị nẹngịmẹ.

²⁶Ò koromamẹ, na Mẹsaya Ḅe gose ini tomoniḅọ pụa mị iḅitẹịn Ijipt ḅie sime ngọ mamgba nwọ nyana mị nẹngịmẹ; anịatịḅị ori ọ̀ tọrụmgbọlụ mamgba nwọse tọrọkọ ḅoḅịa gbẹịn-aye ma ḅụ wẹrịmẹ.

²⁷Ḅereni mị, mị mịẹse Moziz ḅe Ijipt wẹrịsoye-ẹ amanyanaḅọ ḅe ịganị nwọ ḍikiḅalafaka ḅara ḅụ, ọ̀ ḅarị vinpịkị mun ḍụkụkẹ, ọ̀ tọrụse ọrịrịka Tamụnọ Ḅe ọrịsam nwọ ḅẹ ḅara ḅụ.

²⁸Ḅereni mị, mị mịẹse Saḅaḅọrọ Alalị mị ọ̀ nwọ tọn pakụmaye-ẹ, se tọnmẹ na ini pulo mị se ḅọkọma ḅụ tan mịẹse Fị mị ḅe Enjẹlḅọ ḅe Izrẹlapụma tatarị yi owuapụ awọma nwọ ḅaa-ẹka ḅara.

²⁹Ḅereni mị, mị mịẹse Izrẹlapụma kpoinkpoin kiri ọgọnọ nwẹngị ọkụ nwọse Awụwụ Tọrụ mị saḅaḅọrọye-ẹ; Ijipt apụma anị ḅara mị nwọ mịẹ ḍọkị sịkị mengi mị ini mịnị ọkịmẹ.

³⁰Ḅereni mị, mị mịẹse Jẹriko ama onuma ḅịkịkoroye-ẹ Izrẹlapụma sọnọma ḍin nwọse àrị nwẹngị kelemaso ḅụ.

³¹Ḅereni mị, mị mịẹse ini sẹfị Rehab ma ḅaakaye-ẹ, ini Tamụnọ Ḅe ḅịpịpokika apụma nwọ ḅaa sịkị anịatịḅị árị ikiapụ ḅara nwọse ama ẹnyẹ-ẹ mun Izrẹlapụma ọkịmẹ.

³²À pa ḍukoma mun ḅe? Sịkị ḅarị ofori-ẹ Gidiọnị ḅe na, Berak ḅe na, Samsịn ḅe na, Jẹfta ḅe na, Devid ḅe na, Samụẹl ḅe na, pịkị ịkịankoroapụ mamgba na ḅẹrẹ nwọ ḍuko.

³³Ḅereni ḅụ ini wẹrị bebe sẹ sẹ mamgba na owusọ se àrị nẹngịmamẹ. Ini karakaraye nwọ mịẹmẹ se Tamụnọ Ḅe ḅereni ini pịrịye mị nwọ nyanaḅo mẹ. Ini chịrịḅama ḅịpị nwọ gbẹịnmẹ,

³⁴owoi-a fịnị nwọ binmamẹ, okola-agiji ḅara ḅie pọkọ somẹ. Ini ịnyọ nyanakẹ ọkụma ini kụrọmẹ, ini ọmụgbin kụrọ nyanamẹ, se jịnsẹ owunima nẹngịmamẹ.

³⁵Ḅereni mị ḅụ eremenima ini na pakụmapụma nyanaḅo mẹ, ini fịḅụsịsẹma apụma. Ísíapụma ini ḅụnyana mị nwọ ọkị ḍụkụkẹ se tọrụsiọrị ḅụ wẹrị fịmẹ mịẹse ini fịḅụsịsẹ mun iḅitẹịn ḍumo ḅie sọḅịa ẹrẹchị.

³⁶Iniaḅụ dapụ ini nwọ kombo pịkị ini fomumẹ, ini ikoli seni dapụ ịkasị se ini ọkị ikoliwarị ḅie chumẹ.

³⁷Ini ḍụparị se ini gbinmẹ, ini fịkịfịkị se ini seni maịn pumẹ, ini okola-agiji se ini ḅaamẹ, ini anana anịkanịka oḅori oju apụra chụa nwẹngịma ḅọrọmẹ—igwein, tọrụsiọrị pịkị siḅara nwọse ini na angamẹ.

³⁸Tomonikiri mị iḅi ini pịrịkẹ! Owu ḅie mangị apụ sime ọkụ ini nwọse gelegelema ḅọrọmẹ eleogboma ḅie na chịngịma ọgọnọ na ḅụ, kiri ḅie sime pokoloma na ḅụkụma na ḅie angama ḅọrọmẹ.

³⁹Mịnapụ mamgba inia ḅereni ḅụ inuma ayema la-ọkụ ḍiki. Anị sọnị Tamụnọ Ḅe ḅereni ini pịrịayema inia ḅara lakẹ,

⁴⁰anịatịḅị Tamụnọ Ḅe iḅitẹịn ḅara nwọse yetọn koroma wa pịrịsam. Ọ̀ tọn ḅara, anị mine iniaḅụ sọ sịkị re, anị ini ini mịẹse ini karaḅịaye-ẹ.