Read kirikeni Hibru 12 Bible Online

Hibru 12 - kirikeni bible

Hibru 12

¹Mine ọkụma, mịn opu tomoni kpo mị onyechịẹ wa gbori kelemamẹ. Anịẹrẹchị, ó ye wa ateli mị ḅụ kikichụa wa pịrịḅịaye goyegoye na pịkị kapụma wa ọlọchịẹma si mị ḅie mịna ḅụsin, se ó ye wa mịna kuḅie laḅara se mịna tọrọkọ sime arụḍụa mangị mị kọn.

²Ó ye wa mịna tọrụmgbọlụma seni Jizọs Ḅe ḅụ wẹrị anị mịna ḅereni mị ḅụḅụ sẹrẹrẹ ḅọ Ḅe, sakị ḅụ ọkịmun kuluma la. Mgbẹsẹchịn mị anị Ọ̀ mịẹse Ori ọḅụdakẹ! Anịnakaraka, sime Ò koruarị ḅieḅẹlẹ mị gose, mgbẹsẹchịn ọgọnọ fị mị ḅụgerere mị sọnị Ori anị se yechịnkẹ; se mịọkụ, Tamụnọ amanyana ngada mị ḅụ amaḅara anga ḅụ Ọ̀ kpọnjị sime waraḅẹ.

³Ò tolu ḅọrọ ayema ọ́ nwọse ḅiekoroma; siapụma taraka se Ọ̀ wẹrịma la-ọkụ mị! Anịẹrẹchị ó ḅerenima ọ́mịna kuḅie lọkọ mịẹse ómine ọḅụda ẹka ọkụ.

⁴Anịatịḅị ọ́mịna sima na owusọ mị ḅụ, ma ọ́ sọmun ini ọ́ ḅaaḅịa eke lakẹ.

⁵Tamụnọ Ḅe oria owuapụ awọ ḅara ḅụ kọn ọ́ pịrị kuḅie kụrọma ọkwẹịnma ó se ḅieḅaramasa? “Ị̀ya tọkụ, tọrụkweinma Nyanaḅọ Ḅe ị́ datekerema àrị sịkị, pịkị kuḅie lọkọmama Ori ị́ ḍiki ịganị àrị sịkị.

⁶Anịatịḅị Nyanaḅọ Ḅe Ọ̀ datekerema se Ọ̀ ḅẹlẹma ḅọ goyegoye nwọ pịrịpịrịmẹ, pịkị Ọ̀ tọkụ ḅara nwọse ọkịḅọ goyegoye nwọ fomu fomumẹ.”

⁷Ḍaḅọ Ḅe owuapụ awọ ḅara ḅụ ọ́ la àrị ḅụfụkama ọ́ nwọ inema; anịatịḅị ọ́mịna tọrụsiọrị mị ḍiepakụmamẹ na Tamụnọ Ḅe Oria owuapụ awọ ḅara ọ̀ nwọse ómine na anga aḅẹ. Ọkọ sime tọkụ omi, ḍaḅọ ngịsị fomu-ẹkaḅọ?

⁸Oria kọkọma owuapụ awọma fomuye da ḅara mị ọ́ nwọse fomuye dakẹ ḅẹḅẹ, anị fieaḅẹ na ómine Oria kọkọma owuapụ awọkẹ, ọkụma ḍaḅọ nyanaka tịḅị tọnka awọ-ẹ.

⁹Wa yi ḍa apụma ḅụfụka se wa pịrị sịkị wa pịkị ini osisimẹ. Anị mị nẹngịma ḅara wa nwọse ḅụiderima mịna tẹmẹ anga Ḍaḅọ Ḅe pịrị se ḍumo gbẹịnmẹ!

¹⁰Wa yi ḍa apụma kala sịkị nwọse ḅụfụka se wa pịrịmẹ, anị inia ḅụḅẹlẹ ḅara ḅụ, ọkụma Tamụnọ Ḅe mịna iḅi gose anị mịẹmẹ, mịẹse wa Oria fịafịa mị ḅụ ḍiekiri nyanaḅịa ẹrẹchị.

¹¹Ini ḅụfụka se wa pịrị sịkị, anị kururu se wa pịrịpịrịmẹ, ḅieḅẹlẹkẹ. Ọḅụkọ, anị simeọkụ simeọkụ sọnị, ini anị ḅara se dagbụkụkụmasa apụma karakara ḍumo kọn apụma ḅe deinma mị ḅe gbẹịnye nwọ nyana-nyanamẹ.

¹²Anịọkụma, ómine ọ́mịna ịnyọ, ḅụfasa ḅarama nwọ dekichịẹma, pịkị ịnyọ se ọ́mịna geregere àrị ḅụọ ịkpụkụ ḅụ chụa!

¹³Se ọ́ gbụkụkụ kpapụ atelima ḅie nwẹngịma mun mịẹse ikeli ḅụọ mị anyị ẹka ọkụ, ọkụma ini anịnakaraka anị gwọḅịa ḅara.

¹⁴Ọ́ ḅụkụrọma tomoniḅọ goyegoye na deinma ḅụ sime, pịkị ḅụkụrọma fịafịa ḍumokọn, anịatịḅị anị oforika se Nyanaḅọ Ḅe ọrịḅịa ḅọ ofori-ẹ.

¹⁵Ngịsị Tamụnọ Ḅe ḍikiḅụgerere mị ḅụ ó vinpịkị ọḅụdama. Ye gbọrịḅọ sọnị vinpịkịḅo akụ chịn nwọ sọma, anị anịa akụ mị na sẹnị pakaḅo ḅụfụka se tọn-apụ pịrịye mị.

¹⁶Ye gbọrịḅọ sọnị sẹfị ḍumo nwọ kọnma anịkanịka tẹmẹ ḅụ nwẹngịka ḅe ḍumo nwọ kọnma anị Isọ ḅe mịẹ ḅara mị, oria tatarị owutọkụ kiri se gbọrị sịkị fịye nwọ fẹ ḅọ ḅe.

¹⁷Ó nemi ḅara ḅụ ọḅụkọ ò ḅimẹ ọ̀ ḍawu ḅe ḅẹlẹma nwọ nyana, ọkụma ini ò desikimamẹ, anịatịḅị ori ineda ọ̀ mịẹsaye mị ḍinmaḅịa achọ ḍọkịḅokẹ, ori owu sara anị ḍọkịmẹ nwọ ḅẹ sọnị.

¹⁸Izrẹlapụma Saịnaị Tụndụ ọgọnọ ḅara se yelama ḍikiḅịa ḅara ọ́ nwọse ḅokẹ fịnị mị kọrịarị sịkị mị ḅụ, anị kanakana se pịkị ginigini nyọ mị, irisi mị ḅie,

¹⁹oḍu mị kụrọma fiemẹ pịkị tẹmẹ anga ḅe pụkọ mị na. Anị naa apụma tẹkẹmẹ na ngịsị ini ḅarị jịn sịkị se anị naama-ẹ,

²⁰anịatịḅị ini ineda Ọ̀ pịrị kụrọ mị inemakẹ, anị nwọ ḅẹ na, “Nama sọnị ḅụ se anị tụndụ mị lamamẹ ḅẹḅẹ, ini ḍụparị se ò gbin ḅaaḅịa.”

²¹Ori ọrịye mị ḅalafama so ọkụma, Moziz ḅe nwọ ḅẹmẹ, “Ị̀ ḅụgeregere-aḅẹ ị̀ ḅala pịkị famẹ!”

²²Anịnakaraka, Zaịyọn Tụndụ mị ó ḅolasaye-ẹ pịkị ḍumo sime Tamụnọ Ḅe opu ama mị ḅie na anị soḅie Jerusalẹm mị, anịa mẹndẹ oyiasi fịnjị-fịnjị enjẹlapụma na.

²³Ó ḅo Tamụnọ Ḅe tatarị yi owuapụ awọma inia ḅieḅẹlẹ koḅiria mị ḅie sọsam, anị ẹrẹ soḅie gịẹịnsa apụma. Nweni mamgba ḅẹrẹkọn Tamụnọ Ḅe ọ́ nwọ damaḅosam, pịkị ini mịẹ karamasa iḅi apụma tẹmẹma na.

²⁴Ó Jizọs Ḅe damaḅosam, anị ịwọ ọḅọkụ mị se ọrụtọn koroma ḅọ Ḅe, pịkị ini sana pulo mị na, anị iḅitẹịn yeḅereni ḅịpị nyana Ebẹl pulo mị nẹngịye mị.

²⁵Anịẹrẹchị ómine ọbị, se ọkwẹịn àrị ḅọ ḅe poki ḍụkụka apụ ọ́ nwọ sọma. Anịatịḅị tomonikiri ḅie Tamụnọ oku poki ḍụkụka apụma ḅụ nemikase ḅọrọkẹ nwọ ḅẹ ọkụma, nde mịnaḅụ ḅọrọḅịa ọkụ wa nemikase soḅie ḅụ ọkwẹịn àrị ḅọ Ḅe nwọ pokika ọkụma.

²⁶Ọ̀ pụkọ mị tomonikiri mị jikemẹ anịsịkị mị ḅụ, ọkụma mịọkụ Ò yeḅerenisam na, “À pịkị gbọrị sịkị se tomonikiri mị kẹngẹ nwọ jike ẹkẹ ọkụma so mị sọnị-ẹ.”

²⁷“Gbọrị sịkị” nwọ ḅẹ ọkwẹịn mị, ḍiepakụmaḅẹ na tẹmẹ ayema ini nwọ jike se àrị sinḅịa, mịẹse ineda jike ẹka ayema simeḅịa ḅara.

²⁸Ó ye wa anịọkụma, mịẹḅaka ḅe, anịatịḅị ineda jike ẹka amanyanakiri wa nwọ ọkịmẹ, ye wa mịẹḅaka ḅẹ se Ọ̀ ḅụḅẹlẹḅịa ḅara nwọse Tamụnọ Ḅe tẹkẹ, mangịma na ḅalafa na ḅụ;

²⁹anịatịḅị mịna Tamụnọ Ḅe kọkọma ye dọkịma dọkịma fịnị-ẹ.