Read kirikeni Hibru 4 Bible Online

Hibru 4 - kirikeni bible

Hibru 4

¹Tamụnọ Ḅe mịọkụ, Ò yeḅereni wa pịrịsam na, Ọ̀ ḅẹrẹḅẹ ịnyọsara mị wa anị nyanaḅịa. Anịọkụma, ó ye wa ḅụ ọbị, mịẹse Ò ḅereni ọ́ pịrịsa ịnyọsara mị ọ́mịna ḅie gbọrịḅọ sọnị anị gbarị ẹka ḅara.

²Anịatịḅị wa Iḅi Ḅẹrẹ mị naasam anị ini sọnị naa ọkụ mị-ẹ. Ini naa oku mị anị iḅi se ini mịẹkẹ, anịatịḅị ḅereni ḅụ ini anị ọkịkẹ.

³Anịọkụma, mine nwọ ḅereniapụma anị Tamụnọ Ḅe ḅereni ịnyọsara mị nyanaye-ẹ. Ò ḍuko ḅara mị, anị anị paka ọkụ-ẹ, “Ḅụosọ ḅụ à kụrọma yeḅerenimẹ: ‘Àrị ịnyọsara se ini pịrị-ẹ tọn ama mị ḅie ngịsị ini ḅarị sọ ẹkẹ!’” Ọ̀ mịn mị ḍukomẹ Ò tomonikiri mị tẹmẹ so sịkị ngịsị, Oria fịrịma fasam nwọ ḅẹ sọnị.

⁴Anịatịḅị Fịafịaḍiri mị ḅie gbọrị anga ḅụ, mị sọnọma ḍin karama ene mị gbolomaye ini nwọ ḍukomẹ: “Tamụnọ Ḅe sọnọma ḍin karama ene mị Oria fịrịma ḅụ ịnyọsaramẹ.”

⁵Mị gbọrị ḅẹrẹ mị ini pịkị nwọse anị ḍukomẹ: “Àrị ịnyọsara se ini pịrị-ẹ tọn ama mị ḅie ngịsị ini ḅarị sọ ẹkẹ.”

⁶Ini tatarị Iḅi Ḅẹrẹ mị naa apụma, anị ịnyọsara mị ini anị nyanakẹ; anịatịḅị ini ḅerenikẹ. Anịọkụma jịn apụ omi-ẹ, anị nyana ẹmbẹ mị finji pịrịapụ-ẹ.

⁷Anịẹrẹchị, Tamụnọ Ḅe jịn ene tọn koromamẹ, ini nwọse anị chịnmẹ “Mịmgba.” Tọn-a kụra ḅọrọ sịkị, ò Devid ḅe ḅụ ḅọrọ anịa ọkwẹịn kọnmẹ, Fịafịaḍiri mị ḅie ini anị ḍuko ḅọrọsa ḅara ḅụ: “Mịmgba ó nemikase Tamụnọ Ḅe pụkọ naamẹ ḅẹḅẹ, ómine ininachịnma.”

⁸Nemikase Jọsụwa ḅe ḅọrọ anị Tamụnọ Ḅe ḅereni ịnyọsara mị se ini pịrịmẹ nwọ ḅẹ ọkụma, mgbọkụ Tamụnọ Ḅe Ọ̀ ḅarị jịn ene ḅẹrẹ ḍuko ẹkẹ.

⁹Anị sime ḅara ḅụ, ịnyọsara pa sime Tamụnọ-a tomonima pịrị waraḅẹ, anị Tamụnọ Ḅe sọnọma ḍin karama ene mị ḅụ ịnyọsara ọkụ mị.

¹⁰Anịatịḅị Tamụnọ Ḅe ḅereni ịnyọsara mị nyanasa ḅọ goyegoye iniḅọ pịkị ịnyọsarasam, anị Tamụnọ Ḅe Oria fịrị ḅụ ịnyọsara ọkụ mị.

¹¹Anịọkụma ó ye wa ḅụkụrọma mịna ịnyọ laḅara mịẹse anị ịnyọsara mị nyana, mịẹse mịna ḅie gbọrịḅọ sọnị inia ḅereni nyanaka mị gose ini ḅịkị ọkụ ḅịkị ẹka ḅara.

¹²Tamụnọ ọkwẹịn mị anị ḍumo pịkị kụrọ nyanamẹ, anị oḅutẹịn mama tọrụ okola-agiji nwọ nẹngịmẹ. Anị pẹlẹ tolumun ịma mị na tẹmẹ mị na donia anga mị lalamẹ, anị ọkịmun anda na ikoli na ma pịkị ịmgbema ẹmbẹma donia anga ma sọnị lalamẹ. Anị ḅẹrẹkọn tomoniḅọ kuḅie tọn-arịye ma na pịkị koroma àrịye ma na pịrịpịrịmẹ.

¹³Tamụnọ Ḅe tọrọkọ ineda ḅọịḅịaye ofori-ẹ; yegoyegoye tẹmẹ sịkị ngịsị Ọ̀ tọrụkuḅu ḅụ arị kikimakẹ. Pịkị mịna ḅụ ọrị ḅọḅọ nụḅọ opoli tọn Ọ̀ pịrịḅịa.

¹⁴Anịọkụma, ó ye wa kapụma wa ḍukopakụmasa ḅereni mị nwọ ọlọchịẹma. Anịatịḅị wa gbọrị opu Gele Agbamịẹḅọ nyanamẹ, anị mun Tamụnọ Ḅe tọrọkọ lasa ḅọ Ḅe Ori anị—Jizọs, Tamụnọ Tọkụ Ḅe-ẹ.

¹⁵Mịna Gele Agbamịẹḅọ ḅe anị mịna ịnyọ ofori mị tịḅịfoinma ẹka ḅọkẹ. Anịnakaraka, wa nyana Gele Agbamịẹḅọ ḅe, anị ḅọkọ kịrịkịrị ḅụ, ḍaḍiki wa la-ọkụ se lalasa ḅọ-ẹ, ọkụma ngịsị Ò si mịẹkẹ.

¹⁶Anịọkụma, ó ye wa ḅalafaka ḅara se Tamụnọ amanyana ngada mị tọrọkọ mun anị ḍikiḅụgerere sime anga mị. Anịanga, wa ḍikitịḅịfoin na ḍikiḅụgerere na nyanaḅoḅịa, ḅarachụa mịnaḅụ pịrị wa anị ḅisịkị ḅisịkị.