Read kirikeni Hibru 5 Bible Online

Hibru 5 - kirikeni bible

Hibru 5

¹Gele Agbamịẹḅọ goyegoye ò juo-a tomonima ogboku mị ini ọ̀ sẹlẹpakụmaḅo se ọ̀ tọnye-ẹ, na ọ̀ fịrịnwẹngị Tamụnọ Ḅe pịrị inia tịḅị gose, pịkị inia sima gose agbamịẹḅịa ẹrẹchị.

²Ori sọnị tọn-a ḅọkọ ḅụ ịnyọ ofori ḅọ-ẹ, nwọ ḅẹ sịkị, ini mịẹye nemikapụma na pịkị mịẹirimarị apụma na ori ineda dein ḅara se ini na angamẹ.

³Anịatịḅị ori na mịnaḅụ na sọnị, ịnyọ ofori ḅọ-ẹ nwọ ḅẹ sịkị, tomonima inia sima, agba kẹngẹ ọ̀ nwọ mịẹkẹ, ọkụma oria si mị sọnị-ẹ.

⁴Gbọrịḅọ sọnị gele agbamịẹḅọ osi mị nwọ ọkị iniḅọ ḅụ pịrịpịrịkẹ, Tamụnọ Ḅe iniḅọ chịn sịkị mị iniḅọ gele agbamịẹḅọ soarịye-ẹ—ḅọrọsa sịkị ori Erọn ḅe chịn ọkụ mị.

⁵Anị Kraịst Ḅe ḅụ sọnị anị mịẹ ọkụ mị-ẹ, Ori agbamịẹḅọ osi mị nwọse Ọ̀ ḅụ pịrịkẹ. Tamụnọ Ḅe mị ọkọ se Ọ̀ ḅẹye-ẹ, “Ị́rị́ Ị̀ya Tọkụ-ẹ; mịmgba àrị Ị́ Ḍa sọsam!”

⁶Ọ̀ pịkị jịn anga ḅụ nwọ ḅẹmẹ, “Ị́rị́ agbamịẹḅọ sọ gbasoḅịa, Mẹlkizẹdẹk agbamịẹḅọ ọrụ mị ḅụ.”

⁷Jizọs Ḅe tomonikiri sime sịkị Ò gele pụkọ se oloku ọwụsara ineda fị ḅụ Ọ̀ ḍụaḅọrọmaḅịa Tamụnọ Ḅe tẹkẹ pịkị Ọ̀ ḅara ye ḅimẹ. Ọ̀ ḅụiderima pịkị ḅụ se Tamụnọ Ḅe pịrịye ẹrẹchị, Tamụnọ Ḅe ọ̀ naamẹ.

⁸Ori Tamụnọ Tọkụ-ẹ nwọ ḅẹ sọnị, Ori ọrị tọrụsiọrịma ḅie Ọ̀ ḅọrọ Tamụnọ Ḅe ḅịpịpoki mị ḍawọmẹ.

⁹Tamụnọ Ḅe Ọ̀ mịẹse Ọ̀ kara so sịkị, Ò ḅo ini Ọ̀ ḅụ ḅọrọ simegbamaso ḍụaḅọrọma nyanaḅịa ḅọ sọ Ọ̀ ḅịpịpoki apụ mamgba nwọ pịrịmẹ,

¹⁰Tamụnọ Ḅe pịkị Ò se Gele Agbamịẹḅọ nwọ mịẹmẹ, Mẹlkizẹdẹk agbamịẹḅọ ọrụ mị ḅụ.

¹¹Mịn ḅẹrẹ mị ḅụ wa ḍukoḅịaye ḅakamẹ, ọkụma anị ḍukoḅelema ọ́ pịrịḅịa ọkụ mị ḅụfụkamamẹ.

¹²Ó yeḍawọ lasa ḅiri mị nwọ ḍiki ọkụma, ó ye se jịn apụ ḍie gbẹịnmẹ—anịnakaraka ó ḅiaḅẹ jịn apụ pa Tamụnọ ọkwẹịn mị ḅe tatarị ḍawọ ayema se ó ḍie. Ọ́ kụrọ fịye nwọ fị gbẹịn sịkị ọ́ pa awọmẹnị ḅara nwọse ndoaḅẹ.

¹³Ndo mengi kẹngẹ nwọse fịye mịẹ fịarịḅọ goyegoye iniḅọ pa pịkị kalatọkụ-ẹ, iniḅọ ma pa siye na iḅiye na ḍawọ nemikẹ.

¹⁴Ọkụma ineda kụrọ fịye fịḅịa ḅọ ḅe, ori ḅọ ḅe sẹnịḅọ-ẹ, ori anị ye koroma ọkụ nwọ ḍawọ nemisaḅọ-ẹ, anịatịḅị ò siye na iḅiye na nwọ ḍawọ nemisam.