Read kirikeni Hibru 8 Bible Online

Hibru 8 - kirikeni bible

Hibru 8

¹Wa ḍukoarị ḅẹrẹtịḅị anị, na wa ọkọsime Gele Agbamịẹḅọ nyanamẹ, soḅie Amanyanaḅọ ngada mị ḅụ amaḅara anga ḅụ Ọ̀ kpọnjị sime waraḅẹ.

²Ori anị Fịafịa Tẹịn Nyọ mị ḅụ sime fịrịnwẹngịarị Gele Agbamịẹḅọ Ḅe-ẹ, anị Nyanaḅọ Ḅe ḅarana pike kọkọma ikowarị mị ḅie, tomoniḅọ pikeye mịkẹ.

³Gele Agbamịẹḅọ goyegoye ḍiepịrịaye na nama na se agbamịẹ Tamụnọ Ḅe pịrịpịrịmẹ, anịẹrẹchị gbarịmaka ḅara ḅụ, mịna Gele Agbamịẹḅọ ḅe sọnị ye ọkị se agbamịẹ Tamụnọ Ḅe pịrịḅịa.

⁴Jizọs Ḅe nemikase tomonikiri sime ọkụma ngịsị Ori agbamịẹḅọ sọ ẹkẹ, anịatịḅị Juapụ Olokoma sime ḅara se agbamịẹarị apụma ini omi-ẹ.

⁵Agbamịẹapụma nwẹngị fịrị mị anị se soḅie anị simeọkụ mị otoma, se ḍikiḍa ḅara ḅụ mịẹarịye-ẹ. Anị Moziz ḅe ḅụ sọnị anị simeọkụ mị-ẹ. Ori Ọḅọkụ Ikowarị mị nama-ẹtọn àrị sịkị, Tamụnọ Ḅe nwọse ọ̀ ḅẹmẹ, “Tọrụ kweinma tụndụ mị ọgọnọ ị́ ọrịye mị simeọkụ nwọse anị nama.”

⁶Ọkụma mịọkụ ini agbamịẹḅọ fịrị nwọse Jizọs Ḅe pịrịsam anị iḅitẹịn iniaye ma nẹngịye mị, ọ̀ nwẹngị Tamụnọ Ḅe na Oria tomonima na ogboku koroma ọḅọkụ mị iḅiọkụ mị anị iḅiọkụ-ẹ; anịatịḅị iḅitẹịn yeḅereniḅịpị ḅụ anị wẹrị mịẹmẹ.

⁷Tamụnọ Ḅe nemikase tatarị ọḅọkụ mị ḅụ irimaye ḍọkịḅoka ọkụma, mgbọkụ Ori maịn karama ọḅọkụ nwọ ḅi ẹkẹ.

⁸Ọkụma Tamụnọ Ḅe Oria tomonima ḅụ mịẹirima ḍọkịḅomẹ nwọ ḅẹye gose Ọ̀ nwọ ḅẹmẹ, “Nyanaḅọ Ḅe nwọ ḅẹmẹ, Sịkị mị anị ḅoḅịa, àrị Ị̀ya tomoni Izrẹlapụma na Juda apụma na ịwọ ọḅọkụ mị nwọ fịḅịa.

⁹Mịn ọḅọkụ mị àrị inia ḅieju-aḍapụma na fị ọḅọkụ mị simeọkụ sime ẹkẹ anị à ḅara ḅụ ini ọlọ, ateli se ini ḍie se ini Ijipt ḅie pakaso ene mị. Àrị ini na fị ọḅọkụ mị ini nwọ ḍukonwẹngịkẹ, anịẹrẹchị à tọrụse inia ḅụ wẹrịkẹ.

¹⁰Nyanaḅọ Ḅe pịkị nwọ ḅẹmẹ, mịn àrị Izrẹlapụma na fịḅịa ọḅọkụ mị-ẹ ḅoḅịa enema ḅie: Àrị ị̀ya olokoma se inia koromama ḅie chụaḅịa pịkịna àrị se inia kuḅie ma ḅụ gịẹịnḅịa. Àrị inia Tamụnọ sọḅịa, ini pịkị Ị̀ya tomoni nwọ sọḅịa.

¹¹Inia ḅie gbọrịḅọ sọnị ḅarịye se iniḅọ juo ama kuḅuḅọ anịkanịka iniḅọ na gbọrị sẹ ḅie pakaḅo ḅọ ḍie ẹkẹ na, ‘Wa Nyanaḅọ Ḅe nwọ nemi.’ Anịatịḅị inimgba Ị̀ nemiḅịa, kalatọkụ ḅụ sakịmun sẹnịtẹịnḅọ nwọ la.

¹²Ini mịẹsa sima ḅụ à ḅarasin ini pịrịḅịa se à ḅarị pịkị inia mịẹirimama nwọse ḅiekoroma ẹkẹ.”

¹³Tamụnọ Ḅe mịn ḅara mị nwọse ịwọ ọḅọkụ mịẹsa sịkị, anị fiemẹ na ọ̀ tatarịye mị nwọse anga pịrịsam, olomusaye ḅara ḅụ, olomusaye goyegoye anị ḅọlọka ḅọrọḅịa.