Read kirikeni Jems 2 Bible Online

Jems 2 - kirikeni bible

Jems 2

¹Ị̀ya mịnapụ, wa Nyanaḅọ Jizọs Kraịst Ḅe ḅereni apụ ḅara ḅụ, ó tomoni-a tọrụḍiki ḅara se nweni na anga ma.

²Gbọrị ala kọnḅọ nemikase goli ḅaratụmgbalị chụaye chụa se iḅi-a ḅụchụaye nwọ chụa se ọ́mịna koḅiria ḅie sọ ḅo, se gbọrị igweinḅọ pịkị apụrụmba ma ḅiri se sọ ḅo ọkụma.

³Ị́ nemikase osi se iḅiọkụ yeḅiri ḅọ ḅe pịrịtẹịn, se nwọse ọ̀ ḅẹ, “Mịn iḅitẹịn ịkasịe mị ọgọnọ sime,” ọkụma nwọse igwein ḅọ ḅe ḅẹ, “Anịnyọ chịẹ, anịkanịka mịọ kpọnjị sime ị̀ ḅụọ chuku,”

⁴anịọkụma ọ́mịna ogboku ọ́ dapụ mịẹkịrịma ḍumokọn-aḅẹ nwọ ḅẹ ḅẹrẹḅarasi ọ́ nwọ nyanasam; pịkị si kuḅie ḅụ ḅẹrẹkọn-arị apụ ọ́ nwọ sọsam.

⁵Ó poki, ị̀ ḅụ yela mịnapụ! Tamụnọ Ḅe mịn tomonikiri mị ḅie igwein apụma sẹlẹ se ini ḅereni ḅụ alakọn apụ nwọ sọmẹ, pịkị mịẹse ini amanyanakiri mị nwọ ḍiaọkịmẹ, ò ḅereni ọ̀ ḅẹlẹma apụma pịrịye mị.

⁶Ọkụma igwein apụma ómine ini osikẹ! Tapụ ọ́ pụnụma se ọ́ fọnọ ḅẹrẹkọn apụma tọrọkọ mun? Alakọn apụ ma-ẹ!

⁷Ini mịn ini se ọ́ pịrị iḅi ẹrẹ mị nwọ ḍukosima apụ ma-ẹ.

⁸Ọ́ karakaraye mị mịẹarị apụ nwọ sọḅịa ó nemikase Amanyanakiri oloko mị ḍukoarịye nwọ mịẹ ọkụma; anị fịafịa ḍiri mị ḅie simeye mị, “Ị́ ḅụ ḅẹlẹma ḅara nwọse ị́ juo tomoniḅọ ḅẹlẹma.”

⁹Ọkụma ị́ nemikase ḍikitọrụ ḅụ ini sime ḅara nwọ ḍikima ini na angamẹ ḅẹḅẹ, ị́ si mịẹmẹ nwọ ḅẹ ḅẹrẹḅarasi ị́ nwọ nyanasam, Oloko mị ḅẹrẹḅarasi se ị́ pịrịḅịa, oloko kanḅọ ḅara ḅụ.

¹⁰Oloko mị tọnye ma ḅụ gbọrịye nwọ kanḅọ goyegoye, iniḅọ arịmgba nwọ kansam.

¹¹Anịatịḅị ḅẹ na, “Sẹfị ma,” nwọ ḅẹ gbọrịḅọ ḅe, mị pịkị ḅẹye-ẹ, “Nweni ḅaa ma.” Anịẹrẹchị ị́ sẹfịka se nweni ḅaamẹ ḅẹḅẹ ị́ ḅo oloko kanḅọ nwọ sọmẹ.

¹²Wa finma oloko mị ḅẹrẹkọn pịrịḅịa apụ ḅara ọ́ nwọse ọkwẹịn kọn pịkị ye mịẹ.

¹³Anịatịḅị Tamụnọ Ḅe ọ̀ ḅẹrẹkọn-arị sịkị, ò ḍikitịḅịfoin nyana ḍikitịḅịfoin nyanaka ḅọ nwọ pịrị ẹkẹ, anịatịḅị ḍikitịḅịfoin ọmụḅaraiḅi nyana-nyanamẹ ḅẹrẹkọn ḅụ.

¹⁴Ị̀ya mịnapụ, anị che iḅiyemịẹ ḅe, nemikase tomoniḅọ nwọ ḅẹ na, ò ḅereni nyanamẹ se fịrị ḅụ anị ḍiepakụmakẹ nwọ ḅe ọkụma? Oria ḅereni mị anị ineda ọ̀ ḍụaḅe?

¹⁵So si owuapụ anịkanịka eremeni mịnapụ omi-ẹ, ḅụchụaye na fịye na ḅụpalịma apụ ọkụma ini anị nyanakẹ.

¹⁶Che iḅiye anịa ḅie omi, nwọse ini ḅe, “Tamụnọ Ḅe ọ́ ḅẹlẹma! Ye ọ́mịna ḅụ garagara, ọ́ pịkị fị ḅụlọ ḍụḅama!”—ḍumo ḅụ inia ḅụpalịmaye ma nwọse ini pịrịka ḅụ?

¹⁷Anị ḅereni mị simeọkụ-ẹ: anị ngẹrị sime se, fịrị anị na ofori-ẹ ḅẹḅẹ, anịọkụma anị fịsam.

¹⁸Ọkụma nweniḅọ nwọ ḅẹḅịa, “Gbọrịḅọ ḅereni nyanamẹ, ísíḅọ pịkị fịrị nyanamẹ.” À se anị pẹkẹrẹḅịaye mị anị-ẹ, “Tomoniḅọ ineda fịrị ḅụ ofori ḅereni nwọ nyanaḅịa ọkụ se ị̀ ḍie. Ị̀rị̀ àrị ị̀ya fịrị ḅụ wẹrị ị̀ya ḅereni se ị́ ḍieḅịa.”

¹⁹Ị́ ḅereni na gbọrị Tamụnọ kẹngẹ omi-ẹ? Iḅimẹ! Sitẹmẹma sọ àrị anị mị nwọ ḅerenimẹ—pịkị ḅụgeregere na ḅalafa na ḅụ omi-ẹ.

²⁰Ị́rị́ oḅori ḅọ! Ị́ ḅi-ao, ini anị se ị́ ḍie na, fịrị ḅụ ofori ḅereni ye ḅụ ofori-ẹ?

²¹Nde mịna ḅieju-ḍaḅọ Ebraham ḅe ḅo Tamụnọ Ḅe ḅụ iḅiḅọ sọ ọkụ? Anị ọ̀ nwẹngị fịrị ḅụ-ẹ, ori oria tọkụ Aịzịk ḅe se agbamịẹ ẹbẹ ọgọnọ agbamịẹ sịkị ḅụ.

²²Ị́ ọrịka? Oria ḅereni mị na oria fịrị mị na gboloma fịrịnwẹngịmẹ; oria fịrị mị oria ḅereni mị mịẹse anị karaye nwọ sọmẹ.

²³Fịafịa ḍiri mị pịkị ḅo kọkọmaye nwọ sọmẹ, anị nwọ ḅẹmẹ na, “Ebraham ḅe Tamụnọ Ḅe ḅerenimẹ, pịkị ọ̀ nyana ḅereni mị gose, Tamụnọ Ḅe karakaraye mịẹḅọ ḅara nwọse ori ọkịmẹ.” Anịẹrẹchị Tamụnọ ikiaḅọ ini nwọse Ebraham ḅe chịnmẹ.

²⁴Anịọkụma ómine ọrịsam na, tomoniḅọ nwẹngị fịrị ḅụ mị iniḅọ ḅọrọ ḅo Tamụnọ Ḅe ḅụ ḅo iḅiḅọ nwọ sọye-ẹ, iniḅọ ḅereni mị ḅụ kẹngẹkẹ.

²⁵Anị anị pịkị Rehab amanwẹngị eremeniḅọ ma ḅụ simeọkụ mị-ẹ. Arịa fịrị ḅụ á ḅọrọ Tamụnọ Ḅe na ḅẹrẹfamasaḅọ nwọ sọmẹ, anị ama ẹnyẹ Izrẹlapụma daọkị se ḅarachụa ini pịrị se ini jịn ateli ḅụ ḅọrọ se so ye mị gose.

²⁶Anị anị simeọkụ-ẹ, tẹmẹ mị ḅie ofori oju mị nwọ fị ọkụ mị anị fịrị ofori ḅereni mị sọ fị ọkụ mị-ẹ.