Read kirikeni Jems 3 Bible Online

Jems 3 - kirikeni bible

Jems 3

¹Ị̀ya mịnapụ! Ómine mgba yeḍieapụ sọ ẹkẹ. Ó nemimẹ na mine yeḍieapụ ma ḅẹrẹkọn mị, kụrọtẹịn jịn apụ ye nwọ nẹngịḅịa.

²Mine wa sịkị sịkị ḅụ mịẹirima nyana-nyanamẹ. Ọkụma tomoniḅọ nemikase ọkwẹịn ḅụ mịẹirima nyanakẹ ḅẹḅẹ, iniḅọ karagbasịmẹ, pịkị ineda ḅẹrẹtọn iniḅọ ḅụ pịrịḅịa.

³Wa ḍiki se asụn ḅe ḅịpị ọlọmẹ, mịẹse wa ḅi ḅara ọ̀ nwọ mịẹḅịa ọkụ, anị ḅụ wa pịkị ineda ọ̀ mịẹse wa ḅi anga mị ọ̀ nwọ mun mẹ.

⁴Anịkanịka owoin arụ mị ḍụḅa laḅara mị nwọse ḅiekoroma, kụrọ fọrụ pịkị anị fọnọ nwẹngịarị ḅara mị na, fịọn kala jụọịn ineda anịa ḍukunofẹmẹ, se anịa ḍukunofẹḅọ ḅe ḅẹnyọ ḅẹnyọ anị pịkị nwọ mun mẹ.

⁵Anị ḅịpịḅieḅẹlẹ mị sọnị simeọkụ-ẹ; anị boka laḅara mị ḅụ, anị ineda opu aye se ḅụ bomaḅịa. Kọrịarị fịnịḅịpị kalaye, ineda opu piri dọkịmaḅịa ọkụ nwọse ḅiekoroma!

⁶Ḅịpịḅieḅẹlẹ mị fịnị simeọkụ simemẹ, anị anị mịẹirima ḅụ ḅein tomonikiri-ẹ. Mịna oju ḅie anị kiri nyanamẹ, se pịkị mịna bebe oju mị mgba ḅụ ḅọrọ si mịẹmịẹye mị wasamaḅẹ. Anị wa se okorona okorona kọrịfịnị mị ḅie chumẹ.

⁷Tomoniḅọ ḅe ori ineda tẹmẹaye mamgba nwọ ḍikiḍiki se àrị ḅarị owoi ẹkẹ, se pịkị ọkọ se—owoi-a nama mamgba na, fenima na, ikiriarịyema na, injima na nwọ ḍikiḍiki se àrị deinmasam.

⁸Ọkụma ineda ḅịpịḅieḅẹlẹ mị mịẹse anị deinmasa ḅọ ma ofori-ẹ. Anị siye-ẹ pịkị anị ọlọ ḅoḅo ọkụ ofori-ẹ, nweni ḅaaḅaa àrịye anịa ḅụ ḅeinmẹ.

⁹Wa anị se mịẹḅaka se wa Nyanaḅọ pịkị Ḍaḅọ Ḅe ḅẹmẹ, pịkị anị se nime se mịna juo-a tomonima woriaḅẹ, Tamụnọ Ḅe ọ̀ ḅụ kịkẹma tẹmẹ apụma.

¹⁰Mịẹḅaka ḅẹ ọkwẹịn na, nimeworiaye ma na, mị gbọrị ḅịpị mị ḅie àrị pakaḅomẹ. Ị̀ya mịnapụ! Anị ọkọ paka gbẹịnkẹ!

¹¹Ḅu mengi na ala mengi na gbọrị nyọ ḅụ ideri pakaḅo ẹkẹ.

¹²Ị̀ya mịnapụ, figi chịn ineda oliv chịnmgbọlụ chụa ẹkẹ; tụmgbakị elelenda chịn ineda figi mgbọlụ chụa ẹkẹ, anị ala-mengi pịkị ineda ḅumengi pakụmaḅo ẹka ọkụ-ẹ.

¹³Ọ́mịna ogboku yenemi se pịkị yekaịnḅo apụ omi? Ye ini inia ḍumo ḅụ na pịkị mịẹmịẹye ḅụ na, kọkọma nemi mị ḅụ ḅo ḅụiderima elekima nwọ ḍie.

¹⁴Ọkụma nemikase ị́ kuḅiemgbọlụ ḅụ ị́ yeḍiki pụkọsoli, akụ kuḅie na, ngẹrịfị ḍọkịmẹ ḅẹḅẹ, ḅarị ḅụdekichịẹma se iruo aye ḍuko se kọkọmaye mị na tụḅụrụ ma.

¹⁵Mịn nemi ḅara mị soḅie koroḅo yekẹ; sime tomonikiri mị pịrịye-ẹ, tẹmẹ anga ḅe yekẹ ọkụma sitẹmẹ ḅe ḅụ ḅoye-ẹ.

¹⁶Yeḍiki pụkọsoli na, ngẹrịfị ḍọkị na sime nyọ, ye galagala na, simịẹmịẹye tọrụ kịrịkịrị na simeḅịa.

¹⁷Ọkụma soḅie wẹrị ḅo nemi mị anị yoriyorimẹ, tatarịye anị, deinma, ḅụnemi, pịkị ikiaḍọkị, anị pịkị ḍikitịḅịfoin na ḅeinmẹ, pịkị iḅi mịẹmịẹye ḅe sokuaye nwọ nyanamẹ; siye ḅie ḅụsin ḅụ, epekelepepe kuḅie chụaka ḅara ḅụ.

¹⁸Se iḅimịẹmịẹye mị, anị deinma mịẹ apụma, deinma ḅụ ḍipi mgbọlụma ḅụ pakaḅo sokuaye ma-ẹ.