Read kirikeni Jems 4 Bible Online

Jems 4 - kirikeni bible

Jems 4

¹Ọ́mịna ogboku sime owu ma na kamụ ma na nde anga àrị ḅo? Ọ́mịna pụkọsolimarị ayema ḅụ àrị ḅọrọḅoka, anị ọ́mịna oju ḅie sịkịmamgba owusọarị ayema?

²Ó yeḅimẹ ọkụma ọ́ ḅara lakẹ, anịẹrẹchị ọ́ ḅụkarakaramamẹ nweni ḅaa ómine anịkanịka ḅara nwọse yeḅimẹ, ọkụma ọ́ ḅara lakẹ, anịẹrẹchị ọ́ kamụsọ pịkị owusọmẹ. Ó ḅiarịye ọ́ ḅara lakẹ anịatịḅị ọ́ Tamụnọ Ḅe ḅara anị ḅikẹ.

³Ó ye ḅi se anị ọ́ ḅara lakẹ ḅẹḅẹ, anị ó se àrị ḅi koroma ma ḅụgbẹịnkẹ, se ngẹrị ọ́ ḅụtimaḅịa aye kẹngẹ mị ó ḅiye-ẹ.

⁴Kuḅie se ḅụgbana gbẹịnka apụ! Ó nemika na tomonikiri mị ḅe ikiaḅọ anị Tamụnọ Ḅe na taraka ḅọ-ẹ? Tomonikiri mị na ikia ḅiarị ḅọ goyegoye iniḅọ mịna ḅụ se Tamụnọ Ḅe na tarakaḅọ mịẹsam.

⁵Ó koroma ma na fịafịa ḍiri mị ḍukoye mị kọkọmayekẹ, “Tamụnọ Ḅe seni mịna ḅie chụa tẹmẹ mị ḅalafama ḅara nwọse ḅiarị aye nyana waraḅẹ.”

⁶Ọkụma Tamụnọ Ḅe pịrị ḍikiḅụgerere mị pịkị kụrọtẹịnmẹ. Fịafịaḍiri mị ḍuko ḅara ḅụ na, “Tamụnọ Ḅe opuayemịẹḅọ ḅe na tụḅụrụmẹ, ọkụma ḍikiḅụgerere nyana se ḅụiderima ḅọ ḅe pịrịmẹ.”

⁷Anịọkụma ọ́ ḅụiderima Tamụnọ Ḅe pịrị. Oru ḅe na tụḅụrụ, anịsịkị ori ó ḍiki mangịḅịa.

⁸Tamụnọ Ḅe kpekima ori sọnị pịkị ị́ kpekimaḅịa. Ómine ọ́mịna ḅarama sịkịrị, ómine si apụma! Ọ́mịna kuḅiemgbọlụma ọ́ nwọ mịẹfịafịama, ómine epekelepepe apụ!

⁹Ó kururu, oloku owu; ómine ọ́mịna dẹrị mị pịkị anị seni owu mịẹ, ómine ọ́mịna ḅieḅẹlẹ mị pịkị se anị seni tọrụfụrụmaye mịẹ!

¹⁰Ọ́ Nyanaḅọ Ḅe tọrọkọ ọ́ ḅụiderima, ọ̀ pịkị ó dekichịẹmaḅịa.

¹¹Mịnapụ! Ó jịnḅọ jịnḅọ ḍukosima ma. Mịna juo Kraịstḍukonwẹngị mịnaḅọ ḍukosima anịkanịka ḅẹrẹkọn iniḅọ pịrịḅọ goyegoye, iniḅọ Oloko mị nwọ ḍukosima pịkị ḅẹrẹkọn anị pịrịmẹ. Ị́ nemikase ḅẹrẹkọn Oloko mị pịrịmẹ ḅẹḅẹ, ị́rị́ ḅarị Oloko mị ḍukoye mịẹ ḅọkẹ, ọkụma ḅẹrẹkọn anị pịrị ḅọ-ẹ.

¹²Tamụnọ Ḅe kẹngẹ mị Oloko chụa pịkị ḅẹrẹkọn ḅọ ḅe-ẹ. Ori kẹngẹ mị ineda ḍụa pịkị ḅaaḅịaye-ẹ. Ị́ koroma ḅara ị́rị́ tụḅọ, se ḅẹrẹkọn ị́ juo tomoniḅọ pịrị ḅe?

¹³Mịọkụ ómine ị̀ poki, ị́ nwọ ḅẹmẹ na, “Mịmgba anịkanịka ḅa wa so nwọ pembe gbọrị opuama munḅịa, se gbọrị kụra nwọse anịanga sime tuḅo kọn pịkị ḅakama igbiki mịẹḅịa.”

¹⁴Ngịsị ị́ nemikẹ, ị́ya ḍumo mị ḅa simeḅịa ọkụ! Kpochụaka oḅuto simeọkụ anị ị́ simeọkụ-ẹ, boka sịkị nwọse sime se wasama faḅịaye mị.

¹⁵Ó ḍuko gbẹịnye anị mịn mị-ẹ, “Nyanaḅọ Ḅe nemikase ḅerenimẹ ḅẹḅẹ, wa ḍumo se mịn mị anịkanịka anị mị nwọ mịẹḅịa.”

¹⁶Ọkụma mịọkụ ọ́ ḅụdekichịẹmaḅẹ, pịkị ḅụbomaḅẹ, mị ḅụboma ḅara mị kurakẹ.

¹⁷Anịọkụma, nwọ iniḅọ mịẹ gbẹịn iḅiye mị nemi se anị mịẹka ḅọ ḅe ò si mịẹmẹ.