Read kirikeni 1 Pita 1 Bible Online

1 Pita 1 - kirikeni bible

1 Pita 1

¹Pita Jizọs Kraịst okufịrịnwẹngịḅọ ḅe gịẹịn se— Tamụnọ Ḅe sẹlẹọkịsapụ ma sẹịnma fịrịfịrịmaḍiri, anị mangị galagala mun bebe Pọntọs na, Galesia na, Kapadosia na, Esia na, pịkị Bitinia sẹma ḅie ịnyasọ apụ ma-ẹ.

²Tamụnọ Ḍaḅọ Ḅe ḅi ḅara ḅụ, ori ọ̀ Tẹmẹ Ḅe ḅụ ḅọrọ ọ́ sẹlẹọkị se osiḅụ sime apụ nwọ mịẹmẹ, mịẹse ó Jizọs Kraịst Ḅe ḅịpịpoki se oria pulo mị pịkị ọ́ mịẹfịafịamaḅịa ẹrẹchị. Ye ḍikiḅụgerere na deinma na ḅein ḅara ḅụ ómine na sime.

³Ó ye wa mịẹḅaka seni wa Nyanaḅọ Jizọs Kraịst Tamụnọ pịkị Ḍaḅọ Ḅe ḅẹ! Oria opu ḍikiḅụgerere mị gose ori ịwọ ḍumo se wa pịrịmẹ, anị fịḅụ Jizọs Kraịst Ḅe sịsẹma mị ḅụ. Mịn ḍumo mị tọrụseḍikiye nwọse mịna ḅie chumẹ.

⁴Anịẹrẹchị wa tọrụ se Tamụnọ Ḅe se oria tomonima wẹrịma opu ḅẹlẹma ma nyana mị ḍikiaḅẹ. Ori àrị seni soḅie ọ́ wẹrịmamẹ, anị àrị ngịsị ḅụrụ ẹkẹ anịkanịka si ẹka anịkanịka sịkịrị fa ẹka nyọ mị-ẹ.

⁵Àrị sime ómine ini ḅereni mị ḅụ ḅọrọ se Tamụnọ Ḅe kụrọ ḅụ koko koroma ḍụaḅọrọma mị wẹrịma apụma pịrịmẹ, anị kuluma sịkị mị ḅie mịẹḅelemaḅịa ẹrẹchị ini karakarama koroma sa yema.

⁶Ọ́ mịn gose ḅieḅẹlẹ, mịọkụ ọ́ kala sịkị se ngịrị gbẹịnmẹ nwọ ḅẹ sọnị, anị ómine ọrịarị tọn-a ḍaḍiki tọrụsiọrị ma gose.

⁷Anịgose ọkọ pakaye anị seni ọ́mịna ḅereni mị ḅe karakara nwọ nemiḅịa ẹrẹchị-ẹ. Goli ini ineda simaḅịa ye mị sọnị, ini anị se fịnị ḅie elekima ḍikimẹ, anịẹrẹchị ọ́mịna ḅereni yelatẹịn goli nẹngịye mị sọnị, ini gbarịmaka ḅara ḅụ anị elekima ḍikiḅịa, mịẹse anị chịẹsimeḅịa ọkụ. Anịsịkị ini ḅelema Jizọs Kraịst Ḅe ḍiepakụmaḅịa Ene mị ḅụ ó tokoni na, boma na, pịkị osi na nyanaḅịa.

⁸Ómine ọ̀ ḅẹlẹmamẹ, ma ómine ori ọrịkẹ nwọ ḅẹ sọnị, ọ́ pịkị ò ḅerenimẹ mịọkụ ma ómine ori ọrịkẹ nwọ ḅẹ sọnị. Anịẹrẹchị ḅịpị ineda ḍukoḅịa ọkụ ofori opu boma nyana ḅieḅẹlẹ ọ́ nwọ kọn,

⁹anịatịḅị ó gose ḅereni nyanaye mị ọ́mịna ḅara la aḅẹ, anị ọ́mịna tẹmẹma ḅe ḍụaḅọrọma mị-ẹ.

¹⁰Mịn ḍụaḅọrọma mị gose ịkịankoroapụma tọrụkweinma anịaye nwọ ḍọkị se pịkị gbela nemimẹ; pịkị mị Tamụnọ Ḅe seni ọ́ pịrịḅịa ḍiepịrịye mị ḅe ịkịan nwọ koromẹ.

¹¹Ini ḅụkụrọma sịkị mị ḅo laḅịa sịkị mị na anị wẹrị ḅoḅịa ḅara na nwọ ḍọkịmẹ. Mịn sịkị mị, anị inia ḅie sime Kraịst Tẹmẹ Ḅe ḍuko sịkị mị-ẹ. Tẹmẹ Ḅe Kraịst Ḅe ọrịḅịa tọrụsiọrị ma ḅe ịkịan nwọ koro sịkị mị, pịkị àrị na ḅoḅịa boma mị na.

¹²Tamụnọ Ḅe ḅelema se ma ịkịankoroapụma ḍiemẹ na ini nwẹngịarị fịrịma inia ḅụ iḅi gosekẹ, ọkụma ọ́mịna ḅụ iḅi gose-ẹ, anị soḅie ḅo Fịafịa Tẹmẹ Ḅe kụrọ ḅụ ḅọrọ Iḅi Ḅẹrẹ mị ḍukopakụma okunwẹngịapụ ma ḅịpị ḅụ ọ́ ḅọrọ naa sa yema. Mayema enjẹlapụma sọnị àrị kaịnḅo ḍọkịmẹ.

¹³Anịẹrẹchị, ómine ọ́mịna koroma ma karakarama fịrị mị pịrị. Ọ́ ḅụ garagarama, se okorona okorona tọrụ se ḅẹlẹma mị ḍiki ini seni ọ́ pịrịḅịaye mị, ini Jizọs Kraịst Ḅe ḅelema nwọse ó ḍieḅịa sịkị mị.

¹⁴Ọ́ Tamụnọ Ḅe ḅịpịpoki, se ọ́ ḅarị ḅereni ma ọ́mịna ḍumo pịkị siaye nwọ ḅi, ma ó yenemika sịkị ḅara mị.

¹⁵Anịnakaraka, ọ́ mịẹḅịa ye mamgba ḅụ ọ́ fịafịa, ọ́ chịn Tamụnọ Ḅe fịafịa ọkụ mị.

¹⁶Gịẹịn ḍiri mị nwọ ḅẹmẹ, “Ọ́ fịafịa ḅụ sime, anịatịḅị ị̀rị̀ à fịafịamẹ.”

¹⁷Ḍaḅọ ọ́ nwọse ọ̀ chịnmẹ, ọ́ Tamụnọ Ḅe tẹkẹarị sịkị, anị gbọrị ḅara nwọse ḅẹrẹkọn nwenimgba pịrịpịrị Ḅọ Ḅe, ḅọḅọ mịẹsaye sime ḅara ḅụ, anịẹrẹchị ọ́ mangịma se ọ̀ pịrị ḅụ wẹrị tomonikiri ọ́mịna ḍumo ma ḅụ kọn ḍin ma nwọ kọn.

¹⁸Anịatịḅị ó nemimẹ se ọ́mịna olomu-aḍapụma ḅara ọ́ daọkịsa yeḅụsọka papa ḍumo mị ḅie, ọ́ pẹkẹrẹ pakụmaḅo gose gbẹịn sa mị la-ọkụ. Anị papa simaḅịa goli na seleḅa naakẹ!

¹⁹Kraịst Ḅe yela pulo mị ḅụ ọ́ ḅọrọ ọ́ ḅụ nyanamẹ, anị tọkọrọye anịkanịka gwagwa ye ḅụ ofori anana tọkụ simeọkụ sime ḅọ ḅe.

²⁰Tomonikiri mị ma tẹmẹka sịkị ngịsị Tamụnọ Ḅe ọ̀ sẹlẹmẹ, se ọ́ tịḅị gose ma kuluma enema ḅie ḅelema ò ḍiepakụmamẹ.

²¹Ọ̀ ḅụ ḅụ ọ́ ḅọrọ se Tamụnọ Ḅe ḅerenimẹ, fịḅụ ọ̀ sịsẹma se boma seni ọ̀ pịrị ḅọ ḅe; anị mịẹse ọ́mịna ḅereni mị na tọrụseḍikiye mị na Tamụnọ Ḅe ḅụ àrị oḅolomẹ.

²²Mịọkụ ọ́ kọkọmaye mị ḍukoye nwọ mịẹsaye gose, ómine ọ́mịna ḅụ ma nwọ mịẹfịafịamasam, se kọkọma ọ́mịna juo ḅereni apụma nwọ ḅẹlẹmaḅẹ, ọ́ karakara ḅara nwọse ó kuḅie laḅara se jịnḅọ jịnḅọ ḅẹlẹma.

²³Anịatịḅị ḍumo pịkị simegbaso Tamụnọ ọkwẹịn mị ḅụ, ini ḅọrọ pịkị kpoto óyisam, anị fịfịka gbọrị ḍaḅọ awọ ḅara ḅụ, fịḅịa ḅokẹ.

²⁴Fịafịaḍiri mị ḍuko ḅara ḅụ, “Tomoni mamgba osuein simeọkụ, anị ini simeọkụ-ẹ, inia boma mamgba pịkị ngwengwe simeọkụ simemẹ. Osuein mị samịna, se ngwengwe ma pịkị sokoro saramẹ,

²⁵ọkụma Nyanaḅọ Ḅe ọkwẹịn mị anị simegbasomẹ.” Mịn ọkwẹịn mị anị ini ḍuko ọ́ pịrị Iḅi Ḅẹrẹ mị-ẹ.