Read kirikeni 2 Pita 1 Bible Online

2 Pita 1 - kirikeni bible

2 Pita 1

¹Fịrịfịrịmaḍiri mị Saịmọn Pita, Jizọs Kraịst Ḅe fịrịnwẹngịḅọ pịkị okunwẹngịḅọ ḅe ḅara anị ḅo ómine— Ini mịna Tamụnọ pịkị Ḍụaḅọrọmaḅọ Jizọs Kraịst Ḅe karakara mị ḅụ wa ḅọrọ nyana yela ḅereni mị nyanasapụ ma pịrịmẹ:

²Ye ḍikiḅụgerere na deinma na ḅeinma ọ́mịna ye nwọ sọ Tamụnọ Ḅe na Jizọs wa Nyanaḅọ Ḅe ḅụ ọ́ ḍawọ nemiye mị.

³Tamụnọ Ḅe fịafịa kụrọ mị anị wa ḅiye nwọ mịẹ wa pịrịsam, anị mịẹse wa kọkọma Tamụnọ tẹkẹ ḍumokọnḅịa ọkụ mị ḍawọ nemisam. Ori gbọrịḅọ ḅe anị wa chịnḅo oria boma mị na iḅi mị na nwọ ḍiaọkị-ẹ nwọ ḅẹ ḅọ ḅe-ẹ.

⁴Mịn ḅara mị ḅụ ò ḅereni wa pịrị opu yela ḍiepịrịayema ọ̀ nwọse wa pịrịsam, mịẹse ma ḍiepịrịayema ḅụ ómine ineda mịn tomonikiri mị ḅie sime nweni famaḅịa opu si ḅụ pẹlẹsoḅịa ḅara. Anịsịkị, ó ḅo ineda oria ḅụgbiripumaye ma sime ḅara nwọ ḍiaọkịḅịa.

⁵Anị gbọrị ḅara ḅụ ọ́ ḅụkụrọma iḅi mịẹmịẹye se ọ́mịna ḅereni mị ḅie chụa; ọ́mịna iḅi mị ḅie ọ́ ḍawọnemi se chụa,

⁶ọ́mịna ḍawọnemi mị ḅie ḅụọlọ se chụa; ọ́mịna ḅụọlọ mị ḅie ikirima nyana ọ́ nwọse chụa; ọ́mịna ikirima nyana mị ḅie Tamụnọ kịkẹ ḍumo ọ́ nwọse chụa.

⁷Ọ́mịna Tamụnọ kịkẹ ḍumo mị ḅie, mịnapụ ḅẹlẹma ḍumo ọ́ nwọse chụa; pịkị mịnapụ ḅẹlẹma ḍumo mị ḅie, ḅẹlẹma ọ́ nwọse chụa.

⁸Mayema anị ọ́ nyanaḅịaye ma-ẹ, se ó nemikase ḅakama àrị nyanamẹ ḅẹḅẹ, àrị ọ́ mịẹse wa Nyanaḅọ Jizọs Kraịst Ḅe ḅụ ọ́ ḍawọnemisaye ma ḅie ọ́ kụrọma fịrịnwẹngị pịkị yeḅụsọapụ nwọ sọḅịa.

⁹Ọkụma àrị nyanakaḅọ goyegoye iniḅọ tọrụmgbọlụ ginigini so ọkụma, iniḅọ ineda ye ọrị ẹkẹ, se pịkị siḅụ ini iniḅọ mịẹfịafịama ḅọrọsam nwọ ḅẹye mị sọnị iniḅọ ḅieḅaramasam.

¹⁰Anịẹrẹchị, ị̀ya mịnapụ, ọ́ ḅụkụrọma mịẹ anị ọ́ ḅụokoro gbaso Tamụnọ Ḅe ọ́ chịn pịkị ọ́ sẹlẹọkịsam nwọ ḅẹye mị.

¹¹Mịn ḅara mị ḅụ karakarama ḅeinsa kụrọ ini nwọse ọ́ pịrị se ó se wa Nyanaḅọ pịkị mịna Ḍụaḅọrọmaḅọ Jizọs Kraịst Ḅe kuluma nyanaka Amanyanakiri mị ḅie sọḅịa.

¹²Anịgose, à sịkịmamgba ma ḅẹrẹ ma se ọ́mịna ḅie koromaḅịa, ómine àrị lekirisam nwọ ḅẹ sọnị, ómine ọkị sa karakaraye mị ḅụ ọ́ pịkị kuno chụasam nwọ ḅẹ sọnị.

¹³À koromamẹ na à nwọ ḍumo warasịkị mị kẹngẹ ḅụ, anị à kụrọ nyanaye-ẹ, ma ḅẹrẹ ma ḅụ ọ́mịna koroma ma jike.

¹⁴À nemimẹ na ḅarị ḅọlọ ẹka sịkị ḅụ wa Nyanaḅọ Jizọs Kraịst Ḅe ḅelema ḍuko ị̀ pịrị ḅọrọsa ḅara ḅụ, mịn fịḅịa oju mị à nwọ sinkoromaḅịa.

¹⁵Àrị inedaḅịa ḅara à nwọ mịẹḅịa, anịsịkị ḅọkọ finji ọ́ pịrịḅịa, mịẹse sịkịmamgba ọ́ ma ḅẹrẹma nwọse ḅiekoromaḅịa ḅara, à fị ḅọrọso sịkị.

¹⁶Wa papa ḍuko ḅọrọsa kaḅo ḅẹrẹ ḍuko ọ́ pịrịkẹ, wa Nyanaḅọ Jizọs Kraịst Ḅe oria opu kụrọ na ḅoḅịa nwọ ḅẹye mị wa nwọ mịẹse ọ́ nemiarị sịkị. Wa ḅarana tọrụmgbọlụ se oria opu mị ọrịmẹ.

¹⁷Wa omi-ẹ, Tamụnọ Ḍaḅọ Ḅe osi na boma na nwọse ọ́ pịrị sịkị, anịsịkị Opu Boma pụkọ koroḅo ọ̀ lamẹ, se nwọ ḅẹmẹ, “Ḅe anị ị̀ ḅụ yela Tọkụ Ḅe-ẹ, ori opuma ị̀ ḅụḅẹlẹmẹ!”

¹⁸Mine na mịnaḅụ na mị pụkọ mị wa naamẹ, anị soḅie koroḅoarị sịkị, anị wa ori na anị osiḅụ sime tụndụ mị ọgọnọ sime sịkị ḅụ.

¹⁹Anịgose wa opu kụrọkuḅiemgbọlụ nyanamẹ anị ịkịankoroapụma oloku pakụmasa oku mị ḅụ. Anị iḅi se ọ́ mịẹḅịa, ó nemikase ọ́mịna koroma se anịaḅụ gbanamẹ ḅẹḅẹ, anịatịḅị kanakana nyọ ḅụ ḅịa mun Ene ḅa tọnjie simeọkụ mị anị simeọkụ-ẹ, se ḅaso lolia enekuḅu mị pịkị ọ́mịna kuḅie ma ḅụ ḅịapakamẹ.

²⁰Ọkụma maye mamgba nẹngịye, ó se ḅiekoroma na kpọkpọ gbọrịḅọ sọ ofori-ẹ ngẹrị mịna ḅarakuḅu ḅụ Fịafịa ḍiri mị ḅie gbọrị ịkịan nwọ pufinji.

²¹Anịatịḅị tomoniḅọ kụrọ ḅụ ḅo gbọrị ịkịankoro oku ofori-ẹ, ọkụma tomonima Fịafịa Tẹmẹ Ḅe kụrọ ḅụ anị ini sime se Tamụnọ Ḅe ḅara ḅo oku mị ḍukopakụmaye-ẹ.