Read kirikeni 1 Jọn 1 Bible Online

1 Jọn 1 - kirikeni bible

1 Jọn 1

¹Ḍumo Ọkwẹịn mị gbolomaye mị wa gịẹịn ọ́ sẹịnmarịye-ẹ, anị sakị sịkị ngịsị simeye mị. Wa anị naasam, pịkị mịna tọrụmgbọlụma se anị ọrịsam, iin, wa anị ọrịsam, wa pịkị ḅara se anị lamasam.

²Mịn ḍumo mị mịnaḅụ ḍiepakụma sịkị, wa anị ọrịmẹ; anịẹrẹchị wa anị simegbamaso ḍumo mị gbolomaye ḍuko ọ́ pịrịmẹ, anị Ḍaḅọ Ḅe na gbọrị ḅụ simeye mị, ini mịẹse wa anị nemimẹ.

³Wa ọrị pịkị naasaye mị anị wa pịkị ḍukopakụma ọ́ pịrịye mị-ẹ, mịẹse ómine mine na gboloma Ḍaḅọ Ḅe na oria Tọkụ Jizọs Kraịst Ḅe ḅụ wa nyana mịẹgboloma mị nwọ nyanaḅịa ọkụ.

⁴Mịẹse mịna ḅieḅẹlẹ mị ḅeinḅịa ḅara gose anị wa mịn mị gịẹịnye-ẹ.

⁵Mịọkụ oria Tọkụ Ḅe ḅụ wa naa se pịkị ḍukopakụma oku mị anị mị mị-ẹ; Tamụnọ Ḅe anị enekuḅu mị-ẹ, ngịsị ò ḅie kanakana ofori-ẹ.

⁶Anịgose, wa ḅọrọ nemikase ori na nwẹngị gbolomamẹ nwọ ḅẹḅẹ, ọkụma, pịkị anị gbọrị sịkị mị ḅụ kanakana ḅie simeaḅẹ ḅẹḅẹ, wa iruokọn aḅẹ mịna ọkwẹịn na mịẹmịẹaye ḅụ na.

⁷Ọkụma wa ḅọrọ nemikase, enekuḅu mị ḅie angamẹ ḅẹḅẹ—anị ori sọnị enekaka ḅie anga ḅara mị—anịsịkị re mị wa jịnḅọ jịnḅọ na mịẹgboloma nyanasaye-ẹ, pịkị oria Tọkụ Jizọs Ḅe pulo mị yegoyegoye ḅụ wa sịkịrị fịafịamasam.

⁸Wa nemikase ḅẹmẹ na wa si nyanakẹ nwọ ḅẹ ọkụma wa oḅori se mịnaḅụ chịnmẹ, kọkọmaye mị pịkị mịna ḅie ofori-ẹ.

⁹Ọkụma wa nemikase mịna sima ḍukopakụma Tamụnọ Ḅe pịrị ọkụma, ori anị kuḅie se ḅụgbana gbẹịnḅọ-ẹ pịkị karakaraye mị-ẹ ḅọ-ẹ, ọ̀ mịna sima ḅụ ḅarasin wa pịrị pịkị mịna kuraka mịẹmịẹye mamgba ḅụ wa sịkịrị fịafịamaḅịa.

¹⁰Wa nemikase ḅẹmẹ na wa si mịẹkẹ nwọ ḅẹ ọkụma wa Tamụnọ Ḅe seni iruokọnḅọ mịẹmẹ, oria ọkwẹịn mị pịkị mịna ḅie ofori-ẹ.