Read kirikeni 1 Jọn 3 Bible Online

1 Jọn 3 - kirikeni bible

1 Jọn 3

¹Ḍaḅọ Ḅe wa ḅẹlẹma la-ọkụ ọ́ nwọ ḍiki! Oria ḅẹlẹma mị ḅaka so ọkụma Tamụnọ awọ ini nwọse wa chịnmẹ—anị wa pịkị kọkọma simeọkụ-ẹ. Tomonikiri mị ma Tamụnọ Ḅe nemikaye gose, ma ini wa nemikẹ.

²Ị̀ya iḅi ikiapụ, mine ma mịọkụ Tamụnọ awọ-ẹ, ọkụma wa ḅo sọḅịaye ma ḅelepakakẹ. Ọkụma wa nemimẹ na Kraịst Ḅe ḅoḅịa sịkị, wa ọ̀ kịkẹḅịa, anịatịḅị ò jokoma simeọkụ anị wa se ori ọrịḅịa ọkụ-ẹ.

³Kraịst Ḅe ḅụ mịn koroma mị nyanaḅọ goyegoye, ọkọ seni mịnaḅụ se fịafịama koroma koromamẹ, anị Kraịst Ḅe na mịnaḅụ na ọ̀ ḅụ se fịafịama koroma ọkụ mị.

⁴Si mịẹ ḅọ goyegoye iniḅọ Tamụnọ oloko kan-aḅẹ, anịatịḅị si mị anị oloko kanye-ẹ.

⁵Ó nemimẹ na Kraịst Ḅe gose ḅo ye anị sima dekisinḅịa ẹrẹchị-ẹ; si pịkị ọ̀ ḅụ ofori-ẹ.

⁶Anịẹrẹchị Kraịst Ḅe na gbọrịḅụ sime ḅọ goyegoye iniḅọ ḅarị si mịẹkẹ: ọkụma pa si mịẹmịẹarịḅọ goyegoye ma iniḅọ ori ọrịkẹ, iniḅọ pịkị ma ò nemikẹ.

⁷Ị̀ya awọ, ye gbọrịḅọ sọnị oḅori se ọ́ chịnma! Karakaraye mịẹ ḅọ goyegoye iniḅọ karakara ḅọ-ẹ, anị Kraịst Ḅe sọnị karakara ḅọ ọkụ mị-ẹ.

⁸Pa si mịẹarịḅọ goyegoye sime Oru ḅe pịrị ḅọ-ẹ, anịatịḅị Oru ḅe sakị sịkị ngịsị ò si mịẹmẹ. Mịn mị ẹrẹchị anị Tamụnọ Tọkụ Ḅe gose ḅoye-ẹ, mịẹse Oru ḅe fịrịma simaḅịa ọkụ.

⁹Tamụnọ tọkụ goyegoye ḅarị si mịẹmịẹkẹ, anịatịḅị Tamụnọ Ḅe sime ḅara mị ò ḅie anị omi-ẹ, pịkị Tamụnọ Ḅe anị Ḍawu Ḅe-ẹ nwọ ḅẹye ẹrẹchị ọ̀ ḅarị ineda si mịẹkẹ.

¹⁰Mịn anị Tamụnọ awọma na Oru ḅe awọma na ogboku sime kịrịye mị-ẹ: karakaraye mịẹka anịkanịka iniḅọ mịnaḅọ ḅẹlẹmaka ḅọ goyegoye Tamụnọ tọkụkẹ.

¹¹Mịn anị sakị sịkị ngịsị ọ́ naa oku mị-ẹ; na ó jịnḅọ jịnḅọ ḅẹlẹma.

¹²Ken ḅe simeọkụ wa ọkọ sime ẹkẹ; ori ò sime Si Ḅọ ḅe pịrịmẹ, anị ò gose numbireowu Ebẹl ḅe niniye-ẹ. Cheye gose Ken ḅe ò nini? Anịatịḅị ori, ọ̀ mịẹirima nyanamẹ, ọkụma numbireowu Ebẹl ḅe ọ̀ karakaraye mịẹmẹ.

¹³Ị̀ya mịnapụ, anịgose anị ọ́mịna ḅụgbiripumaye sọ ma, nemikase tomonikiri ḅe apụma ó ḍikiḅụnwọnwọmẹ ḅẹḅẹ.

¹⁴Wa nemimẹ na wa fị mị wẹrịso se ḅo ḍumo ḅie sọsam. Wa go seni anị nemiye, anị wa mịna mịnapụma ḅẹlẹmamẹ. Ḅẹlẹma nyanaka ḅọ goyegoye iniḅọ pa fị kụrọ chuku ḅie omi-ẹ.

¹⁵Iniḅọ mịnaḅọ ḍikiḅụnwọnwọ ḅọ goyegoye niniḅọ-ẹ, ó nemimẹ na niniḅọ ḅe, ò ḅie ḅụ ma ò ḅene-ḅene ḍumo nyanakẹ.

¹⁶Mịn ḅara mị ḅụ, anị wa ḅẹlẹma mị simeọkụ nwọ nemiye-ẹ: Kraịst Ḅe oria ḍumo mị se wa pịrịmẹ. Anị-ẹ ḅẹḅẹ, mine sọnị, wa mịna ḍumo seni mịna mịnapụma pịrị gbẹịnmẹ!

¹⁷Nemikase ngọ kọnḅọ, iniḅọ mịnaḅọ ḅụfụka ḅie simeọkụ ọrị, se ḅarachụa iniḅọ pịrị ḍụkụka ọkụma, nde ọ̀ ḅẹḅịa ọkụ na ọ̀ Tamụnọ Ḅe ḅẹlẹmamẹ.

¹⁸Ị̀ya awọ, ó ye wa papa ḅịpịpẹkẹrẹ se tomoniḅọ ḅẹlẹma ma, ọkụma ye mịẹmịẹye ḅụ, anị kọkọma ḅẹlẹma nwọ sọ.

¹⁹Anị-ẹ ḅẹḅẹ, mịn wa nemiḅịa ḅara-ẹ na wa sime kọkọmaye mị nwọ pịrịmẹ ḅẹye mị; mịn ḅara mị ḅụ anị wa nemiḅịaye-ẹ na Tamụnọ Ḅe tọrụkuḅu wa kụrọkuḅie nwọ nyanamẹ.

²⁰Mịna koromama nemikase ḅẹrẹkọn mịna ḅara simamẹ ḅẹḅẹ, wa nemimẹ na Tamụnọ Ḅe ḍụḅatẹịn mịna koromama nẹngịmẹ, pịkị yegoyegoye nwọ nẹngịmẹ.

²¹Anịgose, ị̀ ḅụ yela ikiapụ, nemikase mịna koromama ḅẹrẹkọn mịna ḅara simakẹ ḅẹḅẹ, Tamụnọ Ḅe tọrọkọ ḅụ wa kụrọkuḅie nyanamẹ.

²²Ọ̀ ḅara wa ḅiye goyegoye wa nyanamẹ, anịatịḅị oria olokoma wa nwọ koko, pịkị ọ̀ ḅụḅẹlẹye nwọ mịẹmẹ.

²³Ọ̀ chụa wa pịrị oloko anị, wa oria Tọkụ Jizọs Kraịst Ḅe ḅereni se, pịkị jịnḅọ jịnḅọ ḅẹlẹma, anị Kraịst Ḅe pa ḍuko wa pịrị ọkụ mị-ẹ.

²⁴Tamụnọ Ḅe olokoma koko ḅọ goyegoye, Tamụnọ Ḅe na gbọrịḅụ omi-ẹ, Tamụnọ Ḅe pịkị ini na gbọrịḅụ ḅụ simemẹ, Tamụnọ Ḅe seni wa pịrịsa Tẹmẹ Ḅe gose, wa nemimẹ na Tamụnọ Ḅe ómine na gbọrịḅụ omi-ẹ.