Read kirikeni Bẹrẹkọn Apụ 17 Bible Online

Bẹrẹkọn Apụ 17 - kirikeni bible

Bẹrẹkọn Apụ 17

¹Gbọrị sịkị Maịka nwọ chịn gbọrị owuḅọ simemẹ, Ifrem chịngị ọgọnọ sẹ mị ḅie ḅụ ori angamẹ.

²Ọ̀ nwọse nyọngọrọma ḅẹmẹ, “Ini àrị ị́ya seleḅa mẹndẹ jieasi fịnjịma nwọ furu sịkị, ị́ worinime karị furuḅọ ḅe ọgọnọ gbanamẹ. À naamẹ ị́ yemị mịẹ sịkị. Ḍiki, igbiki mị ị̀ ḅara omi-ẹ. Ị̀rị̀ mị anị dekiye-ẹ.” Nyọngọrọ ma nwọ ḅẹmẹ, “Ye Nyanaḅọ Ḅe ị́ ḅẹlẹma, ị̀ya tọkụ!”

³Ori igbiki mị se nyọngọrọma pịrịmẹ, se á nwọ ḅẹmẹ, “Mịẹse worinime mị ḅo ị̀ya tọkụ ḅe ọgọnọ gbana ẹka ẹrẹchị, à ḅarana seleḅa mị seni osiḅụ wẹrị se Nyanaḅọ Ḅe pịrịaḅẹ. Ini chịn se oru kara se seleḅa mị seni anị oḅoloḅịa. Anịẹrẹchị mịọkụ, à pịkị seleḅa pẹkẹrẹ ma seni kpoto ị́ pịrịḅịa.”

⁴Anị ori àrị seni pịkị nyọngọrọma pịrịye-ẹ. Seleḅa pẹkẹrẹ oyiasi á nwọ ọkị seni ikulele tẹmẹnịḅọ pịrịmẹ, se ọ̀ chịn seni oru kara se seleḅa mị seni anị sara gbẹịnmẹ. Maịka ḅe warị ḅie anị simemẹ.

⁵Ḅe Maịka ḅe ori ọ̀ ḅarakuḅu tẹkẹ nyọ nyanamẹ. Ori oru tẹmẹ pịkị ifọd na nyanamẹ, oria gbọrị owutọkụ ọ̀ nwọ tọnmẹ oria agbamịẹḅọ ḅaraḅụ.

⁶Anịsịkị mị ḅụ Izrẹl ḅie amanyanaḅọ ofori-ẹ, ọrụḅọ-ọrụḅọ nụḅọ ḅụḅẹlẹḅara nwọ mịẹmịẹmẹ.

⁷Anịsịkị ḅụ gbọrị asẹmẹnị Livaị furo ḅieḅọ simemẹ, Bẹtlihẹm Juda ama mị ḅie ori angamẹ.

⁸Ọ̀ Bẹtlihẹm mị wẹrịso se mun ori angaḅịa jịn anga ḍọkịmẹ. Ọ̀ nwẹngịma mun-arị sịkị, ò ḅo Maịka ḅe warị bịanmẹ Ifrem chịngị ọgọnọ sẹ mị ḅieḅụ.

⁹Maịka ḅe nwọse ò gbelamẹ, “Ndeju ị́ sime ḅo?” Ọ̀ nwọse ọ̀ pẹkẹrẹmẹ, “Ị̀rị̀ Livaị furo ḅieḅọ-ẹ, Bẹtlihẹm Juda mị ḅie. Àrị angaḅịa nyọ à nwọ ḍọkịaḅẹ.”

¹⁰Maịka ḅe nwọse ọ̀ ḅẹmẹ, “Ị̀rị̀ na anga. Se tetema pịrịḅọ na agbamịẹḅọ na nwọsọ ị̀ pịrị, se kụra tịḅị seleḅa oyi-a pẹkẹrẹ na, ḅụchụaye na, pịkị ị́ya fịye na à nwọse ị́ pịrịḅịa.”

¹¹Asẹmẹnị Livaị furo ḅieḅọ ḅe ò ḅerenimẹ na ọ̀ Maịka ḅe na angaḅịa se ḅo oria owutọkụ ḅara se ori na angamẹ.

¹²Maịka ḅe ò seni oria agbamịẹḅọ nwọ mịẹmẹ, se Maịka ḅe warị ḅie ori angamẹ.

¹³Maịka ḅe nwọ ḅẹmẹ, “Mịọkụ Livaị furo ḅieḅọ nwọ agbamịẹḅọ sọ ị̀ pịrịsa sịkị, à nemimẹ na Nyanaḅọ Ḅe ọ̀ mịẹse ye ị̀rị̀ na iḅiḅịa.”