Read kirikeni Bẹrẹkọn Apụ 19 Bible Online

Bẹrẹkọn Apụ 19 - kirikeni bible

Bẹrẹkọn Apụ 19

¹Àrị enema ḅie Izrẹl mị ma amanyanaḅọ nyanaka sịkị mị ḅụ, gbọrị Livaịḅọ simemẹ, Ifrem chịngị ọgọnọ sẹ mị ọḅụju ọ̀ salama angamẹ. Bẹtlihẹm Juda mị ḅie gbọrị eremeni tọkụ ori na ịgwa sime nwọ kọnmẹ.

²Ọkụma ọ̀ mịẹye á ḅụosọse á so Bẹtlihẹm ḅie ḍawu ḅe warị mun sime inein-a akalụ nwọ lamẹ.

³Mịn tomoniḅọ ḅe, ò kuḅie ḅụ tọn pẹlẹ se á damamun se ọkwẹịn á pịrịye-ẹ na á vinpịkị ọ̀ damaḅo. Ori oria fịrịnwẹngịḅọ ḅe na mama yepụra asụn na nwọ ọkị ọ̀ ḅụ chụa mun mẹ. Tọkụ ma warị mị se Livaịḅọ ḅe ḍie se ọ̀ sọmunmẹ, se tọkụ ma ḍaḅe dewu ḅe ọrị sịkị, ori iḅiọkụma ori ọkịmẹ.

⁴Ḍawu ḅe ḅimẹ na ọ̀ pa kele ini na sime, anịẹrẹchị tẹrẹ-a ḍin ọ̀ nwọse ini na simemẹ. Ini ama na ere na anịju ḅụ yefị pịkị mọnọmẹ.

⁵Inein-a ḍin karama ene mị ḅe dede funfun ḅụ ini sịsẹmẹ se soḅịa ẹrẹchị ḅụkarakaramamẹ. Ọkụma tọkụ ma ḍawu ḅe nwọse Livaịḅọ ḅe ḅẹmẹ, “Ọ́ tatarị yefị se ó so. Anị ịnyọ se ọ́ pịrịḅịa. Ómine ineda soḅịa mị ḅịpịḅọrọ sịkị.”

⁶Anị ini mama owuapụma kpọnjị sime, yefị pịkị ḅụ gbolomaye-ẹ. Anịsịkị tọkụ ma ḍawu ḅe nwọse ọ̀ ḅẹmẹ, “Sisi mị ḍin mị se mịanga sime se tọrụḅẹlẹ nyana ị́ ḅụ pịrị.”

⁷Livaịḅọ ḅe sịsẹmẹ soḅịa ẹrẹchị, ọkụma tọkụ ma ḍaḅe ọ̀ mịẹse ò simemẹ, anị ọ̀ pịkịna jịn ḍin se anịju ḅụ simeye-ẹ.

⁸Sọnọ-a ḍin karama ene mị ḅe dede funfun ḅie ò so ḍọkịmẹ, ọkụma tọkụ ma ḍawu ḅe nwọ ḅẹmẹ, “Yefị sisi, koru mun saso ḅiri la.” Anị mama owuapụma yefị gbolomaye-ẹ.

⁹Tomoniḅọ ḅe na, oria ịgwa eremeniḅọ ma na pịkị fịrịnwẹngịḅọ ḅe na pịkịna so ḍọkị sịkị, ḍawu ḅe nwọ ḅẹmẹ, “Ḍiki, saso sọ emun-aḅẹ anị gose ómine ineda ḍin mị se mịanga simeḅịa. Ḅọlọ ẹkẹ ene mị gbẹịnḅịa; ọ́ mịanga sime ó kuḅie deinma. Ḅa ómine ineda iḅisịkị se sịsẹ ọ́mịna nwẹngị kọn so ama munḅịa.”

¹⁰Ọkụma tomoniḅọ ḅe ọ̀ ḅarị anịju ḅụ sime jịn ḍin se mọnọḅama ḅikẹ, anị ori na oria ịgwa eremeniḅọ ma na, inia fịrịnwẹngịḅọ ḅe na pịkị mama yepụra asụn ma na sakị nwẹngị-soye-ẹ. Saso sọsam ini ḅo Jebus mị na kpeki sịkị (anị Jerusalẹm mị-ẹ), anịẹrẹchị fịrịnwẹngịḅọ ḅe nwọse ọ̀ nyanaḅọ ḅe ḅẹmẹ, “Cheye gose wa ineda mị Jebus opuama mị ḅie sime mọnọ ḅaama ẹka?”

¹²Ọkụma ọ̀ nyanaḅọ ḅe nwọse ọ̀ ḅẹmẹ, “Izrẹlapụka opuama ḅie wa agba ẹkẹ. Wa kele tọrọkọ mun se Gibia mị anịkanịka Rema mị ḅie mọnọ ḅaama ḅịa.”

¹⁴Anị ini Jebus mị ḅọrọ se nwẹngị tọrọkọ mun ye-ẹ. Ini ḅo Gibia mị lasịkị ịrụa mị ḅịkịsosam anị Bẹnjamin sẹ mị eke ḅụ-ẹ.

¹⁵Ini anịju agba mọnọ ḅama emunmẹ. Ini opuama mị ḅie somun se amaogbo ḅụ simemẹ, ọkụma gbọrịḅọ sọnị ini chịn warị munkẹ ḍin mị ḅie.

¹⁶Ini anịju simearịogbo, gbọrị olomusaḅọ ozu kọrị se ene mị ḅe fịrị fasa ḅaraḅụ ḅo ini lamẹ. Ori anị jokoma Ifrem chịngị ọgọnọ sẹ mị ḅie ḅọ-ẹ, ọkụma mịọkụ Gibia ḅie ori angamẹ. (Anịju ḅụ ísíapụma Bẹnjamin furo ḅie apụ-ẹ.)

¹⁷Olomuḅọ ḅe opuama mị amaogbo igoniḅọ ḅe ọrị se ò gbelamẹ, “Ndeju ị́ ḅo-ao? Ị́ ndeju mun-ao?”

¹⁸Livaịḅọ ḅe nwọse ọ̀ pẹkẹrẹmẹ, “Wa Bẹtlihẹm Juda mun mẹ, se mịọkụ wa so mịna ama mun aḅẹ Ifrem chịngị ọgọnọ sẹ mị ḅieju. Gbọrịḅọ sọnị wa da warị chukẹ mị ḍin ḅie,

¹⁹mịna yepụra asụn ma fịḅịa samịna fịye na pịkị warị ḅie anga nama fịye na, pịkị fịturu na iru na sime ị̀ ta ịgwa eremeniḅọ ma na ị̀rị̀ na pịkị ị̀ya fịrịnwẹngịḅọ ḅe na pịrịmẹ ḅe sọnị. Mịna ḅụpalịmaye goyegoye wa nyanamẹ.”

²⁰Olomuḅọ ḅe nwọ ḅẹmẹ, “Ómine ị̀ya warị ḅo! Àrị ó ḍikiḍikiḅịa; ó gose amaogbo ḅụ mọnọ ḅamaḅịaye ofori-ẹ.”

²¹Anị ori ini ọkịso oria warị mun ye-ẹ se fịye seni inia yepụra asụn ma pịrịmẹ. Oria warị bịan apụma ini inia ḅụọma sịkịrị se yefịmẹ.

²²Ini fị-na-ḅu-na-ḅụ simearịogbo anị bẹkẹma ḅara ḅụ ama mị ḅie ḅụ owuapụ na ḅụgbolomaye mịẹmịẹ apụ warị mị ḍẹkị kelemaye-ẹ, se sakị ḅọkọ mị gbolomẹ. Ini nwọse olomuḅọ ḅe ḅẹmẹ, “Ị́rị́ na warị ḅo ḅọ ḅe ọkịpakụmaḅo wa pịrị! Wa ḅimẹ wa ori na gboloma.”

²³Ọkụma olomuḅọ ḅe nụngọ pakamun nwọse ini ḅẹmẹ, “Ẹn-ẹn, ị̀ya ikiapụ! Pasisi! Nwọ sime ereḍọkị si nwẹngị ọ́ kọnma! Ḅe ḅọ ḅe ị̀ya warị bịan ḅọ-ẹ.

²⁴Ḍiki! Mà tarọ ịgwa eremeniḅọ ma-ẹ, pịkị ị̀ ndụḅa ma owuḅọ nemika eremeni tọkụ ma na-ẹ. Mịọkụ àrị ini ọkị pakụmaḅịa, se ómine ineda ini ọkị soḅịa. Ọkụma ọ́ ḅalafamaye se ḅe ḅọ ḅe mịẹma!”

²⁵Ọkụma owuapụma ini ò poki ḍụkụkẹ. Anịẹrẹchị Livaịḅọ ḅe tarọ ịgwa eremeniḅọ ma ọkịpakụmaḅo ini pịrịmẹ. Ini á ḅụ kanmẹ pịkị bebe ḍin mị mgba se á guluguluma nweni eneḅamẹ.

²⁶Ḅaso ḅiri ḅụ eremeniḅọ ma ḅo olomuḅọ ḅe warị ḅọkọ ḅịkị koromẹ, anị dewu ḅe sime nyọ mị. Anịju ḅụ á sime mun eneḅamẹ.

²⁷Dewu ḅe anị dede ḅie sịsẹ, se ò soḅịa ẹrẹchị ḅọkọ mị finji sịkị tarọ ịgwa eremeniḅọ ma ọ̀ nwọ ọrịmẹ á ḅọlọlọ waraḅẹ warị mị tọrọkọ ḅụ á ḅarama ḅọkọ ḅụ omi-ẹ.

²⁸Ọ̀ nwọse á ḅẹmẹ, “Sịsẹ. Ye wa so.” Ọkụma pẹkẹrẹ ḅịpị ofori-ẹ. Anị ori árịa oju mị se yepụra asụn ḅe ọgọnọ gbana mgbẹsẹ se ini so oria ama mun ye-ẹ.

²⁹Ò ḅo warị lasịkị, ọ̀ warị ḅie sọmun se agiji dekimẹ. Ọ̀ tarọ ịgwa eremeniḅọ ma oju mị nwọ ọkị se, anị seni oyimaịn ikiḅa fịnjị nwọ pẹlẹmẹ, se gbọrị ikiḅa gbọrị ikiḅa nwọse Izrẹl oyimaịn furo fịnjịma sẹịnmamẹ.

³⁰Anị ọrịḅọ goyegoye nwọ ḅẹmẹ, “Nwọ simeye jịn sịkị ma wa naakẹ! Izrẹlapụma Ijipt mị ḅie pakaso sịkị ngịsị nwọ simeye ma pakakẹ! Wa papa anị wẹrịso ẹkẹ! Wa koroma kọn anị pịrịḅịa! Anị che mịẹḅe?”