Read kirikeni Bẹrẹkọn Apụ 20 Bible Online

Bẹrẹkọn Apụ 20 - kirikeni bible

Bẹrẹkọn Apụ 20

¹Bebe Izrẹlapụ mamgba ḅo chịnḅịpị mị ḅerenimẹ, Danị, ọgọnọju daọrụ simeye mị ḅụ sakị mun Biashiba chukuju daọrụ ḅụ simeye mị la, pịkị Giledị ḅụ sakị mun ịrụapakapaka nyọ ọgọnọju mị la. Inimgba gbọrị ḅụ koḅirimamẹ Nyanaḅọ Ḅe tọrọkọ Mizpa mị ḅie ḅụ.

²Sẹsẹ ḅụ Izrẹl tịḅịda apụ mamgba ini omi-ẹ mịn Tamụnọ-a tomonima koḅiria ḅie, se ḅụọ se nwẹngị owuniḅụ poku-a mesi oyi fịnjị simemẹ.

³Bẹnjamin apụma ḅo naamẹ na ísí Izrẹlapụ mamgba Mizpa mị ḅie ini koḅiria waraḅẹ. Izrẹlapụma gbelamẹ, “Ḍuko wa pịrị, nde mị si mị wẹrị mịẹ ọkụ?”

⁴Ini ḅaa ịgwa eremeniḅọ de Livaịḅọ ḅe pẹkẹrẹmẹ, “Ị̀ ta ịgwa eremeniḅọ ma na ị̀rị̀ na Gibia mun mẹ anịju mọnọ ḅamaḅịa ẹrẹchị, anị Bẹnjamin eke mị ḅụ.

⁵Gibia owuapụma ḍin ḅụ ḅo owu se ị̀ pakaḅịa ẹrẹchị warị mị ḍẹkịkelemamẹ. Ini ị̀ ḅaa ọtọnmẹ; ọkụma ini ị̀ wẹrịso se ị̀ ta ịgwa eremeniḅọ ma ḅụ kanmẹ, se á fịmẹ.

⁶Àrị árịa oju mị ọkị, anị se ikiḅa ikiḅa pẹlẹ, se gbọrị ikiḅa gbọrị ikiḅa nwọse Izrẹl oyimaịn furo fịnjịma sẹịnmamẹ. Mịna apụma mịna ḅie ini sime simịẹ sẹfịnwẹngịkọn pịkị mịẹ gbẹịnkaye mịẹsam.

⁷Ómine mịanga sime apụ mamgba Izrẹlapụ-ẹ. Nde wa mịẹḅịa ọkụ mịn mị ḅụ?”

⁸Tomoni mamgba sịsẹ se nwọ ḅẹmẹ, “Mịna ḅie so warị munḅịaḅọ ofori-ẹ anị ḅọrọ ikowarị ḅie angaḅọ-o anịkanịka warị ḅie angaḅọ sọnị.

⁹Mị wa mịẹḅịaye-ẹ: wa ịkịan wakị se nweni sẹlẹọkị mun owu se Gibia mị pakaḅịa.

¹⁰Izrẹl ḅie sime owuapụma se oyi-a kiri pu ḅụ gbọrị pẹkẹrẹ mun fịye se ọmụogbo mị pịrịḅịa, se ísíapụma fomuḅara se mun Gibia mị pịrịḅịa, mị ini Izrẹl ḅie kọnsa si mịẹmịẹaye ma gose.”

¹¹Anịẹrẹchị bebe Izrẹl mị ḅie sime owuapụ mamgba gbọrị pụkọ ḅụ koḅiriamẹ—owu se ama mị pakaḅịa ẹrẹchị.

¹²Izrẹlapụma okumun-apụ se bebe Bẹnjamin furo eke mị la-ọkụ la-ọkụ mgba fịrịma se nwọ ḅẹmẹ, “Mị che siye ọ́ nwọ mịẹ?

¹³Mịọkụ Gibia mị ḅie ḅaralayelaye mịẹ apụma ọ́ nwọse wa sẹịnma, se wa ini ḅaa se mị siye mị Izrẹl ḅie soḅịa ọkụ.” Ọkụma Bẹnjamin furo apụma ísí Izrẹlapụma ḍukoarịye mị inia ḅerisọkẹ.

¹⁴Bẹnjamin opuamama ḅieḅụ ini ḅo Gibia mị ḅie koḅirimamẹ owu se ísí Izrẹlapụma pakaḅịa ẹrẹchị.

¹⁵Anị ene mị ḅụ inia opuamama ḅie owuni-a sọnọ-a poku na sọnọ-a ẹndẹ na ini nwọ chịn pakụmaḅomẹ. Mịna apụma sikima, Gibia apụma pịkị kịnị ẹndẹ jieasi fịnjị nwọ sẹlẹ koḅirimamẹ, inimgba kọndọ apụ-ẹ. Iniaḅụ ḅọḅọ ḍụparị mgbọlụ seni tịḅị inime gbọrị mgbọlụ tẹịnḅịa, pịkị gbarị ẹkẹ.

¹⁶

¹⁷Ísí kirikọn Izrẹl sẹma yeḍawọsa owuni ḅụ poku-a mesi oyi fịnjị ini nwọ koḅirima wẹrịmẹ.

¹⁸Izrẹlapụma mun Bẹtẹl ḅie tẹkẹ nyọ mị ḅie Tamụnọ Ḅe gbelamẹ, “Nde sẹ tatarị owu se Bẹnjamin apụma pakaḅe?” Nyanaḅọ Ḅe pẹkẹrẹmẹ, “Juda sẹ mị-ẹ.”

¹⁹Anị Izrẹlapụma anị ḅe jịn eneḅa dede ḅie paka somun Gibia opuama mị na kpekima ikowarị pike simeye-ẹ.

²⁰Ini mun owu se Bẹnjamin ọmụogbo mị paka-ẹmunmẹ, se ini owunima se opuama mị na damadama ma koromamẹ.

²¹Bẹnjamin ọmụogbo mị opuama mị ḅie ḅụ pakaḅomẹ, se Izrẹl owunima ḅie ḅụ mama poku na jie ẹndẹ fịnjị ḅaamẹ anị ene ḅụ.

²²Anịsịkị Izrẹlapụma so tẹkẹ nyọ mị ḅụ Nyanaḅọ Ḅe tọrụkuḅu ḅụ kururu nweni sasosọmẹ. Ini ò gbelamẹ, “Wa pịkịma mun mịna mịnapụ Bẹnjamin apụma na ọmụ mị gbinḅe?” Nyanaḅọ Ḅe nwọ ḅẹmẹ, “Iin.” Anị Izrẹl ọmụogbo mị kuḅiekụrọmamẹ, se ini pịkị inia owunima se ísí ene ḅụ koroma gbọrị anga mị ḅụ koromaye-ẹ.

²³

²⁴Ini mama sịkị karama nwẹngị Bẹnjamin ọmụogbo mị damunmẹ.

²⁵Bẹnjamin ọmụogbo mị pịkị maịn karama Gibia mị ḅie ḅụ pakaḅomẹ, se mị sịkị mị ḅụ yeḍawọsa Izrẹl owunima ḅụ mama poku na sọnọ-a ẹndẹ ini nwọ ḅaamẹ.

²⁶Anịsịkị bebe Izrẹlapụ mamgba somun Bẹtẹl mị ḅie ḅụ kururumẹ. Anịju ḅụ ini Nyanaḅọ Ḅe tọrụkuḅu ḅụ kpọnjị sime se yefịka nweni sasosọmẹ. Ini agbamịẹmẹ pịkị bebema dọkịma agbamịẹmẹ arịmgba Nyanaḅọ Ḅe tọrụkuḅu ḅụ.

²⁷Àrị enema ḅie Tamụnọ Ḅe Ọḅọkụ Igbe mị Bẹtẹl mị ḅie anị simemẹ, se Fịnehas, Ẹleaza yaḅe, anị Erọn yaḅe anị ḍikiḍikimẹ. Tomonima nwọse Nyanaḅọ Ḅe gbelamẹ, “Wa pịkịna mun owu se mịna mịnapụ Bẹnjamin apụma pakaḅịa mọnọ se wa wẹrịsoḅe?” Nyanaḅọ Ḅe nwọse ini pẹkẹrẹmẹ, “Ó mun owusọ. Ḅa àrị ọ́ mịẹse ómine ini nẹngịmaḅịa.”

²⁸

²⁹Anị Izrẹlapụma owunima ḅụ dapụ se ḅọị Gibia mị ḍẹkị kelemaye-ẹ.

³⁰Anịsịkị, tẹrẹ karama ene mị ḅụ ini nwẹngị Bẹnjamin ọmụogbo mị damunmẹ, se inia owunima se ọmụgbin nyọ mị ḅụ koroma tọrụ se Gibia mị damẹ, anị tatarị sịkị ini mịẹ ọkụ mị.

³¹Bẹnjamin apụma pakaḅomẹ owusọḅịa ẹrẹchị se ini opuama mị ḅie ḅụ ini dapakụmaḅomẹ. Tatarị sịkị ḅara mị ọkụ, ini sakị Izrẹl owunima ḅụ nweni ḅaamẹ Bẹtẹl mị mun ateli mị ḅụ pịkị Gibia mun ateli mị ḅụ na. Kịnị soi laḅịa apụ ini nwọ ḅaamẹ Izrẹlapụma ḅụ.

³²Bẹnjamin apụma nwọ ḅẹmẹ, “Wa ini lamasam tatarị sịkị wa ini mịẹ ọkụ mị.” Ọkụma Izrẹlapụma tọnmẹ na ini opuama mị ḅụ ini dapakụmaḅo mun ateli ma ḅie ḅụ saraḅịa.

³³Anịẹrẹchị dada Izrẹl ọmụogbo mị ọḅụgbinma sịkị ini mun Bealtema mị ḅie ḅụ kpoto koḅirimamẹ, Gibia mị ḍẹkị kelema apụma bẹkẹma ḅaraḅụ ini ḅọị sime ḍụparị sẹ mị ḅie pakaḅo opuama mị kelemamẹ.

³⁴Izrẹl sẹ mamgba ḅie ini sẹlẹ sikima koroma si sọnọ ẹndẹ fịnjị apụma owu se Gibia mị pakamẹ, se owu mị pịkị kụrọmẹ. Bẹnjamin apụma iniaḅụma nemikẹ na ini fịsoaḅẹ.

³⁵Nyanaḅọ Ḅe ọ̀ mịẹse Izrẹlapụma Bẹnjamin ọmụogbo mị nẹngịmamẹ. Izrẹlapụma tẹrẹ-a poku mẹndẹ oyiasi fịnjị na sọnọasi ini na tarakapụma ḅụ ini nwọ ḅaamẹ anị ene mị ḅụ,

³⁶se anị Bẹnjamin apụma ḅụokoromẹ na ini ini nẹngịmasam. Dada Izrẹl ọmụogbo mị ọḅụgbinmamẹ Bẹnjamin apụma ḅụ anịatịḅị ini kuḅie se ini seni ḅọị Gibia mị ḍẹkị kelema apụma ḅụ gbanamẹ.

³⁷Mịna apụma ini sịkị famakẹ se mangị Gibia ḅie sọ se opuama mị ḅie wasamamẹ, se ini tomoniḅọ goyegoye nwọ ḅaamẹ anịju.

³⁸Izrẹl owunima na, iniaḅụ ḅọị apụma na, ini pịrịḅịa elekima ḅe ḅịpịogbosọ ini nwọ nyanamẹ. Ini ama mị ḅie kputu onwoin so ọkụ ọrịmẹ ḅẹḅẹ,

³⁹Izrẹlapụ nwọ owu mị ḅie sime apụma vinpịkị taraka apụma da. Mị sịkị mị ḅụ, Bẹnjamin apụma kịnị soi ma ini ḅaa ḅọrọsam Izrẹlapụma ḅụ. Ini nwọse iniaḅụ ḅẹmẹ, “Iin, wa ini mịẹsam wa tatarị ini mịẹọkụ mị.”

⁴⁰Anịsịkị anị elekima mị pakaḅoye-ẹ; ama mị ḅie onwoin kputuma somẹ. Bẹnjamin apụma inia ọḅụju ḍikimẹ se ijira iniaḅụ saramẹ bebe ama mị mgba kọrịarị ọkụ ini nwọ ọrị sịkị.

⁴¹Anịsịkị Izrẹlapụma vinpịkị sọmunmẹ, se Bẹnjamin apụma inia tẹmẹtaịnmẹ anịatịḅị anị iniaḅụ okoromẹ na ini faḅie sọsam.

⁴²Ini ọḅụgbinmamẹ Izrẹlapụma ḅụ, se mangị ḅelema sime sẹ mị damunmẹ, ọkụma ini ineda mangịsokẹ. Dada ọmụogbo mị na pịkị mịọkụ opuama mị ḅieḅụ pakaḅo àrị apụma na ogboku ini ini kunmẹ, se ini ini ḅaafamamẹ.

⁴³Taraka apụma ini Izrẹlapụma ḍẹịn ḅie koromẹ, se dachịẹka ḅaraḅụ ini ini ḍuko mun Gibia mị ḅụ ịrụapakapaka nyọ daọrụ ḅụ gbọrị anga nwọ lamẹ, ini ini ḅaama mun mẹ ini mun-arị sịkị ḅụ.

⁴⁴Bẹnjamin owunima ḅie owusọtẹịn owuni ḅụ mama poku na sọnọ-a ẹndẹ ini nwọ ḅaamẹ.

⁴⁵Ísíapụma vinpịkị se mangị ḅelema sime sẹ mị damun Rimọn Ḍụparị mị lamẹ. Iniaḅụ kịnị oyimaịn ẹndẹ fịnjị na oyiasi ini nwọ ḅaamẹ ateli ogbo ḅụ. Izrẹlapụma pa pịkị kọn apụma ḍuko nweni mun Gidọm mị lamẹ, se kịnị-a sọnọ-a ẹndẹ nwọ ḅaamẹ.

⁴⁶Inimgba tẹrẹ-a poku na kịnị-a mẹndẹ oyiasi fịnjị Bẹnjamin apụma ḅụ ini nwọ ḅaamẹ anị ene mị ḅụ, inimgba kuḅiekụrọma ọmụgbin ḍin owuni-ẹ.

⁴⁷Ọkụma kịnị ẹndẹ oyiasi fịnjị ineda inia ḅara pẹlẹma mangịso ḅelema sime sẹ mị mun Rimọn Ḍụparị mị lamẹ, se inein-a akalụ ini nwọse anịju ḅụ simemẹ.

⁴⁸Izrẹlapụma vinpịkị Bẹnjamin furo apụma ḅụ kọn apụma da se inimgba ḅaafamamẹ—owuapụma na eremeni ma na, pịkị awọmẹnịma na, pịkị namama sọnị. Anị pẹkẹrẹ ḅụ sime ama goyegoye ini dọkịmamẹ.