Read kirikeni Bẹrẹkọn Apụ 5 Bible Online

Bẹrẹkọn Apụ 5 - kirikeni bible

Bẹrẹkọn Apụ 5

¹Anị ene ḅụ Debora ma na Barak Abinoam yaḅe na mị nime mị chumẹ:

²Ọ́ Nyanaḅọ Ḅe boma Izrẹlapụma iniaḅụ ḅereni owu sọmẹ; tomonima ḅieḅẹlẹ ḅụ inia ḅụ pakụmamẹ.

³Ó poki, ómine amanyanapụ! Ọ́ tọrụgbẹlẹma, ómine ḅẹrẹtọn apụ! À nime chuḅịa, à nime chu pịkị farị Nyanaḅọ Izrẹl Tamụnọ Ḅe pịrịḅịa.

⁴Nyanaḅọ, Sia tụndụma ḅie ị́ pakaso sịkị, Idọm pẹkẹrẹ mị ḅụ ị́ pakaḅo sịkị, sẹkiri mị jikemẹ, sotọrụ ḅụ ene koromẹ. Iin, soḅuno ma ḅụ mengi ọsụn saramẹ.

⁵Saịnaị mị, Nyanaḅọ Ḅe tọrọkọ tụndụma jikemẹ, Nyanaḅọ Ḅe tọrọkọ, Izrẹl Tamụnọ Ḅe.

⁶Shamga, Enat yaḅe enema ḅie, Jaẹl ma enema ḅie, igoniapụ ḅarị ama ḅie toluḅọrọkẹ, se yemun-arị apụma ọḅụ ateli ma ḅụ ḅọrọmẹ.

⁷Izrẹl amama papa sara simemẹ, Debora; arịa ḅie nweni ofori-ẹ ọkịmun ị́ ḅo sịkị lamẹ, nyengiḅọ ḅara ị́ nwọse ḅo Izrẹl mị pịrịmẹ.

⁸Anịsịkị ama mị ḅie ọmụ simemẹ Izrẹlapụma ịwọ oru ma sẹlẹọkị sịkị mị. Izrẹl mị ḅie sime kịnị sọnọ-a poku ma ḅie, agbọ anịkanịka sụḅa deki ḅọ omi?

⁹Ị̀ kuḅie Izrẹl ọmụtịḅịnịma ḅụ omi-ẹ, iniaḅụ àrị omi-ẹ nwọ ḅieḅẹlẹ ḅụ iniaḅụ pakụma apụma. Ọ́ Nyanaḅọ Ḅe boma!

¹⁰Anịa ḅẹrẹ ḍuko, ómine ḅịaḅịa yepụra asụnma se nwẹngịarịapụ ma, ini se iseaye ma ọgọnọ sime apụma, pịkị ómine munḅịa nyọ goyegoye ḅụ ḅụọ se nwẹngịḅịa apụma.

¹¹Ó poki! Tiḅe ma kelema olokuarị tịḅịḅie ma Nyanaḅọ Ḅe oria ọmụḅaraiḅi ḅẹrẹ ma àrị nwọ ḍukoaḅẹ, Izrẹlapụma ḅe ọmụḅaraiḅi ḅẹrẹ ma na! Anịsịkị Nyanaḅọ Ḅe oria tomonima inia opuamama ḅie nwẹngị paka mun mẹ.

¹²Tọrọkọda, Debora, tọrọkọda! Tọrọkọda! Gbọrị nime chu! Tọrọkọda! Tọrọkọmun, Barak Abinoam ya, tọrọkọda ị́ kun apụma se so!

¹³Anịsịkị ḅereni nyana apụma inia tịḅịnịma dama ḅomẹ; Nyanaḅọ Ḅe tomonima ọ̀ damaḅomẹ owusọḅịa ẹrẹchị.

¹⁴Ifrem ḅie ini sime ḅo pẹsịkiri mị ḅie sọmẹ, Bẹnjamin sẹ mị na anịa tomonima na ọḅụju simemẹ. Ọmụtịḅịnị ma Meka ḅie ini ḅomẹ, fịrịnwẹngịapụma Zẹbụlọnị ḅie ini ḅomẹ.

¹⁵Ịsaka tịḅịnịma Debora ma na ḅomẹ; iin, Ịsaka ḅe ò ḅomẹ pịkị Barak ḅe sọnị, se ini ò ḍuko pẹsịkiri mị ḅie sọmẹ. Ọkụma Rubẹnị sẹ mị puamẹ; ini ineda ini ḅoḅịa nwọḅẹ ḅịpịogbosọ nyanakẹ.

¹⁶Cheye ẹrẹchị ini ananama na ọḅụju sime? Anana ḍikiḍikiapụ ma ananama chịn arịye mị pokiḅịa ẹrẹchị mọnọ? Iin, Rubẹnị sẹ mị puamẹ; ini ineda ini ḅoḅịa nwọḅẹ ḅịpịogbosọ nyanakẹ.

¹⁷Gadị sẹ mị Jọdan mị ḅụ ịrụapakapaka nyọ daọrụ ḅụ simemẹ se Danị sẹ mị pịkị onwoin arụ ma anga ḅụ simemẹ. Asha sẹ mị tọrụ mị aka ḅụ simemẹ; ini tọrụ mị aka ḅụ simemẹ.

¹⁸Ọkụma Zẹbụlọnị apụma na Naftalaị apụma na inia ḍumo ma abalakẹ ọmụgbin ele mị ḅie.

¹⁹Teanak mị ḅie ḅụ, Mẹgido iderimengi mị nyọ ḅụ, amanyanapụma ḅo owu mị sọmẹ; Kenan amanyanapụma owu mị ini sọmẹ, ọkụma gbọrị seleḅa sọnị ini ọkịsokẹ.

²⁰Lolia ma sotọrụ ḅụ ḅo owu mị sọmẹ; àrị sotọrụ saḅa ḅọrọarị sịkị, àrị owu se Sịsera ḅe pakamẹ.

²¹Kishọn gbọrị opu mengi ini ọfịn sinmẹ— anị owoi Kishọn Tọrụ mị. À nwẹngịḅịa, nwẹngị mun, ịnyọ kpọma nwẹngị!

²²Anịsịkị asụnma ḍosima ḅomẹ, arịa ḅụọ akpaka ma se kiri nangamẹ.

²³“Worinime se Mirọz mị pịrị,” Nyanaḅọ Ḅe enjẹlḅọ ḅe ọkọ ḅẹmẹ, “worinime, worinime sime anịju ḅụ anga apụma pịrị. Ini ḅo ḅarachụa Nyanaḅọ Ḅe pịrịkẹ, owuni ḅara se ḅo owusọ ọ̀ pịrịkẹ.”

²⁴Eremeni ma ḅụ iḅiso nyanatẹịnḅọ anị Jaẹl ma-ẹ, anị Hiba ḅe tarọ ma Kenaịḅọ ḅe— ikowarịma ḅie anga eremeni ma ḅụ iḅiso nyanatẹịnḅọ ma.

²⁵Sịsera ḅe ọ̀ mengi ḅimẹ, ọkụma nama-ndo-mengi á nwọse ọ̀ pịrịmẹ; á ḍikitọrụgbẹịn bọlị se nama-ndo-mengi ḅẹlẹkị chụa ọ̀ pịrịmẹ.

²⁶Á gbọrị ḅara se ikowarị mị chịn ikiḅa ọlọmẹ, fịrịnwẹngịḅọ amana se ísí ḅara ḅụ ọlọmẹ; á kụrọma amana mị se Sịsera ḅe fomu se ọ̀ tịḅị kukure mị kanmẹ; árị anị se ọ̀ tịḅị ḅụ tolupakụmamẹ.

²⁷Ori ọ̀ ḅụọịkpụkụma se ḅịkịkoromẹ, sokoro koro se á ḅụọchuku yawụma simemẹ. Á ḅụọchuku ḅụ ori ọ̀ ḅụọịkpụkụ ma se ḅịkịkoromẹ; ò sokoro kiri koro, fịmẹ.

²⁸Sịsera nyengima ikiḅaḅọkọ mị ḅụ toluma ḍikimẹ; nyọ kikimaye mị ọḅụju á sime ḍikimẹ. Á nwọ gbelamẹ, “Cheye ẹrẹchị oria owuni kporokporoma ḅoka ḅo nwọ la?” “Cheye ẹrẹchị oria asụnma iḅisịkị se vinpịkị ḅoka?”

²⁹Arịa yenemitẹịn eremeni ma á pẹkẹrẹmẹ, se á kpoto-kpoto anị ḍuko á ḅụ pịrịmẹ,

³⁰“Ini ọfọịn pịkị ḍiaọkịḅịaye ma ini nwọ ḍọkịaḅẹ, owuniḅọ goyegoye gbọrị eremeni tọkụ anịkanịka mama apụ, se Sịsera ḅe pịrịḅịa yela ḅụchụaye na, pịkị amanyanaḅọta ma se kọngọ wakịḅịa ḍorisa ḅịtẹma na.”

³¹Yei Nyanaḅọ, ye ị́rị́na-tarakapụ mamgba anị ḅara mị se fị, ọkụma ye ị́ya ikiapụ ma ayama pakarị ịrụa mị ḅịa ọkụ ḅịa! Se ama mị ḅie deinma sime mun kụra mesi nwọ lamẹ.