Read kirikeni Bẹrẹkọn Apụ 6 Bible Online

Bẹrẹkọn Apụ 6 - kirikeni bible

Bẹrẹkọn Apụ 6

¹Izrẹlapụma ini pịkị Nyanaḅọ Ḅe ḅụ simịẹmẹ, anịẹrẹchị ọ̀ mịẹmẹ Midia apụma ḅẹrẹtọn ini pịrị mun sọnọma kụra nwọ lamẹ.

²Midia apụma kụrọtẹịn Izrẹlapụma nẹngịmẹ gose, Izrẹlapụma ini Midia apụma gose pokolo ma ḅie inia ḅụ ḅọịmẹ pịkị chịngịma ọgọnọ jịn ḅụ ḅọịḅịa nyọma na.

³Izrẹlapụma ini fịaye ḍipi sịkị goyegoye, Midia apụma na, Amalẹk apụma na, pịkị onwun ele mị ḅie sime sẹma na ḅo owu se ini pakaḅịa.

⁴Ini ama mị ḅie ikowarị pike sime pịkị fịayema ḅaafama ọkịmun chukuju daọrụ ḅụ Gaza mị kelema koro ḅịa. Anana ma na, nambuloma na, pịkị yepụra asụn mamgba ini ọkị soḅịa, gbọrịye sọnị kọnma Izrẹlapụma pịrị se ini seni angaka ḅaraḅụ.

⁵Inia warịma ḅie anga namama na ikowarịma na ini nwọse chụa ḅoḅịa, igurube kpo churu ọkụ mị. Ini na inia ike-nambuloma na kịẹnḅịa ọkụ ofori-ẹ ini ḅaka la ḅaraḅụ. Ini ḅo ama mị igweinmamẹ,

⁶se Izrẹlapụma ini ḅarachụa pịrị apụ nyanaka ẹrẹchị, inia kuḅu ini chịẹkẹ.

⁷Anịsịkị Izrẹlapụma ini owu pakụma Nyanaḅọ Ḅe pịrịmẹ na ọ̀ ḅarachụa ini pịrị Midia apụma gose,

⁸se ori ịkịankoroḅọ seni ini fịrịmamẹ, Nyanaḅọ Ḅe ḅịpị mị oku mị daḅo ini pịrịmẹ, anị Izrẹl Tamụnọ Ḅe: “Ị̀rị̀ anị Ijipt mị ḅie omoniapụ ḅaraḅụ ómine ọkịpakụmaḅo ḅọ ḅe-ẹ.

⁹Ị̀rị̀ Ijipt apụma ḅara ḅie ọ́ ḍụaḅọrọmamẹ pịkị mịanga mị ama mị ḅie ḅụ ómine na ọmụgbin apụma ḅara ḅie na. Àrị ini depakụmamẹ ọ́ nwẹngị sọmun-arị sịkị ḅụ, se inia amama à nwọse ọ́ pịrịmẹ.

¹⁰Àrị ọ́ ḅẹmẹ na Ị̀rị̀ anị ọ́ Nyana Tamụnọ Ḅe-ẹ, na Amọraị apụ oru ma ómine árị tẹkẹma, anị mịọkụ ómine angarị ama mị nyana apụma. Ọkụma ngịsị ómine ị̀ ḅịpịpokikẹ.”

¹¹Anịsịkị Nyanaḅọ Ḅe enjẹlḅọ ḅo Ọfra ịwọama mị ḅie Joash, anị Abaịeza sẹḅọ ḅe oria kuru chịn mị chuku kpọnjị simemẹ, yayo Gidiọnị ḅe, Midia apụma ori ọrịẹkaye gose, ḅọịma irumịẹ chịnmgbọlụ pọnjị-pọnjị pakụma akpa ḅie chụaḅẹ ini iru mịẹmịẹ nyọ ḅụ.

¹²Nyanaḅọ Ḅe enjẹlḅọ anịju ḅụ ḅụpakụma ọ̀ pịrịmẹ se nwọse ọ̀ ḅẹmẹ, “Nyanaḅọ Ḅe ori ị́rị́na-omi-ẹ, ị́rị́ kuḅie kụrọ opuḅọ!”

¹³Gidiọnị ḅe nwọse ọ̀ ḅẹmẹ, “Ye àrị ị́ gbela, ị̀ Nyanaḅọ, nemikase Nyanaḅọ Ḅe mine na omi-ẹ nwọḅẹ ọkụma, cheye gose maye mamgba mịnaḅụ paka-ao? Mịna ḍapụma ḍuko wa pịrị na Nyanaḅọ Ḅe mịẹmịẹmẹ nwọḅẹ ḅụgbiripuma ayema kwanị—ọ̀ ḅara wẹrịma Ijipt mị ḅieḅụ ini ọkị pakụma ḅo ọkụ mị? Nyanaḅọ Ḅe ọ̀ wa se gbinkoromasam pịkị wa se Midia apụma pịrịsam ini inia ḅụḅẹlẹḅara se wa mị-ẹ.”

¹⁴Anị Nyanaḅọ Ḅe kụrọ se ọ̀ pịrịye-ẹ, “Ị́ya opu ịnyọ mị la-ọkụ mgba se mun Midia apụma ḅara ḅie Izrẹl mị ḍụaḅọrọma. Ị̀rị̀ anị ḅarana ị́ fịrịmarịye-ẹ.”

¹⁵Gidiọnị ḅe nwọse ọ̀ pẹkẹrẹmẹ, “Nyanaḅọ nde àrị ineda Izrẹl mị ḍụaḅọrọma ḅịa ọkụ? Manasẹ sẹ mị ḅie, à pakaḅo furo mị ịnyọ nyanakatẹịnmẹ, pịkị mịna warị mị ḅie ị̀rị̀ yesọkatẹịnḅọ-ẹ nwọḅẹ sịkị.”

¹⁶Nyanaḅọ Ḅe nwọse ọ̀ pẹkẹrẹmẹ, “Ị́ ineda ḅịa anịatịḅị à ḅarachụa ị́ pịrịḅịa. Ị́ se Midia apụma kọsịmaḅịa ḅara, ị́ ḅẹḅịa na ini mgba gbọrịḅọ kẹngẹ-ẹ.”

¹⁷Gidiọnị ḅe nwọse ọ̀ ḅẹmẹ, “Nemikase ị̀ya mịẹye ị́ ḅụḅẹlẹmẹ ḅẹḅẹ elekima se ị̀ ḍie na Ị́rị́ anị kọkọma Nyanaḅọ Ḅe-ẹ.

¹⁸Sisi mịanga ḅụ soma, ọkịmun à ḅo fịye agbamịẹ ḍiepịrịye seḅo ị́ pịrị sịkị la.” Ọ̀ nwọ ḅẹmẹ, “À sime mun ị́ vinpịkị ḅo sịkị laḅịa.”

¹⁹Anịẹrẹchị Gidiọnị ḅe ò so oria warị ḅie sọmun se ayamburama gbọrị oḅori nwọ chụọmẹ se fịlawa tẹrẹ-a kọpụ laḅịaye se fịturu mịẹmẹ fịturu-sumaye sọka ḅaraḅụ. Ọ̀ nama mị se kana ḅie chụamẹ se fụlọ mengi mị se ḅẹlẹ ḅie chụamẹ, se anị ọkịḅo Nyanaḅọ Ḅe enjẹlḅọ ḅe pịrịmẹ kuru chịn mị chuku ḅụ, se àrị seni ọ̀ pịrịmẹ.

²⁰Enjẹlḅọ ḅe nwọse ọ̀ ḅẹmẹ, “Nama mị na fịturu mị na se mị ḍụparị mị ọgọnọ gbana, se fụlọ mengi mị se àrịa ọgọnọ ḅụ sara.” Gidiọnị ḅe ọ̀ pịkị ọkọ mịẹmẹ.

²¹Nyanaḅọ Ḅe enjẹlḅọ ḅe, ori ọlọ chịn mị ḅịpị sụma se nama mị na fịturu mị na lamamẹ. Se fịnị kọrị pakaḅo nama mị na fịturu mị na dọkịmamẹ. Anịsịkị enjẹlḅọ ḅe maịn somẹ.

²²Anịsịkị re mị anị Gidiọnị ḅe ḅụokoroye-ẹ na Nyanaḅọ Ḅe enjẹlḅọ anị ori ọrịye-ẹ, se ḅalafa ḅụ nwọ ḅẹmẹ, “Yei Kụrọmamgba Nyana Tamụnọ! À tọrụna-tọrụna ị́ya enjẹlḅọ ọrịsam!”

²³Ọkụma Nyanaḅọ Ḅe nwọse ọ̀ ḅẹmẹ, “Dein sime ị́ pịrị. Ḅalafama. Ị́ fịẹkẹ.”

²⁴Gidiọnị ḅe ori anịju ḅụ agbamịẹ ẹbẹ nama se Nyanaḅọ Ḅe pịrị se nwọse anị chịnmẹ, “Nyanaḅọ Ḅe anị Deinma-ẹ.” (Mịọkụ sọnị anị pa chịẹ waraḅẹ Ọfra mị ḅie, anị sime Abaịeza sẹ mị pịrịye mị.)

²⁵Anị ḍin mị ḅie Nyanaḅọ Ḅe nwọse Gidiọnị ḅe ḅẹmẹ, “Ị́ ḍa ḅe oria owoi-nambulo na pịkị jịn sọnọma kụra lasa owoi-nambulo na nwọ ọkị se ị́ ḍa ḅe oria Beal agbamịẹ ẹbẹ mị kansara pịkị anịanga sịkị sime Ashera-eremeni-oru mị na pẹlẹgbin.

²⁶Kpaịn iḅi agbamịẹ ẹbẹ nama se ị́ Nyana Tamụnọ Ḅe pịrị mị ịlachịngị ọgọnọ. Anịsịkị maịn karama owoi-nambulo ḅe ọkị, se ori mgba se dọkịma agba nwọ mịẹ, Ashera-oru-tọrụ ị́ pẹlẹ gbinye mị se fịnị tọnọ anị dọkịma.”

²⁷Anị Gidiọnị ḅe oria fịrịnwẹngịapụma ḅie oyi-apụ nwọ ọkị se Nyanaḅọ Ḅe ḍuko ọ̀ pịrị ọkụ mị nwọ mịẹye-ẹ. Ọ̀ paka furo mị ḅie apụma na pịkị ama apụma na ọ̀ ḅalafama so ọkụma enekaka ori anị mịẹkẹ, ḍin ḅie mị ori anị mịẹye-ẹ.

²⁸Anịḅe eneḅa dede funfun ḅie ama apụma mọnọ ḅụ sịsẹ sịkị, ini ọrịmẹ na Beal agbamịẹ ẹbẹ mị na pịkị Ashera oru-tọrụ mị na ini pẹlẹ gbinsam, pịkị maịn karama owoi-nambulo ḅe ini nwọse anịju ḅụ nama koroma agbamịẹ ẹbẹ mị ọgọnọ ḅụ dọkịmasam.

²⁹Ini nwọse jụḅọ jụḅọ gbelamẹ, “Tụḅọ mịn mị mịẹ?” Ini anịa chuku ḍọkị se ọrịmẹ na Gidiọnị Joash yaḅe anị mịẹmẹ.

³⁰Ini nwọse Joash ḅe ḅẹmẹ, “Ị́ nịa ḅe ọkị pakụma mịanga ḅo, se wa ọ̀ ḅaa! Beal agbamịẹ ẹbẹ mị ọ̀ nwọ kansam pịkị Ashera-oru-tọrụ anịanga sịkị simeye mị pẹlẹgbinmẹ.”

³¹Ọkụma Joash ḅe nwọse ḅẹrẹ mị se ọ̀ damaḅo apụ mamgba ḅẹmẹ, “Beal ḅe ẹrẹ ḅụ ọ́ chịẹ-ao? Ómine ọ̀ ḍụa-ao? Beal ḅe ẹrẹ ḅụ ḅẹrẹ ḍukoḅọ goyegoye ḅaaḅụ sọḅịa dede ma laka simeogbo. Beal ḅe nemikase tamụnọ-ẹ ḅẹḅẹ, ye ori ọ̀ḅụ ḍụa. Oria agbamịẹ ẹbẹ anị kansarasaye-ẹ.”

³²Anịsịkị ḅụ sakị ini nwọse Gidiọnị ḅe chịnmẹ Jerubeal, anịatịḅị Joash ḅe nwọ ḅẹmẹ, “Ye Beal ḅe ḅarana ọ̀ḅụ ḍụa; oria agbamịẹ ẹbẹ anị ini kansaraye-ẹ.”

³³Anịsịkị bebe Midia apụ mamgba na, Amalẹk apụma na, pịkị onwun ele mị ḅie sime sẹma na ḅo koḅiriamẹ, ini Jọdan mị saḅa, se Jezriẹl Pẹsịkiri mị ḅie ikowarịma pike simemẹ.

³⁴Nyanaḅọ Ḅe sosikima kụrọ se Gidiọnị ḅe pịrịmẹ, se ori oḍu ofuro Abaịeza sẹ mị ḅie owuapụma chịnmẹ ini ò ḍukoḅịa ẹrẹchị.

³⁵Ori okunwẹngịapụ se bebe Manasẹ ḅie mama pẹkẹrẹ ma fịrịmamẹ ini ò ḍukoḅịa ẹrẹchị. Ori okunwẹngịapụ se Asha na, Zẹbụlọnị na pịkị Naftalaị sẹma na fịrịmamẹ, se ini sọnị ḅo ọ̀ḅụ sọmẹ.

³⁶Anịsịkị Gidiọnị ḅe nwọse Tamụnọ Ḅe ḅẹmẹ, “Ị́rị́ nwọ ḅẹmẹ na ị́ ị̀ḅụ ḅọrọ Izrẹl mị ḍụaḅọrọmaḅịa.

³⁷Iḅimẹ, wa ịpịamgba gbẹịn-gbẹịn kiri mị ọgọnọ ḅụ nama-oju-ichuka à nwọse koromaḅẹ. Nemikase dede ḅie nama-oju-ichuka mị kẹngẹ ḅụ ijiriji simemẹ ọkụma kiri mị ḅụkẹ ḅẹḅẹ, anịsịkị mị à nemiḅịaye-ẹ na ị́ ị̀ḅụ ḅọrọ Izrẹl mị ḍụaḅọrọmaḅịa.”

³⁸Anị anị paka ọkụ-ẹ. Gidiọnị ḅe anịḅe eneḅa dede funfun ḅie ọ̀ sịsẹmẹ, ọ̀ nama-oju-ichuka mị imimamẹ se anịa ḅụ pakaḅo ijiriji mengi mị se gbọrị bọlị ḅeinmamẹ.

³⁹Anịsịkị Gidiọnị ḅe nwọse Tamụnọ Ḅe ḅẹmẹ, “Ḅụosọ nyanama ị̀ ḅụ; ye à pa pịkị gbọrị sịkị se ọkwẹịn. Sisi ye à pa pịkị nama-oju-ichuka mị se gbọrị elekima nwọ mịẹ ḍiki. Mị sịkị ḅụ ye nama-oju-ichuka mị samịna, se kiri mị pisi.”

⁴⁰Anị ḍin mị ḅie Tamụnọ Ḅe pịkị anị mị mịẹmẹ. Anị ḅe eneḅa dede ḅie nama-oju-ichuka mị samịnamẹ, ọkụma kiri mị ijiriji anị pisimamẹ.