Read kirikeni Bẹrẹkọn Apụ 8 Bible Online

Bẹrẹkọn Apụ 8 - kirikeni bible

Bẹrẹkọn Apụ 8

¹Anịsịkị ḅụ Ifrem owunima nwọse Gidiọnị ḅe ḅẹmẹ, “Cheye ẹrẹchị ị́ wa chịnka ị́ mun Midia apụma na owusọ-o mun sịkị ḅụ? Cheye ẹrẹchị ị́ nwọse wa mịẹ?” Anị opuma inia ḅụosọmẹ.

²Ọkụma ọ̀ nwọse ini ḅẹmẹ, “À ḅụkụrọma mịẹye mị seni ọ́ mịẹsaye mị na otomaḅịayekẹ. Ómine Ifrem owuapụma mịẹ kalaye mị anị kọkọ ị̀ya sẹ mị mgba mịẹye mị nẹngị wara-o.

³Tamụnọ Ḅe kụrọ ḅụ ọ́ kọkọ Midia mama alapụ ma ḅaasa, Orẹb ḅe na pịkị Ziẹb ḅe na. Nde à mịẹsaye, seni anị mị na otomaḅịaye?” Ọ̀ mịn mị ḍuko sịkị, ini ḅarị opu ḅụosọ nyanakẹ.

⁴Ḅo nwọ lasịkị Gidiọnị ḅe na oria kịnị-a jieasi ma na Jọdan Tọrụ mị ini saḅaḅọrọsam. Ịnyọ iniaḅụ fasam, ọkụma ini pa tarakapụma ḍukoaḅẹ.

⁵Ini ḅo Sọkọt mị lasịkị, ọ̀ nwọse ama mị ḅie owuapụma ḅẹmẹ, “Sisi ó kele fịturu seni ị̀rị̀ na ḅo owuapụma pịrị. Ịnyọ iniaḅụ fasam, à pa Ziba ḅe na Zalmuna ḅe na nwọ ḍukoaḅẹ, anị Midia amanyanapụma.”

⁶Ọkụma Sọkọt tịḅịnịma nwọ ḅẹmẹ, “Cheye ẹrẹchị wa fịye se ị́ya ọmụogbo mị pịrịḅe? Ziba ḅe na Zalmuna ḅe na ma ị́ pa ini kunkẹ.”

⁷Anị Gidiọnị ḅe nwọḅẹye-ẹ, “Iḅimẹ! Nyanaḅọ Ḅe Ziba ḅe na Zalmuna ḅe na se ị̀ pịrịsa ḅẹḅẹ, onwun ele mị ḅie ịga ma na nangị ma na anị à se ó fomuḅịaye-ẹ!”

⁸Gidiọnị ḅe ò so Pẹnuẹl mị mun se inia ḅara mị gbọrịye mị ḅimẹ, ọkụma Pẹnuẹl apụma Sọkọt apụma se ọ̀ pẹkẹrẹ gbọrị ḅara mị nwọ pẹkẹrẹmẹ.

⁹Anị ọ̀ nwọse ini ḅẹye-ẹ, “À deinma mun se ḅoḅịa, se à vinpịkị ḅosa ḅẹḅẹ, àrị ọ́mịna sokopi warị mị kan gbinḅịa!”

¹⁰Ziba ḅe na Zalmuna ḅe na inia ọmụogbo mị na, Kakọ ḅie ini simemẹ. Bebe onwun ele mị ḅie sime sẹma ọmụogbo mị mgba ḅie, kịnị poku na tẹrẹfasi ẹndẹ oyiasi fịnjị kẹngẹ anị bebema kọnye-ẹ; owunima ḅie jie-a poku ini nwọ ḅaasam.

¹¹Gidiọnị ḅe ori onwun ele mị aka sịkị ḅụ sime ateli mị ḅie nwẹngịma mun mẹ, Noba mị na Jọgbẹha mị na ḅụ ịrụapakapaka nyọ daọrụ mị, se ọ̀ bẹkẹma owu se ọmụogbo mị pakamẹ.

¹²Midia mama amanyanapụ Ziba ḅe na Zalmuna ḅe na ini mangị somẹ, ọkụma ori ini ḍuko mun ini kunmẹ, anị mịẹse bebe inia ọmụogbo mị mgba ḅo opu ḅalafa ḅie sọmẹ.

¹³Gidiọnị ḅe ọmụ mị ḅie vinpịkị Hirẹs Ḅọrọnyọ mị ḅụ soḅoarị sịkị,

¹⁴Sọkọt ama gbọrị asẹmẹnịḅọ ọ̀ nwọ kun se ò gbelamẹ. Asẹmẹnịḅọ ḅe Sọkọt tịḅịnị tẹrẹfa kịnị iniasi ma ẹrẹ gịẹịn se Gidiọnị ḅe pịrịmẹ.

¹⁵Se Gidiọnị ḅe so Sọkọt apụma damamun se nwọse ini ḅẹmẹ, “Ọ́ ḅarachụa ị̀ pịrị ḍụkụka sịkị mị ó se ḅiekoroma? Ọ́ nwọ ḅẹmẹ na ómine ineda fịye se ị̀ya ịnyọ ḅụfasa ọmụogbo mị pịrị-ẹkẹ anịatịḅị ma à pa Ziba ḅe na Zalmuna ḅe na kunka ẹrẹchị. Iḅimẹ, mị ini-ẹ!”

¹⁶Anị ori onwun ele ḅie ịga ma na nangị ma na ọkị se fomuḅara se Sọkọt tịḅịnịma pịrịye-ẹ.

¹⁷Ọ̀ pịkị Pẹnuẹl ḅie sokopi warị mị kan gbin se ama mị ḅie sime owuapụma ḅaamẹ.

¹⁸Anịsịkị Gidiọnị ḅe nwọse Ziba ḅe na Zalmuna ḅe na gbelamẹ, “Nde Tebọ mị ḅie ọ́ ḅaa owuapụma?” Ini nwọse ọ̀ pẹkẹrẹmẹ, “Ini ị́rị́ na kịkịnamẹ—amanyanaḅọ awọ sime ọkụ anị inia ḅie gbọrịḅọ gbọrịḅọ sime ọkụ-ẹ.”

¹⁹Gidiọnị ḅe nwọ ḅẹmẹ, “Ị̀ya mịnapụ-ẹ, jokoma ị̀ nyengima arịa owuapụ awọ-ẹ. À Nyanaḅọ Ḅe karịfị ọ́ pịrịmẹ na ó nemikase ma ini ḅaakẹ ḅẹḅẹ àrị ọ́ ḅaa-ẹkẹ.”

²⁰Ọ̀ nwọse oria tatarị tọkụ Jẹta ḅe ḅẹmẹ, “Mun ini ḅaa!” Ọkụma tọkụ ḅe kongo mị ọ̀ wọrọ ḍụkụkẹ. Ori ini ḅaa ḍụkụkẹ anịatịḅị ọ̀ pa kalatọkụ ḅụ omi-ẹ.

²¹Anị Ziba ḅe na Zalmuna ḅe na nwọse Gidiọnị ḅe ḅẹye-ẹ, “Ḅo ḅarana wa ḅaa. Owutọkụ anị pịkị owutọkụ fịrịnwẹngịḅịaye-ẹ.” Anịẹrẹchị Gidiọnị ḅe ori ini ḅaa se inia ike-nambuloma kọngọma ḅụ sime pụkọchụayema sin ọkịmẹ.

²²Anị ḅọrọsịkị, Izrẹlapụma nwọse Gidiọnị ḅe ḅẹmẹ, “Mịna amadaḅọ sọ wa pịrị—ị́rị́ na ị́ furo ḅie ị́ya ọḅụju pakaḅoḅịa apụma na. Midia apụma ḅara ḅie ị́ wa ḍụaḅọrọmasam.”

²³Gidiọnị ḅe nwọse ini pẹkẹrẹmẹ, “Àrị amadaḅọ sọ ọ́ pịrị-ẹkẹ, pịkị ị̀ya tọkụ ḅe sọnị. Nyanaḅọ Ḅe anị ọ́mịna amadaḅọ sọḅịaye-ẹ.”

²⁴Ọkụma ọ̀ pịkị nwọse ini ḅẹmẹ, “Ye àrị ọ́mịna ḅara gbọrịye nwọ ḅi. Ọ́mịna ḅụ ọrụḅọḅọ nụḅọ deki ḅerichụaye ma se ị̀ pịrị.” (Midia apụma, ini goli ḅerichụaye chụachụamẹ, ísí onwun ele sẹ mị ḅie apụ mamgba mịẹmịẹ ọkụ mị.)

²⁵Ini nwọse ọ̀ pẹkẹrẹmẹ, “Wa ḅieḅẹlẹ ḅụ àrị se ị́ pịrịḅịa.” Ini ḅịtẹ seni kiri ise, se ọrụḅọḅọ nụḅọ ọkị ḅerichụayema se ḅo anịa ọgọnọ saramẹ.

²⁶Gidiọnị ḅe ori ọkị goli ḅerichụayema opuma ḅakamẹ, pịkịna iku-goli-ḅiriayema na, pụkọchụayema na, pịkị awụwụ ḅụchụayema na, anị Midia amanyanapụma chụayema, pịkị inia ike-nambuloma kọngọ ma ḅụ sime pụkọchụayema na sikima.

²⁷Gidiọnị ḅe goli ma ò se oru tẹmẹ se oria ama Ọfra mị ḅie koromamẹ. Bebe Izrẹlapụ mamgba Tamụnọ Ḅe sịkị se somun anịju ḅụ oru mị tẹkẹmẹ. Anị ḍẹịn sọ se Gidiọnị ḅe na ò furo mị na pịrịmẹ.

²⁸Izrẹlapụma Midia mị nẹngịmamẹ se anị ḅarị ḅalafamaye sọkẹ. Ama mị anị deinma ḅụ sime mun kụra mesi lamẹ, ọkịmun Gidiọnị ḅe fị sịkị lamẹ.

²⁹Gidiọnị ḅe ò vinpịkị so oria ama mun se anịju ḅụ angamẹ.

³⁰Owuapụ awọ ḅụ tesi oyi fịnjị ọ̀ nwọ yimẹ, anịatịḅị ọ̀ tọn-a ere simemẹ.

³¹Ọ̀ pịkị Shẹkẹm ḅie gbọrị ịgwa eremeniḅọ nyanamẹ; gbọrị owutọkụ á nwọ yi ọ̀ pịrịmẹ, se ọ̀ nwọse ọ̀ chịnmẹ Abimẹlẹk.

³²Gidiọnị, Joash yaḅe ori iḅiọkụ kpọ se ọ̀ fịmẹ, se ini ò seni ḍawu Joash ḅe iḍupu mị ḅie ḍipimẹ Ọfra mị ḅie, anị Abaịeza sẹ mị ama mị.

³³Gidiọnị ḅe fị ḅọrọ sịkị Izrẹlapụma ini ḅarị ḅereni nyanakẹ Tamụnọ Ḅe ḅụ se Beal ma nwọ tẹkẹmẹ. Ini Beal Ọḅọkụ mị se inia oru mịẹmẹ,

³⁴se ḅarị ngịsị fịrịnwẹngị Nyanaḅọ inia Tamụnọ Ḅe pịrịkẹ, anị ini gbori kelema inina-tarakapụ mamgba ḅie ini ḍụaḅọrọmaḅọ ḅe.

³⁵Ini Gidiọnị furo mị ḅụ iḅi ḍọkịkẹ, ọ̀ mịẹ se Izrẹlapụma pịrịaye mamgba sọnị.