Read kirikeni Bẹrẹkọn Apụ 9 Bible Online

Bẹrẹkọn Apụ 9 - kirikeni bible

Bẹrẹkọn Apụ 9

¹Gidiọnị ya Abimẹlẹk ḅe ò so Shẹkẹm ama mị mun mẹ, anị nyọngọrọma mịnapụ mamgba anga nyọ mị, se ọ̀ nwọse ini ḅẹmẹ

²na ini Shẹkẹm apụma gbela, “Nde ọ́ ḅụḅẹlẹye? Gidiọnị owuapụ awọ kịnị-a tesi oyi fịnjị mamgba ọ́mịna tịḅịda na anịkanịka gbọrịḅọ kẹngẹ ọ́mịna tịḅịda mị na? Ó se ḅiekoroma na Abimẹlẹk ḅe anị jokoma ọ́mịna ojumịnị mị na pulo mị na-ẹ.”

³Nyọngọrọ ma mịnapụma ò gose mịn mị na gbolomaye ḍuko Shẹkẹm apụma pịrịmẹ, se Shẹkẹm apụma ini tọnpẹlẹmẹ na ini Abimẹlẹk ḅe jusọḅịa anịatịḅị ori inia mịnaḅọ-ẹ.

⁴Ini seleḅa pẹkẹrẹ-a tesi oyi fịnjị nwọ ọkịḅo ọ̀ pịrịmẹ Beal-Ọḅọkụ-opu-oru-warị ḅie ḅụ, se mị igbiki mị ọ̀ nwọse yeḅụsọka tomoni ọkọ se ọ̀ ḅụ chụamẹ.

⁵Ò so Ọfra mị ḅie ḍawu warị mun mẹ, se anịju gbọrị ḍụparị ọgọnọ ḅụ oria owuapụ mịnapụma ḅụ kịnị-a tesi oyi fịnjịma ḅaafamamẹ, anị Gidiọnị owuapụ awọ ma-ẹ. Ọkụma Jotam, anị Gidiọnị ya furopẹlẹḅọ ḅe, ọ̀ ḅọịmẹ anịẹrẹchị ini ọ̀ ḅaakẹ.

⁶Anịsịkị bebe Shẹkẹm mị na pịkị Bẹtmilo mị na ḅie sime owuapụ mamgba ḅo gboloma se so osiḅụ sime kuru chịn mị chuku mun mẹ Shẹkẹm mị ḅie, anịju ini Abimẹlẹk ḅe se amanyanaḅọ mịẹmẹ.

⁷Jotam ḅe mịn mị naa sịkị ò mun Gẹrizim Tụndụ mị ọgọnọ chịẹ se oloku ini pịrịmẹ, “Ómine ị̀ poki, ómine Shẹkẹm apụ, se Tamụnọ Ḅe pịkị ó pokiḅịa!

⁸Gbọrị sịkị ḅụ ejema ḅo gbolomamẹ amanyanaḅọ sẹlẹ arịa ḅụ pịrịḅịa ẹrẹchị. Árị nwọse oliv chịn mị ḅẹmẹ, ‘Mịna amanyanaḅọ sọ.’

⁹Oliv chịn mị nwọ pẹkẹrẹmẹ, ‘Árị ó ḍikiḍikiḅịa ḅẹḅẹ, ị̀ya pulo mị àrị anị ọlọchịẹmaḅịa, anị ini seni osi se oru ma na tomonima na pịrịarị ye mị.’

¹⁰Anị ejema nwọse figi chịn mị ḅẹye-ẹ, ‘Ị́rị́ ḅo mịna amanyanaḅọ sọ.’

¹¹Ọkụma figi chịn mị nwọ pẹkẹrẹmẹ, ‘Ị̀ya ḅẹlẹ chịnmgbọlụma àrị anị ọlọchịẹmaḅịa, àrị ó ḍikiḍikiḅịa ḅẹḅẹ.’

¹²Anịẹrẹchị ejema nwọse iru-mịẹ-chịnmgbọlụ-chịn mị ḅẹmẹ, ‘Ị́rị́ ḅo mịna amanyanaḅọ sọ.’

¹³Ọkụma iru-mịẹ-chịnmgbọlụ-chịn mị nwọ ḅẹmẹ, ‘Àrị ó ḍikiḍikiḅịa ḅẹḅẹ, ị̀ya ere-iru mị àrị anị ọlọchịẹmaḅịa, anị oru ma na tomonima na mịẹse ini ḅieḅẹlẹarịye mị.’

¹⁴Anịẹrẹchị bebe eje mamgba nwọse aga-ikpu mị ḅẹmẹ, ‘Ị́rị́ ḅo mịna amanyanaḅọ sọ.’

¹⁵Aga-ikpu mị nwọ pẹkẹrẹmẹ, ‘Ọ́ kọkọma ị̀ se ọ́mịna amanyanaḅọ mịẹ ḅimẹ ḅẹḅẹ, anịọkụma ó ḅo ị̀ chukuḅie ọ́ tịḅịkikima. Ó nemikase ọkọ mịẹkẹ ḅẹḅẹ, fịnị ị̀ya aga-ikpu ịkpangị ma ḅụ kọrị pakaḅo se Lẹbanọn ḅie awụ chịn ejema dọkịmaḅịa.’ ”

¹⁶Jotam ḅe pịkị nwọ ḅẹmẹ, “Mịọkụ,” “ọ́ nwọ Abimẹlẹk ḅe se amanyanaḅọ mịẹye mị kọkọma kura pịkị mịẹ gbẹịnye ọ́ nwọ mịẹ? Ómine osi nyana ḅara se Gidiọnị ḅe se ḅiekoroma se ḅụgbẹịn ḅara seni ò furo mị wẹrị, anị ọ̀ nwẹngị fịrịma sime ḅaraḅụ?

¹⁷Ó se ḅiekoroma na ị̀ ḍaḅe ori ọmụgbin ọ́ pịrịmẹ. Ori ò ḍumo abalaka ḅụ Midia apụma ḅara ḅie ọ́ ḍụaḅọrọmamẹ.

¹⁸Ọkụma mịmgba ómine ị̀ ḍaḅe furo mị dapakasam. Ómine oria owuapụ awọma ḅaasam—kịnị-a tesi oyi fịnjị; gbọrị ḍụparị ọgọnọ ḅụ—anị pa oria tọkụ Abimẹlẹk, oria fịrịnwẹngị tọkụ ma yayo ḅe, ọ́mịna mịnaḅọ-ẹ nwọḅẹye ẹrẹchị, ómine ò se Shẹkẹm amanyanaḅọ mịẹsam.

¹⁹Anịọkụma, mịọkụ ọ́ nwọse Gidiọnị ḅe na ò furo mị na mịẹye mị kọkọma kura pịkị mịẹ gbẹịnye-ẹ ḅẹḅẹ, ye ómine Abimẹlẹk ḅe na ḅieḅẹlẹ, ori pịkị ómine na ḅieḅẹlẹ ḅụ sime.

²⁰Ọkụma nemikase kurakẹ ḅẹḅẹ, ye fịnị Abimẹlẹk ḅe ḅụ kọrị pakaḅo Shẹkẹm na Bẹtmilo owuapụma na dọkịma. Ye fịnị Shẹkẹm na Bẹtmilo na ḅụ kọrị pakaḅo Abimẹlẹk ḅe dọkịma.”

²¹Anịeso ò numbireowu Abimẹlẹk ḅe ḍikiḅalafa ẹrẹchị Jotam ḅe ọ̀ mangị somun Biya mị ḅie angamẹ.

²²Abimẹlẹk ḅe tẹrẹ-a kụra ọ̀ nwọse Izrẹl mị damẹ.

²³Se Tamụnọ Ḅe mịẹse Abimẹlẹk ḅe na Shẹkẹm owuapụma na ḅo ḅẹrẹ nyanamẹ, se ini ḅarị nyana ḅereni ọ̀ pịrịkẹ.

²⁴Mịn mị mịẹmẹ mịẹse Abimẹlẹk ḅe na Shẹkẹm owuapụma na, ini mịẹ si mị ḅe gbẹịnye nwọ ọkịḅịa ẹrẹchị, anị ò kuḅie kụrọma se ò Gidiọnị owuapụ awọ ḅụ kịnị-a tesi oyi fịnjịma nini apụma.

²⁵Shẹkẹm owuapụma nweni se tụndụma ọgọnọ ḅụ ḅọị koroma se Abimẹlẹk ḅe ọbịmẹ, pịkị mun inia ḅie koroḅọ goyegoye ini nụḅọye ọfọịnmẹ. Ini mịn mị ḍuko se Abimẹlẹk ḅe pịrịmẹ.

²⁶Se Geal, Ebẹd yaḅe na oria mịnapụ owuapụma na Shẹkẹm mị ḅomẹ, se Shẹkẹm owuapụma ini ò se ḅiekpọmamẹ.

²⁷Inimgba so inia iru-mịẹ-chịnmgbọlụ-ozu ma ḅie mun se tụmgbakị elelenda tan, se àrị seni irumịẹ, se alalị fịmẹ. Ini so inia oru warị mị mun anịnyọ fị na ḅu na ḅụ sime se Abimẹlẹk ḅe ḍukosimamẹ.

²⁸Geal ḅe nwọ ḅẹmẹ, “Mine ḅọrọ ndende ọkụ sime apụ Shẹkẹm mị ḅie? Cheye ẹrẹchị wa fịrịnwẹngị Abimẹlẹk ḅe pịrị-ao? Jokoma ori ḅọrọ tụḅọ? Anị Gidiọnị yaḅe! Se ọ̀ tọnye Zibọl ḅe nwọ mịẹmịẹḅọ ḅe, ọkụma cheye ẹrẹchị wa fịrịnwẹngị ọ̀ pịrịḅe? Ọ́ nyana ḅereni ọ́mịna olomu ḍaḅọ Hemọ ḅe pịrị, ọ́mịna sẹ mị koromaḅọ ḅe!

²⁹Ị̀rị̀ ḅọrọ mịna tomonima tịḅịdamẹ ḅẹ ọkụma! Mgbọkụ Abimẹlẹk ḅe àrị ọ̀ chụasinḅịa! À nwọse ọ̀ ḅẹḅịa, ‘Ị́ya ọmụogbo mị jịn apụ se anịaḅụ chụa, se pakaḅo wa owusọ!’”

³⁰Opuama mị da Zibọl ḅe ò Geal ḅe kọn ọkwẹịn mị naa sịkị, anị ò ḅụosọmẹ.

³¹Ori okumun-apụ se Abimẹlẹk ḅe fịrịmamẹ Aruma mị ḅie na ini nwọḅẹ-ẹ, “Geal, Ebẹd yaḅe na oria owuapụ mịnapụma na ini Shẹkẹm ḅosam, se ini ḅereni ẹkẹ ị́ opuama mị ḅie sọḅo.

³²Anịẹrẹchị, mịọkụ, ị́rị́ na ị́ya owuapụma na ó so mun ḍin ḅụ ozuma ḅie ḅọịsime.

³³Ḅa dede ḅie ịrụa pakaḅịa sịkị ḅụ ọ́ sịsẹ se bẹkẹma owu se opuama mị paka. Anịsịkị Geal ḅe na oria owuapụma na ini pakaḅomẹ ḅẹḅẹ, ọ́ gagama ọ́mịna ịnyọ la-ọkụ se ini pịrị kọsịma!”

³⁴Anịẹrẹchị Abimẹlẹk ḅe na oria owuapụ mamgba na ḍin ḅụ somun inein-a kpo chụa ḅọịsimemẹ Shẹkẹm mị ḅie sọka ḅaraḅụ.

³⁵Abimẹlẹk ḅe na oria owuapụma na ini Geal ḅe ọrịmẹ opuama mị ḅọkọ ḅụ ọ̀ chịẹ sime anga ḅụ, se ini pakaḅomẹ ini ḅọịsime nyọ mị ḅụ.

³⁶Geal ḅe ini ọrị se nwọse Zibọl ḅe ḅẹmẹ, “Ḍiki tụndụ mị ọgọnọ ḅụ nweni koroḅoaḅẹ!” Zibọl ḅe nwọse ọ̀ pẹkẹrẹmẹ, “Tomonikẹ.” “Tụndụ ma tẹmẹ ma àrị-ẹ.”

³⁷Geal ḅe pịkị nwọse ọ̀ ḅẹmẹ, “Ḍiki! Tomoni tụndụ mị ogboku tukoroaḅẹ, gbọrị kpo pịkị tọrụtoluḅọ ḅe oria kuru chịn mị ateli ḅie ḅụ sime ḅoaḅẹ!”

³⁸Anị Zibọl ḅe nwọse ọ̀ ḅẹye-ẹ, “Nde mịọkụ ị́ya kpokoro ọkwẹịn mị sime anga? Ị́rị́ anị nwọ ḅẹye-ẹ na cheye ẹrẹchị wa fịrịnwẹngị ḅe Abimẹlẹk ḅe pịrịḅe. Mịna apụma anị ị́ ḍukosima sime apụ ma-ẹ. Paka somun ini na owusọ mịọkụ.”

³⁹Geal ḅe ọ̀ Shẹkẹm owuapụma ọkị paka mun Abimẹlẹk ḅe na owusọmẹ.

⁴⁰Geal ḅe ọ̀ mangị mẹ, se Abimẹlẹk ḅe ori ò ḍukomẹ. Ye tọn-apụ lamẹ, pịkị opuama mị ḅọkọ ḅụ sọnị.

⁴¹Abimẹlẹk ḅe Aruma mị ḅie ori angamẹ, se Zibọl ḅe ò Geal ḅe na oria owuapụ mịnapụma na desinmẹ Shẹkẹm mị ḅieḅụ, anịẹrẹchị ini ḅarị ineda anịju ḅụ angakẹ.

⁴²Anịḅe eneḅa Abimẹlẹk ḅe ọ̀ naamẹ na Shẹkẹm apụma ini ḅẹrẹḅiaḅẹ ini pakaso ozuma ḅie munḅịa ẹrẹchị,

⁴³anị ori oria owuapụma ọkị, ini se tẹrẹ-a kpo ḍie, se ozuma ḅie ḅọị sime ini koruye-ẹ. Tomonima opuama mị ḅie pakaḅo se ori ini ọrị sịkị, ọ̀ ḅọị sime nyọ mị ḅụ ọ̀ pakaḅomẹ, ini ḅaaḅịa ẹrẹchị.

⁴⁴Abimẹlẹk ḅe na oria kpo mị na bemun opuama mị ḅọkọ kiki sịkị, ísí mama kpo ma ozuma ḅie owu se tomonima paka, se inimgba ḅaafamamẹ.

⁴⁵Owu mị bebe ene mị mgba ini nwọse anị sọmẹ. Abimẹlẹk ḅe ori opuama mị ọkị, se anịa ḅie sime apụ mamgba ḅaafama, anị kan sara, se fụn seni kiri mị sara gbẹịnmẹ.

⁴⁶Shẹkẹm mị ḅie owuni kụrọ warị mị ḅie sime tịḅịnị mamgba mịn mị naa sịkị, ini ḅụḍụa nyọ ḍọkịmẹ Beal-Ọḅọkụ-oru warị mị ḅie kụrọtẹịn nyọ mị ḅieḅụ.

⁴⁷Ini ḍuko Abimẹlẹk ḅe pịrịmẹ na anịju ḅụ ini koḅirima sime waraḅẹ,

⁴⁸anị oria owuapụma na ori na Zalmọn Tụndụ mị kpọlị iwomunye-ẹ. Anịju ḅụ ori apala ọkị se gbọrị eje ịkpangị pẹlẹ, se anị pụra oria aba gbanamẹ. Ọ̀ nwọse oria owuapụma ḅẹmẹ na ini sarama ọkọ mịẹ.

⁴⁹Anịẹrẹchị ọrụḅọḅọ gbọrị eje gbọrị eje ịkpangị nwọ pẹlẹmẹ, anịsịkị ini Abimẹlẹk ḅe ḍukomun se ịkpangị ma seni tomonima kpo ḅụ sime owuni kụrọ warị mị ḅọkọ ḅụ tunduruma koromamẹ. Ini fịnị se warị mị ḅụchụamẹ se owuni kụrọ warị mị ḅie sime apụ mamgba dọkịmafamamẹ, anị owuni kụrọ warị ḅie sime a tomoni ineda kịnị-a mẹndẹ oyiasi fịnjị laḅịa, owuapụ na eremeni na dọkị fa mẹ.

⁵⁰Anịsịkị Abimẹlẹk ḅe ò so Tebẹs mun se anị opuama mị gbori kelema se anị ọkịmẹ.

⁵¹Gbọrị kụrọ sokopi warị anịju simemẹ, se opuama mị ḅie sime ama na ere na, pịkị tịḅịnị mamgba na, mangị anị damamunmẹ. Ini ḅieju ḅọkọ mị ịkasị inia ḅụ pịrị se kpọlị ochu mị ọgọnọju mun simemẹ.

⁵²Abimẹlẹk ḅe ò ḅo owu se kụrọ sokopi warị mị paka-oḅo sịkị, ori iwo ḅọkọ mị damamun se fịnị se sokopi warị mị ḅụ chụaḅịa ẹrẹchị.

⁵³Ọkụma gbọrị eremeniḅọ ḍụparị ḅara se ọ̀ tịḅị gbin se ọ̀ tịḅị okpolokpo mị pumẹ.

⁵⁴Anị kirikiri oria owuniayema pụra asẹmẹnịḅọ ḅe ọ̀ nwọ chịn ọkị se nwọse ọ̀ ḅẹmẹ, “Ị́ya okola-agiji mị wọrọ pakụmaḅo ị̀ ḅaa. À ḅikẹ ini nwọḅẹ na eremeniḅọ re anị ị̀ ḅaaye-ẹ.” Anị asẹmẹnịḅọ ḅe ò temi gbin se ọ̀ fịye-ẹ.

⁵⁵Izrẹlapụma Abimẹlẹk ḅe ọ̀ fịsam nwọḅẹye mị ọrị sịkị, inimgba ini so ama mun mẹ.

⁵⁶Mị ḅara anị Tamụnọ Ḅe wẹrị Abimẹlẹk ḅe se ḍawu ḅe mịẹ si mị se ọ̀ gbẹịn ọkụ-ẹ, anị ori oria mịnapụ owuapụ kịnị-a tesi oyi fịnjịma ḅaa ẹrẹchị.

⁵⁷Tamụnọ Ḅe ọ̀ pịkị mịẹse Shẹkẹm apụma inia tọrụsiọrịmẹ inia sitịḅị mị gose, anị Jotam Gidiọnị yaḅe worinime se ini pịrị sịkị ḅụ ọ̀ ḅẹ ọkụ mị.