Read kirikeni 2 Jọn 1 Bible Online

2 Jọn 1 - kirikeni bible

2 Jọn 1

¹Mịn anị chọchị mị ḅie Sẹnịḅọ ḅe se sẹịn— Yela Eremeniḅọ ma na árịa awọma na fịrịmaḍiri mị-ẹ, anị à kọkọma ḅẹlẹma apụma. Ị̀rị̀ ngẹrịkẹ, ọkụma kọkọmaye mị nemiapụ mamgba ị́ ḅẹlẹmamẹ,

²anịatịḅị kọkọmaye mị mịna ḅie anị omi-ẹ, anị pịkị mịna ḅie simegbasoḅịa.

³Ye Tamụnọ Ḍaḅọ Ḅe na pịkị Jizọs Kraịst, Ḍaḅọ Ḅe Tọkụ Ḅe na, ḍikiḅụgerere na, ḍikitịḅịfoin na, pịkị deinma na, nwọse wa pịrị. Ye kọkọmaye ḅụ na, ḅẹlẹma ḅụ àrị mịnaye nwọ sọ.

⁴Anị opuma ị̀ ḅieḅẹlẹmamẹ ḍọkịḅo ọrị na ị́ya awọma ḅie tọn apụ Ḍaḅọ Ḅe kọkọmaye mị ḅe ḍumo ini nwọ kọn-aḅẹ nwọ ḅẹye mị.

⁵Anịgose à ḍuko ị́ pịrịaḅẹ, yela Eremeniḅọ; ye wa jịnḅọ jịnḅọ ḅẹlẹma. Mịn mị, ịwọ oloko ḅara ḅụ à gịẹịn ọ́ pịrịarịyekẹ; ọkụma sakị sịkị ngịsị anị wa mị oloko mị nyanaye-ẹ.

⁶À nwọ ḅẹarị ḅẹlẹma mị fieaḅẹ na Tamụnọ Ḅe olokoma ḅie ḅụ wa ḅịpịpoki ḅaraḅụ angaḅịa. Sakị sịkị ngịsị ọ́ naa ḅọrọ sa ḅara ḅụ, oloko mị ḅẹmẹ na ómine mgba ḅẹlẹma ḅụ anga.

⁷Tọn-a nweni telima famapụ ḅo bebe tomonikiri mị ḅie mgba sarasam, anị Jizọs Kraịst Ḅe tomoniḅọ ḅara se ḅosam nwọ ḅẹye mị ḅerenika apụma. Ọkọ simeḅọ anị nweni telima famaḅọ-ẹ pịkị Kraịst Ḅe na tarakaḅọ-ẹ.

⁸Anịẹrẹchị, ọ́ ḅụ ọbị, mịẹse wa nwẹngị sa fịrịma faye sọ ọ́ pịrị ẹka ọkụ, ọkụma ó ḅeinma ọ́mịna gbẹịnye nwọ nyanaḅịa ḅara.

⁹Kraịst Ḅe ḍieye mị ḅụ simeka, se anị saḅakoro ḅọ goyegoye ma Tamụnọ Ḅe nyana ọkịkẹ, ò ḍieye mị ḅụ sime ḅọ goyegoye iniḅọ Ḍaḅọ Ḅe na Tọkụ Ḅe nyanasam.

¹⁰Anịẹrẹchị, ọ́mịna warị ḅo se mịn ḍieye mị se ḅokaḅọ goyegoye iniḅọ da ị́ya warị ḅie chuma; “Deinma sime ị́ pịrị” nwọ ḅẹ kereniḅịpị mị sọnị se ọ̀ pịrị ma.

¹¹Anịatịḅị deinma ḅi ọ̀ pịrị ḅọ goyegoye iniḅọ ọ̀ ḅụ sọ oria si mịẹmịẹaye ma mịẹ ḅọ sọsam.

¹²À ḍuko ọ́ pịrịḅịaye ḅakamẹ, ọkụma ḍiri ḅụ à gịẹịn ẹkẹ; anịnakaraka à ḅimẹ à ḅara na ḅo ómine na ịrịa se tọrụ se ómine na dama ọkwẹịnma, mịẹse mịna ḅieḅẹlẹ mị ḅeinḅịa ọkụ.

¹³Ọ́mịna ḅụ yela mịnaḅọ ma anị Tamụnọ Ḅe pịkị sẹlẹọkịsa ḅọ ma awọma ini ó kerenimẹ.