Read kirikeni Ḍieḅelema Yema 1 Bible Online

Ḍieḅelema Yema 1 - kirikeni bible

Ḍieḅelema Yema 1

¹Mịn ḍiri mị ḅie simeayema anị paka se Jizọs Kraịst Ḅe ḍieḅelema aye ma-ẹ. Tamụnọ Ḅe gose mịn mị ḍieḅelema ọ̀ pịrịye anị, mịẹse oria fịrịnwẹngịapụma ḅo ḅọlọka sịkị ḅụ pakaḅịa ayema nwọ nemiḅịa ọkụ. Kraịst Ḅe oria enjẹlḅọ ḅe fịrịma ḅụ, anị ọ̀ mịẹse oria fịrịnwẹngịḅọ Jọn ḅe mayema nemiye-ẹ.

²Se Jọn ḅe ori ọrịaye mamgba ọ̀ pịkị nwọ ḍukosam. Mịn mị anị Tamụnọ Ḅe ḅara ḅo oku mị-ẹ, pịkị Jizọs Kraịst Ḅe ḍieḅelema kọkọmaye mị ḅụ, ori Jọn ḅe gịẹịn koromaye ma-ẹ.

³Ḅieḅẹlẹ sime mịn ḍiri mị kịẹn ḅọ nwọ pịrịmẹ, ḅieḅẹlẹ mị anị pịkị sime mịn ịkịankoro ọkwẹịn mị poki se pịkị mịn ḍiri mị ḅie gịẹịnye ma se bebe ye mịẹ apụma pịrịmẹ! Anịatịḅị, mayema ḅo pakaḅịa sịkị mị kpekisam.

⁴Mịn anị Jọn ḅe se Esia sẹ pẹkẹrẹ mị ḅie sime sọnọma chọchị ma sẹịnma fịrịfịrịma ḍiri mị-ẹ: Ye mịọkụ sime Ḅọ ḅe, ḅọrọsa sịkị sime Ḅọ ḅe, pịkị ḅoḅịa Ḅọ ḅe na pịkị oria amanyanaḅọ ngada mị tọrọkọ sime sọnọma tẹmẹma ḅụ ḅo ḍikiḅụgerere na deinma na sime ọ́ pịrị,

⁵pịkị Jizọs Kraịst, kuḅie se ḅụgbana gbẹịn onyechịẹḅọ ḅe fịapụma ḅụ ini tatarị sịsẹma ḅọ ḅe, ori pịkị tomonikiri mị ḅie sime amanyanapụma ḅụ ḅẹrẹtọnḅọ-ẹ. Ọ̀ wa ḅẹlẹmamẹ, se oria fịḅụ mịna sima ḅụ ọ̀ wa pẹkẹrẹ pakụmaḅosam

⁶ọ̀ pịkịna wa se agbamịẹapụ amanyanakiri mịẹsam, fịrịnwẹngị se ọ̀ Tamụnọ, pịkị Ḍawu Ḅe pịrịḅịaye ẹrẹchị. Ye boma na kụrọ na sime Jizọs Kraịst Ḅe pịrị, ḅẹsịkị ḅẹsịkị la! Amẹn.

⁷Ḍiki, ò soḅuno ma na ḅoaḅẹ! Tomoniḅọ goyegoye ori ọrịḅịa, ḅẹkẹrẹ se ò temi apụma sọnị. Tomonikiri ḅie sime tomoni mamgba ò gose kururuḅịa. Anị anị simeḅịa ọkụ-ẹ! Amẹn.

⁸“Ị̀rị̀ anị Tatarị pịkị Kuluma Ḅe-ẹ,” Kụrọmamgba Nyana Tamụnọ Ḅe nwọ ḅẹmẹ, mịọkụ sime, ḅọrọsa sịkị sime, pịkị ḅoḅịa Ḅọ ḅe-ẹ.

⁹Ị̀rị̀ anị Jọn, ọ́mịna mịnaḅọ ḅe-ẹ, Ị̀rị̀ sọnị ómine na tọrụsiọrị ḅụ inema nyana, amanyanakiri mị na pịkị kuḅie kụrọ mị na ḍiaọkịarịḅọ-ẹ, anị Kraịst Ḅe ḍukonwẹngịapụ ḅara ḅụ. Ini ị̀ se Patmọs chụọ mị ḅie koromamẹ, anịatịḅị Tamụnọ ọkwẹịn mị na Jizọs Kraịst Ḅe ḍieḅelemasa kọkọmaye mị à nwọ oloku pakụmaye ẹrẹchị.

¹⁰Nyanaḅọ Ḅe ene mị ḅụ Fịafịa Tẹmẹ Ḅe ḅo ị̀ya ọgọnọ gbanamẹ. Anịsịkị, oḍu fie ọkụ fiearị gele pụkọ ị̀ya ọḅụju à nwọ naamẹ.

¹¹Pụkọ mị nwọ ḅẹmẹ, “Ị́ ọrịye gịẹịn, se ḍiri mị se sọnọma amama ḅie sime chọchị ma sẹịnma: Ẹfịsọsị na, Smaịna na, Pagamọm na, Tayatira na, Sadis na, Filadẹlfia na, pịkị Laodisia mị na.”

¹²Anị à vinpịkị ọkwẹịn ị̀ pịrịarịḅọ ḅe ḍikiye-ẹ, àrị ọrịye anị ini goli se mịẹ sọnọma tọnjie gbanaye.

¹³Arịa ḅie ḅụ gbọrịye tomoniḅọ na kịkịnamẹ, ọ̀ chụa koro ḅụchụaye mị anị mun ọ̀ ḅụọchuku lamẹ. Anịsịkị ini goli se mịẹ ḅirikunye ọ̀ nwọse oria ekpe ḅọrọmamẹ.

¹⁴Ọ̀ tịḅị inimema owo, anịkanịka abalalaḅịa ọkụ ḅịamẹ, anịsịkị ọ̀ tọrụmgbọlụma àrị fịnị kọrị ọkụ kọrịmẹ.

¹⁵Ini gurosa alapẹlẹka wananị wananịma ḅịa ọkụ anị ọ̀ ḅụọma ḅịa ọkụ-ẹ; anịsịkị ọ̀ pụkọ mị chịngị ọgọnọ ideri koroarị ogororo mengi de ọkụ demẹ.

¹⁶Oria amaḅara mị ḅie sọnọma lolia ọ̀ nwọ ọlọmẹ, anịsịkị mama tọrụ nyana ọḅụ okola-agiji ọ̀ ḅịpị ḅie pakaḅomẹ. Ọ̀ tọrụ mị eneogboin ịrụa ḅịa ọkụ ḅịamẹ.

¹⁷Àrị ori ọrị sịkị fịsa ḅọ ḅara à nwọse ọ̀ ḅụọchuku ḅịkị koromẹ se ori oria amaḅara mị ọ̀ nwọse ị̀ya ọgọnọ gbana se ị̀ ḅẹmẹ na: “Ḅalafama! Ị̀rị̀ anị ye ḅụ tatarị mị na pịkị anịa kuluma mị na-ẹ.

¹⁸Ị̀rị̀ anị ḍumo ḅọ ḅe-ẹ! À fịmẹ, ọkụma mịọkụ à ḍumo gbamasosam. Fị mị na ḍụẹịn ama mị na ḅụ à kụrọ nyanamẹ.

¹⁹Anịgose, ị́ ọrịsaye ma gịẹịn, anị mịọkụ simeye ma na pịkị ọḅụkọ pakaḅịaye ma na.

²⁰Mịn ị̀ya amaḅara mị ḅie ị́ ọrị sọnọma loliama na pịkị sọnọma goli tọnjie gbanaye ma ḅe ḅọịye mị fiearịye-ẹ: àrị sọnọma loliama anị sọnọma chọchị ma ḅe enjẹlapụ ma-ẹ; anịsịkị sọnọma tọnjie gbanayema anị sọnọma chọchị ma-ẹ.