Read kirikeni Ḍieḅelema Yema 12 Bible Online

Ḍieḅelema Yema 12 - kirikeni bible

Ḍieḅelema Yema 12

¹Anịsịkị gbọrị opu ḅụgbiripuma elekima sotọrụ pakamẹ. Gbọrị eremeniḅọ omi-ẹ, árịa ḅụchụaye anị ịrụa mị-ẹ, akalụ mị á ḅụọchuku omi-ẹ, se oyimaịn lolia fịnjị ḅụ sime amanyanaḅọchu á tịḅị ọgọnọ omi-ẹ.

²Á tọkụ yi gose jikeaḅẹ, tọkụ yi mị ḅe ḅụfụka na ḅụ akụ mị na gose árị olokumẹ.

³Jịn ḅụgbiripumaye sotọrụ pakamẹ. Gbọrị opu pulo-pulo dragọn sotọrụ pakamẹ. Sọnọma tịḅị na, oyi-a ịvalị na ọ̀ nwọ nyanamẹ, se amanyanaḅọchu tịḅịma ḅụ gbọrịye gbọrịye ọgọnọ omi-ẹ.

⁴Ori ò tumo mị se sotọrụ mị ḅụ loliama se tẹrẹ-a kiri pu ḅe gbọrị kiri, nwọ jine se àrị se tomonikiri gbinmẹ. Ori eremeniḅọ ma tọrọkọ chịẹmẹ, mịẹse á yi koroma kirikiri ọ̀ tọkụ mị nwọ pẹịḅịa ḅara.

⁵Anịsịkị owutọkụ á nwọ yimẹ, ikulele amgbara ọ̀ ḅara omi-ẹ ò se ḅẹrẹtọn sẹ mamgba nwọ pịrịḅịaye mị. Ọkụma tọkụ ḅe ini kụrọ ḅara se ò deki soḅie mun Tamụnọ Ḅe na oria amanyana ngada mị na tọrọkọ koromamẹ.

⁶Eremeniḅọ ma á mangị so mun Tamụnọ Ḅe karakarama koroma se á pịrịsa piri-ele mị ḅie mun mẹ, anịanga ḍin-a tẹrẹ ẹndẹ na ḍin-a tesi na ini nwọse á ḍikiḍikiḅịa.

⁷Anịsịkị soḅie owu koromẹ, Maịkịẹl ḅe na oria enjẹlapụma na owu se dragọn ḅe pakamẹ; se dragọn ḅe na oria owunima na ini na owusọmẹ.

⁸Ọkụma ini dragọn ḅe inumamẹ, se ori na oria enjẹlapụma na soḅie sime mị ini ḅarị ḅerenikẹ.

⁹Opu dragọn ḅe ini ò de koromamẹ—ori olomu sịkị ḅe oruwu ḅe, ini Oru se chịnḅọ ḅe, tomonikiri mị mgba telima ḅọ ḅe. Ori na oria enjẹlapụ mamgba ini ini de tomonikiri sẹịnmamẹ.

¹⁰Anịsịkị soḅie à gele pụkọ naamẹ. Anị nwọ ḅẹmẹ, “Mịọkụ Tamụnọ Ḅe oria ḍụaḅọrọma mị anị ḅosam! Mịọkụ Tamụnọ Ḅe Amanyanaḅọ ḅara ọ̀ nwọse oria kụrọ mị ḍiepakụmasam! Mịọkụ oria Mẹsaya Ḅe oria kụrọ mị ọ̀ nwọ ḍiepakụmasam! Anịatịḅị mịna Tamụnọ Ḅe tọrọkọ ḅụ chịẹsime ḍin na enekaka na ḅụ ḅẹrẹ se mịna mịnapụma tịḅị sẹịn sẹịn ḅọ ḅe ini soḅie ò dekoromasam.

¹¹Mịna mịnapụma, ini ọ̀ nẹngịmasam Anana Tọkụ Ḅe pulo mị ḅụ, anị ini ḍukopakụmasa kọkọmaye mị ḅụ; ini pịkị ḅụkarakaramamẹ inia ḍumo ma abalaka ḅara ḅụ fị.

¹²Anịgose ó ḅieḅẹlẹ ómine soma na arịa ḅie anga apụ mamgba na! Ọkụma anị ḅalafamaye sọ tomonikiri mị na tọrụ mị na pịrị ọkụ ḍiki! Anịatịḅị Oru ḅe ò koroḅo ọ́ lasam, opu ịganị pịkị ò ḅie omi-ẹ, anịatịḅị ò nemimẹ na boka kala sịkị kẹngẹ anị ọ̀ nyanaye-ẹ.”

¹³Dragọn ḅe ḅo nemisam na ini ò de tomonikiri sẹịnmasam nwọ ḅẹ sịkị, anị ọ̀ sakị owutọkụ ḅe yi koroma eremeniḅọ ma ḍukoye-ẹ.

¹⁴Mama opu igo pamba ini nwọse á pịrịmẹ, mịẹse árị ineda fin so mun piri-ele ḅie árịa nyọ mị laḅịa ḅara, anịju tẹrẹ-a kụra na pẹkẹrẹ ini nwọse á ḍikiḍikiḅịa, dragọn ḅe ḅara ḅie ye á la-ẹka ḅara ḅụ.

¹⁵Anịsịkị anị dragọn ḅe ọ̀ ḅịpị ḅie opu mengi osiro pakụma eremeniḅọ ma daye-ẹ, mịẹse anị á dekisoḅịa ḅara.

¹⁶Ọkụma tomonikiri mị ḅarachụa eremeniḅọ ma pịrịmẹ, anị anịa ḅịpị finji se dragọn ḅe ḅịpị ḅie pakaḅo mengi mị mịnị ọkịmẹ.

¹⁷Se dragọn ḅe ori ịganị eremeniḅọ ma pịrị, se mun owu se á ḅụ pakaḅo ísí kọn apụma na, Tamụnọ Ḅe olokoma koko apụma na, pịkị Jizọs Ḅe ḍuko ḅelema kọkọmaye mị ḍukonwẹngịapụma na nwọ pakamẹ.

¹⁸Anịsịkị dragọn ḅe tọrụaka chịẹsimemẹ.