Read kirikeni Ḍieḅelema Yema 13 Bible Online

Ḍieḅelema Yema 13 - kirikeni bible

Ḍieḅelema Yema 13

¹Anịsịkị à gbọrị nama ọrịmẹ, tọrụ mị ḅie pakaḅoaḅẹ oyi-a ịvalị na, sọnọma tịḅị ọ̀ nwọ nyanamẹ. Gbọrị amanyanaḅọchu gbọrị ịvalị gbọrị ịvalị ọgọnọ omi-ẹ; anịsịkị se Tamụnọ Ḅe wọlọḅịa ẹrẹ anị gbọrị ịvalị gbọrị ịvalị ḅụ simeye-ẹ.

²Nama ḅe ori ọpọ chịrị simeọkụ simemẹ, ḅụọma oḅoin ḅụọ kịkẹmẹ, anịsịkị ḅịpị mị chịrịḅa ḅịpị kịkẹmẹ. Dragọn ḅe oria kụrọ mị na, oria amanyanaḅọ ngada mị na, pịkị oria opu ḅẹrẹtọn kụrọ mị la-ọkụ mgba na nwọse nama ḅe pịrịmẹ.

³Nama ḅe tịḅịma ḅụ gbọrịye, ye opuma laḅara simemẹ, ọkụma anịa ịnọ mị ḅịasam. Ijira bebe tomonikiri mị mgba ḅụ saramẹ, se ini nama ḅe ḍukonwẹngịmẹ.

⁴Tomoniḅọ goyegoye dragọn ḅe tẹkẹmẹ, anịatịḅị oria kụrọ mị ọ̀ nwọse nama ḅe pịrịsam na ò se ḅẹrẹtọn. Ini pịkị nama ḅe tẹkẹmẹ. Ini nwọ ḅẹmẹ, “Tụḅọ nama ḅe na kịkịna? Tụḅọ ineda owu se ọ̀ paka ḅe?”

⁵Ini nama ḅe wẹrịso se ọ̀ Tamụnọ Ḅe wọlọḅịa ḅara nwọse ọ̀ ḅụ dekichịẹmamẹ, se ini pịkị ḅereni ọ̀ pịrịmẹ na akalụ-a mesi na mama akalụ ọ̀ nwọse kụrọ kọn.

⁶Ọ̀ sakị Tamụnọ Ḅe na, oria ẹrẹ mị na, oria anga nyọ mị na, pịkị soḅie angapụma na, nwọ gulugulumamẹ.

⁷Ini ọ̀ wẹrịso se ori owu se Tamụnọ-a tomonima paka se ini inumamẹ, ini pịkị kụrọ se ọ̀ pịrịmẹ na ò se ḅẹrẹtọn tomonikiri ḅie sime furo furoma na; sẹ kịrịkịrị ma na, pịkị ọkwẹịn ḅẹlẹ kịrịkịrị apụ mamgba nwọ pịrị.

⁸Tomonikiri angapụ mamgba ọ̀ tẹkẹḅịa. Ọ̀ tẹkẹ ẹka apụma anị tomonikiri mị ma tẹmẹka sịkị ngịsị ini ḅaa Anana Tọkụ Ḅe ḍumo apụma ḍiri mị ḅie ẹrẹ gịẹịnsa apụma kẹngẹ-ẹ.

⁹“Anịgose ó poki, ó ḅeri nyanamẹ ḅẹḅẹ!

¹⁰Ini kunḅịa ḅọ goyegoye, gbarịmaka ḅara ḅụ ini iniḅọ kunḅịa; ini agiji se ḅaaḅịa ḅọ goyegoye, gbarịmaka ḅara ḅụ iniḅọ agiji fị nwọ kọnḅịa. Mịn mị ḅimẹ na Tamụnọ-a tomonima ini inema na ḅereni na nwọ nyana, pịkị kuḅie se ḅụgbana gbẹịn ḅara nwọ sime.”

¹¹Anịsịkị jịn nama à nwọ ọrịmẹ; tomonikiri ḅie ọ̀ pakaḅomẹ. Ọ̀ mama ịvalị nyanamẹ, àrị anana tọkụ tịḅị ịvalị kịkẹmẹ se dragọn ọkwẹịn ọkụ ọ̀ nwọ ọkwẹịnmẹ.

¹²Tatarị nama ḅe ḅara ọ̀ nyanaḅo kụrọ mị ọ̀ nwọse pịkị ọ̀ tọrụkuḅu fịrịnwẹngịmẹ. Ọ̀ mịẹse tomonikiri mị na anịa ḅie sime apụma na tatarị nama ḅe tẹkẹmẹ, anị ịnọ ma ḅịasa wu ḅe.

¹³Tọn-a ḅụgbiripumaye maịn karama nama ḅe nwọ mịẹmẹ. Nwenimgba tọrụkuḅu ọ̀ mịẹse fịnị soḅie sokoro ḅo tomonikiri koromẹ.

¹⁴Tatarị wu ḅe tọrụkuḅu ḅụ, ini ọ̀ wẹrịso se ọ̀ mịẹ ḅụgbiripumaye ma ḅụ, bebe tomonikiri mị mgba ọ̀ nwọ tẹlịmamẹ. Nama ḅe ḍuko ini pịrịmẹ na ini okola-agiji se ye se lama se pa ḍumo àrị wu ḅe osi gose ini agbambuḅọ tẹmẹ.

¹⁵Ini maịn karama nama ḅe wẹrịso se ḍumo ọwụ ọ̀ nwọse tatarị wu ḅe ḅụ chụamẹ, mịẹse agbambuḅọ mị anị ineda ọkwẹịn pịkị anị tẹkẹ ḍụkụka apụma ḅaaḅịa ḅara.

¹⁶Nama ḅe tomoni mamgba, kala na sẹnị na, ala na igwein na, omoniapụ na furoawọ na, mịẹse ini inia amaḅara ḅụ anịkanịka inia fụḅaraogbo ma ḅụ, elekima chụamẹ.

¹⁷Nama ḅe ẹrẹ mị, anịkanịka sime oria ẹrẹ mị pịrị kịẹnḅịpị mị ḅe elekima mị, se iniḅọ ḅụ chụaka ḅọ ineda ye fẹ anịkanịka yedẹrị ẹkẹ.

¹⁸Nemi anị mịn mị ḅiye-ẹ. Ye nemiḅọ goyegoye ineda nama ḅe kịẹnḅịpị mị fieye mị nwọ ḍọkịḅo nemiḅịa, anịatịḅị tomoniḅọ ẹrẹ mị anị chịẹ pịrịye-ẹ. Chịn soi na ineinfa tesi oyifịnjị anị anịa kịẹnḅịpị mị-ẹ.