Read kirikeni Ḍieḅelema Yema 15 Bible Online

Ḍieḅelema Yema 15 - kirikeni bible

Ḍieḅelema Yema 15

¹Anịsịkị jịn opu ḅalafama ḅụgbiripumaye à nwọ ọrịmẹ so mị ḅie. Sọnọma obi ọlọ sọnọma enjẹlapụ omi-ẹ. Ma sọnọma obi ma anị kulumaye ma-ẹ, anịatịḅị àrị anị kuluma ḅara ḅụ Tamụnọ Ḅe ịganị mị ḍiepakụmaye-ẹ.

²Anịsịkị opu tọrụ ọkụ simeye à nwọ ọrịmẹ, tẹmẹḍikiye ḅịa ọkụ anị nwọ ḅịamẹ, fịnị anị na wọlọma mẹ. À pịkị nama ḅe na pịkị ori na kịkịnaye mị na; pịkị oria ẹrẹ mị ḅụ kịẹnḅịpị se elekima ḅaraḅụ gịẹịn apụma nẹngịma tomonima ọrịmẹ. Ini tẹmẹḍikiye ọkụ sime ala mengi tọrụ mị anga chịẹsimemẹ, se Tamụnọ Ḅe se ini pịrị ọbọ ma nwọ ọlọ waraḅẹ

³se Moziz, Tamụnọ fịrịnwẹngịḅọ ḅe, nime mị na, Anana Tọkụ Ḅe nime mị na ini nwọ chuaḅẹ: “Nyanaḅọ, Kụrọmamgba Nyana Tamụnọ, ị́ya fịrịma àrị ḍụḅa pịkị ḅụgbiripumam! Sẹ mamgba Amanyanaḅọ; ị́ya atelima àrị karakara pịkị kọkọmaye sọmẹ!

⁴Tụḅọ ḅalafa ḅụ osi ḅara se ị́ tọrọkọ chịẹ-ẹka, Nyanaḅọ? Tụḅọ ị́ya opu ḍukopakụma mị sịkịḅe? Ị́rị́ kẹngẹ anị fịafịa Ḅọ ḅe-ẹ. Sẹ mamgba ḅo kpẹrẹkị ị́ tẹkẹḅịa, anịatịḅị nwenimgba ị́ya karakara mịẹmịẹaye ma ọrịsam.”

⁵Mịn mị ḅọrọ sịkị, soḅie sime Oputẹkẹwarị mị finji waraḅẹ; se àrị ọrịmẹ, Tamụnọ Ḅe tọrụkuḅu Osiḅụ sime Ikowarị mị anịa ḅie omi-ẹ.

⁶Àrị sọnọma obi ma ḅara sime sọnọma enjẹlapụma Oputẹkẹwarị mị ḅie pakaḅomẹ. Fịafịa wananị-wananị lọkọ-ḅịtẹ ḅụchụaye ini nwọ chụamẹ. Anịsịkị goli-goli ḅirikunye ini nwọse inia ekpe ma ḅọrọmamẹ.

⁷Anịsịkị àrị inein-a ḍumo tẹmẹayema ḅụ gbọrị wu ḍumogbamaso Tamụnọ Ḅe ịganị mị ḅie sime sọnọma goli-goli bọlị ma se sọnọma enjẹlapụma pịrịmẹ.

⁸Tamụnọ boma mị na, oria kụrọ mị ḅe onwoin mị na Oputẹkẹwarị mị ḅeinmamẹ se gbọrịḅọ sọnị ineda anịa ḅie sọkẹ, àrị sọnọma enjẹlapụma dekiḅo sọnọma obi ma faka simeogbo.