Read kirikeni Ḍieḅelema Yema 16 Bible Online

Ḍieḅelema Yema 16 - kirikeni bible

Ḍieḅelema Yema 16

¹Anịsịkị Oputẹkẹwarị mị ḅie à gele pụkọ naamẹ, nwọse enjẹlapụma ḅẹaḅẹ: “Ó mun sọnọma bọlị ma ḅie sime Tamụnọ ịganị mị ọsụn tomonikiri mị ọgọnọ sara!”

²Tatarị enjẹlḅọ ḅe so mun oria bọlị mị ḅie simeye mị ọsụn tomonikiri mị ọgọnọ saramẹ. Ḅalafama pịkị ḅụfụkama si ịnọ ini nama ḅe elekima mị chụapụ ma na, pịkị kpẹrẹkị oria agbambuḅọ mị tẹkẹ apụma na ḅụ pakamẹ.

³Anịsịkị maịn karama enjẹlḅọ ḅe oria bọlị mị ḅie simeye mị ọsụn ala mengi tọrụ mị ọgọnọ saramẹ. Mengi mị anị pịkịḅo fịsaḅọ oju pulo kịkẹmẹ, se ala mengi tọrụ mị ḅie sime ḍumoaye mamgba fịmẹ.

⁴Anịsịkị tẹrẹ karama enjẹlḅọ ḅe oria bọlị mị ḅie simeye mị ọsụn ideri ḅumengi tọrụ ma ọgọnọ saramẹ, pịkị kirichuku ḅie pakaḅoarị mengi ma ọgọnọ na; se àrị pịkịḅo tomoni pulo sọmẹ.

⁵Mengi mị ḍikiḍiki enjẹlḅọ ḅe pụkọ à nwọ naamẹ, nwọ ḅẹmẹ, “Yei Fịafịa Ḅọ, ị́rị́ mịọkụ sime pịkị ḅọrọsa sịkị sime ḅọ, ị́ya ḅẹrẹkọnḅịpị ma àrị karakaramẹ!

⁶Ini fịafịapụ ma na, ịkịankoroapụma na pulo ma ọsụn ye gose, ị́ pulo se ini pịrịmẹ na ini ḅu. Mịn mị ini gbẹịnmẹ!”

⁷Anịsịkị agbamịẹ ẹbẹ mị nyọ ḅụ, à pụkọ naamẹ, nwọ ḅẹmẹ, “Yei Nyanaḅọ, Kụrọmamgba Nyana Tamụnọ! Ị́ya ḅẹrẹkọnḅịpị ma àrị karakara pịkị kọkọmaye sọmẹ!”

⁸Anịsịkị inein karama enjẹlḅọ ḅe oria bọlị mị ḅie simeye mị ọsụn ịrụa mị ọgọnọ saramẹ, se ini anị wẹrịso se anịa ọfịrị mị anị nwọse tomonima dọkịmamẹ.

⁹Anịa ọfịrị mị tomonima dọkịma so ọkụma ini Tamụnọ Ḅe ḍukosimamẹ, ori nwọ ma obi ma ḅụ kụrọ nyanaḅọ ḅe. Ọkụma ini inia sima ḅụ vinpịkị se oria opu mị tokoni ḍụkụkẹ.

¹⁰Anịsịkị sọnọ karama enjẹlḅọ ḅe oria bọlị mị ḅie simeye mị ọsụn nama ḅe amanyanaḅọ ngada mị ọgọnọ saramẹ. Kanakana nama ḅe amanyanakiri mị gbẹịnmẹ; inia ḅụfụka ma gose, tomonima ini inia ḅịpị ḅie ḅẹlẹ ma tokurumẹ.

¹¹Se inia ḅụfụka ma na ịnọ ma na gose, ini soḅie Tamụnọ Ḅe ḍukosimamẹ. Ọkụma inia sima ḅụ ini vinpịkị ḍụkụkẹ.

¹²Anịsịkị sonio karama enjẹlḅọ ḅe oria bọlị mị ḅie simeye mị ọsụn Yufretis opu tọrụ mị ḅie saramẹ. Se tọrụ mị anị fịḅịmẹ, mịẹse anị ateli sọ ịrụapakapaka nyọ mị ḅụ ḅo amanyanapụma pịrịḅịaye gose.

¹³Anịsịkị ngụ na kịkịna tẹrẹ-a sitẹmẹ à nwọ ọrịmẹ. Dragọn ḅe na, nama ḅe na iruo ịkịankoroḅọ ḅe na, ḅịpị ḅie àrị pakaḅomẹ.

¹⁴Àrị anị ḅụgbiripumaye ma mịẹmịẹ si-a-tẹmẹ ma-ẹ. Ma tẹrẹ-a tẹmẹ ma àrị so tomonikiri mị ḅie sime amanyanapụ mamgba damamunmẹ, mịẹse inimgba ḅo gboloma Kụrọmamgba Nyana Tamụnọ Ḅe opu Ene mị ḅe owu mị sọḅịaye gose.

¹⁵“Ó poki! Furuḅọ ḅara à nwọse ḅoaḅẹ! Ḅieḅẹlẹ sime ori mọnọkase sime oria ḅụchụayema koruḅọ ḅe pịrịḅịa, mịẹse ọ̀ papaḅụsin nwẹngịma ḅọrọ ẹka ọkụ, pịkị amaogbo ḅụgerere nyana ẹka ọkụ!”

¹⁶Anịsịkị ini Hibru ḅịpị ḅụ Amagedọn se chịn nyọ ḅụ, anị tẹmẹma amanyanapụma ọkịḅo koḅirimaye-ẹ.

¹⁷Anịsịkị sọnọmẹ karama enjẹlḅọ ḅe oria bọlị mị ḅie simeye mị ọsụn fọrụ mị ḅie saramẹ. Se Oputẹkẹwarị mị ḅie sime amanyanaḅọ ngada mị ḅie gele pụkọ pakaḅomẹ, anị nwọ ḅẹmẹ, “Anị mịẹsam!”

¹⁸Sowakam mẹ, so fiemẹ, soalagba tẹịnmẹ, pịkị kiri ḅalafama ḅarase jikemẹ. Ọkọ sime kirijike ḅara ngịsị ma pakakẹ, ini tomoniḅọ ḅe tẹmẹ sịkị ngịsị, mịn mị anị kirijike mamgba ḅụ sitẹịnye mị-ẹ!

¹⁹Anị opuama mị se tẹrẹ-a kiri pumẹ, sẹ goyegoye ḅie sime opuama mamgba àrị kanmẹ. Tamụnọ Ḅe opuama mamgba kanmẹ. Tamụnọ Ḅe opu Babilọn mị se ḅiekoromamẹ, se ori mịẹse oria ịganị mị ḅe iru ọmọngọ anị nwọ ḅumẹ.

²⁰Chọ goyegoye ḅilefamẹ, tụndụ goyegoye maịnfamẹ.

²¹Iku kilogram-a mesi na gbasịa soḍụparịma tomonima ọgọnọ koro so-ọkụma ini Tamụnọ Ḅe fiesimamẹ obi mị gose, anịatịḅị obi mị opuma ḅalafamamẹ.