Read kirikeni Ḍieḅelema Yema 17 Bible Online

Ḍieḅelema Yema 17 - kirikeni bible

Ḍieḅelema Yema 17

¹Sọnọma bọlị ma nyana enjẹlapụma ḅụ gbọrị enjẹlḅọ ị̀ damaḅo se nwọse ị̀ ḅẹmẹ, “Ḅo, ini tọrụsiọrị se árị ẹrẹpaka sẹfịḅọ ma pịrịḅịa ḅara à nwọse ị́ ḍieḅịa, anị tọn-a ideri ḅumengi tọrụ na kpeki nyọ ḅụ ini nama opuama mị.

²Tomonikiri ḅe amanyanapụma ini árị na sẹfị gbolomamẹ, se ini árịa sẹfị iru mị ḅuarịogbo, tomonikiri mị ḅe apụma ḅo iruḅu tọrụḅaama apụ nwọ sọmẹ.”

³Fịafịa Tẹmẹ Ḅe ị̀ ḅie sọmẹ, anị enjẹlḅọ ḅe ị̀ deki so piri-ele munye-ẹ. Anịanga ḅụ à gbọrị eremeniḅọ ọrịmẹ oju awụwụ nama ọgọnọ à sime waraḅẹ. Nama ḅe oju mgba se Tamụnọ Ḅe ḍukosimaḅịa ẹrẹ ini nwọ gịẹịnmẹ. Sọnọma tịḅị na oyi-a ịvalị na nama ḅe ḅụ omi-ẹ.

⁴Eremeniḅọ ma elelenda tọrụ na awụwụ tọrụ nyana ḅụchụaye ini nwọse á chụamẹ, goli na yela ḍụparị na pịkị ịla na ini nwọse á ḅirimamẹ. Á ḅara goli ọmọngọ á nwọ ọlọ waraḅẹ se árịa sẹfị-a nwẹngị ma ḅe tọntọn-aye na ḅụrụsaye na mị anịa ḅie ḅeinye-ẹ, mị anị árịa sẹfị mị ḅụ pakaḅoye-ẹ.

⁵Á fụḅaraogbo gịẹịnye mị fie ḅọị ẹrẹ omi-ẹ anị: “Opu Babilọn, sẹfịapụma na ama simapụ mamgba na nyengiḅọ.”

⁶Àrị ọrịmẹ na eremeniḅọ ma, Tamụnọ-a tomonima pulo na, ini ḅaa nyana ḅereni Jizọs Ḅe pịrị apụma pulo ma na á tọrụsọsam. Àrị árị ọrị sịkị, ị̀ ḅụ opuma gbiripumẹ.

⁷“Cheye gose ị́ ḅụgbiripu?” enjẹlḅọ ḅe nwọse ị̀ gbelamẹ. “Eremeniḅọ ma na, á deki nama ḅe na, ọ̀ nyana sọnọma tịḅịma na, oyi-a ịvalịma na fie ḅọịye mị à nwọ ḍuko ị́ pịrịḅịa.

⁸Ori nama ḅe gbọrị sịkị ò ḍumomẹ, ọkụma mịọkụ ọ̀ ḅarị ḍumo ḅụ ofori-ẹ. Tuma nyanaka olulu mị ḅie ọ̀ pakaḅo-ẹ tọn aḅẹ, mun fị ḅie sọḅịa ẹrẹchị. Tomonikiri mị ma tẹmẹka sịkị ngịsị, mị tomonikiri anga se ẹrẹ ḍumo apụma ḍiri mị ḅie ma gịẹịnka apụma anị inia ḅụgbiripumaye sọḅịa ini nama ḅe ọrịḅịa sịkị. Gbọrị sịkị ò ḍumomẹ: mịọkụ ọ̀ ḅarị ḍumo ḅụ ofori-ẹ, ọkụma ọ̀ pịkị pakaḅoḅịa.

⁹“Gbun nemi na, ye kaịnḅo na, anị mịn mị ḅiye-ẹ. Sọnọma tịḅịma anị eremeniḅọ ma kpọnjị sime sọnọma chịngị ma-ẹ. Àrị pịkị sọnọma amanyanapụ ma-ẹ:

¹⁰ini sọnọ apụ ḅịkịsam, gbọrịḅọ pa ḅẹrẹtọn aḅẹ, anịsịkị ísí ḅọ ḅe ma ọ̀ pa ḅokẹ; ọ̀ pakaḅoḅịa sịkị, kala sịkị ngẹrị anị ò se ḅẹrẹtọnḅịaye-ẹ.

¹¹Anịsịkị ori gbọrị sịkị ḅụ ḍumo sime, ọkụma ḅarị ḍumoka nama ḅe ori na mịnaḅụ na anị nine karama amanyanaḅọ-ẹ, sọnọma apụma ḅụ sọ se ini ḅaaḅịa ḅọ ḅe-ẹ.

¹²“Ị́ nwọ ọrị oyi-a ịvalịma anị ngịsị ma ḅẹrẹtọnka oyi-a amanyanapụ ma-ẹ, ọkụma ini gbọrị awa se ini na, nama ḅe na pịrịḅịa, mịẹse ini amanyanapụ ḅara se ḅẹrẹtọnḅịa ọkụ.

¹³Mịna oyi-a apụ mamgba ini gbọrị ḅịpịogbosọ nyanamẹ, se ini inia ḅẹrẹtọn mị na kụrọ mị na se nama ḅe pịrịmẹ.

¹⁴Ini owu se Anana Tọkụ Ḅe pakaḅịa. Ọkụma Anana Tọkụ Ḅe na, ọ̀ chịn apụma na, ọ̀ sẹlẹsa apụma na, pịkị ḅereni nyana ò ḍukonwẹngịapụma na, ini inia ḅụ ọmụḅaraiḅi nyanaḅịa, anịatịḅị ori anị nweni nyana apụma Nyana, pịkị amanyanapụma na Amanyanaḅọ Ḅe-ẹ.”

¹⁵Enjẹlḅọ ḅe pịkị nwọse ị̀ ḅẹmẹ, “Sẹfịḅọ ma kpọnjị sime nyọ ị́ ọrị mengi ma anị sẹma na, tomonima na, pịkị tọrụkịrịkịrị apụma na ọkwẹịnḅẹlẹ kịrịkịrị kọn-arịapụ ma-ẹ.

¹⁶Ị́ nwọ ọrị oyi-a ịvalịma na, nama ḅe na, àrị sẹfịḅọ ma ḍikiḅụnwọnwọḅịa; á nyanaye goyegoye ini dekisoḅịa se á se papaḅụsinḅịa, pịkị ini árịa ojumịnị mị pẹịḅịa, anịsịkị fịnị se á dọkịmaḅịa.

¹⁷Anịatịḅị Tamụnọ Ḅe ọ̀ ḅụḅẹlẹye mị se inia kuḅie chụasam, na ini gboloma se inia amanyana kụrọ mị se nama ḅe pịrị, mịẹse Tamụnọ Ḅe ọkwẹịnma ma mịẹḅeinmaka simeogbo, nama ḅe anị se ḅẹrẹtọnḅịa ọkụ.

¹⁸“Ị́ nwọ ọrị eremeniḅọ ma anị ḅẹrẹtọn se tomonikiri mị ḅie sime amanyanapụ mamgba pịrịarị opuama mị-ẹ.”