Read kirikeni Ḍieḅelema Yema 19 Bible Online

Ḍieḅelema Yema 19 - kirikeni bible

Ḍieḅelema Yema 19

¹Mịn mị ḅọrọ sịkị, soḅie à pụkọ naamẹ. Tomonikpo ḅie fie ọkụ anị nwọ fiemẹ. Anị nwọ ḅẹmẹ, “Ọ́ Tamụnọ Ḅe tokoni! Ḍụaḅọrọma na boma na, pịkị kụrọ na sime mịna Tamụnọ Ḅe pịrịmẹ!

²Oria ḅẹrẹkọn mị kọkọmaye-ẹ pịkị karakaramẹ! Ọ̀ ḅẹrẹsi pẹlẹ se árị opu sẹfị eremeniḅọ ma pịrịmẹ anị mịna sẹfị mị se tomonikiri mị sima ḅọ ma. Tamụnọ Ḅe ò fomuḅara se á pịrịsam, anịatịḅị árị oria fịrịnwẹngịapụma ḅaamẹ.”

³Ini pịkị olokumẹ, “Ọ́ Tamụnọ Ḅe tokoni! Opuama mị dọkịma fịnị ḅẹlẹ onwoin ma àrị iwo gbamasomẹ!”

⁴Ini si inein-a sẹnịapụ fịnjịma na àrị inein-a ḍumo tẹmẹayema na ḅịkịkoro se kpẹrẹkị ori amanyanaḅọ ngada mị ọgọnọ sime Tamụnọ Ḅe tẹkẹmẹ. Se ini nwọ ḅẹmẹ, “Amẹn, ọ́ Tamụnọ Ḅe tokoni!”

⁵Anịsịkị pụkọ amanyanaḅọ ngada mị sime nyọ ḅụ pakaḅomẹ, anị nwọ ḅẹmẹ: “Ó tokoni se mịna Tamụnọ Ḅe pịrị ómine oria fịrịnwẹngịapụma na tomoni mamgba na, ómine nwọ ò ḍikiḅalafa apụma, kala na sẹnị na.”

⁶Anịsịkị tomonikpo pụkọ kịkẹye à nwọ naamẹ, ḍụparị ọgọnọ ideri koroarị mengi ḅie fie ọkụ, pịkị soalagba pụkọ kịkẹ ḅara anị nwọ fiemẹ. Pụkọ mị nwọ ḅẹmẹ, “Ọ́ Tamụnọ Ḅe tokoni, anịatịḅị Nyanaḅọ mịna Tamụnọ Ḅe, Kụrọmamgba Nyanaḅọ Ḅe, ori Amanyanaḅọ-ẹ.

⁷Ó ye wa ḅieḅẹlẹ, se tokoni se oria opu mị pịrị! Anịatịḅị Anana Tọkụ Ḅe oria ereya sịkị mị lasam, ọ̀ yaḅịaḅọ ma sọnị á ḅụkarakaramasam.

⁸Ini fịafịa, gẹnịgẹnị tọrụkpaịn lọkọ ḅịtẹ nwọse á pịrịsam chụa ḅụ, lọkọ ḅịtẹ mị anị Tamụnọ-a tomonima ḅe iḅi-a fịrịma-ẹ.”

⁹Anịsịkị enjẹlḅọ ḅe nwọse ị̀ ḅẹmẹ, “Mịn mị gịẹịn: Ḅieḅẹlẹ sime Anana Tọkụ Ḅe ereya alalị mị chịnḅịpị mị la apụma pịrịmẹ.” Enjẹlḅọ ḅe pịkị nwọ ḅẹmẹ, “Ma anị Tamụnọ Ḅe kọkọma ọkwẹịnma-ẹ.”

¹⁰À ḅịkị ọ̀ ḅụọchuku koro se kpẹrẹkị ọ́ tẹkẹmẹ, ọkụma ọ̀ nwọse ị̀ ḅẹmẹ, “Mịẹ ma! Ị̀rị̀ ị́ juo fịrịnwẹngịḅọ-ẹ pịkị ị́ya mịnapụma ḅie gbọrịḅọ-ẹ, anị Jizọs Ḅe ḍukoḅelema karakaraye mị ọlọapụ mamgba Tamụnọ Ḅe tẹkẹmẹ!” Anịatịḅị Jizọs Ḅe ḍukoḅelema karakaraye mị anị ịkịankoroapụma jikeye-ẹ.

¹¹Anịsịkị à so mị ọrịmẹ, anị finji waraḅẹ, gbọrị ḅịaḅịa asụn anịju omi-ẹ. Ini nwọse ọ́ dọkụsime ḅọ ḅe chịnmẹ Kuḅie se ḅụgbana gbẹịn ḅọ pịkị Kọkọmaḅọ, karakaraye ḅụ mị ọ̀ ḅẹrẹkọnkọnye-ẹ, se pịkị ọmụ gbingbinye-ẹ.

¹²Ọ̀ tọrụmgbọlụma fịnị kọrị ọkụ kọrịmẹ, se pịkị tọn-a amanyanapụchu chiramẹ. Gbọrị ẹrẹ oria oju ini nwọ gịẹịnmẹ, ọkụma ori sikima, gbọrịḅọ sọnị anị simeọkụ nemikẹ.

¹³Ọ̀ chụa koro ḅụchụaye mị ini anị seni tomoni pulo ḅie sumẹ. Oria ẹrẹ anị, “Tamụnọ Ọkwẹịn.”

¹⁴Soḅie owunima ini inia ḅịaḅịa asụnma na nwẹngị ò ḍukomẹ. Fịafịa abalala tọrụkpaịn lọkọ ḅịtẹ ḅụchụaye ini nwọ chụamẹ.

¹⁵Se sẹma inumaḅịa oḅu okola-agiji ọ̀ ḅịpị ḅie pakaḅomẹ! Ikulele amgbara anị ò se ḅẹrẹtọn ini pịrịḅịaye-ẹ, ọ̀ ḅụọ se Kụrọmamgba Nyana Tamụnọ Ḅe oria opu ḅalafama ịganị mị ḅe irupọnjịye mị ḅie sime iru mị nanga pakụmaḅoḅịa.

¹⁶Mịn anị ini oria koro ḅụchụaye mị ḅụ na, ọ̀ ḅụọfuro na ḅụ gịẹịnye-ẹ, “Amanyanapụ ma ḅe Amanyanaḅọ, pịkị nweni nyanapụma ḅe Nyanaḅọ.”

¹⁷Anịsịkị à gbọrị enjẹlḅọ ọrịmẹ, ịrụa mị ọgọnọ ọ̀ chịẹsime waraḅẹ. Gele pụkọ ọ̀ nwọse oloku sotọrụ fin-arị fenima pịrịmẹ: “Ó ḅo koḅirima se Tamụnọ Ḅe koroma opu alalị mị fị!

¹⁸Ó ḅo amanyanapụma na, owunitịḅịnịma na, owunima na, asụnma na, àrị se nwẹngịapụma na, bebe tomoni mamgba, omoniapụ na furoawọ na, pịkị opu apụ na kala apụ na, inia ojumịnị ma pẹị!”

¹⁹Anịsịkị nama ḅe na, tomonikiri mị ḅe amanyanapụma na, inia owunima na, à nwọ ọrịmẹ, ini owu se asụn ḅe se nwẹngịarịḅọ ḅe na oria owunima na pakamẹ.

²⁰Nama ḅe na, ọ̀ tọrụkuḅu ḅụ ḅụgbiripumaye ma mịẹ iruo ịkịankoroḅọ ḅe na, ini ini kun ikoli ḅie chumẹ. (Àrị ḅụgbiripumaye ma mịẹ ḅụ anị ò se nama ḅe oria elekima mị chụa apụma na pịkị agbambuḅọ ḅe tẹkẹ apụma na dairimaye-ẹ.) Nama ḅe na iruo ịkịankoroḅọ ḅe na ini fịka ḅụ, ini seni kọrịarị sọlfọ fịnị ḍapa mị ḅie gbin chumẹ.

²¹Asụn ḅe se nwẹngịarị ḅọ ḅe ḅịpị ḅie pakaḅo okola-agiji mị, anị ini se kirikọn owunima ḅaaye-ẹ; se feni mamgba ineda pẹịḅịa ḅara nwọse inia ojumịnị ma pẹịmẹ.