Read kirikeni Ḍieḅelema Yema 2 Bible Online

Ḍieḅelema Yema 2 - kirikeni bible

Ḍieḅelema Yema 2

¹“Gịẹịn ori Ẹfịsọsị chọchị enjẹlḅọ ḅe sẹịnma: “Ori oria amaḅara mị ḅie sọnọma loliama ọlọ pịkị sọnọma goli tọnjie gbanaye ma ogboku nwẹngị ma ḅọrọ ḅọ ḅe anị mịn oku mị fịrịmaye-ẹ.

²Ị́ nwẹngịarị fịrịma à nemimẹ; à nemimẹ na siyemịẹ apụma ị́ inia tọrụkụnkẹ, à pịkị nemimẹ na, okunwẹngịapụ se inia ḅụ chịn apụma, ị́ ini ḍaḍiki se ḍọkịḅo ọrịsam na ini iruoapụ-ẹ.

³Ị̀ tịḅị gose ị́ inema nyanamẹ, pịkị tọn-a tọrụsiọrị ọrịmẹ, anịẹḅẹsọ, ị́ kuḅie lọkọkẹ.

⁴Ọkụma à se ị́ ọlọarịye omi-ẹ. Tatarị sịkị ị́ ị̀ ḅẹlẹma ọkụ ị́ ḅarị ọkọ se ị̀ ḅẹlẹmakẹ.

⁵Anịọkụma, ị́ ḅịkị anga mị se ḅiekoroma! Siḅụ vinpịkị, se tatarị sịkị ị́ mịẹ ọkụ mịẹ. Ị́ nemikase ị́ya sima ḅụ vinpịkịkẹ ḅẹḅẹ ị́ya tọnjie gbanaye mị sime anga à ḅo anị dekisinḅịa.

⁶Ọkụma mịn ị́ nwẹngị sa iḅi fịrị-ẹ, na Nikolaị sẹ apụma inia fịrịma ị́ àrị ḍikiḅụnwọnwọmẹ, anị ị̀rị̀ sọnị àrị ḍikiḅụnwọnwọ ọkụ mị-ẹ.

⁷“Ye ḅeri nyanaḅọ nyanaḅọ Tẹmẹ Ḅe kọn chọchị ma pịrịarị ọkwẹịnma poki! “Ọmụḅaraiḅi nyanaḅọ nyanaḅọ, anị Tamụnọ Paradaịs mị ḅie sime ḍumo chịnmgbọlụ mị à nwọse pịrị se fịḅịaye-ẹ.

⁸“Gịẹịn ori Smaịna chọchị mị enjẹlḅọ ḅe sẹịnma: “Ori, tatarị pịkị kuluma ḅọ ḅe, fị pịkị sịsẹ ḅọ ḅe, oku mị fịrịmamẹ.

⁹Àrị ị́ya ḅụfụkama nemimẹ; à nemimẹ na ị́ igweinmẹ—ọkụma kọkọmaye ḅụ ị́ ḅakama alakọnmẹ! Ini Juapụka, se Juapụ se inia ḅụ chịn apụma, se ị́ ḍukosimarịye ma à nemimẹ. Ini anị sime Oru ḅe pịrị apụ-ẹ!

¹⁰Gbọrịye sọ ḍikiḅalafa ma, ị́ ọrịḅịa tọrụsiọrịma ḅụ. Poki! Oru ḅe ori ọ́mịna ḅụ dapụ se ikoli ḅie chuḅịa, se ọ́ ḍaḍikiḅịa ẹrẹchị. Oyi-a ḍin ọ́ nwọse tọrụsiọrịḅịa. Kuḅie se ḅụgbana gbẹịn ḅọ sọ-ọ anị fị ọkịḅo ị́ pịrịḅịa nwọ ḅẹ sọnị, anịsịkị à ḍumo se ọmụḅaraiḅi amanyanachu mịẹ ị́ pịrịḅịa.

¹¹“Ị́ nemikase ḅeri nyanamẹ ḅẹḅẹ, Tẹmẹ Ḅe kọn chọchị ma pịrịarị ọkwẹịnma poki! “Ọmụḅaraiḅi nyana apụma maịn karama fị mị, ḅarịye se ini lama ẹkẹ.

¹²“Gịẹịn ori Pagamọm chọchị mị enjẹlḅọ ḅe sẹịnma: “Ori mama tọrụ nyana oḅu okola-agiji mị nyanaḅọ ḅe anị mịn oku mị fịrịmaye-ẹ.

¹³Ị́ anga nyọ à nemimẹ; anị nyọ anị Oru ḅe oria amanyana ngada mị simeye-ẹ. Ị́ kụrọma ị̀ ọlọmẹ; ị̀ ḅụ ị́ nyana ḅereni mị ḅụ ị́ kuḅie lọkọkẹ, anịtẹịn anga Antipas à kuḅie se ḅụgbana gbẹịn onyechịẹḅọ ḅe, anị Oru ḅe anga nyọ mị ḅụ ini nwọ ḅaa sịkị sọnị.

¹⁴Ọkụma, à se ị́ ọlọḅịaye kalaye omi-ẹ: ị́ya tomonima ḅie dapụ Belam ḅe ḍieye mị ḍukonwẹngịaḅẹ. Belam ḅe anị Belak ḅe se telima ḅie chu se, Izrẹlapụma mun ini se agbamịẹ oru pịrị sa fịye fị ḅọ ḅe-ẹ. Ori anị pịkị sẹfị se ini ḍieye-ẹ.

¹⁵Anị gbọrị ḅara anị ị́ya tomonima ḅie dapụ Nikolaị-a apụma ḍieye mị ḍukonwẹngị ọkụ-ẹ.

¹⁶Mịọkụ, ị́ya sima ḅụ pịkị! Ị́ nemikase pịkịkẹ ḅẹḅẹ, ḅọlọka sịkị àrị ọ́ damaḅo se ị̀ ḅịpị ḅie pakaḅoḅịa okola-agiji mị se owu se inia apụma pakaḅịa.

¹⁷“Ye ḅeri nyanaḅọ nyanaḅọ Tẹmẹ Ḅe kọn chọchị ma pịrịarị ọkwẹịnma poki! “Ini ọmụḅaraiḅi apụma, ḅọịsime mana mị ḅụ daye à nwọse ini pịrịḅịa. À pịkị gbọrị ḅịaḅịa ḍụparị nwọse inia ḅie ọrụ ḅọḅọ pịrịḅịa. Anị ọkị ḅọ ḅe kẹngẹ mị ḍụparị mị ḅụ sime ịwọ ẹrẹ mị nemiḅịaye-ẹ.

¹⁸“Gịẹịn ori Tayatira chọchị mị enjẹlḅọ ḅe sẹịnma: “Mịn ori Tamụnọ Tọkụ Ḅe tọrụmgbọlụ fịnị kọrị ọkụ kọrị ḅọ ḅe, anị ḅụọma ini gurosa alapẹlẹka simeọkụ sime ḅọ ḅe, anị mịn oku mị fịrịmaye-ẹ.

¹⁹Ị́ nwẹngịarị fịrịma à nemimẹ. Ị́ya ḅẹlẹma na ḅereni na, pịkị fịrịnwẹngị mị na inema nyana mị na—àrịmgba à nemimẹ. À pịkị nemimẹ na mịọkụ, ị́ fịrịnwẹngịtẹịn aya sịkị mị nẹngịmẹ.

²⁰Ọkụma, mịn à se ị́ ọlọḅịaye-ẹ. Ị́ ḅereni árị Jezibẹl ịkịankoroarọ nwọse á ḅụ chịnḅọ ma pịrịmẹ, árịa ḍieye mị ḅụ árị ị̀ya fịrịnwẹngịapụma telima mun sẹfịsam, ini pịkị se agbamịẹ oru pịrị fịye nwọ fịsam.

²¹À sịkị se á pịrịmẹ se árịa sima ḅụ á vinpịkị, ọkụma árịa sẹfị ḅụ á vinpịkị ḍụkụkẹ.

²²Anịẹrẹchị, àrị á se ḅụfụka ḅie chuḅịa, àrị á se obi iḅila ọgọnọ gbin koromaḅịa, anịsịkị, árị na sẹfị gboloma apụma pịkị ojuakụ nyanaḅịa ini árịa si-a mịẹmịẹaye ma ḅụ vinpịkị sikimaka ọkụma.

²³À pịkị árị na nwẹngịapụma ḅaaḅịa. Anịsịkị, anị chọchị mamgba nemiḅịaye-ẹ na, ị̀rị̀ anị tomoniḅọ koroma se iniḅọ tọnye goyegoye nemiḅọ ḅe-ẹ. Ọrụ ḅọḅọ mịẹye ḅụ mị à wẹrị iniḅọ gbẹịnḅịaye-ẹ.

²⁴“Ọkụma, ómine Tayatira ḅie kọn ísíapụma, ma mị si ḍieye mị nemika apụma: ísíapụma se ‘Oru ḅe ḅụ gbun-aye nwọ chịnye ma, ma ọ́ ḍawọ nemikẹ.’ À ḍuko ọ́ pịrịaḅẹ na à ḅarị jịn iku aye se ọ́ pụnụma ẹkẹ.

²⁵Ọkụma ma à ḅoka simeogbo, ómine ọlọye mị ọ́ nwọ ọlọ kụrọma.

²⁶Ini ọmụ mị ḅara iḅisapụma, à ḅi ayema mịẹ mun kuluma mị la apụma, ị̀ Ḍaḅe ḅara àrị ọkịḅo anị gbọrị kụrọ mị, à nwọse ini pịrịḅịa. Ini se, sẹma ḍikiḍikiḅịa kụrọ à nwọse ini pịrịḅịa. Ikulele amgbara ini nwọse ḅẹrẹtọn ini pịrịḅịa se kuku ḅaa kọsịma ḅara ini nwọse ini ḅaakọsịmaḅịa. À pịkịna ḅaso lolia mị sọnị seni ini pịrịḅịa.

²⁹“Ị́ ḅeri nyanamẹ ḅẹḅẹ, anịọkụma Tẹmẹ Ḅe kọn se chọchị ma pịrịarị ọkwẹịnma poki!