Read kirikeni Ḍieḅelema Yema 20 Bible Online

Ḍieḅelema Yema 20 - kirikeni bible

Ḍieḅelema Yema 20

¹Anịsịkị soḅie koroḅoarị gbọrị enjẹlḅọ à nwọ ọrịmẹ, ọ̀ ḅaraḅie tuma nyanaka olulu sambị mị na, iku ikoli na ọ̀ nwọ ọlọmẹ.

²Se ọ̀ kụrọḅara se dragọn ḅe kunmẹ, anị olomu sịkị oruwu ḅe, Oru ini nwọse chịnḅọ ḅe, se ori ikoli se ori ịkasị se ò sime mun kụra mẹndẹ oyiasi fịnjị laḅịa.

³Enjẹlḅọ ḅe ori ò se tuma nyanaka olulu mị ḅie gbinmẹ, se ori anị ịkasị se ye se anị oḅolomẹ, mịẹse ma kụra mẹndẹ oyiasi fịnjịma ḅọrọka simeogbo, ọ̀ ḅarị ineda sẹma dairima ẹka ḅara. Anịsịkị mị ḅọrọ sa ḅẹḅẹ ini kala sịkị se ò finmaḅịa.

⁴Anịsịkị tọn-a amanyanapụ ngada na arịa ọgọnọ sime apụma na à nwọ ọrịmẹ; ini ḅẹrẹtọn kụrọ se ini pịrịmẹ. À pịkị Jizọs Ḅe ḍieḅelema kọkọmaye mị na, Tamụnọ ọkwẹịn mị ḍukopakụma gose ini ḅaa tẹmẹma nwọ ọrịmẹ. Nama ḅe na anịkanịka oria agbambuḅọ mị na jịn sịkị ma ini àrị tẹkẹkẹ, anịkanịka nama ḅe elekima mị sọnị inia fụḅarama ḅụ na inia ḅarama ḅụ na, ma ini chụakẹ. Iniḅo ḍumoapụ sọ se Kraịst Ḅe na kụra mẹndẹ oyiasi fịnjị nwọse amanyanapụ ḅara se ḅẹrẹtọnmẹ.

⁵(Ma kụra mẹndẹ oyiasi fịnjịma ḅọrọka simeogbo kọn fịapụma ini sịsẹ ẹkẹ.) Mịn anị tatarị fịḅụsịsẹ mị-ẹ.

⁶Ḅieḅẹlẹ na, opu ḅẹlẹma sime tatarị fịḅụsịsẹ mị ḅie sime apụma pịrịmẹ. Maịn karama fị mị anị inia ḅụ kụrọ nyanakẹ; ini Tamụnọ Ḅe na Kraịst Ḅe na agbamịẹapụ nwọ sọḅịa, ini pịkị kụra mẹndẹ oyiasi fịnjị se ori na amanyanapụ ḅara se ḅẹrẹtọnḅịa.

⁷Ma kụra mẹndẹ oyiasi fịnjịma ḅọrọ sa ḅẹḅẹ, ini ikoli ḅie Oru ḅe finmaḅịa,

⁸se ọ̀ pakamun bebe tomonikiri mị ḅie sime wasama sẹ mamgba dairimaḅịa, anị Gọg na Megọg mị na-ẹ. Ọmụ gbinḅịa gose, Oru ḅe inimgba ori ini ọkịḅo gbolomaḅịa, tọrụaka ḅụ onwun ḅaka ọkụ ḅaka apụ.

⁹Ini wasama bebe tomonikiri mị kelemamẹ, se Tamụnọ-a tomonima sime ikowarịma sime ikowarịma na pịkị ọ̀ ḅẹlẹma opuama mị na gbori kelemamẹ. Ọkụma fịnị soḅie koroḅo ini ḅaamẹ.

¹⁰Anịsịkị Oru ḅe, anị ini dairimaḅọ ḅe, ini nwọ deki sọlfọ ḍapa mị ḅie gbinmẹ, anị nama ḅe na iruo ịkịankoroḅọ ḅe na ini nwọse gbin chu ḅọrọsa nyọ mị, anịanga ḍin na enekaka na ḅụ ini sime tọrụsiọrị mun ḅene-ḅene laḅịa.

¹¹Anịsịkị gbọrị opu ḅịaḅịa amanyanaḅọ ngada na anịa ọgọnọ simeḅọ ḅe na à nwọ ọrịmẹ. So mị na tomonikiri mị na ọ̀ tọrụkuḅu ịmaịnfamẹ; se tomoni ḅarị àrị ọrịkẹ.

¹²À fịapụma ọrịmẹ, opu apụ na kala apụ na gbọrị ḅaraḅụ amanyanaḅọ ngada mị tọrọkọ chịẹ waraḅẹ. Ḍirima àrị finjimẹ, anịsịkị jịn ḍiri ini pịkịna nwọ finjimẹ, anị ḍumo apụma ḍiri mị-ẹ. Ḍirima ḅie gịẹịn koromaye ma ḅụ, ini wẹrị ḅẹrẹkọn fịapụma pịrịmẹ, ini kọn nwẹngịma ḅụ.

¹³Anịsịkị, tọrụ mị anịa ḅie sime fịapụma pakụmaḅomẹ. Fị mị na, fịapụma ḅe tomonikiri mị na arịa ḅara ḅie sime fịapụma pakụmaḅomẹ. Se ini ḅẹrẹkọn inimgba pịrịmẹ ini kọn nwẹngịma ḅụ.

¹⁴Anịsịkị ini fị mị na, fịapụma ḅe tomonikiri mị na se orumo ḍapa mị ḅie gbinmẹ. (Mịn orumo ḍapa mị anị maịn karama fị mị-ẹ.)

¹⁵Se mịna ẹrẹ ḍumo apụma ḍiri mị ḅie sọka ḅọ goyegoye ini iniḅọ se orumo ḍapa mị ḅie gbinmẹ.