Read kirikeni Ḍieḅelema Yema 21 Bible Online

Ḍieḅelema Yema 21 - kirikeni bible

Ḍieḅelema Yema 21

¹Anịsịkị ịwọ so na, ịwọ tomonikiri na, à nwọ ọrịmẹ. Tatarị so mị na tatarị tomonikiri mị na, àrị maịnfamẹ, pịkị ala-mengi tọrụ mị sọnị ḅarị simekẹ.

²Se àrị ịwọ Jerusalẹm anị Fịafịa Opuama mị ọrịmẹ, Tamụnọ Ḅe ḅara ḅụ soḅie anị koroḅoaḅẹ, mun mịna deḅọ na ịrịaḅịa eremeni tọkụ ḅụ ḅirima ọkụ anị nwọse ḅụ karakaramamẹ.

³Amanyanaḅọ ngada mị ḅụ ọkwẹịn àrị gele pụkọ à nwọ naamẹ: “Mịọkụ, Tamụnọ Ḅe ò ḅo tomoni na anga-ẹ ḅosam! Ori ini na angaḅịa, anịsịkị ini pịkị oria tomoni sọḅịa. Tamụnọ Ḅe na mịnaḅụ na ori ini na sime se inia Tamụnọ nwọ sọḅịa.

⁴Ori inia tọrụmgbọlụma ḅụ owu mengi ma gurosinḅịa. Fị, anịkanịka ngịrị, anịkanịka owu, anịkanịka ḅụfụka ḅarị sime ẹkẹ, anịatịḅị olomuaye ma àrị ḅọrọsam.”

⁵Anịsịkị amanyanaḅọ ngada mị ọgọnọ sime ḅọ ḅe nwọ ḅẹmẹ, “Mịọkụ, yegoyegoye à nwọ mịẹ ịwọmasam!” Ọ̀ pịkị nwọse ị̀ ḅẹmẹ, “Mịn mị gịẹịn, anịatịḅị ma ọkwẹịnma kọkọmaye-ẹ, pịkị kuḅie se ḅụgbana gbẹịn-aye-ẹ.”

⁶Ọ̀ pịkị nwọse ị̀ ḅẹmẹ, “Anị mịẹ ḅeinmasam! Ị̀rị̀ anị Alfa Ḅe-ẹ pịkị Omega Ḅe-ẹ, yeḅụsakị Ḅe-ẹ pịkị kuluma Ḅe-ẹ. Mengi pụkọtarịḅọ goyegoye, igbiki gbẹịnka ḅaraḅụ papa ḍumo iderimengi mị ḅuḅịa kụrọ à nwọse iniḅọ pịrịḅịa.

⁷Ọmụ mị ḅara iḅiḅọ goyegoye, ị̀ ḅara mịn mị nyana ọkịḅịa: À Tamụnọ sọ ọ̀ pịrịḅịa, anịsịkị ori ị̀ya tọkụ sọḅịa.

⁸Ọkụma fịnị ḍụparị, se kọrịarị orumo ḍapa mị anị sime ḅalafa ḍọkịapụ na, ịbafịapụ na, yepakaka ḅara se yeḍuko apụ na, niniapụ na, sẹfịapụ na, arịapụ na, oru tẹkẹapụ na, pịkị iruokọn-apụ mamgba na nwọ pịrịmẹ anị maịn karama fị mị-ẹ.”

⁹Anị sọnọma kuluma obi ma ḅie sime sọnọma bọlị ma ọlọ sime sọnọma enjẹlapụma ḅie gbọrịḅọ ị̀ damaḅo se nwọse ị̀ ḅẹye-ẹ, “Ḅo àrị owuḅọ simeḅịa tọkụma se ị́ ḍie, anị Anana Tọkụ Ḅe tarọ ma.”

¹⁰Fịafịa Tẹmẹ Ḅe ị̀ ḅie sọmẹ, se enjẹlḅọ ḅe ị̀ dekisomun anị opuma gele tụndụ mị ọgọnọ lamẹ. Se Jerusalẹm Fịafịa Opuama mị se ị̀ ḍiemẹ, Tamụnọ Ḅe ḅara soḅie anị koroḅoaḅẹ

¹¹se Tamụnọ Ḅe oria boma mị anịa ḅụ ḅịaḅẹ. Anị opuama mị, anị yela ḍụparị ḅịa ọkụ ḅịamẹ anị jaspa na kịkịnamẹ, anị pịkị kristal ḍụparị yoriyorima ḅịa ọkụ ḅịamẹ.

¹²Anị opu gele onu nyanamẹ, oyimaịn ḅọkọ fịnjị anịa ḅụ omi-ẹ, anịsịkị gbọrị enjẹlḅọ gbọrị ḅọkọ gbọrị ḅọkọ korumẹ. Izrẹl oyimaịn furo fịnjịma ẹrẹma ini nwọse ma onu ḅọkọ ma ḅụ gịẹịnmẹ.

¹³Tẹrẹ-a onu ḅọkọ gbọrị ịkọlị gbọrị ịkọlị ḅụ omi-ẹ arịa ḅụ: tẹrẹ ịrụapakapaka nyọ ḅụ omi-ẹ, tẹrẹ chuku da nyọ ḅụ omi-ẹ, tẹrẹ ọgọnọ da nyọ ḅụ omi-ẹ, pịkị arịa ḅụ tẹrẹ ịrụa mị tuma tuma nyọ mị ḅụ omi-ẹ.

¹⁴Oyimaịn chukusẹkẹ ḍụparị fịnjịma ọgọnọ mị ini opuama mị onu mị nwọ nama chịẹmaye-ẹ. Oyimaịn ḍụparị fịnjịma ọgọnọ mị ini Anana Tọkụ Ḅe oyimaịn okunwẹngịapụ fịnjịma ẹrẹma gịẹịnye-ẹ.

¹⁵Ini se opuama mị na, anịa onu ḅọkọ ma na, pịkị anịa onu mị na tọnḅịa goli-goli yetọn amgbara ọkwẹịn ị̀ pịrị enjẹlḅọ ḅe ḅara omi-ẹ.

¹⁶Opuama mị inein-a ịkọlị anị nwọ nyanamẹ; anịḅe finji mị na ịsụn mị na gbasịmẹ. Enjẹlḅọ ḅe oria yetọn chịn mị se opuama mị tọnmẹ. Anịa ịsụn mị tombi-a tẹrẹ ẹndẹ jieasi fịnjị-ẹ, anị anịa finji mị na anịa gele mị na pịkị la-ọkụ-ẹ.

¹⁷Enjẹlḅọ ḅe ọ̀ pịkị opuama mị onu mị tọnmẹ; anịa gele inein-a ḅụọ ofori ḅụọ oyi gbọrị chịn fịnjị-ẹ, anị ene ini seni yetọn tọnye mị ò seni yetọnye-ẹ.

¹⁸Jaspa ḍụparị ini nwọse onu mị namamẹ; opuama mị na mịnaḅụ na tụkụma iḅi goli ini nwọse anị namamẹ, tẹmẹḍikiye yoriyori ọkụ yoriyori goli.

¹⁹Tọrụkịrịkịrị yela ḍụparị anị ini se opuama mị onu ma chukusẹkẹye mịẹye-ẹ. Jaspa mị ini se tatarị chukusẹkẹ ḍụparị mịẹye-ẹ; safaya anị maịn karamaye mị-ẹ; aget anị tẹrẹ karamaye mị-ẹ; ẹmẹrald anị inein karamaye mị-ẹ,

²⁰oniks anị sọnọ karamaye mị-ẹ; kanelian anị sonio karamaye mị-ẹ; odo tọrụ nyana kwọz anị sọnọmẹ karamaye mị-ẹ; bẹril anị nine karamaye mị-ẹ; tọpaz anị esenie-a karamaye mị-ẹ; kalsidoni anị oyi karamaye mị-ẹ; tọkwọịs anị oyi gbọrịye fịnjị karamaye mị-ẹ; ametist anị oyimaịn fịnjị karamaye mị-ẹ.

²¹Àrị oyimaịn onu ḅọkọ fịnjịma anị oyimaịn pal fịnjị ma-ẹ; gbọrị pal anị ini se gbọrị onu ḅọkọ gbọrị onu ḅọkọ mịẹye-ẹ. Tẹmẹḍikiye yoriyori ọkụ yoriyori jokoma goli mị ini se ama mị ḅe ateli mị mịẹye-ẹ.

²²Opuama mị ḅie àrị Oputẹkẹwarị ọrịkẹ, anịatịḅị Kụrọmamgba Nyana Tamụnọ Ḅe na Anana Tọkụ Ḅe na mị anịa Oputẹkẹwarị mị-ẹ.

²³Ḅịa ḅo anịa ḅie saraḅịa ịrụa anịkanịka akalụ, opuama mị anị nwọ ḅikẹ, anịatịḅị Tamụnọ Ḅe oria boma mị anịa ḅie ḅịarịye-ẹ, anịsịkị Anana Tọkụ Ḅe anị anịa tọnjie mị-ẹ.

²⁴Tomonikiri ḅe apụma anịa enekuḅu mị se nwẹngịḅịa, anịsịkị tomonikiri ḅe amanyanapụma inia opu ngọ na boma na se anịa ḅie ḅoḅịa.

²⁵Ene mamgba opuama mị ḅe onu ḅọkọ ma finji saraḅịa, ngịsị àrị ḅarị palị ẹkẹ; anịatịḅị anị nyọ ene ḅarị san ẹkẹ.

²⁶Opu na, opu ngọ na, sẹma nwọse ḅo opuama mị ḅie chuḅịa.

²⁷Fịafịaka gbọrịye sọnị opuama mị ḅie sọ ẹkẹ. Ḅụgereremaye mịẹḅọ na, iruokọnḅọ na sọ anịa ḅie sọ ẹkẹ. Ini Anana Tọkụ Ḅe ḍumo ḍiri mị ḅie ẹrẹ gịẹịn sa apụma kẹngẹ mị opuama mị ḅie sọḅịaye-ẹ.