Read kirikeni Ḍieḅelema Yema 22 Bible Online

Ḍieḅelema Yema 22 - kirikeni bible

Ḍieḅelema Yema 22

¹Enjẹlḅọ ḅe ọ̀ pịkị ḍumo ideri mengi tọrụ mị sọ se ị̀ ḍiemẹ. Anị kristal wananị wananị ma ḅịa ọkụ ḅịamẹ. Tamụnọ Ḅe oria amanyanaḅọ ngada mị na Anana Tọkụ Ḅe na ḅụ mị anị pakaḅoye-ẹ,

²se anị ideri mun opuama mị ogboku ateli mị ḅie koromẹ. Tọrụ mị ḅe mama anga ma ḅụ anị ḍumo pịrị chịn mị simeye-ẹ; oyimaịn sịkị fịnjị mị anị se chịnmgbọlụ chụa àrịye-ẹ; akalụ gbọrị sịkị gbọrị sịkị ḅara ḅụ anịsịkị anịa ịnyanya ma ini se sẹsẹma ḅe obi ma gwọḅịa.

³Tamụnọ Ḅe worinime se pịrịsa gbọrịye sọnị opuama mị ḅie ini ḍọkịḅo ọrị ẹkẹ. Opuama mị ḅie anị Tamụnọ Ḅe na Anana Tọkụ Ḅe na amanyanaḅọ ngada mị na simeḅịaye-ẹ; anịsịkị oria fịrịnwẹngịapụma kpẹrẹkị ọ̀ tẹkẹḅịa.

⁴Ini ọ̀ tọrụkuḅu mị ọrịḅịa, se ini oria ẹrẹ gịẹịnḅịa inia fụḅara ogboma ḅụ.

⁵Ene ḅarị ngịsị san ẹkẹ, se ini ḅarị tọnjie anịkanịka ịrụa ḅi ẹkẹ, anịatịḅị Tamụnọ Nyanaḅọ Ḅe ori inia enekuḅu nwọ sọḅịa, anịsịkị amanyanapụ ḅara ini nwọse ḅẹrẹtọn gbasoḅịa.

⁶Anịsịkị enjẹlḅọ ḅe nwọse ị̀ ḅẹmẹ, “Ma kọkọma pịkị kuḅie se ḅụgbana gbẹịn ọkwẹịn-ẹ. Se Tamụnọ Nyanaḅọ Ḅe ọ̀ Tẹmẹ Ḅe se ịkịankoroapụma pịrị Ḅọ ḅe, ori oria enjẹlḅọ ḅe se sẹịnsam, mịẹse ḅọlọka sịkị ḅụ pakaḅịaye ma ọ̀ nwọse oria fịrịnwẹngịapụma ḍieḅịa ẹrẹchị.”

⁷Jizọs Ḅe nwọ ḅẹmẹ, “Poki!” “Ḅọlọka sịkị ḅụ à ḅoaḅẹ! Ḅieḅẹlẹ sime mị ḍiri mị ḅie sime ịkịankoro ọkwẹịnma ḍukoarịye ma mịẹ apụma pịrịmẹ!”

⁸Ị̀rị̀, Jọn ḅe, à maye mamgba naa pịkị ọrịsam, à maye mamgba naa pịkị ọrị so sịkị, à ḅịkị àrị se ị̀ ḍie enjẹlḅọ ḅe ḅụọchuku koro se ọ̀ tẹkẹ-ẹ tọnmẹ.

⁹Ọkụma ọ̀ nwọse ị̀ ḅẹmẹ, “Mịẹ ma! Ị̀rị̀ ị́rị́ na ị́ya mịnapụ ịkịankoroapụma inia juo fịrịnwẹngịḅọ-ẹ, pịkị mị ḍiri mị ḅie sime ọkwẹịnma ḍukoyema mịẹarị apụma na. Kpẹrẹkị Tamụnọ Ḅe tẹkẹ!”

¹⁰Ọ̀ nwọse ị̀ ḅẹmẹ, “Mịn ḍiri mị ḅie sime ịkịankoro ọkwẹịnma se ḅọị ma, anịatịḅị mayema ḅo kiri ọkịḅịa sịkị mị kpekisam.

¹¹Ye si mịẹarị ḅọ ḅe, pa si mị mịẹmamun; ye ịlọlị ḅụ sime ḅọ ḅe, pa ịlọlị ḅụ simemamun; ye karakaraye mịẹ ḅọ ḅe, pa karakaraye mịẹmamun; anịsịkị ye osiḅụ sime ḅọ ḅe pa osiḅụ simemamun.”

¹²Jizọs Ḅe nwọ ḅẹmẹ, “Poki!” “Ḅọlọka sịkị à ḅoaḅẹ! Àrị ị̀ya gbẹịnyema na ḅoḅịa se ḅọḅọ nwẹngị fịrịma simeọkụ nwọse iniḅọ gbẹịnḅịa.

¹³Ị̀rị̀ anị tatarị pịkị kuluma ḅe-ẹ, sakị pịkị kuluma ḅe-ẹ.”

¹⁴Ḅieḅẹlẹ sime inia koro ḅụchụayema sịkịrị fịafịama apụma pịrịmẹ, anịatịḅị ini kụrọ nyanamẹ ḍumo chịn mị ḅe chịnmgbọlụ mị nwọ fị, pịkị onu ḅọkọ ma ḅie ḅọrọ mun opuama mị ḅie sọ.

¹⁵Ọkụma opuama mị ḅie sọ ẹka apụma, anị iḅiye mị pịkị mun siye mịẹapụ ma na, ḅịrịapụ na, si mịẹmịẹaye mịẹmịẹapụ na, pịkị niniapụ na, oru tẹkẹtẹkẹ apụma na, pịkị ọkwẹịn ḅụ na mịẹmịẹaye ḅụ na iruokọnkọn apụma na-ẹ.

¹⁶“Ị̀rị̀, Jizọs Ḅe, ị̀ya enjẹlḅọ ḅe fịrịma pakụmasam, na ò mun chọchị ma ḅie mayema ḍukopakụma ọ́ pịrị. Ị̀rị̀ anị Devid ḅe kuno-ẹ pịkị ò furo mị ḅie anị à pakaḅoye-ẹ; Ị̀rị̀ anị jaịnma ḅịarị ḅaso lolia ḅe-ẹ.”

¹⁷Tẹmẹ Ḅe na, Owuḅọ yaḅịaḅọ ma na nwọ ḅẹmẹ, “Ḅo!” Mịn ye mị naaḅọ naaḅọ mịẹka mịẹka ḅaraḅụ pịkịna nwọ ḅẹḅịa, “Ḅo!” Ḅo, mengi pụkọtarịḅọ goyegoye: ḍumo pịrị mengi mị ọkị ḍiepịrịye ḅaraḅụ, anị ḅiḅọ goyegoye.

¹⁸Ị̀rị̀, Jọn ḅe, à kụrọma mịn ḍiri mị ḅie sime ịkịankoro ọkwẹịnma naaḅọ goyegoye ḅerijine-aḅẹ; nemikase ye se arịa ḅụ chụa ḅọ omi-ẹ ḅẹḅẹ, mị ḍiri mị ḅie ini ḍuko si obi ma, Tamụnọ Ḅe nwọse chụa iniḅọ pịrịḅịa.

¹⁹Nemikase mị ḍiri mị ḅie sime ịkịankoro ọkwẹịnma ḅụ ye sin ḅọ omi-ẹ ḅẹḅẹ, Tamụnọ Ḅe ḍumo pịrị chịn mị ḅụ na, pịkị fịafịa opuama mị ḅie na, sime iniḅọ pịrị ḍiekiri mị ḅụ yesinḅịa, anị mị ḍiri mị ḅie ini ḍukoye ma-ẹ.

²⁰Ori onyechịẹ maye mamgba pịrịḅọ ḅe nwọ ḅẹmẹ, “Iin kọkọmaye-ẹ! Ḅọlọka sịkị ḅụ à ḅoaḅẹ!” Anị ọkọ sime. Ḅo, Nyanaḅọ Jizọs!

²¹Ye Nyanaḅọ Jizọs Kraịst Ḅe ḍikiḅụgerere mị sime nwenimgba pịrị.