Read kirikeni Ḍieḅelema Yema 4 Bible Online

Ḍieḅelema Yema 4 - kirikeni bible

Ḍieḅelema Yema 4

¹Mịn mị ḅo ḅọrọ sịkị à ḅo ḍikimẹ, se so ḅọkọ mị finji se à jịn elekima ọrịmẹ, à tatarị naa se ọkwẹịn ị̀ pịrị oḍu mị fie ọkụ fie pụkọ mị, nwọ ḅẹmẹ, “Iwo mịọ ḅo, anịsịkị mịn sịkị mị ḅọrọ se pakaḅịaye à nwọse ị́ ḍieḅịa.”

²Anị gbọrị kirikiri, anị Tẹmẹ Ḅe ḅo ị̀ ḅụ gbanaye-ẹ. Anị nyọ soḅie gbọrị amanyana ngada ọgọnọ gbọrịḅọ anịa ọgọnọ simemẹ.

³Ḍiki tọrụ ḅụ jaspa na kanelian na yela ḍụparịma simeọkụ anị ò simeọkụ-ẹ; anịsịkị ogona oria amanyana ngada mị kelemamẹ. Ḅe ogona ḅe ori ẹmẹrald ḍụparị tọrụ nyanamẹ.

⁴Amanyanaḅọ ngada mị kelema, jịn si inein-a amanyana ngada fịnjị à nwọ ọrịmẹ. Arịa ọgọnọ sẹnịapụ ḅụ si inein-a apụ fịnjị simemẹ; abalala ini nwọ chụamẹ, se goli goli amanyanachu ini nwọ chiramẹ.

⁵Sowakam na sofie na, pịkị soalagba na, amanyana ngada mị ḅie pakaḅomẹ. Sọnọma pọnjị tọnjie amanyana ngada mị tọrọkọ ḅịa simemẹ. Ma sọnọma tọnjie ma anị Tamụnọ Ḅe oria sọnọma Tẹmẹma-ẹ.

⁶Tẹmẹḍikiye simeọkụ sime ala mengi tọrụ pịkị amanyana ngada mị tọrọkọ simemẹ, opumaḅịa ḍụparị fịafịa ọkụ anị anị fịafịa ọkụ-ẹ. Amanyanaḅọ ngada mị kelemamẹ anga anga ḅụ, inein-a ḍumo tẹmẹaye omi-ẹ, tọrụmgbọlụ ọḅụ na kuḅu na ḅụ arịa ḅụ ḅeinmẹ.

⁷Tatarị wu ḅe ọ̀ chịrịḅa ḅe na kịkịnamẹ; maịn karama wu ḅe ọ̀ nambulo kịkẹmẹ, tẹrẹ karama wu ḅe ò tomoniḅọ tọrụkuḅu nyanamẹ, anịsịkị inein karama wu ḅe ò fin àrị igo na kịkịnamẹ.

⁸Inein-a ḍumo tẹmẹayema ḅụ gbọrị wu sonio-a pamba sonio-a pamba nwọ nyanamẹ; anịsịkị ọḅụ na kuḅu na ḅụ tọrụmgbọlụ arịa ḅụ ḅeinmẹ. Ḍin na Enekaka na ḅụ, ịnyọsara ofori ḅara ḅụ àrị nime chuaḅẹ: “Fịafịa, fịafịa, fịafịa, anị Nyanaḅọ Kụrọmamgba Nyana Tamụnọ Ḅe-ẹ, ori ḅọrọsa sịkị na mịọkụ na pịkị ḅoḅịa sịkị na simeḅọ ḅe.”

⁹Boma na, osi na, pịkị mịẹḅaka ḅe nime na, ma inein-a tẹmẹayema nwọ chu ori amanyana ngada mị ọgọnọ sime ḍumogbaso ḅọ ḅe pịrịmẹ. Ini nime mị chu sịkị,

¹⁰ini si inein-a sẹnịapụ fịnjịma ḅịkịkoro ori amanyana ngada mị ọgọnọ sime ḍumogbaso ḅọ ḅe pịrị se ọ̀ tẹkẹmẹ. Ini inia amanyanachu ma se amanyana ngada mị tọrọkọ koroma se nwọse nime chumẹ,

¹¹“Wa Nyanaḅọ, pịkị mịna Tamụnọ! Ị̀rị̀ anị boma na, osi na, pịkị kụrọ na se pịrị gbẹịn Ḅọ-ẹ. Anịatịḅị ị́rị́ ye mamgba tẹmẹmẹ, pịkị ị́ ḅụḅẹlẹ ḅara ḅụ anị àrị sime pịkị ḍumo nyanaye-ẹ.”