Read kirikeni Ḍieḅelema Yema 5 Bible Online

Ḍieḅelema Yema 5 - kirikeni bible

Ḍieḅelema Yema 5

¹Ori amanyana ngada mị ọgọnọ sime ḅọ ḅe amaḅara ḅie, fangala ọḅụ na kuḅu na ḅụ ye gịẹịn ḍiri à nwọ ọrịmẹ; anịsịkị sọnọma yeoḅoloaye ini nwọse anị oḅolomẹ.

²À gbọrị opu enjẹlḅọ ọrịmẹ, gele pụkọ se olokuaḅẹ: “Tụḅọ kụrọ nyana se yeoḅoloaye ma pịnị se fangala ḍiri mị finji ḅe?”

³So mị ḅie sọnị anịkanịka tomonikiri ḅie anịkanịka tomonikiri chukuḅie gbọrịḅọ sọnị ineda ḍiri mị finji se anịa ḅie ḍikikẹ.

⁴Àrị opuma owumẹ, anịatịḅị anị gbọrịḅọ sọnị ḅụgbẹịnkẹ ineda pakaḅo mị fangala ḍiri mị finji, anịkanịka anịa ḅie ḍiki.

⁵Anị sẹnịapụma ḅie gbọrịḅọ nwọse ị̀ ḅẹye-ẹ, “Owu ma. Ḍiki! Juda furo mị ḅie pakaḅo chịrịḅa ḅe Devid ḅe ḅụ pakaḅo opuḅọ ḅe, ori ọmụḅaraiḅi mị nyanasam; ori anị pịkị ineda sọnọma yeoḅoloaye ma pịnịsin pịkị fangala ḍiri mị finjiḅịaye-ẹ.”

⁶Anịsịkị, à gbọrị Anana Tọkụ ọrịmẹ amanyana ngada mị ogboku ọ̀ chịẹ waraḅẹ. Se inein-a ḍumo tẹmẹayema na sẹnịapụma na gbori kelemamẹ. Ini ọ̀ ḅaasam nwọ ḅẹ ḅara ọ̀ nwọ simemẹ. Sọnọma ịvalị na sọnọma tọrụmgbọlụ na ọ̀ nwọ nyanamẹ, anị Tamụnọ Ḅe se tomonikiri mị mgba sẹịnma sọnọma tẹmẹma-ẹ.

⁷Anana Tọkụ ḅe mun amanyana ngada mị ọgọnọ sime ḅọ ḅe amaḅara ḅie sime fangala-ḍiri mị ọkịmẹ.

⁸Ori ọ̀ ḅara fangala-ḍiri mị ọkị so sịkị, inein-a ḍumo tẹmẹayema na si-inein-a sẹnịapụ fịnjịma na Anana Tọkụ ḅe tọrọkọ ḅịkịkoromẹ. Ḅọḅọ ọbọ na insẹnsị ḅie ḅein goli goli bọlị na nwọ nyanamẹ, anị Tamụnọ-a tomonima ḅe tẹkẹma-ẹ.

⁹Ini ịwọ nime chumẹ: “Anị ị́ gbẹịnmẹ fangala-ḍiri mị ọkị se anị oḅoloyema pịnị sin. Anịatịḅị ini ị́ ḅaamẹ se ị́ pịkị ị́ya pulo ḅụ wẹrị tomoni fẹ ḅo Tamụnọ Ḅe pịrịsam tọn-a furo na, ọkwẹịnḅẹlẹ na, sẹma na, pịkị tomoni goyegoye mamgba ḅie ḅụ.

¹⁰Ị́ pịkị ini se agbamịẹapụ amanyanakiri mịẹsam fịrịnwẹngị mịna Tamụnọ Ḅe pịrị, se ini ḅẹrẹtọnḅịa tomonikiri ḅie.”

¹¹À pịkị ḍikimẹ se tọn-a enjẹlapụ mbrusẹ pụkọ naamẹ mẹndẹ oyiasi fịnjị fịnjị ḅụ. Ini chịẹ amanyana ngada mị na, inein-a tẹmẹayema na, sẹnịapụma na kelemamẹ,

¹²se gele pụkọ ḅụ nime chụaḅẹ: “Ini ḅaa Anana Tọkụ Ḅe anị ọ̀ gbẹịnmẹ kụrọ na, pẹrẹ na, nemi na, ịnyọ na, osi na, boma na, pịkị tokoni na sime ọ̀ pịrị!”

¹³Se à pịkị tẹmẹaye goyegoye nwọ naamẹ so mị ḅie simeaye na tomonikiri ḅie na, tomonikiri chukuḅie na pịkị tọrụ mị ḅie—mịn tomonikiri ḅie ḍumo nyanaye goyegoye—arịmgba nime chu se ḅẹaḅẹ: “Simegbaso tokoni na, osi na, boma na, pịkị kụrọ na sime ori amanyana ngada mị ọgọnọ sime ḅọ ḅe na Anana Tọkụ ḅe na pịrị!”

¹⁴Inein-a ḍumo tẹmẹayema nwọ pẹkẹrẹmẹ, “Amẹn!” Se sẹnịapụma ḅịkịkoro se tẹkẹmẹ.