Read kirikeni Ḍieḅelema Yema 7 Bible Online

Ḍieḅelema Yema 7 - kirikeni bible

Ḍieḅelema Yema 7

¹Mịn mị ḅọrọ sịkị tomonikiri mị ḅe inein-a ịkọlịma ḅụ, chịẹsime àrị inein-a enjẹlapụ à nwọ ọrịmẹ, ini inein-a ịkọlị fọrụ ma ọlọ chịẹmamẹ, mịẹse gbọrị fọrụ sọnị fie mun tomonikiri mị ḅie, anịkanịka tọrụ mị ọgọnọ, anịkanịka ejema la ẹka ḅara.

²Se à pịkị jịn enjẹlḅọ ọrịmẹ; ịrụapakapaka nyọ ḅụ ori iwoaḅẹ; ọ̀ ḅara ḅie ḍumo Tamụnọ Ḅe yeoḅoloye omi-ẹ. Ori oloku ini inein-a enjẹlapụma pịrịmẹ, anị Tamụnọ Ḅe kụrọ se pịrị na ini tomonikiri mị na tọrụ mị na sima-ẹ nwọ ḅẹ apụma.

³Enjẹlḅọ ḅe nwọ ḅẹmẹ, “Ma ye se tomonikiri mị na tọrụ mị na anịkanịka ejema na lamama, wa mịna Tamụnọ Ḅe fịrịnwẹngịapụma fụḅaraogboma ḅụ elekima chụaka simeogbo.”

⁴Ini ḍuko ị̀ pịrịmẹ na ini fụḅaraogbo elekima chụa apụma kịẹnḅịpị anị maịnfasi poku nwọ lamẹ. Izrẹl furo mamgba ḅie anị mịna apụma pakaḅoye-ẹ.

⁵Juda furo ḅie kịnị-a poku na oyi ẹndẹ anị ye fụḅara ḅụ oḅoloye-ẹ. Rubẹnị furo ḅie kịnị-a poku na oyi ẹndẹ, Gadị furo ḅie kịnị-a poku na oyi ẹndẹ, Asha furo ḅie kịnị-a poku na oyi ẹndẹ, Naftalaị furo ḅie kịnị-a poku na oyi ẹndẹ, Manasẹ furo ḅie kịnị-a poku na oyi ẹndẹ, Simiọnị furo ḅie kịnị-a poku na oyi ẹndẹ, Livaị furo ḅie kịnị-a poku na oyi ẹndẹ, Ịsaka furo ḅie kịnị-a poku na oyi ẹndẹ, Zẹbụlọnị furo ḅie kịnị-a poku na oyi ẹndẹ, Josẹf furo ḅie kịnị-a poku na oyi ẹndẹ, Bẹnjamin furo ḅie kịnị-a poku na oyi ẹndẹ.

⁹Mịn mị ḅọrọ sịkị ḅaka tomonikpo à nwọ ọrịmẹ—gbọrịḅọ sọnị ineda kịẹn ẹka tomonikpo. Ama tọrụkịrịkịrị na, sẹ tọrụkịrịkịrị, pịkị ọkwẹịn ḅẹlẹ kịrịkịrị ḅie mị ini ḅoye-ẹ, se ini ḅo amanyana ngada mị na Anana Tọkụ Ḅe na tọrọkọ chịẹmẹ; ini abalala koro ḅụchụaye chụamẹ, ini pịkị inia ḅarama ḅie kọrọ ḅara ọlọ waraḅẹ.

¹⁰Ini gele pụkọ se olokumẹ: “Ori amanyana ngada mị ọgọnọ sime mịna Tamụnọ Ḅe na, Anana Tọkụ Ḅe na ḅụ mị ḍụaḅọrọma mị ḅoye-ẹ!”

¹¹Enjẹlapụ mamgba chịẹ amanyana ngada mị na sẹnịapụma na pịkị inein-a ḍumo tẹmẹayema na kelemamẹ. Anị ini amanyana ngada mị tọrọkọ ḅịkị koro, tọrụ se iḅo Tamụnọ Ḅe tẹkẹye-ẹ.

¹²Se ḅẹaḅẹ, “Amẹn! Tokoni na, boma na, nemi na, mịẹḅaka na, osi na, kụrọ na, pịkị ịnyọ na, sime mịna Tamụnọ Ḅe pịrịmẹ, mun ḅene-ḅene nwọ la! Amẹn!”

¹³Sẹnịapụma ḅie gbọrịḅọ ị̀ gbelamẹ, “Nwọ koro abalala ḅụchụayema chụa apụma ta apụ, nde ju ini ḅo?”

¹⁴“Sẹnịḅọ, à nemikẹ, Ị́rị́ ị́ nemimẹ.” À nwọ pẹkẹrẹmẹ. Ọ́ nwọse ị̀ ḅẹmẹ, “Mịna apụma, anị opu tọrụsiọrị mị ḅie pakaḅo apụ ma-ẹ. Ini Anana Tọkụ Ḅe pulo mị se inia koro ḅụchụayema sịkịrị se àrị mịẹfịafịamasam.

¹⁵Anị ini gose Tamụnọ Ḅe amanyana ngada mị tọrọkọ chịẹ, pịkị ḍin na enekaka na ḅụ oria Oputẹkẹwarị ḅie fịrịnwẹngị ọ̀ pịrịarịye-ẹ. Ori amanyana ngada mị ọgọnọ sime ḅọ ḅe anị ọ̀ tọrụkuḅu se ini gbẹịnḅịaye-ẹ.

¹⁶Ḅuru anịkanịka mengi ḅarị ngịsị ini tarị ẹkẹ; ịrụa ḅarị ini tẹịn ẹkẹ, inia ḅụ pịkị ḅarị jukujuku ẹkẹ,

¹⁷anịatịḅị, ori amanyana ngada mị ogboku sime Anana Tọkụ Ḅe anị inia anana koruḅọ sọḅịaye-ẹ. Ori anị pịkị ini pamun ḍumo pịrị ideri mengi ma laḅịaye-ẹ. Anịsịkị, Tamụnọ Ḅe ori inia tọrụ owumengi ma gurosinḅịa.”