Read kirikeni Ḍieḅelema Yema 8 Bible Online

Ḍieḅelema Yema 8 - kirikeni bible

Ḍieḅelema Yema 8

¹Anana Tọkụ Ḅe sọnọmẹ karama yeoḅoloye mị pịnị finji sịkị, sokịẹnye ḅala soi pembe ye na gbasịye ḅụ so mị ḅie yawụmẹ.

²Anịsịkị à sọnọma enjẹlapụma ọrịmẹ, ini Tamụnọ Ḅe tọrọkọ chịẹ simemẹ; se ini pịkị sọnọma oḍu se ini pịrịmẹ.

³Jịn enjẹlḅọ ḅo agbamịẹ ẹbẹ mị angasịkị chịẹmẹ. Ini goli se mịẹ insẹnsị dọkịma ḅụrọ ọ̀ ḅara omi-ẹ. Ò se Tamụnọ-a tomonima tẹkẹma ḅụ chụaḅịa insẹnsị ini nwọse ḅakama ọ̀ pịrịmẹ, ọ̀ pịkị anị se amanyana ngada mị tọrọkọ chịẹsime goli agbamịẹ ẹbẹ mị ọgọnọ agbamịẹ-ẹ.

⁴Enjẹlḅọ ḅe ḅara sime dọkịarị insẹnsị onwoin mị na Tamụnọ-a tomonima ḅe tẹkẹma na iwo mun Tamụnọ Ḅe tọrọkọ lamẹ.

⁵Anịsịkị enjẹlḅọ ḅe insẹnsị dọkịma ḅụrọ mị ọkị se agbamịẹ ẹbẹ mị ọgọnọ ḅụ fịnị ọkị se anịa ḅie chụa ḅeinma, se anị se tomonikiri gbinmẹ. Nyọ fie na soalagba na, sowakam na, pịkị opu kirijike na kiri ọkịmẹ.

⁶Anịsịkị sọnọma oḍu ma ọlọ sọnọma enjẹlapụma ḅụkarakaramamẹ, àrị ofuroḅịa ẹrẹchị.

⁷Tatarị enjẹlḅọ ḅe oria oḍu mị ofuromẹ. Opu ene mgbọlụ na fịnị na, pịkị oju ḅụ pulo na gwa tomonikiri mị ḅie saraḅẹ. Tomonikiri mị se tẹrẹ-a kiri pu ḅe gbọrị kiri dọkịmẹ anị gbọrị ḅara anị ejema na osueinma na pịkị dọkị ọkụ-ẹ.

⁸Anịsịkị, maịn karama enjẹlḅọ ḅe oria oḍu mị ofuromẹ. Kọrịarị opu tụndụ kịkẹye ini nwọse tọrụ mị ḅie gbinmẹ. Tọrụ mị se tẹrẹ-a kiri pu ḅe gbọrị kiri pịkịḅo oju ḅụ pulo sọmẹ.

⁹Tọrụ mị ḅie sime ḍumo tẹmẹayema se tẹrẹ-a kiri pu ḅe gbọrị kiri fịmẹ; pịkị owoin arụ ma se tẹrẹ-a kiri pu ḅe gbọrị kiri kọsịfamẹ.

¹⁰Anịsịkị tẹrẹ karama enjẹlḅọ ḅe oria oḍu mị ofuromẹ. Gbọrị pọnjị tọnjie ḅịa ọkụ ḅịa opu lolia soḅie sokoro ideri ḅu mengi tọrụ ma na, kiri ḅie pakaḅoarị mengi ma na se tẹrẹ-a kiri pu ḅụ, gbọrị kiri ọgọnọ ḅụ saramẹ.

¹¹(Lolia mị ẹrẹ anị “Opu Akụ.”) Mengi mị se tẹrẹ-a kiri pu ḅe gbọrị kiri akụmẹ, se anị ḅu tọn-a apụ fịmẹ anịatịḅị anị ḅo akụsam.

¹²Anịsịkị inein karama enjẹlḅọ ḅe oria oḍu mị ofuromẹ. Ịrụa mị na akalụ mị na, pịkị lolia ma na gbọrịye gbọrịye se tẹrẹ-a kiri pu ḅe gbọrị kiri ye àrị lamẹ, anịẹrẹchị, arịa enekuḅu mị se tẹrẹ-a kiri pu ḅe gbọrị kiri pịkịḅo kanakanamẹ. Ene mị se tẹrẹ-a kiri pu ḅe gbọrị kiri ḅịapakakẹ, anị gbọrị ḅara anị anị sime ḍin mị sọnị pịrị ọkụ-ẹ.

¹³Anịsịkị à ḍiki sịkị, gbọrị fin soḅie sọarị igo à nwọ ọrịmẹ; ò gele pụkọ se olokuaḅẹ, “Yei ḅalafamaye! ḅalafamaye! Nde anị ḅalafamaye sọ tomonikiri ḅie anga apụma pịrịḅịa ọkụ, kọn tẹrẹ-a enjẹlapụma inia oḍu ma ofuroḅịa sịkị pakaḅịaye ma ẹrẹchị!”