Read kirikeni Ḍieḅelema Yema 9 Bible Online

Ḍieḅelema Yema 9 - kirikeni bible

Ḍieḅelema Yema 9

¹Anịsịkị sọnọ karama enjẹlḅọ ḅe oria oḍu mị ofuromẹ. Soḅie sokoro tomonikiri koro gbọrị lolia à nwọ ọrịmẹ; tuma nyanaka olulu mị ḅe sambị mị ini nwọse anị pịrịmẹ.

²Mịn lolia mị anị tuma nyanaka olulu mị finjiye-ẹ; se onwoin anịa ḅie kputuma pakaḅomẹ, mịn onwoin mị anị opu orumo ḅie pakaḅoye na kịkịnamẹ. Tuma nyanaka olulu mị ḅie pakaḅo onwoin mị anị ịrụa mị na, so mị tọrụ na kanakanamamẹ.

³Onwoin mị ḅie igurube pakaḅo tomonikiri saramẹ, se pirikambulo ma nyana kụrọ mị ini nwọse àrị pịrịmẹ.

⁴Ini nwọse àrị ḅẹmẹ na àrị ye seni osuein anịkanịka ejema, anịkanịka chịn goyegoye lama ma, àrị ye se lamaḅịa apụ anị Tamụnọ elekima mị fụḅara ḅụ oḅoloka apụma-ẹ.

⁵Ini ḅereni igurube ma pịrịkẹ àrị mịna apụma ḅaa, ọkụma àrị sọnọ akalụ nwọse ḅụfụka se ini pịrị. Pirikambulo ḅe nwenitẹịn se anị ọyịyị ọkụ mị, anị mị ḅụfụka mị inia ḅụ ọyịḅịa ọkụ-ẹ.

⁶Mà sọnọ akalụ ma ḅie ini fị ḍọkịḅịa, ọkụma ini anị ọrị ẹkẹ, ini fị ḅiḅịa, ọkụma fị mị, anị ini ḍiki mangịḅịa.

⁷Mà igurube ma àrị asụn na kịkịnamẹ, ḅụkarakarama owu sọḅịa ẹrẹchị. Goli amanyanachu ọkụ simeye arịa tịḅị ọgọnọ omi-ẹ, se arịa tọrụ ma tomoni-a tọrụ na kịkịnamẹ.

⁸Arịa tịḅị inime ma eremeni tịḅị inime na kịkịnamẹ, arịa aka ma àrị chịrịḅa ḅe aka ma na kịkịnamẹ.

⁹Ikulele ekpe gbẹịn aye na kịkịnaye àrị nwọse arịa ekpe ma gbẹịnmẹ, anịsịkị arịa pamba ma tọn-a asụn fọnọ owu mun-arị kirinwẹngị arụ ma ḅie fie ọkụ fiemẹ.

¹⁰Pirikambulo tumo ma nweni tẹịn aye nyana ọkụ àrị nwọ nyanamẹ, pịkị arịa tumo ma ḅụ mị àrị kụrọ nyanaye ye se tomoni lama mun sọnọ-a akalụ laḅịa.

¹¹Ḅẹrẹtọn àrị pịrịarị amanyanaḅọ àrị nwọ nyanamẹ, ori anị tuma nyanaka olulu mị ḍikiḍikiarị enjẹlḅọ ḅe-ẹ. Hibru ọkwẹịn ḅụ oria ẹrẹ anị Abadọn, Grik ḅụ anị Apoliọn (mịn mị fiearịye anị “Nweni Ḅaaḅaa Ḅọ”).

¹²Tatarị ḅalafamaye mị ḅọrọsam, mịn mị ḅọrọ sịkị jịn mama ḅalafamaye pịkị ḅoḅịa.

¹³Anịsịkị sonio karama enjẹlḅọ ḅe oria oḍu mị ofuromẹ, se Tamụnọ Ḅe tọrọkọ chịẹsime goli agbamịẹ ẹbẹ inein-a ịkọlị ma ḅụ à pụkọ naamẹ.

¹⁴Pụkọ mị nwọse sonio karama enjẹlḅọ ḅe ḅẹmẹ, “Anị Yufretis opu ideri mengi tọrụ mị ḅụ sime inein-a enjẹlapụma finma!”

¹⁵Ini inein-a enjẹlapụma ini ini finmamẹ. Anịatịḅị anị kụra mị ḅie, anị akalụ mị ḅie, anị gbọrị ene mị na sịkị mị na ḅụ, mịna enjẹlapụma, ini ḅụkarakaramasam na ini tomonikiri mị se tẹrẹ-a kiri ḍia ḅe gbọrị kiri nwọ ḅaaḅịa.

¹⁶Ini ḍuko ị̀ pịrịmẹ na asụn se owusọḅịa owunima inia kịẹnḅịpị anị poku-a sonioasi sọnọ-a poku fịnjị ḅụ kiri-a oyiasi-ẹ.

¹⁷Tẹmẹ ḅie ḅụ, àrị asụnma na àrị se nwẹngịarị apụma na ọrịmẹ: ini ekpe gbẹịn aye nyanamẹ, kọrịarị awụwụ tọrụ nyana fịnị simeọkụ sime safaya ḅulu tọrụ anị nwọ nyanamẹ, anị pịkịna sọlfọ ododotọrụ nyana ọkụ nyanamẹ. Asụn ma tịḅị ma chịrịḅa tịḅị kịkẹmẹ, se arịa ḅịpị ḅie fịnị na onwoin na sọlfọ na pakaḅomẹ.

¹⁸Asụn ma ḅịpị ḅie pakaḅo àrị tẹrẹ-a obi ma, fịnị na, onwoin na, pịkị sọlfọ na, tomonikiri mị se tẹrẹ-a kiri pu ḅụ gbọrị kiri àrị nwọ ḅaamẹ.

¹⁹Anịatịḅị asụnma ḅe kụrọ mị arịa ḅịpị ḅie na tumoma na ḅụ àrị omi-ẹ. Arịa tumo mama tịḅị nyana oruwuma na kịkịnamẹ, anị àrị se ye se tomoni lamaḅịaye ma-ẹ.

²⁰Mà obi ma, ma ḅaaka apụma, ini inia si mịẹmịẹayema ḅụ vinpịkịkẹ. Sitẹmẹma na, ini goli na, seleḅa na, alapẹlẹka na pịkị chịn se karayema na, anị ineda nyọ ọrị ẹka, ye naaka pịkị ineda nwẹngị ẹka yema tẹkẹ ḅụ, ini ḅarasinkẹ.

²¹Anị ini pịkị inia nweni nini na, ḅịrịkọn na, sẹfị na, pịkị furu ḅụ na vinpịkịka ọkụ-ẹ.