Read kirikeni Ruf 3 Bible Online

Ruf 3 - kirikeni bible

Ruf 3

¹Sịkị ḅọrọ sịkị, Naomi ma nwọse Ruf ma ḅẹmẹ, “Àrị ị́ simeḅịa owuḅọ ḍọkị ị́ pịrịḅịa, mịẹse ị́ya warị ị́ nwọ nyanaḅịa ḅara.

²Se ḅiekoroma na, mịna eremeni ma na-ị́rị́-na nwọ fịrịnwẹngị pịrịarị owuḅọ, Boaz ḅe, mịna mịnaḅọ-ẹ. Mịọkụ poki. Mịn saso, ò mun irumịẹ ịpịamgba mgbọlụ pịsịrị pakụmaḅịa.

³Anịgose, mengi ḅiri se kụnụ olo ọmbị, se ị́ya iḅitẹịn ḅụchụaye mị chụa. Se ori ịpịamgba ma pịsịrị pakụma ḅoarị nyọ mị mun, ọkụma ò ye fị so, pịkị mengi ḅu soka simeogbo, mịẹse ị́ anịnyọ omi-ẹ nwọḅẹye mị ọ̀ nwọ nemi.

⁴Iḅiọkụma ọ̀ sọ mun ḅọlọlọḅịa nyọ mị nemi, anịsịkị, ọ̀ mọnọsa ḅẹḅẹ, mun ò se ọ̀ ḅụgbẹịn ayema ḅụ ọ̀ ḅụọ chuku ḅịtẹ mị dekichịẹma, se ọ̀ ḅụọchuku ḅọlọlọ. Ị́ mịẹḅịaye ọ̀ nwọ ḍuko ị́ pịrịḅịa.”

⁵Ruf ma nwọ pẹkẹrẹmẹ, “Ị́ ḍukoye goyegoye à mịẹḅịa.”

⁶Ruf ma á so ịpịamgba mgbọlụma pịsịrị nyọ mị mun mẹ, se árịa fuarọ ma ḍuko á pịrịayema nwọ mịẹmẹ.

⁷Boaz ḅe ò ye fị so, se pịkị mengi ḅu so sịkị, oria oju rẹgẹrẹgẹsam. Anị ò so mun ini irumịẹ ịpịamgba ma kpokponima nyọ ḅụ ḅọlọlọ se mọnọye-ẹ. Ruf ma á deinma sịnịnị sọ mun se ò seni ọ̀ ḅụgbẹịn ḅịtẹ mị ḅụ ḅụọchuku mị dekichịẹma se ọ̀ ḅụọchuku ḅụ ḅọlọlọmẹ.

⁸Ḍin mị ḅụ ọ̀ bẹkẹma sịsẹ se pịkịmẹ, se ọ̀ ḅụgbiripumẹ, ò ḅo ọrịmẹ na eremeniḅọ ọ̀ ḅụọchuku ḅụ ḅọlọlọ sime waraḅẹ.

⁹“Ị́rị́ tụḅọ?” ọ̀ nwọ gbelamẹ. Á nwọ pẹkẹrẹmẹ, “Ị̀rị̀-ẹ, Ruf ị́ya eremeni fịrịnwẹngịḅọ ma árị-ẹ.” “Anịatịḅị ị́rị́ ị̀rị̀ na kpeki mịnaḅọ-ẹ, ị́rị́ anị ị̀ ḍikiḍikiḅịaye-ẹ. Anịgose, pasisi ị̀ sime.”

¹⁰Se ọ̀ nwọ ḅẹmẹ, “Nyanaḅọ Ḅe ị́ ḅẹlẹma ị̀ya eremeni tọkụ.” “Anịatịḅị, ị́ mịọkụ furo mị ḅerenitẹịn ị́ se ị́ya fuarọ ma ḅereni ḅara mị nẹngịmẹ. Mgbọkụ ị́ so mun asẹmẹnị tọkụ ḍọkịsam, anị ḅọrọ pẹrẹḅọ-o, anịkanịka, igweinḅọ-o, ọkụma ị́ anị ḅara mị mịẹkẹ.

¹¹Ị́ ḅụ ḅalaḅalamama, Ruf. Ị́rị́ ḅiye goyegoye àrị anị mịẹḅịa; ọrụḅọḅọ ama mị ḅie nemimẹ na ị́rị́ iḅi eremeniḅọ-ẹ.

¹²Kọkọmaye-ẹ, ị̀rị̀ ị́rị́ na kpeki mịnaḅọ-ẹ, pịkị ị́ ḍikiḍikiarịḅọ-ẹ nwọḅẹ sọnị, jịn kpekitẹịn ị̀ nẹngị mịnaḅọ owuḅọ omi-ẹ.

¹³Ḍin mị mgba se mịanga sime, se dede ḅie lasịkị, ori ị́ ḍikiḍikiḅịa na ori ị́ ḍikiḍiki-ẹka na, wa nwọ ḍọkịḅo ọrịḅịa. Anị-ẹ ḅẹḅẹ, opuma iḅimẹ; anịkẹ ḅẹḅẹ, à ḍumosime Tamụnọ Ḅe karịfịmẹ na àrị ị́ ḍikiḍikiḅịa. Mịanga ḅọlọlọ sime koru se dede la.”

¹⁴Anị árị anịanga ọ̀ ḅụọchuku ḅọlọlọ simeye-ẹ, ọkụma ene mị ḅa se ma nweni ḅo árị ọrịka simeogbo, mị á sịsẹye-ẹ, anịatịḅị, Boaz ḅe ò ḅikẹ jụmḅọ nemi na árị anị nyọ simemẹ.

¹⁵Boaz ḅe nwọse á ḅẹmẹ, “Ị́ya ḅụgbẹịn ḅịtẹ mị sin se anị se mịanga anya.” Árị ọkọ mịẹmẹ, si-a ḅarasịkịrị panị ḅeinḅịa irumịẹ ịpịamgba mgbọlụ ọ̀ nwọse sara, se ḅarachụa anị deki árịa aba gbanamẹ. Se árị anị se so warị mun mẹ.

¹⁶Á mun warị lasịkị, árịa fuarọ ma nwọse á gbelamẹ, “Ndụḅa, nde ị́ nwẹngị la ọkụ?” Ruf ma Boaz ḅe mịẹ á pịrịye goyegoye á ḍuko á pịrịmẹ.

¹⁷Á pịkị nwọ ḅẹmẹ, “Ọ̀ nwọse ị̀ ḅẹmẹ na à papa ḅara se so ị́ dama ḅoma, mịn mị gose ọ̀ ma irumịẹ chịnmgbọlụ mamgba nwọse ị̀ pịrịmẹ.”

¹⁸Naomi ma nwọse á ḅẹmẹ, “Ruf, inema mun yema mịẹḅịa sịkị la, Boaz ḅe, mịmgba ori ịnyọ sara ẹkẹ ọkịmun ọ̀ mịn ḅẹrẹ mị mịẹ famaḅịa sịkị laḅịa.”