Read kirikeni 1 Samụẹl 10 Bible Online

1 Samụẹl 10 - kirikeni bible

1 Samụẹl 10

¹Anị Samụẹl ḅe oliv pulo ololo deki se anị seni Sọl ḅe tịḅịkiri saraye-ẹ, ori ọ̀ ḅịpị nọnjụ se nwọse ọ̀ ḅẹmẹ, “Nyanaḅọ Ḅe ò pulo se ị́ tịḅịkiri sarasam ị́ seni amanyanaḅọ mịẹ oria tomoni Izrẹlapụma pịrịsam. Ị́rị́ amanyana oria tomonima pịrị se ini na tarakapụ mamgba ḅara ḅie ini ḍụaḅịa. Mịn ị́ se nemiḅịaye-ẹ na Nyanaḅọ Ḅe ori ị́ sẹlẹọkị se amanyanaḅọ mịẹ oria tomonima pịrịsam nwọḅẹye mị-ẹ.

²Mịmgba ị́ ị̀ wẹrịsosa ḅẹḅẹ, Zẹlza anị Bẹnjamin eke mị ḅụ, mama owuapụ ị́rị́ na ịrịaḅịa Rechẹl iḍupu mị na kpeki nyọḅụ. Ini ḍuko ị́ pịrịḅịa na ọ́ ḍọkịarị yepụra asụnma ini àrị ọrịsam, anịẹrẹchị ị́ ḍaḅe ọ̀ ḅarị àrị gose kpalakpalakẹ, ọkụma ị́rị́ gose-ẹ, se ò gbelama ḅọrọaḅẹ, ‘Nde à ḅọrọ mịẹḅịa ọkụ ị̀ nịa ḅe gbolomayeḅụ?’

³Anịju ḅụ ị́ sakị nwẹngị mun Tebọ mị ḅie osiḅụ sime eje mị lasịkị, anị nyọ mun Bẹtẹl ḅie agbamịẹ Tamụnọ Ḅe pịrị-ẹ mun-arị tẹrẹ-a owuapụ ị́rị́ na ịrịaḅịa. Inia ḅie gbọrịḅọ tẹrẹ-a oḅori se mun aḅẹ, gbọrịḅọ pịkị fịturu tẹrẹ-a okpokpo deki waraḅẹ, anịsịkị tẹrẹ karamaḅọ ḅe ere-iru ḅie ḅein nama oju apụra akpa ọ̀ nwọ ọlọ waraḅẹ.

⁴Ini ị́ kereniḅịa se fịturu mama okpokpo arịaḅụ ini nwọse ḍie ị́ pịrịḅịa, ị́ àrị ọkịḅịa.

⁵Anịsịkị ị́ so Tamụnọ Ḅe Chịngị mị damamunḅịa Gibia ḅieḅụ, anị Filistia apụma inia ikowarịma pike sime nyọ mị. Ị́ mun ama mị ḅie sọḅịa sịkị, chịngị mị ọgọnọ ḅụ agbamịẹ ẹbẹ mị nyọ ḅụ koroḅo àrị ịkịankoroapụ kpo ị́rị́ na ịrịaḅịa, ini ọbọ na, akwa na, epelepe na, pịkị ịchakachaka na farịaḅẹ. Ini sẹkị pịkị oloku aḅẹ.

⁶Bẹkẹma ḅaraḅụ Nyanaḅọ Ḅe tẹmẹ ḅo ị́ ḅụ gbanaḅịa, se ị́ inia ḅie sọ inia Tamụnọ anga ḅe mịẹmịẹye sẹkị mị kọn pịkị oloku ịkịankoroḅịa se ị́ pịkị ḅo kịrịḅọ sọḅịa.

⁷Ma ayema mịẹsa ḅẹḅẹ, Tamụnọ Ḅe tọn ị́ pịrị na mịẹ ḅẹye goyegoye mị-ẹ, anịatịḅị Tamụnọ Ḅe ori ị́rị́ na omi-ẹ.

⁸Ị́rị́ tatarị mun Gilgalị la se à ḅo anịju ḅụ ị́rị́ na ịrịaḅịa se dọkịma agba na pịkị nwẹngịgboloma agba na mịẹḅịa. Anịju sime ị̀ koru mun sọnọma ḍin nwọ la anịsịkị à ḅo ị́ mịẹḅịaye nwọ ḍuko ị́ pịrịḅịa.”

⁹Sọl ḅe ò vinpịkị se Samụẹl ḅe koroma soarị sịkị, Tamụnọ Ḅe ori ịwọ ḅara se Sọl ḅe wẹrịmẹ. Se anị ene ḅụ Samụẹl ḅe ḍuko ọ̀ pịrịye goyegoye pịkị pakamẹ.

¹⁰Sọl ḅe na oria fịrịnwẹngịḅọ ḅe na ḅo Gibia mị lasịkị ịkịankoroapụ kpo ḅo ori na ịrịamẹ. Bẹkẹma ḅaraḅụ Tamụnọ Ḅe tẹmẹ ḅakama ḅo ọ̀ ḅụ gbanamẹ, se ori inia ḅụ sọ ini na sẹkị, oloku pịkị ịkịankoromẹ.

¹¹Ò nemi ḅọrọsa apụma ọ̀ mị ḅara mị mịẹarị ọkụ ọrị se nwọse jụmḅọ jụmḅọ gbelamẹ, “Kish yaḅe cheye ọ̀ ḅụ mịẹ-ao? Sọl ḅe sọ ịkịankoroapụma ḅụ gbọrịḅọ nọ?”

¹²Anịju ḅụ anga gbọrị owuḅọ nwọse ini gbelamẹ, “Anịsịkị nwọ mịanga sime ísí ịkịankoroapụma kwanị—ó koroma ḅara inia ḍapụma tapụ?” Mị ọkwẹịn mị wẹrị sakị ọkụ-ẹ, “Sọl ḅe sọnị ịkịankoroapụma ḅụ gbọrịḅọ nọ?”

¹³Sọl ḅe ọ̀ sẹkị, oloku pịkị ịkịankoro so sịkị, ori agbamịẹ ẹbẹ mị nyọ mun mẹ chịngị mị ọgọnọ ḅụ.

¹⁴Sọl ḅe ḍawu numbireowu ḅe ori na oria fịrịnwẹngịḅọ ḅe na ọrị sịkị, ori ini gbelamẹ, “Ómine ndeju mun?” “Wa yepụra asụnma ḍọkị simemẹ,” Sọl ḅe nwọse ọ̀ pẹkẹrẹmẹ. “Wa ineda àrị ḍọkịḅoka sịkị, wa so Samụẹl ḅe damamunmẹ.”

¹⁵“Anịsịkị Samụẹl ḅe ò che ḍuko ọ́ pịrị?” Sọl ḅe ḍawu numbireowu ḅe nwọse ini gbelamẹ.

¹⁶“Ò ḍuko wa pịrịmẹ na namama ini àrị ọrịsam,” Sọl ḅe nwọse ọ̀ pẹkẹrẹmẹ—ọkụma Samụẹl ḅe ḍuko ọ̀ pịrị na ori amanyanaḅọ sọḅịa nwọḅẹye mị ò ḍuko ḍawu numbireowu ḅe pịrịkẹ.

¹⁷Samụẹl ḅe tomonima chịn koḅirimamẹ ini Mizpa ḅie Tamụnọ anga ḅe mịẹmịẹye mịẹḅịa ẹrẹchị

¹⁸se nwọse ini ḅẹmẹ, “Nyanaḅọ, Izrẹl Tamụnọ Ḅe nwọ ḅẹmẹ, ‘Ị̀rị̀ Ijipt mị ḅie ómine ọkị pakụmaḅomẹ pịkị Ijipt ḅie ómine pụnda àrị apụ mamgba ḅaraḅie ọ́ ḍụapakụmaḅomẹ.

¹⁹Ị̀rị̀ ọ́mịna Tamụnọ Ḅe-ẹ, ọ́mịna ḅụḅalaḅala mamgba na ḅụfụka ma na ḅie ọ́ ḍụapakụmaḅo ḅọ ḅe-ẹ, ọkụma mịmgba ómine ị̀ sịkịsam se ị̀ ḅẹmẹ na àrị amanyanaḅọ se ọ́ pịrị. Opuma iḅimẹ, anịọkụma, ómine mgba ó koḅirima Nyanaḅọ Ḅe tọrọkọ ḅo sẹ mị ḅie ama ama na, furo furo ḅụ na.’”

²⁰Anịsịkị Samụẹl ḅe sẹ mị ḅie furoma ḅie gbọrịye gbọrịye chịn pakụmaḅomẹ, se Nyanaḅọ Ḅe Bẹnjamin furo mị sẹlẹọkịmẹ.

²¹Anịsịkị Samụẹl ḅe Bẹnjamin sẹ mị ḅie gbọrị furo gbọrị furo chịn pakụmaḅomẹ, se Matraị furo mị nwọ sẹlẹọkịmẹ. Anịsịkị Matraị furo mị pakaḅomẹ, se Sọl Kish yaḅe ọ̀ nwọ sẹlẹọkịmẹ. Ini ọ̀ ḍọkịmẹ, ọkụma ini ineda ori ọrịka sịkị,

²²ini Nyanaḅọ Ḅe gbelamẹ, “Jụmḅọ pa kọn wara-ao?” Nyanaḅọ Ḅe nwọse ini pẹkẹrẹmẹ, “Sọl ḅe anịju ori omi-ẹ, yema ọḅụju ọ̀ ḅọị waraḅẹ.”

²³Anị ini mangị mun Sọl ḅe ọkịpakụmaḅo tomonima pịrịye-ẹ, se ini ọrịmẹ na chịẹtịḅị ḅụ ò geletẹịn ḅẹḅọ ḅẹḅọ nẹngịmẹ.

²⁴Samụẹl ḅe nwọse tomonima ḅẹmẹ, “Ḅe anị Nyanaḅọ Ḅe sẹlẹọkịsa ḅọ ḅe-ẹ mịanga ḅụ! Mịna ḅieḅụ ò sime ọkụ sime ḅọ ofori-ẹ.” Tomoni mamgba oloku se nwọ ḅẹmẹ, “Ḍumo ḅọlọ sịkị la amanyanaḅọ!”

²⁵Samụẹl ḅe sime amanyanaḅọ pịrị ayema na pịkị fịrịma na ḍuko ḅelema tomonima pịrịmẹ, anịsịkị ọ̀ pịkị àrị se ḍiri ḅie gịẹịn koromamẹ, ori anị se osiḅụ sime nyọ ḅụ kokomẹ. Anị ori ini ḅẹ se ọrụḅọḅọ so mịna ama mun ye-ẹ.

²⁶Sọl ḅe sọnị so oria ama Gibia mị mun mẹ. Tọn-a kụrọnị ori na somẹ, anị Tamụnọ Ḅe ḅara se kuḅie gbolo apụma.

²⁷Ọkụma ye ḅụ ofori apụma nwọ ḅẹmẹ, “Nde ḅeḅe re ineda iḅiye mịẹ wa pịrịḅịa ọkụ?” Ini Sọl ḅe ḍikisimamẹ se pịkị gbọrị ḍiepịrịaye sọ ọkịḅo ọ̀ pịrịkẹ.