Read kirikeni 1 Samụẹl 16 Bible Online

1 Samụẹl 16 - kirikeni bible

1 Samụẹl 16

¹Nyanaḅọ Ḅe nwọse Samụẹl ḅe ḅẹmẹ, “Sọl ḅe ị́ kururu ọ̀ pịrị mun nde sịkị laḅe? Àrị ọ̀ sịkịsam amanyana Izrẹl mị pịrị ḅụ. Ọkụma mịọkụ oliv pulo ọkị se so Bẹtlihẹm mun, Jẹsi nwọ chịnḅọ ḅe damamun, anịatịḅị oria owuapụ awọma ḅie, amanyanaḅịa gbọrịḅọ à nwọ sẹlẹ ọkịsam.”

²“Nde àrị ineda ọkọ simeye mịẹḅịa ọkụ?” Samụẹl ḅe nwọ gbelamẹ. “Nemikase Sọl ḅe anị naamẹ ḅẹ ọkụma, ori ị̀ ḅaaḅịa!” Nyanaḅọ Ḅe nwọse ọ̀ pẹkẹrẹmẹ, “Gbọrị ayamburama nambulo ọkị se nwọḅẹ na ị́ anịju ḅụ agbamịẹ Nyanaḅọ Ḅe pịrị-ẹmunmẹ.

³Jẹsi ḅe chịn ori agbamịẹ nyọ mị ḅo, se ị́ mịẹḅịa ọkụ à nwọ ḍuko ị́ pịrịḅịa. Ị́ pulo se à ḍuko ị́ pịrịḅịa ḅọ ḅe tịḅịsara se, ò se amanyanaḅọ mịẹḅịa.”

⁴Samụẹl ḅe, Nyanaḅọ Ḅe se ọ̀ ḅe ḅara mị ọ̀ nwọ mịẹse ò so Bẹtlihẹm mun mẹ, anịju ḅụ opuama mị ḅe tịḅịnịma ḅụgeregere ḅụ ḅo ori-na-ịrịa se ò gbelamẹ, “Yeọrịḅọ, ị́ kpaịnma deinse ḅo?”

⁵“Iin,” ori nwọse ini pẹkẹrẹmẹ. “À ḅo agbamịẹ Nyanaḅọ Ḅe pịrị-ẹḅomẹ. Ómine ọ́ ḅụ mịẹfịafịama tẹmẹ anga ḅụ se ị̀rị̀ na mun.” Ò ḅo Jẹsi ḅe na oria owuapụ awọma na mịẹfịafịamamẹ tẹmẹ anga ḅụ, ọ̀ pịkị chịnḅịpị se ini pịrịmẹ na ini agbamịẹ nyọ mị ḅo.

⁶Ini ḅo lasịkị, Samụẹl ḅe, ò Jẹsi ya Ẹlaịab ḅe ọrị se ḅịpị se ọ̀ ḅụ fiemamẹ, “Ḅe, nwọ Nyanaḅọ Ḅe tọrụkuḅu chịẹ simeḅọ ḅe, pikipikiye ofori-ẹ anị ọ̀ sẹlẹ ọkịḅọ ḅe-ẹ.”

⁷Ọkụma Nyanaḅọ Ḅe nwọse ọ̀ ḅẹmẹ, “Ò gele se pịkị owutọkụ iḅikọn ḅara mị ḍikimama. Àrị ọ̀ sịkịmẹ, anịatịḅị tomoni yeḍiki-ọkụ à nwọse yeḍikiḍikikẹ. Tomoniḅọ ḅe ọgọnọ paka se ọ̀ tọrụ se ọrịye mị, anị ò ḍikiḍikiye-ẹ, ọkụma ị̀rị̀ kuḅiemgbọlụ mị anị à ḍikiḍikiye-ẹ.”

⁸Anịsịkị Jẹsi ḅe yayo Abinadab ḅe chịn Samụẹl ḅe tọrọkọ ḅomẹ. Ọkụma Samụẹl ḅe nwọ ḅẹmẹ, “Ẹn-ẹn, ḅe Nyanaḅọ Ḅe sẹlẹ ọkịḅọ ḅe ọrịkẹ.”

⁹Anị Jẹsi ḅe Shama ḅe ọkịḅoye-ẹ. Samụẹl ḅe nwọ ḅẹmẹ, “Ḅeḅe sọnị ọrịkẹ Nyanaḅọ Ḅe sẹlẹ ọkịḅọ ḅe.”

¹⁰Mịn ḅara mị ḅụ Jẹsi ḅe oria owuapụ awọma ḅụ sọnọmapụ ọkịḅo Samụẹl ḅe tọrọkọ chịẹmamẹ. Se Samụẹl ḅe nwọse ọ̀ ḅẹmẹ, “Ẹn-ẹn, mịna apụma ḅụ Nyanaḅọ Ḅe sẹlẹ ọkị gbọrịḅọ sọnị ofori-ẹ.”

¹¹Anị ọ̀ nwọse ò gbelaye-ẹ, “Ị́ya jịn owuapụ awọ pa omi?” Jẹsi ḅe nwọse ọ̀ pẹkẹrẹmẹ, “Iniaḅụ kalaḅọ ḅe kọnmẹ, ọkụma ori anana ḍikiḍiki nyọ mun mẹ.” “Ọ̀ fịrịmaḅo,” Samụẹl ḅe nwọ ḅẹmẹ. “Agba mị ma wa mịẹ ẹkẹ, ò ḅo laka simeogbo.”

¹²Anị Jẹsi ḅe ọ̀ fịrịmaḅoye-ẹ. Ori owutọkụ iḅi kọnmẹ, pịkị ịnyọ nyanamẹ, ọnwẹnẹ pịkị ọ̀ tọrụmgbọlụma ḅie omi-ẹ. Nyanaḅọ Ḅe nwọse Samụẹl ḅe ḅẹmẹ, “Sịsẹ se pulo mị se ọ̀ tịḅịsara, Ḅe ori-ẹ!”

¹³Samụẹl ḅe oliv pulo mị ọkị se Devid ḅe tịḅịsaramẹ oria owuapụ mịnapụma tọrụkuḅu ḅụ. Anị gbọrị kirikiri Nyanaḅọ Ḅe tẹmẹ ḅo Devid ḅe ọgọnọ gbanamẹ se anị ene ḅụ sakị anị ori-na-simemẹ. Anịsịkị Samụẹl ḅe ò vinpịkị so Rema mị mun mẹ.

¹⁴Nyanaḅọ Ḅe tẹmẹ mị Sọl ḅe wẹrịsomẹ, anịsịkị Nyanaḅọ Ḅe ḅara ḅo sitẹmẹ ḅo ò ḅie sọmẹ ọ̀ tọrụsiọrịma ḅịa ẹrẹchị.

¹⁵Oria fịrịnwẹngịapụma nwọse ọ̀ ḅẹmẹ, “Wa nemimẹ na Tamụnọ Ḅe fịrịma sitẹmẹ anị ị́ tọrụsiọrịmarịye-ẹ.

¹⁶Anịẹrẹchị kụrọ se wa pịrị, wa nyanaḅọ, wa mun ọbọ-farị-ḍinḅọ ḍọkịḅo. Nyanaḅọ Ḅe ḅara ḅo sitẹmẹ mị ḅo ị́ya ọgọnọ gbana sịkị goyegoye, ori ineda ọbọ mị farị se ị́ ḅụ deinḅịa.”

¹⁷Sọl ḅe ọ̀ kụrọ se ini pịrịmẹ, “Ọbọ-farị-ḍinḅọ ọ́ nwọ ḍọkịḅo ị̀ pịrị.”

¹⁸Ò ḅiekoruapụ ma ḅie gbọrịḅọ nwọ ḅẹmẹ, “Ḍiki, Jẹsi, Bẹtlihẹmḅọ ḅe, gbọrị nime-chu-ḍin owutọkụ ọ̀ nwọ nyanamẹ. Ọ̀ pịkị kụrọkuḅie nyana pịkị owutọkụ iḅi kọnmẹ, ori ọmụgbin ḍinmẹ, pịkị ọkwẹịn ḍinḅọ-ẹ. Nyanaḅọ Ḅe pịkị ọ̀ ḅụ omi-ẹ.”

¹⁹Anịẹrẹchị Sọl ḅe okumun-apụ se Jẹsi ḅe fịrịma se nwọse ọ̀ ḅẹmẹ, “Ị́ nịa Devid ḅe se ị̀ sẹịnma, anị anana ḍikiḍikiḅọ ḅe.”

²⁰Jẹsi ḅe Devid ḅe se Sọl ḅe sẹịnmamẹ, gbọrị ayamburama oḅori na, gbọrị yepụra asụn na oria ọgọnọ ḅụ sime fịturu na, pịkị ere-iru ḅie ḅein nama oju apụra akpa na.

²¹Devid ḅe ọ̀ Sọl ḅe damaḅo se fịrịnwẹngị ọ̀ pịrịmẹ. Sọl ḅe ori opuma ọ̀ ḅẹlẹmamẹ anịẹrẹchị ori ọ̀ sẹlẹ ọkị seni oria owuniayema pụraḅịaḅọ nwọ mịẹmẹ.

²²Anịsịkị Sọl ḅe oku seni Jẹsi ḅe fịrịma se nwọse ọ̀ ḅẹmẹ: “Devid ḅe ori ị̀ ḅụḅẹlẹmẹ. Ye ọ̀ mịanga sime fịrịnwẹngị ị̀ pịrị.”

²³Anịsịkị ḅụ ọkị tọrọkọ mun, Tamụnọ Ḅe ḅara ḅo sitẹmẹ mị ḅo Sọl ḅe ọgọnọ gbana sịkị goyegoye, Devid ḅe ori oria ọbọ mị deki se anị farịḅịa. Sitẹmẹ mị anị soḅịa se Sọl ḅe ọ̀ ḅụ pịkị deinḅịa.