Read kirikeni 1 Samụẹl 17 Bible Online

1 Samụẹl 17 - kirikeni bible

1 Samụẹl 17

¹Filistia apụma ini koḅirimamẹ Sokọ mị ḅieḅụ ọmụgbinḅịa ẹrẹchị, anị Juda ama ḅụ gbọrị ama ḅie; Ẹfịs Damim nwọ chịn gbọrị anga ḅụ ini ikowarịma pike simemẹ, Sokọ mị na Azika mị na ogboku.

²Sọl ḅe na Izrẹlapụma na Ela Pẹsịkiri mị ḅieḅụ koḅirima se inia ikowarịma pike simemẹ, anị ini ḅụkarakarama se Filistia apụma na owusọḅịa nyọ mị.

³Filistia apụma gbọrị chịngị ọgọnọ sụngụma chịẹmẹ, se Izrẹlapụma pịkị jịn chịngị ọgọnọ ḅụ chịẹmẹ, se gbọrị pẹsịkiri inia ogboku simemẹ.

⁴Golaịat nwọ chịn gbọrịḅọ, Gat opuama mị ḅieḅọ, Filistia apụma inia ikowarịma pike sime nyọ mị ḅụ pakaḅo Izrẹlapụma na ḅaraḅaamẹ. Oria gele mị esenia-a ḅụọ na pẹkẹrẹ lamẹ

⁵se alapẹlẹka ikulele owuni ḅụchụaye ọ̀ nwọ chụamẹ, anị pịkị opuma ikumẹ, ọ̀ pịkị alapẹlẹka okpochu chiramẹ.

⁶Ori alapẹlẹka ikulele se ọ̀ ḅụọma chụamẹ ye ọ̀ la ẹka ḅara, ọ̀ pịkị alapẹlẹka ḅẹkẹrẹ seni oria aba gbanamẹ.

⁷Oria sụḅa mị ḅịtẹ ḍoriḅọ se mgbẹsẹchịn mịẹye mị kpokoro ọkụ kpokoromẹ, anịa ikulele tịḅị mị opuma ikumẹ. Ọ̀ tọrọkọ ḅụ nwẹngịarị gbọrị owuniḅọ oria agbọ mị dekimẹ.

⁸Golaịat ḅe ò ḅo chịẹ se Izrẹlapụma tịḅị oloku se nwọḅẹmẹ, “Anịju ò che ye-ao, ọmụgbinḅịa ẹrẹchị ọ́ sụngụma chịẹ nọ? Ị̀rị̀ Filistiaḅọ-ẹ, ómine Sọl omoniapụ! Ọ́mịna ḅie gbọrịḅọ ọ́ nwọ sẹlẹ nụḅọ ḅo ị̀rị̀ na owusọ.

⁹Ori nemikase ị̀ nẹngịma se ị̀ ḅaamẹ ḅẹḅẹ, wa omoniapụ sọ ọ́ pịrịḅịa; ọkụma ị̀rị̀ nemikase ọ̀ nẹngịma se ọ̀ ḅaamẹ ḅẹḅẹ, ómine omoniapụ sọ wa pịrịḅịa.

¹⁰À mịanga Izrẹl ọmụogbo mị na ḅaraḅaamẹ mịọkụ. Ómine ineda ḅịa ḅẹḅẹ ọ́ gbọrịḅọ pakụmaḅo ị̀rị̀ na owusọ!”

¹¹Sọl ḅe na oria owunima na mịn mị naa sịkị inia ḅalafamẹ.

¹²Devid ḅe Jẹsi ya-ẹ, anị Ẹfratḅọ ḅe, Bẹtlihẹm Juda mị ḅie ḅọ-ẹ. Jẹsi ḅe nine owuapụ awọ ọ̀ nwọ nyanamẹ, se Sọl ḅe amanyanaḅọ sọ sịkị ori opuma olomusam.

¹³Oria awọma ḅie sẹnịsa tẹrẹ-a owuapụ awọma, ini Sọl ḅe na ọmụ mị mun mẹ. Inimgba ḅụ sẹnịḅọ ḅe anị Ẹlaịab ḅe-ẹ, ò ḍukomaḅọ ḅe anị Abinadab ḅe-ẹ, se tẹrẹ karamaḅọ ḅe anị Shama ḅe-ẹ.

¹⁴Devid ḅe anị furopẹlẹḅọ ḅe-ẹ, ini sẹnịsa tẹrẹ-a mịnapụma Sọl ḅe na sime wara sịkị,

¹⁵Devid ḅe ori ini wẹrịso Bẹtlihẹm mị mun ḍawu ḅe ananama ḍikiḍikimẹ, sịkịsịkị ḅụ.

¹⁶Golaịat ḅe ori Izrẹlapụma na ḅaraḅaaḅaamẹ dede goyegoye na pịkị saso goyegoye na ọkịmun ḍin-a mesi nwọ lamẹ.

¹⁷Gbọrị ene Jẹsi ḅe nwọse Devid ḅe ḅẹmẹ, “Ma kpangịrịsa ịpịamgbama ḅụ kala ḅara sịkịrị panị ḅeinḅịaye na pịkị ma fịturu oyi okpokpoma na ọkị, se be àrị se sarama mun ị́ya mịnapụma pịrị ini ikowarịma pike sime nyọ mị ḅieḅụ.

¹⁸Pịkị na kposa-oyi-a-ndo-mengi-okpokpo ma ọkị mun ọmụtịḅịdaḅọ ḅe pịrị. Ị́ya mịnapụma ye ini na sime ọkụ ḍọkị nemi pịkị, ị́ kọkọma ini ọrịmẹ se iniaḅụ iḅi waraḅẹ nwọḅẹye ḍiepakụmaḅịaye nwọse vinpịkị ḅo.

¹⁹Amanyanaḅọ Sọl ḅe na, ị́ya mịnapụma na, pịkị ísí Izrẹlapụ mamgba Ela Pẹsịkiri mị ḅieḅụ ini Filistia apụma na owusọaḅẹ.”

²⁰Anịḅe eneḅa dede funfun ḅie, Devid ḅe ọ̀ sịsẹmẹ, se ọ̀ jụmḅọ se koroma ananama ḍikiḍikimẹ, ọ̀ fịaye ọkị se, Jẹsi ḅe se ọ̀ ḅe nyọ mị mun mẹ. Izrẹlapụma ọmụ-eke mị paịn se pakamun inia ọmụgbin ọrụ mị ḅụ chịẹ-o-mun-arị sịkị ḅụ, anị ò mun ikowarịma pike sime nyọ mị laye-ẹ.

²¹Filistia apụma na Izrẹlapụma na inia kirima ḅụ ini chịẹsam ọmụgbinḅịa ẹrẹchị, tọrụ se jịn-apụ jịn-apụ da waraḅẹ.

²²Devid ḅe ọ̀ fịayema seni fịaye ḍikiḍiki tịḅịnịḅọ ḅe ḅarachụa, se mangị ini sụngụma chịẹ sime nyọ mị mun mẹ, ò so oria mịnapụma damamun, se ye ini na sime ḅara se ini gbelamẹ.

²³Ori ọkwẹịn ini pịrịarịogbo, Golaịat ḅe pakaḅo Izrẹlapụma na ḅaraḅaamẹ anị ọ̀ tatarị mịẹ ḅọrọsa ḅara mị, se Devid ḅe ò ḍukoye mị naamẹ.

²⁴Izrẹlapụma ini Golaịat ḅe ọrị sịkị, ḅalafa ḅụ ini mangị somẹ.

²⁵“Ma ò ḍiki!” ini nwọse jụmḅọ jụmḅọ ḅẹmẹ. “Oria ḅaraḅaa ọkwẹịn ma poki! Amanyanaḅọ Sọl ḅe ori opu gbẹịnye ḅereni ọ̀ ḅaaḅịaḅọ goyegoye pịrịmẹ; amanyanaḅọ ḅe ọ̀ pịkị ḅarọ ma se nụḅọ pịrị se nụḅọ árị na simeḅịa pịkị nụḅọ ḍaḅọ furo mị ḅarị pịkị ama mị ochocho ama igbiki mị gbẹịn-ẹkẹ.”

²⁶Devid ḅe ori ori-na-kpekima sime apụma gbelamẹ, “Ḅe Filistiaḅọ ḅe ḅaa se mị ḅụgerere mị Izrẹl mị ḅụ nwọ sinḅọ che gbẹịnye nụḅọ nwọ nyanaḅe? Ọkụma, ḅe oru ḅẹrẹnemi Filistiaḅọ ḅe sọnị ḅọrọ tụḅọ, se ḅo ḍumo sime Tamụnọ Ḅe ọmụogbo mị se papaye mịẹḅe?”

²⁷Ini mịẹ se Golaịat ḅe ḅaaḅọ pịrịḅịaye ini nwọ ḍuko ọ̀ pịrịmẹ.

²⁸Ẹlaịab, Devid numbireowu, iniaḅụ sẹnịtẹịnḅọ ḅe, Devid ḅe ori ọkwẹịn owunima pịrịarị ọkụ ọ̀ nwọ naamẹ. Ori ịganị Devid ḅe pịrị se nwọ ḅẹmẹ, “Mịanga ị́ cheye-ao? Tụḅọ piri ele mị ḅie àrị ị́ya ananama ḍikiḍiki ị́ pịrị-ao? Ị́rị́ ḅe ḅụdekichịẹma pịkị opuaye mịẹ tọkụ ḅe! Sọarị owu mị ḍikiḅịaye gose ị́ ḅomẹ!”

²⁹“Mịọkụ cheye à nwọ mịẹsa?” Devid ḅe nwọse ò gbelamẹ. “Papa ḅẹrẹ sọnị à gbelama?”

³⁰Ò vinpịkị jụmḅọ damamun se pịkị anị gbọrị ḅẹrẹ mị se ò gbelamẹ, se ọ̀ ḅẹrẹ mị gbela sịkị goyegoye gbọrị pẹkẹrẹ ḅịpị anị ini se ọ̀ pịrịye-ẹ.

³¹Da owuapụ Devid ḅe ḍukoye mị naa se anị ḍuko Sọl ḅe pịrịmẹ, anị ori ọ̀ chịn ọkịye-ẹ.

³²Devid ḅe nwọse Sọl ḅe ḅẹmẹ, “Opu Amanyanaḅọ, gbọrịḅọ sọnị ḅe Filistiaḅọ ḅe ḍikiḅalafama! Ị̀rị̀ à mun ori na owu mị sọḅịa.”

³³“Ẹn-ẹn,” Sọl ḅe nwọse ọ̀ ḅẹmẹ. “Nde ị́rị́ ineda ori na owusọḅịa ọkụ? Ị́rị́ kalatọkụ-ẹ, ọkụma ori owuniḅọ-ẹ oria ḍumo ene mamgba!”

³⁴“Opu Amanyanaḅọ,” Devid ḅe nwọ ḅẹmẹ. “Ị̀rị̀ anị ị̀ ḍaḅe oria ananama ḍikiḍikiarịye-ẹ. Chịrịḅa anịkanịka piri obiri ḅo arịa ḅie gbọrị anana kun so sịkị goyegoye,

³⁵à mun ọ̀ ḅaraḅie anana ḅe pọkọ pakụmaḅoḅomẹ. Se nemikase chịrịḅa ḅe anịkanịka piri obiri ḅe vinpịkị ị̀ damẹ ḅẹḅẹ, àrị ọ̀ pụkọ-mgbọlụ ḅụ ori ọlọ se ò fomuḅaaḅaamẹ.

³⁶À chịrịḅa ḅe na piri obiri ḅe na ḅaaḅaa ḅara mị anị à pịkị ḅe oruḅẹrẹnemi Filistiaḅọ ḅe mịẹḅịa ọkụ-ẹ, anị ḍumo sime Tamụnọ Ḅe ọmụogbo mị se papaye mịẹarịḅọ ḅe.

³⁷Nyanaḅọ Ḅe chịrịḅama na piri obiri ma na ḅara ḅie ori ị̀ ḍụamẹ; ḅe Filistiaḅọ ḅe ḅara ḅiesọ, ori ị̀ ḍụaḅịa.” “Iḅimẹ,” Sọl ḅe nwọ pẹkẹrẹmẹ. “Mun se, ye Nyanaḅọ Ḅe ị́rị́ na sime.”

³⁸Oria ọmụni ayema ọ̀ nwọse Devid ḅe pịrịmẹ ori àrị chụa: alapẹlẹka ikulele okpochu mị ọ̀ nwọse Devid ḅe chiramẹ, pịkị owuni ḅụchụaye mị na.

³⁹Devid ḅe ọ̀ Sọl okola-agiji mị se owuni ḅụchụaye mị ḅụ sụka se nwẹngị ḅimẹ, ọkụma ori inedakẹ, anịatịḅị jịn sịkị ma ori àrị chụakẹ. Anị ọ̀ nwọse Sọl ḅe ḅẹye-ẹ, “Àrị ineda ma aye mamgba se owusọ ẹkẹ.” “Ma ayema jịn sịkị ma à chụakẹ.” Anịẹrẹchị ori àrị sin koromamẹ.

⁴⁰Ori oria anana ḍikiḍiki amgbara mị dekimẹ, anịsịkị ọ̀ pịkị mọnịmọnị ḍụparị sọnọ-mgbọlụ dekimẹ ideri mengi mị ḅieḅụ, se àrị seni oria akpa ḅie chụamẹ. Oria akarabọsị mị ọ̀ nwọ karakaramamẹ, se pakamun Golaịat ḅe na bịamamẹ.

⁴¹Filistiaḅọ ḅe ọ̀ nwẹngị Devid ḅe damẹ, oria agbọ-dekiḅọ ḅe ọ̀ tọrọkọ ḅụ nwẹngịma mun aḅẹ. Ọ̀ pa nwẹngị sọmaḅoaḅẹ,

⁴²ò ḅo iḅiọkụma Devid ḅe ḍiki sịkị, ori opuma ò ḍiki iderimamẹ, anịatịḅị ori anị iḅiọkụma ḍikitọrụgbẹịn iḅi owutọkụ-ẹ.

⁴³Ọ̀ nwọse Devid ḅe ḅẹmẹ, “Anị chịn mị che mịẹye? Ị̀rị̀ obiri-ẹ ị́ nwọ chịn?” Anị ori ọ̀ oru mị ẹrẹ ḅụ worinime se Devid ḅe pịrịye-ẹ.

⁴⁴Devid ḅe na ḅaraḅaa ḅụ ọ̀ nwọ ḅẹmẹ, “Sọmaḅo,” “à pịkị ị́ya oju mịnị mị seni fenima na namama na pịrị se àrị pẹịḅịa.”

⁴⁵Devid ḅe nwọse ọ̀ pẹkẹrẹmẹ, “Ị́rị́ se ị̀ damaḅoarịye anị okola-agiji na, sụḅa na, pịkị ḅẹkẹrẹ na, ọkụma ị̀rị̀ Kụrọmamgba Nyanaḅọ Ḅe ẹrẹ ḅụ anị àrị ị́ damaḅoarịye-ẹ, anị Izrẹlapụ ọmụogbo mị Tamụnọ Ḅe, anị ị́ se papaye mịẹarị ḅọ ḅe.

⁴⁶Mịmgba mị ḅụ Nyanaḅọ Ḅe ori ị́ se ị̀ ḅaraḅie dẹrị se àrị ị́ ḅụ kụrọkọnḅịa, àrị ị́ nẹngịma pịkị ị́ tịḅị pẹlẹsinḅịa. Se à pịkị Filistia apụ owunima oju mịnị ma se fenima na namama na pịrị se àrị pẹịḅịa. Anịsịkị bebe tomonikiri mị mgba nemiḅịa na Izrẹl mị anị Tamụnọ nyanamẹ,

⁴⁷se mịanga simeḅọ goyegoye ọrịḅịa na Nyanaḅọ Ḅe ori okola-agiji anịkanịka sụḅa ḅikẹ oria tomonima ḍụaḅọrọma mị ḅụ. Ọmụḅaraiḅi mị oriaye-ẹ, ọ̀ pịkị ómine mgba se mịna ḅaraḅie dẹrị se wa ọ́ ḅụ kụrọkọnḅịa.”

⁴⁸Golaịat ḅe pịkịna sakị nwẹngị Devid ḅe damamunmẹ, se Devid ḅe be mangị Filistia apụ ọmụogbo mị sụngụma sime nyọ mun ori na owu mị sọ-ẹmunmẹ.

⁴⁹Ori ọ̀ ḅara se oria akpa mị ḅie chu se gbọrị ḍụparị mgbọlụ deki ọkị, se anị seni Golaịat ḅe tẹịnmẹ. Anị ọ̀ fụḅara ogboku koro se kukure mị pumẹ, se Golaịat ḅe ḅịkị tọrụ se kiri iḅomẹ.

⁵⁰Anị ọkọ pakamẹ na Devid ḅe okola-agiji ọlọka ḅaraḅụ, akarabọsị na ḍụparị mgbọlụ na se Golaịat ḅe nẹngịma se ọ̀ ḅaamẹ!

⁵¹Ọ̀ mangị ọ̀ damamun se oria ọgọnọ chịẹ se Golaịat ḅe okola-agiji mị wọrọ pakụmamẹ lubu mị ḅie, ọ̀ tịḅị pẹlẹsin se ọ̀ ḅaamẹ. Filistia apụma inia ọmụalaḅọ ḅe fị̀sa ọkụ ọrị sịkị, ini mangị somẹ.

⁵²Izrẹlapụma na Juda apụma na oloku se mangị ini ḍukomẹ, ini ini ḍuko nweni mun Gat mị lamẹ pịkị somun Ẹkrọn mị onu ḅọkọ ma lamẹ. Filistia apụma ḅụ ye la se fị apụma Sheareim ateli mị ḅụ sara simemẹ, ọkịmun Gat mị na pịkị Ẹkrọn mị na lamẹ.

⁵³Izrẹlapụma ini Filistia apụma ḍuko ḅụ vinpịkị ḅo sịkị, ini inia yema ọfọịnmẹ, Filistia apụma na pike sime ikowarịma ḅie.

⁵⁴Devid ḅe ò Golaịat ḅe tịḅị mị deki so Jerusalẹm mị mun mẹ, ọkụma Golaịat owuniayema ori àrị ọkị se oria ikowarị mị ḅie wẹrịmẹ.

⁵⁵Sọl ḅe, Devid ḅe mun Golaịat ḅe na owusọ-ẹmuarị ọkụ mị ọrị sịkị, ọ̀ nwọse Abna oria ọmụtịḅịdaḅọ ḅe gbelamẹ, “Abna, ḅe tụḅọ tọkụ?” Abna ḅe nwọse ọ̀ pẹkẹrẹmẹ, “Opu Amanyanaḅọ, à tịḅị nemika-ao.”

⁵⁶Sọl ḅe nwọse ọ̀ ḅẹmẹ, “Anịọkụma, mun gbela nemi.”

⁵⁷Se Devid ḅe Golaịat ḅe ḅaa so se vinpịkị ini pike sime ikowarịma ḅie ḅo sịkị, Abna ḅe ori ori ọkịmun Sọl ḅe pịrịmẹ. Devid ḅe ọ̀ pa Golaịat ḅe tịḅị mị deki waraḅẹ.

⁵⁸Sọl ḅe nwọse ọ̀ gbelamẹ, “Asẹmẹnịḅọ, ị́rị́ tụḅọ tọkụ?” Devid ḅe nwọse ọ̀ pẹkẹrẹmẹ, “Ị̀rị̀ ị́ya fịrịnwẹngịḅọ Jẹsi ḅe tọkụ-ẹ, Bẹtlihẹmḅọ ḅe.”