Read kirikeni 1 Samụẹl 19 Bible Online

1 Samụẹl 19 - kirikeni bible

1 Samụẹl 19

¹Sọl ḅe ḍuko yayo Jonatan ḅe na oria fịrịnwẹngịapụ mamgba na pịrịmẹ na ọ̀ tọnsam na ò Devid ḅe ḅaaḅịa. Ọkụma Jonatan ḅe ò Devid ḅe ọrịka ori ineda ẹkẹ,

²anịẹrẹchị ọ̀ nwọse ọ̀ ḅẹmẹ, “Ị̀ ḍaḅe ori ị́ ḅaaḅịa ẹrẹchị ḍọkịaḅẹ. Sisi ị́ ḅụ ọbị ḅa dede ḅie; gbọrị kikima nyọ ḅụ ḅọị se anịju ḅụ sime.

³À mun piri mị ḅie chịẹḅịa ị̀ ḍaḅe anga sịkị anị ị́ ḅọị simearị nyọ ḅụ, se àrị ị́ gbolomaye se ori na ọkwẹịnma ḅịa. À nemikase ḍọkịḅoye omi-ẹ ḅẹḅẹ, à mịẹse ị́ nemiḅịa.”

⁴Jonatan ḅe ò Devid ḅe tokoni Sọl ḅe pịrị se nwọ ḅẹmẹ, “Ḍaḍa, siye se Devid ḅe mịẹma-ao ị́ya fịrịnwẹngịḅọ ḅe. Ò se ị́ mịẹsa siye ma ofori-ẹ; anịnakaraka, ori nyana se mịẹye goyegoye opu ḅarachụa anị anị sọ ị́ pịrịye-ẹ.

⁵Ori ò ḍumo mị abalakẹ ò Golaịat ḅe ḅaa sịkị ḅụ, se Nyanaḅọ Ḅe opu ọmụḅaraiḅi se Izrẹl mị pịrịmẹ. Anị mị ị́ nwọ ọrị sịkị ị́ ḅieḅẹlẹmẹ. Cheye ẹrẹchị, anịọkụma, ị́ siye se ḅẹrẹnemikaḅọ ḅe mịẹ ḅi-ao, se mịọkụ Devid ḅe ḅaaḅịa ọkụ ḍọkị-ao ḅẹrẹtịḅị tọnka ḅaraḅụ?”

⁶Sọl ḅe anị ọ̀ ḅụokoromẹ Jonatan ḅe ḍukoye mị, se Nyanaḅọ Ḅe ẹrẹ ḅụ ò ye ḅerenimẹ na ò Devid ḅe ḅaa ẹkẹ.

⁷Anị Jonatan ḅe Devid ḅe chịn se yegoyegoye ḍuko ọ̀ pịrịye-ẹ; se ò Devid ḅe ọkịmun Sọl ḅe pịrịmẹ, se Devid ḅe fịrịnwẹngị Sọl ḅe pịrịmẹ, anị ọ̀ tatarị mịẹmịẹ ḅara mị.

⁸Filistia apụma na, Izrẹlapụma na ọmụ mị pịkịna sakịmẹ. Devid ḅe ori owu se ini paka se iḅiọkụma ini nẹngịma so ọkụma ini mangị somẹ.

⁹Gbọrị ene, Nyanaḅọ Ḅe ḅara ḅo sitẹmẹ mị ḅo Sọl ḅe ọgọnọ gbana mẹ. Oria warị ḅie ọ̀ kpọnjị simemẹ oria sụḅa mị ọ̀ ḅara ḅie omi-ẹ, Devid ḅe sọnị pịkị anịju ḅụ sime oria ọbọ mị farịaḅẹ.

¹⁰Sọl ḅe oria sụḅa mị seni Devid ḅe gbin warị agbagba oḅoloma ḅimẹ, ọkụma Devid ḅe ọ̀ ḅụkwamẹ se sụḅa mị mun warị agbagba ḅụ pikemẹ. Devid ḅe ọ̀ mangị se ọ̀ ḅarapẹlẹma somẹ.

¹¹Anị gbọrị ḍin mị ḅụ Sọl ḅe owuapụ fịrịmamẹ na ini Devid ḅe warị koru se anịḅe eneḅa dede ḅie ọ̀ ḅaa. Maịkal, Devid tama á furuma ọ̀ pịrịmẹ na, “Nemikase mị ḍin ḅie ị́ ị́ tịḅị juakẹ ḅẹḅẹ, ḅa ini ị́ ḅaaḅịa.”

¹²Árị ikiḅa ḅọkọ mị ḅie ḅụ ò toluma koroma se ọ̀ mangị inia ḅarapẹlẹma se somẹ.

¹³Anịsịkị warị mị nyana ini kara oru á nwọse mọnọye mị ọgọnọ ḅọlọlọ koromamẹ se oḅori-oju-ichuka se tịḅịsẹkẹye mịẹ se anịa tịḅịju koroma, se ḅụgbẹịnye seni anị gbẹịnmẹ.

¹⁴Sọl ḅe fịrịma owuapụma ḅo Devid ḅe kun oḅo sịkị, Maịkal ma nwọse ini ḅẹmẹ na ori obiaḅẹ.

¹⁵Sọl ḅe ini fịrịmamẹ na ini vinpịkị mun ḅarana tọrụ se Devid ḅe ọrị. Ọ̀ kụrọ se ini pịrịse nwọ ḅẹmẹ, “Oria mọnọye mị ọgọnọ ómine ò deki mịanga ḅo, se àrị ọ̀ ḅaaḅịa.”

¹⁶Ini warị mị ḅie somun se ini kara oru mị ọrịmẹ mọnọye mị ọgọnọ se oḅori-oju-ichuka tịḅịsẹkẹye mị nwọse anịa tịḅị sẹkẹ mẹ.

¹⁷Sọl ḅe nwọse Maịkal ma gbelamẹ, “Cheye ẹrẹchị nwọ sime epele ị́ nwọse ị̀ ti se ị̀rị̀na-tarakaḅọ ḅe mịẹse ori ị̀ ḅarapẹlẹma so?” Árị nwọse ọ̀ pẹkẹrẹmẹ, “Ori ị̀ ḅaaḅịa ọ̀ nwọ ḅẹmẹ, à nemikase ḅarachụa ọ̀ pịrị se ori ị́ ḅarapẹlẹma soka ọkụma.”

¹⁸Devid ḅe ọ̀ ḅarapẹlẹma so Samụẹl ḅe damamunmẹ Rema mị ḅie, se Sọl ḅe seni ọ̀ mịẹye goyegoye nwọ ḍuko ọ̀ pịrịmẹ. Anị ori na Samụẹl ḅe na so Naịọt mị mun se anịju ḅụ simeye-ẹ.

¹⁹Ini ḍuko Sọl ḅe pịrịmẹ na Devid ḅe, Rema ḅie sime Naịọt ḅie ori omi-ẹ,

²⁰anị ori owuapụ fịrịmaye-ẹ na ini mun ò kun ḅo. Ini ịkịankoroapụma kpochụa sẹkị pịkị olokuarị ọkụ ọrịmẹ, se Samụẹl ḅe tịḅịda ini pịrịmẹ. Anị Tamụnọ tẹmẹ Sọl ḅe fịrịma owuapụma ọgọnọ gbanaye-ẹ, ini sọnị sakị sẹkị pịkị olokumẹ.

²¹Sọl ḅe mịn mị naa sịkị, ọ̀ pịkị jịn okumun-apụ se fịrịmamẹ, ini sọnị sẹkị pịkị olokumẹ. Ọ̀ pịkị tẹrẹ karama sịkị se okumun-apụ fịrịmamẹ, anị gbọrịye mị pa pịkị inia ḅụ mịẹmẹ.

²²Anị ori ḅarana so Rema mị mun ye-ẹ. Ò ḅo Seku mị ḅie sime opu tiḅe mị lasịkị, Samụẹl ḅe na Devid ḅe na sime nyọ ọ̀ nwọ gbelamẹ se ini ḍuko ọ̀ pịrịmẹ na Naịọt mị ḅie ini omi-ẹ.

²³Ori anịju mun-arị ogbo Tamụnọ tẹmẹ pịkị ori sọnị ọgọnọ gbanamẹ, anị ọ̀ sakị anịju ngịsị sẹkị pịkị oloku ma mun Naịọt mị laye-ẹ.

²⁴Ori oria ḅụchụayema sin se sẹkị pịkị olokumẹ Samụẹl ḅe tọrụkuḅu, se anị bebe ḍin mị ḅie na bebe ene kuḅu mị mgba na ḅụ, papaḅụ ọ̀ nwọ sin simemẹ. (Mịn anị ọkwẹịn mị ḅe chuku mị-ẹ, “Sọl ḅe sọnị ịkịankoroapụma ḅe gbọrịḅọ nọ?”)