Read kirikeni 1 Samụẹl 20 Bible Online

1 Samụẹl 20 - kirikeni bible

1 Samụẹl 20

¹Anị Devid ḅe, Rema ḅie sime Naịọt mị ḅieḅụ mangị so Jonatan ḅe damamunye-ẹ. “Cheye à ḅọrọ nwọ mịẹ?” ọ̀ nwọse ò gbelamẹ. “Che siye à nwọ mịẹ? Che siye à nwọse ị́ ḍaḅe mịẹ ẹrẹchị ori ị̀ ḅaa ḍọkị-ao?”

²Jonatan ḅe nwọse ọ̀ pẹkẹrẹmẹ, “Tamụnọ ḍụkụma se ị́ fị! Ị̀ ḍaḅe ọ̀ mịẹḅịaye mị ò ḍuko ị̀ pịrịka simeogbo ọ̀ mịẹmịẹkẹ, anị ḅọrọ yelaye-o anịkanịka yelakaye sọnị, mịn mị sọnị ọ̀ pịkị se ị̀ ḅọịma ẹkẹ. Kọkọmayekẹ!”

³Ọkụma Devid ḅe nwọse ọ̀ pẹkẹrẹmẹ, “Ị́ ḍaḅe ori iḅiọkụma nemimẹ ị́ ị̀ ḅẹlẹma la-ọkụ, anịẹrẹchị ọ̀ tọnpẹlẹsam ọ̀ mịẹ ḅiye mị ò ḅi ẹkẹ ị́ nemi, anịatịḅị anị opuma ị́ ḅụosọḅịa. À ḍumo sime Nyanaḅọ Ḅe karịfị ị́ pịrịmẹ na kalaye kọnmẹ à fịsam!”

⁴Jonatan ḅe nwọse ọ̀ ḅẹmẹ, “Ị́ ḅiye goyegoye à mịẹḅịa.”

⁵“Ḅa anị Ịwọ-Akalụ-Alalịfị ene mị-ẹ,” Devid ḅe nwọse ọ̀ pẹkẹrẹmẹ, “à pịkị amanyanaḅọ ḅe na yefịḅịa ḅara anị nwọ simemẹ. Ọkụma nemikase anị ị́ ḅụḅẹlẹmẹ ḅẹḅẹ, à somun ozuma ḅie ḅọị sime mun ḅa ḅọrọ berembere ene mị laḅịa.

⁶Nemikase ị́ ḍaḅe ị̀rị̀, à yefị nyọ mị ḅụ ofori-ẹ nwọḅẹye mị nemi ḅo mẹ ḅẹḅẹ, ḍuko ọ̀ pịrị na àrị ị́ ḅara kụrọ ọkị se so Bẹtlihẹm mun mẹ, anịḅo kụra goyegoye ḅụ ị̀ furo mị mgba mịẹmịẹ agba mị sịkị lasa sịkị.

⁷Ò nemikase, ‘Iḅimẹ,’ nwọ ḅẹḅẹ, anịọkụma, ye ị̀ la-ẹkẹ; ọkụma ò nemikase ḅụosọ nyanamẹ ḅẹḅẹ, ị́ nemiḅịa ọ̀ tọnsam na ò yese ị̀ lama ḍọkịaḅẹ.

⁸Sisi mị iḅi mị se ị̀ mịẹ, se osiḅụ-sime ị́ karịfị ị̀ pịrịye mị koko. Ọkụma à mịẹirimamẹ ḅẹḅẹ, ị́rị́ ḅarana ị̀ ḅaa! Cheye gose ị́ ị̀ se ị́ ḍaḅe pịrị se ori ị̀ ḅaaḅe?”

⁹“Ọkọ simeye ngịsị koromama!” Jonatan ḅe nwọse ọ̀ pẹkẹrẹmẹ. “Ị̀rị̀ ḅọrọ nemimẹ na ị̀ ḍaḅe ye se ị́ lamaḅịa ọkụ ḍọkịaḅẹ nwọḅẹ ọkụma, ngịsị à ḍuko ị́ pịrị-ẹka?”

¹⁰Anịsịkị Devid ḅe nwọse ò gbelamẹ, “Tụḅọ anị ḍuko ị̀ pịrịḅe nemikase ị́ ḍaḅe ịganị pụkọ se ị́ pẹkẹrẹmẹ nwọḅẹ ọkụma?”

¹¹“Ye wa ozuma ḅie mun,” Jonatan ḅe nwọse ọ̀ ḅẹmẹ. Anị ini somunye-ẹ,

¹²se Jonatan ḅe nwọse Devid ḅe ḅẹmẹ, “Ye Nyanaḅọ, Izrẹl Tamụnọ Ḅe onyechịẹ wa pịrị! Ḅa nwọ pembe ḅiri ḅụ na pịkị berembere ene na à ye se ị̀ ḍaḅe gbelaḅịa. Ò se ị́ ḅụ ḍumo kọn ḅara iḅimẹ ḅẹḅẹ, à ḅịpị se ị́ fịrịmaḅịa.

¹³Ò ye se ị́ lamaḅịa ḅara ọ̀ nwọ mịẹmẹ se à nemikase mịẹse ị́ nemikẹ pịkị mịẹse ye ị́ laka ḅaraḅụ ị́ sokẹ ḅẹḅẹ, ye Nyanaḅọ Ḅe ị̀ fomuḅaasin. Ye Nyanaḅọ Ḅe ị́rị́ na sime anị ḅọrọsa sịkị ori ị̀ ḍaḅe na sime ọkụ mị!

¹⁴À nemikase ḍumomẹ ḅẹḅẹ, sisi anị ị́ ḅereni ị̀ pịrị osiḅụ sime ḅereniye mị se ḅiekoroma, pịkị kuḅie se ḅụgbana gbẹịnḅọ sọ ị̀ pịrị; ọkụma à nemikase fịmẹ ḅẹḅẹ,

¹⁵anị gbọrị kuḅie se ḅụgbana gbẹịn ḍumo mị se ị̀ya furo mị na anga gbaso. Se Nyanaḅọ Ḅe ị́rị́na-tarakapụ mamgba ḅaafama sosa ḅẹḅẹ,

¹⁶ye wa ḅereni jụmḅọ jụmḅọ pịrị yeḅereni ḅịpị mị pa chịẹ gbaso. Anị nemikase kanmẹ ḅẹḅẹ, Nyanaḅọ Ḅe ò fomuḅara se ị́ pịrịḅịa.”

¹⁷Jonatan ḅe pịkịna jịn gbọrị sịkị se Devid ḅe mịẹse ò yeḅereni ọ̀ pịrịmẹ na ori ọ̀ ḅẹlẹmamẹ, anịatịḅị Jonatan ḅe ori ọ̀ ḅụ ḅẹlẹma ọkụ se Devid ḅe ḅẹlẹmamẹ.

¹⁸Anịsịkị Jonatan ḅe nwọse ọ̀ ḅẹmẹ, “Ḅa anị nwọ Ịwọ-Akalụ-Alalịfị ene mị-ẹ nwọḅẹ sịkị, fịye fị nyọ mị ḅụ ị́ ofori mị leleḅịa.

¹⁹Ḅa ḅọrọ berembere ene ị́rị́ḅe ofori mị pịkị opuma leletẹịnḅịa; anịẹrẹchị so ị́ tatarị ḅọị sime nyọ mị mun, se anịju ḅụ tunduruma sime ḍụparịma ọḅụju ḅọị.

²⁰Anịsịkị tẹrẹ-a ḍẹịn à nwọse anị da tẹịnḅịa, à da tẹịn arịye omi-ẹ nwọḅẹ ḅara.

²¹Anịsịkị àrị ị̀ya fịrịnwẹngịḅọ ḅe fịrịma mun àrị ḍọkịḅịa. À nemikase nwọse ọ̀ ḅe, ‘Ḍiki, ḍẹịn ma ị́ ḅụ, mị agbagba àrị omi-ẹ, mun àrị ọkịḅo nwọ ḅẹḅẹ,’ anị mị fiemẹ na ye ị́ la-ẹkẹ, ị́ ineda pakaḅoḅịa. À ḍumo sime Nyanaḅọ Ḅe karịfịmẹ na gbọrị ḅụfụka sọnị ị́ dapaka-ẹkẹ.

²²Ọkụma à nemikase nwọse ọ̀ ḅẹmẹ, ‘Ḍẹịn ma ị́ ḅụ ísí agbagba ḅụ àrị omi-ẹ ḅẹḅẹ,’ anịọkụma so, anịatịḅị Nyanaḅọ Ḅe ori ị́ ḅẹaḅẹ na sikima.

²³Wa ḅereni jụmḅọ jụmḅọ pịrị ḅereni ye mị Nyanaḅọ Ḅe ọ̀ mịẹse wa anị koko gbasoḅịa.”

²⁴Anị Devid ḅe ozuma ḅie ḅọị simeye-ẹ. Ịwọ-Akalụ-Alalịfị mị ḅie, Amanyanaḅọ Sọl ḅe, fịye mị chuku ḅomẹ

²⁵se oria kiri ḅụ simemẹ warị agbagba ḅụ. Abna ḅe ọ̀ palị simemẹ, se Jonatan ḅe ori na damadama ma simemẹ. Devid ḅe oria kiri mị fomẹ,

²⁶ọkụma Sọl ḅe anị ene ḅụ ò yeḍukokẹ, anịatịḅị ọ̀ nwọ chịnmẹ, “Ye ọ̀ ḅụ paka waraḅẹ, se ọ̀ fịafịaka ḅaraḅụ omi-ẹ.”

²⁷Anị ḍukoma ene ḅụ, Ịwọ-Akalụ-Alalịfị ene mị ḅọrọ se la ene mị ḅụ, Devid ḅe oria kiri mị pa fo waraḅẹ, se Sọl ḅe Jonatan ḅe gbelamẹ, “Cheye gose Devid ḅe ọ̀ fịye mị chuku ḅoka ḅịa na mịmgba na ḅụ?”

²⁸Jonatan ḅe nwọse ọ̀ pẹkẹrẹmẹ, “Ori ị̀ ḅara kụrọ ọkị so Bẹtlihẹm mun mẹ.

²⁹‘Sisi ye à paso mun,’ ọ̀ nwọ ḅẹmẹ, ‘anịatịḅị mịna furo apụma ini agbamịẹ alalịfịaḅẹ ama ḅieḅụ, se mbire ḅe tọn ị̀ pịrịmẹ na àrị anịju mun. Anịẹrẹchị, ị́rị́ nemikase ị̀ya ikiaḅọ-ẹ ḅẹḅẹ, ḅereni ị̀ pịrị à mun ị̀ya mịnapụma ọrị.’ Anị ò gose oria kiri ḅụ simekaye-ẹ, ị́ya fịye chuku ḅụ.”

³⁰Sọl ḅe ori opu ḅụosọ nyana Jonatan ḅe pịrị se nwọse ọ̀ ḅẹmẹ, “Anị ị́ nyengima tịḅịḅie kụrọ pịkị kuḅie se ḅụgbanaḅịa ọkụ oforika ọkụ-ẹ! Mịọkụ à nemisam na Devid ḅe ḅụ ị́ omi-ẹ, pịkị ḅụgerere se ị́ tọrụchụaḅẹ pịkị ị́ nyengima tọrụ na!

³¹Ngịsị ma ị́ nemika na Devid ḅe ḍumo sime sịkị goyegoye mị sẹ mị ị́ amanyanaḅọ sọ anị pịrị ẹka ọkụ? Mịọkụ somun ori ọkị mịanga ḅo—gbarị ẹkẹ ọ̀ fịḅịa!”

³²“Cheye gose ọ̀ fịḅe?” Jonatan ḅe nwọse ọ̀ pẹkẹrẹmẹ. “Nde ọ̀ mịẹye?”

³³Anị ḅụ, Sọl ḅe oria sụḅa mị se Jonatan ḅe gbinmẹ ọ̀ ḅaaḅịa ẹrẹchị, se anị Jonatan ḅe ḅụokoromẹ na ḍawu ḅe ọ̀ kọkọma Devid ḅe ḅaa ḅimẹ.

³⁴Jonatan ḅe fịye mị chuku ịganị ḅụ sịsẹmẹ se gbọrị fịye sọnị fịkẹ anị ene ḅụ—anị Ịwọ-Akalụ-Alalịfị mị ḅe mama ḍin karama ene mị ḅụ. Ori opuma Devid ḅe gose kururumẹ anịatịḅị Sọl ḅe ori ò ḅụosọye mịẹsam.

³⁵Ene ḅa dede ḅieḅụ Jonatan ḅe ò somun ozuma ḅie Devid ḅe na ịrịamẹ ini ḅịpị ọkịsa ḅaraḅụ. Gbọrị owutọkụ ọ̀ nwọ ọkị ọ̀ ḅụ chụamunmẹ

³⁶se nwọse ọ̀ ḅẹmẹ, “Mịọkụ à tẹịnḅịa lubu mị mangị mun anị ḍọkị.” Tọkụ ḅe ọ̀ mangị mun mẹ, se Jonatan ḅe gbọrị ḍẹịn tẹịn ọ̀ saḅakoromẹ.

³⁷Tọkụ ḅe mun ḍẹịn mị koro nyọ mị lasịkị, Jonatan ḅe oloku ḍuko ọ̀ pịrịmẹ, “Ḍẹịn mị sasaju anị omi-ẹ!

³⁸Papa chịẹma anịju ḅụ! Be mun!” Tọkụ ḅe ọ̀ ḍẹịn mị deki se vinpịkị ọ̀ nyanaḅọ ḅe damaḅomẹ,

³⁹ọkụma anị fieye tịḅị ò nemikẹ; Jonatan ḅe na Devid ḅe na kẹngẹ mị anị nemiye-ẹ.

⁴⁰Jonatan ḅe oria owuniayema se tọkụ ḅe pịrị se nwọse ọ̀ ḅẹmẹ na ori àrị se so ama mun.

⁴¹Tọkụ ḅe so ḅọrọ sịkị, Devid ḅe tunduruma sime ḍụparịma ọḅụju sịsẹ chịẹmẹ, ọ̀ ḅụọ ịkpụkụ se kpẹrẹkị se tẹrẹ-a sịkị seni ọ̀ tọrụ se kiri iḅomẹ. Ori na Jonatan ḅe na ini owu mẹ se jụmḅọ jụmḅọ ḅịpị nọnjụ àrị sịkị; Devid ḅe anị ò kuḅie simatẹịn Jonatan ḅe kuḅie si mị nẹngịmẹ.

⁴²Anị Jonatan ḅe nwọse Devid ḅe ḅẹye-ẹ. “Tamụnọ Ḅe ị́rị́ na sime. Nyanaḅọ Ḅe ọ̀ mịẹḅịa ị́rị́ na ị̀rị̀ na, pịkị ị́ furo ḅie apụma na ị̀ furo ḅie apụma na, anị wa ḅereni jụmḅọ jụmḅọ pịrị ḅereniye mị koko gbasoḅịa.” Anịsịkị Devid ḅe ò somẹ, se Jonatan ḅe vinpịkị so ama mị mun mẹ.