Read kirikeni 1 Samụẹl 23 Bible Online

1 Samụẹl 23 - kirikeni bible

1 Samụẹl 23

¹Devid ḅe ọ̀ naamẹ na Filistia apụma ini owu se Keila ama mị paka aḅẹ, pịkị ini ịwọma pẹlẹ ịpịamgba ma furuaḅẹ.

²Anịẹrẹchị ọ̀ nwọse Nyanaḅọ Ḅe gbelamẹ, “À mun owu se Filistia apụma paka?” “Iin,” Nyanaḅọ Ḅe nwọse ọ̀ pẹkẹrẹmẹ. “Owu se ini paka se Keila mị ḍụa.”

³Ọkụma Devid ḅe oria owuapụma nwọse ọ̀ ḅẹmẹ, “Wa opu ḅalafa nyanamẹ mịanga Juda mị ḅieḅụ; anị pịkị sitẹịnḅịa wa nemikase so Keila mị mun se owu seni Filistia owunima paka ọkụma!”

⁴Anịẹrẹchị Devid ḅe ọ̀ pịkịna Nyanaḅọ Ḅe ḅịpị gbelamẹ, se Nyanaḅọ Ḅe nwọse ọ̀ ḅẹmẹ, “Owuse Keila mị paka, anịatịḅị àrị anị mịẹ sarasarama se ó Filistia apụma nẹngịmaḅịa.”

⁵Anịẹrẹchị Devid ḅe na oria owuapụma na so Keila mị mun se owu seni Filistia apụma pakamẹ, ini inia ḅụ tọn-a apụ ḅaamẹ, pịkị inia namama kun somẹ. Anị Devid ḅe ḅara-wẹrịma ama mị ḍụa ọkụ-ẹ.

⁶Abaịata, Ahimẹlẹk yaḅe mangị so se mun Devid ḅe ḅụ sọ sịkị Keila ama mị ḅụ, ifọd mị ori ọkị chụa mun mẹ.

⁷Ini ḍuko Sọl ḅe pịrịmẹ na Devid ḅe ò so Keila mị munsam, anị ọ̀ nwọ ḅẹye-ẹ, “Tamụnọ Ḅe ori ọ̀ ḅọrọma ḅo ị̀ pịrịsam na àrị ọ̀ ḅụ kụrọ kọn. Devid ḅe ori ọ̀ ḅụ se mun ḍẹịn ḅie chusam ọ̀ nwọ mun ini onu nama kelema pịkị ini onu ḅọkọ ma mịẹkụrọma ama ḅie sọsa sịkị.”

⁸Anịẹrẹchị Sọl ḅe ori oria owuni kpo mị ọkị se ọmụ mun mẹ, ini mun owu se Keila mị paka se Devid ḅe na oria owuapụma na gbẹịnmachịẹḅịa ẹrẹchị.

⁹Devid ḅe Sọl ḅe ḅo owu se ọ̀ paka-ẹtọn àrị ọkụ nwọ naa sịkị, ọ̀ nwọse agbamịẹ Abaịata ḅe ḅẹmẹ, “Ifọd mị se mịanga ḅo.”

¹⁰Anịsịkị Devid ḅe nwọ ḅẹmẹ, “Nyanaḅọ, Izrẹl Tamụnọ, à naamẹ na Sọl ḅe ò Keila mị ḅo se anị famaḅịa nwọ tọn aḅẹ ị̀rị̀ ị́ya fịrịnwẹngịḅọ ḅe gose.

¹¹Keila amapụ ma ini ị̀ ḅọrọma se Sọl ḅe pịrịḅe? Sọl ḅe ọ̀ kọkọma ḅo ḅe, ị́ya fịrịnwẹngịḅọ ḅe naasa ḅaraḅụ? Yei, Nyanaḅọ, Izrẹl Tamụnọ, àrị ị́ tẹkẹmẹ pẹkẹrẹ ḅịpị se ị̀ pịrị!” Nyanaḅọ Ḅe nwọse ọ̀ pẹkẹrẹmẹ, “Sọl ḅe ò ḅoḅịa.”

¹²“Amapụ ma ini ị̀ya tomonima na ị̀rị̀ na ḅọrọma Sọl ḅe pịrịḅe?” Devid ḅe ọ̀ pịkịna gbelamẹ. “Iin, ini ị́ seni ọ̀ pịrịḅịa,” Nyanaḅọ Ḅe nwọse ọ̀ pẹkẹrẹmẹ.

¹³Anịẹrẹchị Devid ḅe na oria owuapụma na—inimgba kịnị ẹndẹ oyiasi fịnjị pembeye laḅịa—ini kirikiri Keila mị koroma somẹ se sakị nwẹngịma mun mẹ. Sọl ḅe, Devid ḅe Keila mị ḅie ọ̀ mangị sosam nwọḅẹye naa sịkị, ọ̀ tọnye mị ọ̀ ḅarị mịẹkẹ.

¹⁴Devid ḅe chịngị ọgọnọ sẹ mị ḅieḅụ ọ̀ ḅọị simemẹ piri ele mị ḅie, Zif mị na kpeki nyọ ḅụ. Sọl ḅe sịkịmamgba ori ọ̀ ḍọkịaḅẹ, ọkụma Tamụnọ Ḅe ò Devid ḅe seni ọ̀ pịrịkẹ.

¹⁵Devid ḅe ori ọrịmẹ na Sọl ḅe ori ọ̀ ḅaa ḅimẹ. Devid ḅe Horẹsh mị ḅie ò simemẹ, piri ele mị ḅie Zif mị na kpeki nyọ ḅụ.

¹⁶Jonatan ḅe ò so anịju ọ̀ damamun se ò kuḅie kụrọmamẹ na Tamụnọ Ḅe ori ò ḍikiḍikiḅịa,

¹⁷nwọse ọ̀ ḅẹaḅẹ, “Ḅalafama. Ị̀ ḍa Sọl ḅe ori ineda ye se ị́ lama ẹkẹ. Ori iḅiọkụma nemimẹ na ị́rị́ anị Izrẹl amanyanaḅọ sọḅịaḅọ ḅe-ẹ, ị̀rị̀ anị pịkị ị́ palịḅịaye-ẹ.”

¹⁸Ini mama apụma osiḅụ sime ḅara se yeḅereni jụmḅọ jụmḅọ pịrịmẹ na ini ikiasọ ḅụ simeḅịa. Devid ḅe Horẹsh ḅie ò simemẹ, se Jonatan ḅe so ama mun mẹ.

¹⁹Zif mị ḅie dapụ paka so Sọl ḅe damamunmẹ Gibia ḅie se nwọse ọ̀ ḅẹmẹ, “Devid ḅe mịna eke ḅụ Hakila Tụndụ mị ọgọnọ ọ̀ ḅọị sime waraḅẹ Horẹsh mị ḅieḅụ, Juda apụ piri ele mị ḅie chuku daọrụ ḅụ.

²⁰Amanyanaḅọ, wa nemimẹ na ị́ ò kun ḍọkịmẹ; anịẹrẹchị mịna eke ḅo, se wa mịẹse ị́ ò kunḅịa.”

²¹Sọl ḅe nwọse ini pẹkẹrẹmẹ, “Ye Nyanaḅọ Ḅe ọ́ ḅẹlẹma ó se ị̀ mịẹ iḅi mị gose!

²²Ó mun pịkị gbọrị sịkị na se iḅiọkụma ò sime anga ḍọkị nemi, pịkị jokoma anịju ḅụ ori ọrịḅọ nwọ ḍọkị pakụmaḅo. À naamẹ na ori opu epeleniḅọ-ẹ.

²³Jokoma ọ̀ ḅọịḅọị nyọma ọ́ nwọ ḍọkị nemi, se ḅo kirikiri ḍuko ị̀ pịrị. Anịsịkị àrị ómine na munḅịa, se nemikase ọ̀ pa anị pẹkẹrẹ mị ḅụ omi-ẹ ḅẹḅẹ, àrị ọ̀ ḍọkị mun laḅịa ò sime anga sime anga, à ḅọrọ nemikase bebe Juda ama mị ḅie mgba ḍọkịḅịa nwọḅẹ sọnị.”

²⁴Anị gose ini Sọl ḅe tọrọkọ pẹlẹma pịkịma so Zif mị mun mẹ. Devid ḅe na oria owuapụma na Meọn piri ele ḅie, gbọrị yawụ pẹsịkiri ḅụ, Juda piri ele mị ḅụ chuku daọrụ ḅụ ini omi-ẹ.

²⁵Sọl ḅe na oria owuapụma na pakamun Devid ḅe ḍọkịmẹ, ọkụma ori anị ḅe ye ọwụmamẹ se ò so mun gbọrị ḍụparị chịngị ọgọnọ ḅụ simemẹ Meọn piri ele mị ḅieḅụ. Sọl ḅe ọ̀ mịn mị naa sịkị, ò Devid ḅe ḍọkịma mun mẹ.

²⁶Sọl ḅe na oria owuapụma na chịngị mị ọgọnọ gbọrị pẹkẹrẹ ḅụ simemẹ, ini sikima simemẹ Devid ḅe na oria tomonima na ḅụ, se ini ma ísí pẹkẹrẹ ḅụ simemẹ. Ini be aḅẹ ini Sọl ḅe na oria owuapụma na ḅụ ḅụsikimaḅịa ẹrẹchị, anị ḅo inina kpeki se ini kun oḅoarị apụma.

²⁷Anịsịkị mị ḅụ anị gbọrị okuḅoḅọ ḅola se nwọse Sọl ḅe ḅẹmẹ, “Sarama vinpịkị ḅo! Filistia apụma ini ḅo sẹ mị gbẹịnmachịẹ aḅẹ!”

²⁸Anịẹrẹchị Sọl ḅe ọ̀ ḅarị Devid ḅe ḍukokẹ se ò vinpịkị mun Filistia apụma na owusọmẹ. Anị gose anị nyọ mị ini nwọse anị chịnmẹ Pua Chịngị.

²⁹Devid ḅe ò so Ẹngẹdaị pẹkẹrẹ mị mun mẹ, anị ọ̀ ḅọị sime nyọ mị.